Read Kissi Yeremi 4 Bible Online

Yeremi 4 - Kissi bible

Yeremi 4

¹Mí Mɛlɛka dimi aa: «Israɛl, taa muungu pɛ ya o ibuŋ, taa mal pɛ piɔmnda sooloo, mà ve lɛ laasian te, mɛɛ a nɔla ma muungu ya o ibuŋ.

²Taa mɛnan pɛ aa: «Le Mɛlɛka yoomaa», mò va mɛnan toɲaa, sandei a dɛnɛ sandaa, o kon vanaa-mangalaa-isɔɔa sɔlanin duaa ya o ba, mà lisan o ya nin.

³Kani diom Mɛlɛka dimul vanpiaandua Yuda a haa Yerusalɛm-ndo co hoo ni aa: ‹La fɛɛya ciɛi sɛnɛiye le niaa pila, la saŋ o yɔɔn nin te.

⁴La dii toomaa le ya Mɛlɛka, la dii kɔlta niaalan tooma, niaa vannda Yuda a vanaa co Yerusalɛm-nda, yɔŋii kɔl ni tuwvo bii maa leyin, mì le saa, vana-vana nɔlanin nden ɲumi le, le dɛnnda vɔɔnnda niaa co tosaa lan.›

⁵‹La yonda sɔɛi he Yuda, mì la yonda vɛlɛ ndi Yerusalɛm. La hɔŋ buloo o lɛŋnden nin, la deŋi ndi coocoo kpélén. La dimi mì vannda cuungian o kobila nɔ kpakilan ndan nin.›

⁶‹La heelu tɔɔmasele yonda cɔwvo a ba Siɔn-ndo, la ɲaanun, la sim te dɛ! Kani i co dɛnɛ palaa a sanga bɛndoo cuu fulaa a ba luaŋ-ndo.

⁷Yàlàá huulu mó fula o bɛ̀mɛ́lta ndɔlan nin, vana tɛɛmbua vanaa-mangalaa-isɔɔa cɛn hunɔɔ, o mal o ndu lo mó can hunɔɔ le lɛŋnde niaalen yɛɛvɔɔ dɔvɔɔ, kobila niaalan la co piɔl mì vannda pew.

⁸Lelan, la vownun yalala yuululan mì la koŋul, mì la hiiliaa, kani kɔltuw Mɛlɛka-o bindunin niaa le.›

⁹Mí Mɛlɛka dimi aa: «Paale len, diallon vunin masaa a simlacia, mì siòònde bii vanaa-solia-lasálàá, mì vanaa-tɛɛngaa-diom Hala-a yɔŋnun talamun.»

¹⁰Mí yonda aa: «Éé! Maalii Hala, a kei vannda ha a Yerusalɛmnda baa o mundu, má dimul nda aa la sɔlanin kɔlɲuloo, nduyɛ, cɛɛluuo tuŋ mɔɛi cɔwve co nda ni.»

¹¹Paale len, Mɛlɛka dimulnin vanaa kan a Yerusalɛmnda aa: «Hoeyii tuwve co hɔŋndo o pembun co o lɛŋnde veselɛilen nin-ndon coo, i bii nɛiyo hunɔɔ o vanaa nia lo, o co hoeyii hɛyaa n'kul le mun dindi le.

¹²Hoeyii fùkù-fùkùi bɛnduei cɛn ndon, mí tiiya háá o ya lo dí-e pɛɛn. Lelan ya co yamɛi ndɛi kiolɔɔ ni.»

¹³«Má cè vanaa tɛɛmbua kalaa hunɔɔ maa yumbuyumbu piɔɔ helaa bɛndu! Ɲɛla ɲaanannda cɔwla ndalan la keleŋa maa hoeyii fùkù-fùkù. Soa ndɔa hiow keleŋaa a kovɛa. Naa n kɔndu dɛnɛ fɔ́!»

¹⁴«Yerusalɛm, dindin kɔl, haliko ma sɔla cindaa. Háá telen kuɛɛ kpeekpei n solin yɛnin yiyannda vɔɔnndan o kɔl?

¹⁵Kani tɔ́ɔ́lan la co fulaa Dan pɔ́ a dɛnɛ palaa o kɔɔ, o pembon Efraim coo tɔ́ɔ́ kon co fulaa ni.

¹⁶La yiyalan vanaa-mangalaa-isɔɔa sɔɛi ken, mì la cɔm Yerusalɛm ndi aa: ‹Vanaa del vannda coo-a co hunɔɔ fulaa nɛɛ levil, a co yondaa a sɔɔn vɔɔnndon dimio a kobilan Yuda.

