Read Kissi Yeremi 42 Bible Online

Yeremi 42 - Kissi bible

Yeremi 42

¹O kon, mí simlacia vanaa cɔwva kpow a sɔɔnguu, handɔɔ Yohanan po Karea-o a Yesania po Hosaya-o a vannda kpow coo, kandɔɔ a cuaambɔa kɔ bii a kaasonnda,

²má dimul Yeremi aa: «Yaŋnun tɛɛlɔnnda naa n co nɔm-ndan, piɛi Mɛlɛka, Hala nɔmndo, le naa a le vanaa tɔ̀a lo-a kpow, kani n va sɛ́lɛ́ taw, kɛ n co lɛ hau a bɔɔ le, maa mɛɛ nɔm pila co cɔu nuaa yɛ koni.

³Màá Mɛlɛka Hala nɔmndo cɔm naa nɛi naa n bɛnda le kɔlan coo-o a ɲɛ naa n bɛnda le tosaa-o.»

⁴Mí Yeremi vana-tɛɛngaa-diom Hala-o dimul nda aa: «I tuei, i co Mɛlɛka Hala naa piɛi mɛɛ niaa ɲuna yɛ. Nduyɛ ɲɛ-ɲɛ Mɛlɛka muli pɛ, i tɛɛngulnin niaa lende. I vinnin niaa ɲɛ-ɲɛ le.»

⁵Má mulul Yeremi aa: «N tosanin sɔɔn Mɛlɛka Hala nɔmndo dimulnin nɔm le naa tɛɛngullo-on. Ndu Mɛlɛka kon co sei toɲaa a sei sandaa le mɛnan naa n co hoo-o ni.

⁶Naa n vem nɔm sɔɛi o Mɛlɛka Hala naa lo ni. N biinin sɔɛi o co naa dimul-le, i hɛnan naa, i nɛinun naa. O kon n sɔlanin dɛnɛ kɛndɔɔ, n bii pɛ sɔɛi Mɛlɛka Hala naa.»

⁷Palɛi tɔ́ o kon kɔɔli, mí Mɛlɛka soaa o Yeremi lo.

⁸Mí ndu Yeremi veelu Yohanan po Karea-o, simlacia vanaa cɔvaa va ndu ikɛi-ya kpow, a vanaa va lon-nda kpow, vana-vana lo kɔɔli le.

⁹Mó dimul nda aa: «La vem ya le kɔlan Mɛlɛka Hala Israɛlla isɔɔ ɲuna, sɔɛi o dimi-e co hee ni aa:

¹⁰Te la cɛl pɛ le lou o lɛŋnden nden nin, i tɛɛmbuu lɛnin niaa le, i tɔalnin niaa, i sungu lɛnin niaa le, kani mɔnɛi bii ya le dɛnɛ palaa ya tuisi niaa coo-o.

¹¹La yɔŋ ndɛ isiòòn a masaa Babilɔn te, ya Mɛlɛka co niaa ndi dimullo lende ni. La yɔŋ isiòòn a ndu le, kani i co niaa ikɛi, le niaa ciindiaa mì soli niaa ndu o ba.

¹²I lueinin ndu kɔl iɲííyo nin, mì ɲííye bii ndu a niaa, mò mal niaa muungoo o lɛŋnde niaalen nin.»

¹³Kɛ te la dimi pɛ aa la celnin o lɛŋnden nden nin te, mì la kɛɛ diom Mɛlɛka Hala niaa,

¹⁴te la dimi pɛ aa Esipte niaa kɔanin ni, yɔŋii niaa cɔ vɛlɛ cɔwvo, yɔŋii niaa tuei vɛlɛ bulu cɔwvo sɔɛi, yɔŋii yima fofolan ma saangiaa niaa, aa lelan lon niaa co va ni,

¹⁵mɛɛ la tuei-yɔ sɔɛi Mɛlɛka dimi-e. Niaa vanaa tɔ̀a lo Yuda-a, o Mɛlɛka-Nɔ-Kpaayaa-Kpow-vo, o Hala Israɛlla dimi-o co hoo ni aa: «Te la dimi pɛ aa Esipte niaa kɔa ni, te la kɔɛ pɛ lon le calle,

¹⁶mɛɛ cɔw niaa co siòònde yɔŋndo-o komalnin niaa Esipte lon. Yima niaa co buulan bɛndoo-an ma kuelnin niaa Esipte lon di, mì la vi a man.

¹⁷Vanaa kɛ́-kɛ̀ kialunin o kɔlta ndalan nin le kɔlan vionnɔnndo Esipte kpow a sɔlanin piɔ́mndo o mɔɛi cɔwve bɛngu, a yima fofolan te kon te a nàà n'kɔnyaa. Vana-vana helunnin dɛnɛ palaa ya tuisinin nda coo-o le.»

¹⁸Kani diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: «Maa mɛɛ yáà tuulu kɔl taw a vannda Yerusalɛm yɛ, lende koni ya tuulunin vɛlɛ kɔl a niaa ni, te la kɔɛ pɛ Esipte. Vannda vanin tɔɔmaseloo cuaa a niaa le mɛnanndo, te kon te le sɔɛi vɔɔŋii bɛnduei pum dimio. Nduyɛ la ci lɛnin lɛŋnden nden lɔ́ɔ́-lɔ́ɔ̀ le.»

¹⁹Niaa vanaa tɔ̀a Yuda, diom Mɛlɛka co niaa dimullo-o co hoo ni aa: O bɛnda mì la kɔɛ Esipte le! La sinà maa i cii niaa hau tanaa hendul.

²⁰Niaa pila dimul-la ni aa ya ɲuna Mɛlɛka Hala niaa. Mí la dimul-la aa: «Ɲɔɔlul naa Mɛlɛka Hala naa, mà tɛɛngul naa diomnde o dimulnin nɔm-nden sanaa, o kon mì n kela lecoo.» Niaa pila luei bollen o ken nin ni.

²¹Sɔɛi ken ya co niaa hau tɛɛngullo ni, kɛ la co cɛlɔɔ le nilan yaŋɔɔ o diom Mɛlɛka Hala niaa dimul-la le niaa-o le.

²²Mɛɛ la sina niko maa la co cuu o mɔɛi cɔwve bɛngu, a yima fofolan te kon te a nàà n'kɔnyaa o lɛŋnde niaa kɔanin nden calle len nin.»