Read Kissi Yeremi 43 Bible Online

Yeremi 43 - Kissi bible

Yeremi 43

¹Telen Yeremi cii vannda kpow sɔɔn Mɛlɛka Hala ndaa dimul ndu-on tɛɛngul-lo, sɔɔn Mɛlɛka Hala ndaa ndóò dimul ndu mun le nda kpow-von pɛɛn,

²mí Asaria po Hosaya-o, Yohanan po Karea-o, a vanaa sondola kalaa va kan lon-nda kpow a cua sɔɛi, má dimul Yeremi aa: «Ɲɛ-ɲɛ n co hoo dimio, còòlan fúú! Mɛlɛka Hala naa dimul nɔm le naa kuuna lakɔ caltan Esipte le.»

³Kɛ Baruk po Neriya-o co nɔm luɛyɔɔ nin le naa malɔɔ Babilɔnnda o ba, haliko ma diw naa, te kon te ma kɔɛ a naa o biyɔɔ nin ni.»

⁴O kon kandɔɔ a Yohanan po Karea-o, simlacia vanaa cɔwva kpow, kɔ bii a vannda kpow, vana-vana bii diom Mɛlɛka dimul nda le lou o tàndá Yuda-o nin-ndo le.

⁵Le hee mí Yohanan po Karea-o nda simlacia vanaa cɔwva kpow a kɔa a vanaa tɔ̀a lo yoomu Yuda-a kpede, vanaa ndáà tow o tasendɔ mí ndáà va a sɛŋiannda o lɛŋii balu nda-e nin, mí ndáà muungu o tàndá Yuda-o nin le calle-a pɛɛn.

⁶Vanpiaandua, vanlaandua, cuaambɔa, cuavaa laandua masaa, a vanaa Nebusaradan bolle kpalilla ndóò mɛi Kedalia o ba bɛngu-a kpow, Nebusaradan po Ahikam-ndo, po imama Safan-ndo pɛɛn. Má bii vɛlɛ Yeremi vana-tɛɛngaa-diom Hala-o nda Baruk po Neriya-o, má kɔa a nda.

⁷A cɛl le sɔɛi Mɛlɛka-e biyɔɔ le, má kɔa a nda o lɛŋnde Esipte len nin, má kɔ tiiya Tapanɛs.

⁸A lo Tapanɛs mí Mɛlɛka soaa o Yeremi lo aa:

⁹«Cua powta bɛndulan, mà kumbu lan o fonda yesa co le luɛyɔɔ o cɛi masaa Esipte-o nin-ndo Yudaa o hɔl Tapanɛs.

¹⁰O kon mà dimul Yuifia aa: «Diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: ‹I co vannda vomɔɔ Nebukanɛsar masaa Babilɔn vana ni baalaa kɔɔli, mì kɛsi kpɛŋɛ ndɔ lemasaa o powta ya kumbu lan-ndan coo. O fondaa ho o toandunin cɛi-kola-toandaa ndɔɔ ni.

¹¹O hunnin mò lɔɔ lɛŋnde Esipte len, mì vanaa bɛnda le vuo-a vi, mì vanaa bɛnda le kɔlan o biyɔɔ nin-nda kɔɛ o biyɔɔ nin, mì vanaa bɛnda le vuo o mɔɛi cɔwve bɛngu-a nda vi o mɔɛi cɔwve bɛngu.

¹²O malnin cɛila halaa Esiptea yin, mò lom halaa kalaa, te kon te mò kɔɛnnun a nda Babilɔn. O kindinnin le bolofaa Esiptea cɔwviaa mɛ̀ɛ́-mɛ̀ɛ́ vana mandaa n'cɔloo nuwviaa lɛnnda o volɔɔla ndɔla cuɛinanndan nuaa yɛ. O kon kɔɔli, o kɔɛnnun bɛɛn-bɛɛn.

¹³O pesipesinin powta sálàlan Bɛt-Siemɛs o lɛŋnde Esipte len nin, mò lom cɛila halaa Esiptea.›»