Read Kissi Yeremi 47 Bible Online

Yeremi 47 - Kissi bible

Yeremi 47

¹Mí Mɛlɛka soaa o Yeremi lo, mó dimul ndu isɔɔ a Filistia o kɔɔ, masaa Esipte ndóò del lɔ Kaasa coo a cɔwvo le.

²Diom Mɛlɛka dimi-o co hoo ni aa: «Mɛnndan ma co hunɔɔ fulaa a ba luaŋ-ndo, ma co siŋnɔnndo mɛmma letindima ɲindu taw-van. Ma co lɛŋnden a ɲɛm co lecoo-on kumbɔɔ, kobilan a vanndacieea. Vannda co caŋndo le malaa sɔlaa, vanaa co o lɛŋnden nin-nda kpow a co koŋullo.

³Buukula ndalan la co diomndan soli, ɲɛla ɲaanannda soa nan-ndan la co va sɔɛi, pelun ndan vanin idiki-dikiei. Siòònde biinin kala-ncuawva, má va cuavaa ndaa pɔɛɛndan. Balan la vunin nda pɛ́-pɛ́.

⁴Kani paale tɛɛmbua len le tiiya le Filistia kpow. Vana-vana co lɛ le kobilan Tir a Sidɔn malaa le. Mɛlɛka co cii ɲɛ-ɲɛ fee tɛɛmbuu o Filistia lo, vanaa lo yoomu o lɛŋnde ibunga len Kaftɔr nin-nda.

⁵Vannda sendinnin tembeltan Kaasa. Vannda meinin Askelɔn kpili-kpili. Niaa vanaa lonin yoomu-a yɛ, háá lɔ́ɔ́ kuɛɛ niaa va yɛnin vaasan kioŋnɔnndo lekɔɔ?

⁶La diminin aa: ‹Éé nɔm mɔɛi cɔvii Mɛlɛka-e, vɛ̀ɛ̀ o ve nihau nuaa le? Muungu o boo nɔmndo nin, cal yili, kpeŋan lɛhau le ɲɛ-ɲɛ tosa le dɛ.›

⁷Kɛ vɛ̀ɛ̀ i pɛngi yɛnin? Mɛlɛka cɔm ndi ɲɛ i bɛnda le tosaa-o, o dimul ndi le kɔlan Askelɔn a o mɛmma ihɛllan kɔngɔ dí. Nɛɛ i nɔ le kɔlan-nda co kan ni.»