Read Kissi Yeremi 41 Bible Online

Yeremi 41 - Kissi bible

Yeremi 41

¹O paangii ŋɔmmɛwndɔɛi, mí Ismaɛl po Netania-o po imama Elisama-o, fulaa o yungu masaa nin, o va vɛlɛ vana pilɛ o simlacia lebolla nin. Mó hun a n'van tɔ́ kɔɔli o Kedalia po Ahikam-ndo lo Mispa. Má dia ɲɛdiaa latulu Mispa lon.

²Fɔ́ɔ́fɔ̀, mí Ismaɛl po Netania-o can nda n'van tɔ́a o hin kan kɔɔli-a, má del Kedalia po Ahikam-ndo, po imama Safan-ndo coo, má cuku ndu a mɔɛi cɔwve. Nuaa nda looku vana masaa Babilɔn ndóò siinguu masa ibungaa-o diyɔɔ ni.

³Mí Ismaɛl diw vɛlɛ Yuifia va o Kedalia lo Mispa lon-nda a vanaa cɔwva Babilɔŋaa va lon-nda.

⁴Palɛi ŋiin o diyɔɔ nda dii Kedalia-o kɔɔli, vana-vana ndóò sina vɔ a dɛnɛ kon o kɔɔ le.

⁵Mí vanpiaandua belaŋɔmaa fula Sikɛm, Silo a Samari, ndáà nɔ siayun sendian a volɔɔla sɛɛsiɛilan nda lekɔɔ, boolɔnndan la va nda kɔɔlen kpede. Má hun a kela n'mal tan a ansan le lan yɔngoo o Cɛi-Hala-o nin Yerusalɛm.

⁶Mí Ismaɛl can Mispa, mó kɔa nda bɔŋa a caŋndo. Ndóò komallo nda, mó dimul nda aa: «La hun o Kedalia po Ahikam-ndo lo.»

⁷Kɛ ndáà tiiyaa dɔ́ɔ́ o kobio tɛɛn, mí Ismaɛl nda langbaa ndɔa diw nda, má viaw nda o soondo nin.

⁸Kɛ mí n'van tɔ́ o vanaa kan tɛɛn a dimul Ismaɛl aa: «Dii naa le! N nɔ baloo o vianaa yondoo nin, maalon, ɔrse, cuɛiyan a lɛan.» O kon mí Ismaɛl nda vanaa ndɔa mal nda, a dii lɛ nda le.

⁹O soon masaa Asa ndóò tow telen nda va cɔwvo nda Baesa masaa Israɛl-lo nin Ismaɛl viow vanaa o diw-va ni.

¹⁰O kon kɔɔli, mí Ismaɛl mal vanaa tɔ̀a lo Mispa-a kpow o kaasoo a cuavaa laandua masaa. Vanaa Nebusaradan simlacinɔ kpalilla ndóò sɔɔ Kedalia po Ahikam-ndo o ba bɛngu-a. O kon mí Ismaɛl bii nda o cɛlen nin, mó kɔa o Amɔnnda lo.

¹¹Mí Yohanan po Karea-o nda simlacia vanaa cɔvaa va ndu ikɛi-ya kpow a tuɛi dɛnɛ vɔɔn Ismaɛl po Netania-o ndóò tosa-o.

¹²Má cuungiaa vanaa ndaa cɔwva kpow le kɔlan Ismaɛl po Netania-o delɔɔ coo a cɔwvo. Má kɔ saalun ndu o dala bɛndoo Kabaɔn ikɛi.

¹³Lɔ́ɔ́ vanaa kaasoaa va Ismaɛl o ba bɛngu-a ce Yohanan po Karea-o a simlacia vanaa cɔwva kpow ndu ikɛi-yo, má naŋ kɔl.

¹⁴O kon mí vanaa Ismaɛl ndóò bii Mispa-a kpow a mulin, má kɔannun Yohanan po Karea-o kɔɔli.

¹⁵Kɛ mí Ismaɛl po Netania-o hialun nda langbaa a ŋɔmaa, má kɔ viannun o Amɔnnda lo.

¹⁶Mí Yohanan po Karea-o nda simlacia vanaa cɔvaa va ndu ikɛi-ya kpow, a cua vanaa tɔ̀a lo-a, má hialu nda Ismaɛl po Netania-o o ba. Vanaa ndóò bii Mispa telen ndóò dii Kedalia po Ahikam-ndo-a. Mí Yohanan cua vanaa cɔwva, vanlaandua, cuaambɔa a vanaa nda tɛnda bosio-a, mó faŋan Kabaɔn, mó muungu a nda.

¹⁷Má bii nɛiyo le kɔlan, má kei pɛngi Kimham Bɛtlɛhɛm ikɛi. O kon kɔɔli, mì ndáà hiow Esipte,

¹⁸le Babilɔŋaa ndóò nɔ siòònde-a kɔlan levil polon, kani Ismaɛl po Netania-o dii Kedalia po Ahikam-ndo ni, o masaa Babilɔn ndóò siinguu masa ibungaa o lɛŋnde len coo-o pɛɛn.