¹⁷A balu Yerusalɛm pindo mɛɛ vannda balu bungɛi cumullo yɛ. Kani o simul-l›. Sɔɛi fula Mɛlɛka o sondo-e co ken ni.

¹⁸«Tɔnɔ kela nɔm vɔɔndo n co hoo sɔlaa ni, dɛnnda nɔmnda vɔɔnndan pɛɛn. Dɛnɛ palaa co nɔm hoo coo-o co nɔm kindila mo tiiya nɔm sondoo lɛŋ dí, o tiiyanin nɔm kindilaa o kɔllo nin di.»

¹⁹«Éé ya, demboo! Kpòkóó ya, demboo! I co somisominndo a ɲɛ nɛyaa, kɔllo kindun ya véŋ-véŋ. I tiwba meiyo a hee le, kani i tuei bulula-hɔŋaalan diom, a yonda cɔwvo.

²⁰Sɔɔn dɛnɛ palan tuŋ nda co hiyanndo dimio ni, kani lɛŋnden kpow le cuu itambu, cɛila-kolala-toandaala nilan la tambu o lepilɔɔ, mí kuula nilan la tambu o biɔŋɔɔ lepilɔɔ.

²¹Háá telen kuɛɛ ya va yɛnin lɛfɛ cɔwvo cɔu, mì va diom bulu cɔwvo tueyɔɔ?

²²«Diɔmnda vanaa nia co lekɛ́ndɛi ni, a sina ya le, cuavaa kindu kɔl te-a nda co ni. Ɲɛ-pɔmbɔ bɛɛ a nɔ kɔlkalu le, le dɛnɛ vɔɔndo tosaa daama nda kendu kɔl ni, kɛ a sina dɛnɛ kɛndɔɔ tosaa le.»

²³Mí tofa lɛŋnden, mí ca len tulumasaa, le va fondo fúú. Mí tofa o halataala, ɲɛm ndɔn tengan ve lɛ le.

²⁴Mí tofa pembon, n va ɲiiyaa, mí mɛɛndian buubuuon kpow, n va hiilɔnndo.

²⁵Mí tofa, i ci lɛ vanaciee kɛ́-kɛ̀ le, mí yowva coocoo kpow a ɲaanun.

²⁶Mí tofa, mí ca lɛŋnde Karmɛl-ten le muungu lɛŋnde veselɛilen, kobila ndɔlan kpow la tambu a kɔltuw Mɛlɛka-o.

²⁷Kani diom Mɛlɛka dimi-o co hoo ni aa: «Lɛŋnden kpow le dɔawnunnin yɛɛvɛ, kɛ i tɛɛmbuunin nden kpede le.

²⁸Lelan le co o mɔnɛi nin ni, mì halataala coocoo piimiaa, kani i cii dimi, lende ya kelu le tosaa ni, mɔnɛi biinin ya le kon tosaa le, i mangalanin diom kon te.»

²⁹Vanaa va o kobila lan nin-nda tueyɔɔ diom vanaa ɲaanun o soa coo-a a vanaa vuaa lakpaasiaa-a, má ɲaanun, mí vannda kɔ luɛi o bɔɔlan bɛngu, a pum o powta kpovalan coo, mí kobilan kpow la lo fondo, vana-vana lo lɛ lenin te.

³⁰Éé nɔm kobi nda cii hoo tɛɛmbuu-o, vɛ̀ɛ́ n tosa yɛnin? A co volɔɔla siaŋala vólotótolan vownɔnndo, mà va kelan n'sianion vownɔnndo. Vɛ ma suinun ɲɛ tiŋi ŋɛlɛngi-ŋɛlɛngio o hɔltan coo? Fondo fúú n co kɛɛmian kon ni, sɔɛi nɔmnde nɛinun sámáá nɔmnda, a yeema le yoomu nɔmndo ciiyo.

³¹Kani i co caŋndan tueyɔɔ maa caŋnda vanalanɔ co n'vanlaandu o ba, caŋnda imɔnɔlan maa caŋnda vanalanɔ co violɔɔ ivuɛɛn. Vannda Siɔn niaa tuɛi diom lende nuaa ni: a co kuŋndan, a co balan siaandiaa má va dimio aa: «Àá ya, i kɔndu dɛnɛ fɔ́! Mbɔ̀ ya, i nii cuu vanaa diuvaa n'vannda o ba.»