Read Kissi Yeremi 46 Bible Online

Yeremi 46 - Kissi bible

Yeremi 46

¹Sɔɛi Mɛlɛka dimul Yeremi vana-tɛɛngaa-diom Hala-o le vanaa-mangalaa-isɔɔa-e.

²Sɔɛi dimin le Esipte a le vanaa cɔvaa Neko, masaa Esipte-a-e. O va o peo Efrate kɔngɔ Karkemis, telen Nebukanɛsar masaa Babilɔn nɔla ndu-o. O vɔsi hiɔɔlundɔ Yehoyakim po Yosia-o va o maselen Yuda-o.

³Mí simlacia cɔwva va yondaa aa: «La bɛɛndiaa kɔ̀ɔ̀la cɔwlan, la pɔmbɔlan a la bɛndulan, mì la sɔɔnguu le cɔwvo.

⁴Niaa vanaa ɲaanun o soa coo-a, la dovi soa le calle. La vownun mɔsilta cɔwlan, mì la sim o polalen. La cɛɛŋa bálta niaalan, mì la vownun domala cɔwlan.

⁵Yɛɛ ya co yɛ cɔu ho nuaa? Siòònde bii nda, a co muungoo a makɔɔ. A nɔla vanpiaandua dialun fulaa, a sɔɔndian a kiltan, vana-vana co tofan kɔɔli le. Kɔltan la laasian nda nin kpow. Sɔɛi fula Mɛlɛka o sondo-e co ken ni.

⁶Vana hiow keleŋa-o helunnin te! Vana fula diallon o cɔwvo nin-ndo nɔlanin yoomu ndɔɔ baŋaa le. A co siɛɛliaa mà va delio o kɔngɔla peo Efrate lan coo.

⁷Nɛ̀ɛ́ co yɛ maa mɛmma hunan o peo Nil, pee mɛmma ndɔan ma ŋol kon-ndo?

⁸Esipte co ŋolɔɔ kon lende ni maa mɛmma hunan Nil o peelo. O co dimio aa: «I co helɔɔ mì kumbu lɛŋnden kpow, mì tɛɛmbuu kobilan a vanndacieea co lenin-nda.

⁹Soa, la cɔn le cɔwvo! Ɲɛla ɲaanannda cɔwla soa nan-ndan, la keleŋa! Vanaa caa cɔwvo caa bɛndoo-a, niaa fula Etiopii-a, niaa fula Put-a niaa caa kɔ̀ɔ̀ cɔwvo hiŋndo-a, niaa fula Lud-a a niaa caa kpaasiaa vuuo-a, la cɔn!»

¹⁰Le Maalii Hala paale len le co ni, le Maalii Hala-Nɔ-Kpaayaa-Kpow-vo pɛɛn. Paale mingiaa maa len le vanin nden ni, o mingulnin yaamɔaa ndɔa maa. Mɔɛi cɔwve tosanin dɛnɛ mì i pim ca, kooma vanaa kan ma biinin ndi maa mamɔi. Sálàá vanin kon le Maalii ni, Mɛlɛka-Nɔ-Kpaayaa-Kpow-vo pɛɛn, o lɛŋnde ba luaŋ-nden nin, o peo Efrate kɔngɔ.

¹¹Esipte taanin! Kɔ Kalaad, mà nuwviaa koovan le boolɔnnda nɔmndan. Kɛ nduyɛ, fondo fúú koni n nuwviaanin kooma súú-súù fee ni, ma kɛ́-kɛ̀ singinin nɔm te.

¹²Vanaa-mangalaa-isɔɔa tuei siɛmbula tol nɔm-ndan. Kani koŋul nɔmndo tiw nɛɛ-nɛɛka o lɛŋnden coo. Kuubanɔ cɔwvo kundunin kuubanɔ cɔw celen, mà deli latulu nda ŋiɔn kpow.»

¹³Mí Mɛlɛka soaa o Yeremi vana-tɛɛngaa-diom Hala-o lo, telen Nebukanɛsar masaa Babilɔn hin le lɛŋnde Esipte len delɔɔ coo a cɔwvo-o, mó dimul ndu aa:

¹⁴«La yonda sɔɛi he Esipte, mì la tosa mì vannda sina ndi Mikdɔl, Nɔf a Tapanɛs! Mí la dimul nda aa: ‹La bɛɛndian mì la sim yili!› Kani a cii vanaa balu niaa-a bɛlubɛluu a cɔwvo.

¹⁵Le yɛɛ vanaa cɔvaa nɔmnda a deli lɛŋ? O nɔla simullo telen Mɛlɛka ɲindu nda-o le.

¹⁶Mɛlɛka co tosa mì vanaa cɔvaa sɛ́lɛ́ bɛndua boŋi, mà delian coo, mà dimi aa: ‹N cɔnnun mì n muungun vanaa naa o ibuŋ, o lɛŋnde naale naa n velun nin-nden nin, mì n kɔɛnnun mɔɛi cɔvii co naa hee hinullo-e levil.›

¹⁷Vannda kenin Faraɔnnɔɔ, o co masaa Esipte-o diolan aa: ‹Tombola-fondoo! Kɛ o yɔŋ ɲɛ-ɲɛ le›.

¹⁸Sɔɛi fula masa nɔ diolan aa Mɛlɛka-Nɔ-Kpaayaa-Kpow-vo o sondo-e co hee ni aa: ‹Te i co yoomu lekɛ́ndɛi! Te pembei Tabɔr co ni, te o mɛnndan coo Karmɛl co ni, mɛɛ hunɔɔ yaamɔɔa co ni.›

¹⁹Niaa vannda Esipte sei, telen niaa bɛnda le volɔɔla niaalan dovio le kɔlan o biyɔɔ nin-ndo co hoo ni. Kani kobio Nɔf piɔlnin mò siŋnun pɔmndo, vana venin lenin te.

²⁰Esipte va maa naw téndé kɛndɛ-kɛndɛ, kɛ mí sunbungaa hun toal ndu coo.

²¹Vanaa cɔvaa mialaa Esiptea co salaa le cɔwvo tosaa-a co o biilu bɛndu nin. Kɛ hali nda, a kɔannunnin, a ɲaanunnin nda ndaa latulu. Vana-vana simulnin lɔ́ɔ́ paale dɛnɛ palaalen le komal nda-o le, paale ya tuisinin nda sangaa coo len pɛɛn.

²²Yaamɔa co sɔɔnguuo sɛ́lɛ́ bɛndoo le Esipte hunɔɔ delɔɔ coo, mɛɛ vanaa kiaŋaa iyɔmnda sɔɔnguu a cueon o laba nuaa yɛ. Mì vanaa cɔvaa Esiptea sɔndian a kiltan, mɛɛ kɛwvo ɲaanun hali kpɛkɛlɛ bɛɛ vana tui le yɛ.

²³Sɔɛi fula Mɛlɛka o sondo-e co hee ni aa: ‹A co bundɛ ndɔɔ kioŋndo, bundɛ vanaa nɔla hoo paandu luɛyɔɔ nin too. Kani a hiow sóónɔa vaa sɛ́lɛ́, vana nɔla nda cii cɔm te.

²⁴Siɛmbulan la bii Esipte fɔ: o del masale fula a ba luaŋ-ndo len o ba.»

²⁵Mí Mɛlɛka-Nɔ-Kpaayaa-Kpow-vo, Hala Israɛlla dimi aa: ‹I co Amon simul, mì simul hala co Tɛb-o, mì simul masaa Esipte, halaa ndɔa a simlacia ndɔa, mì simul masaa Esipte a vanaa tiindan ndu-a.

²⁶I co nda malɔɔ vanaa yeema le nda diyɔɔ-a o ba, Nebukanɛsar masaa Babilɔn a vanaa ndɔa cɔwva pɛɛn. Kɛ o mɛɛlulan, Esipte muungunin maa paandu.› Sɔɛi fula Mɛlɛka o sondo-e co ken ni.

²⁷Nɔm Yakɔb vana ni baalaa, siòòŋii bii nɔm te, vu n'dial te. I co nɔm baŋa mà fula lɛŋii leville o ba, mì cuavaa nɔmaa imamaa mal o lɛŋnde nda kɔɛ a nda len nin. Yakɔb muungunin mò kɔ cal nila ɲulu, vana ve lɛnin le ndu kpeeŋiaa le.

²⁸Nɔm Yakɔb vana ni baala, siòòŋii bii lɛ nɔm te, kani i co nɔm ikɛi. I ciinin vanaa-mangalaa-isɔaa niaa kɔ cal tɛɛn telen yáà tow niaa-o-a. Kɛ nɔm, i ciinin nɔm te. I tuisinin nɔm sangaa coo le nɔm silaa o sandei nin, i melnin nɔm kɔnndan lende le.»