Read Kissi Yeremi 48 Bible Online

Yeremi 48 - Kissi bible

Yeremi 48

¹Diom Mɛlɛka-Nɔ-Kpaayaa-Kpow-vo, o Hala Israɛlla dimi-o co hoo ni aa: «Dɛnɛ palaa co le vannda Nebo, kani kobi ndaa cuu itambu! Siɛmbulan la tol Kiriataim le biyɔɔ nda bii ndu-o! Siɛmbulan la co bɔɔ le kobi va kon o kpakio nin-ndo!

²Ɲɛ va Moabua hɔlla heeloo-o cuu. Vannda tuu sɔɔn kɔlvesɛiyon le kobio Hɛsbɔn, má va dimio aa: ‹N kɔnnun mì n kɔ ɲumi kobi kon vanaa-mangalaa-isɔɔ tɛɛn!› Nɔm kobio Madmɛn bɛɛ, a tambunin, kani cɔwvo co nɔm kɔɔli.

³Yeelan la co sɔɛi Horonaim aa: ‹Ɲɛ-ɲɛ cuu itambu, aa mɔnɛi taanin!›

⁴Moab tambu, vanaa co lon-nda co koŋullo a labɛɛla.

⁵Vannda co pembei Luhit helɔɔ a caŋndan. Vannda co pembei Horonaim tolɔɔ a caŋnda imɔnɔlan.

⁶La ɲaanun mì la ciindiaa yoomula niaalan, mì la kɔ va o lɛŋnde veselɛilen nin maa sofɛlɛa yondo!

⁷Nɔm Moab, a va baalaa n tosa-o tiindanndo mà va bolofaa nɔmndo tiindanndo. Kɛ nɔm bɛɛ, a biinunnin! Kɛmɔs hala nɔmndo kɔanin o biyɔɔ nin, a kɔanin a vanaa nɔmaa solia lasálàá a simlacia nɔmnda kpede latulu.

⁸Vana tɛɛmbua keinin o kobilan la pilɛn-pilɛnndan nin, o pilɛ bɛɛ o pɔɛɛnnin te. Ɲɛ tambɛiyo vanin o bóllo nin a o dɛngbɔɔ nin.» Lende Mɛlɛka dimi ni.

⁹La ke Moabua kumbanndan mà cɛn coocoo! Kobila ndalan la lonin fondo a mɔnɛi, vanaciee ve lɛnin lenin te.

¹⁰Dangaa co le vana co baala Mɛlɛka-o tosaa a dialun vílɛ́iyon-ndo, dangaa co le vana kɛɛnin mì mɔɛi ndɔɛi cɔwve soli koovan-ndo!

¹¹«Kabi o cuaambɔyɛi ndɛi nin, Moabua ndáà nɔ buulan te, kabi a kue a nda o biyɔɔ nin te. A vannun nila ɲulu fɛɛ mɛɛ mɔiyan ma cal o kììyo coo yɛ. Lepilɛ bɛɛ a soli ndu o ɲɛ nin má vow ndu o ɲɛ celen nin te. Lelan o vannun o yeela ndɔɔ a o naŋɔɔ ndɔɔ coo ni.»

¹²Sɔɛi fula Mɛlɛka o sondo-e co hee ni aa: «Lelan paale vanin mì vem vannda, mà kɔ yɛlɛma ndu o ɲɛ vovaa celen nin. A solinin ndu o kpɛɛnɛn o co nin-ndon nin, mà pesi mun.

¹³Siɛmbulan la biinin Moabua le Kɛmɔs hala ndaa, mɛɛ siɛmbulan la bii Israɛlla le hala nda va Betɛl-lo yɛ, o ndáà tiindan a kɔlta ndalan kpow-vo.

¹⁴«Niaa Moabua, le yɛɛ niaa co yɛ dimio aa: ‹Vanaa cɔvaa mayoomua kpeekpeyaa caa cɔwvo-a naa n co ni?›

¹⁵Moab cuu itambu kpede, vannda co helɔɔ le kobila ndɔlan delɔɔ coo. A co kɔlan a langbaa felengia ndaa le nda diyɔɔ. Sɔɛi fula Masa bɛndu nɔ diolan aa Mɛlɛka-Nɔ-Kpaayaa-Kpow-vo o sondo-e co hee ni aa:

¹⁶Tambii Moab-e co nin kpɛɛlun, dɛnɛ palaa ndaa co sɔɔnguuo cɔ́-cɔ́.

¹⁷Niaa vanaa balu nda-a, niaa sina nda ɲɛkɛndɛi-ya kpow, la yil nda yilɔɔ biisio. La dimi aa: «Vɛ̀ɛ̀ kpeekpei kpaaya bɛndoo ho looku yɛ puusian, masale biilaa len-nden pɛɛn?»

¹⁸Niaa vannda Dibɔn, la tol o kpɛŋɛla niaala lebɛɛlan coo, mì la cal o sállo coo. Vana tɛɛmbuu Moab-o co nɔm hinullo, o co kpakila nɔmndan tɛɛmbuuo.

¹⁹Niaa vannda Aroɛr séi! La sím o nɛilan mì la cumul. La ɲuna vɔ vanaa sɔɔndian-nda a vanaa hɛlun o cɔwvo-a aa ‹Yɛɛ nɛ yɔŋnun yɛ?›

²⁰A mululnin niaa aa: ‹Moab cuu piɔl vɔ́-vɔ́! Siɛmbula bɛndulan la bii lɛŋnde len.› La yonda le vanaa malaa veeloo! La yonda ndi o peo Arnɔn kɔngɔ maa Moab cuu itambu!

²¹Yamɛi Mɛlɛka-e i hin kiolɔn o tàndá co o pembei coo-o, kobilan Holɔn, Yasa, Mefaat,

²²Dibɔn, Nebo, Bɛt-Diblataim,

²³Kiriataim, Bɛt-Kamul, Bɛt-Meɔn,

²⁴Keriɔt, Bɔsra a kobila kɛ́-kɛ̀ co o lɛŋnde Moab len nin, la co macɛlu lan a la co levil tan.

²⁵Yoomuma Moabua ma cuu, kpaaya ndaa bɔndɔla.» Sɔɛi fula Mɛlɛka o sondo-e co ken ni.

²⁶Moabua cennun maa nda hiow Mɛlɛka ni, lelan la pimi nda mɔiyan mì ma bii nda, maa kuusuu, mà yɔliyɔlin o kuusuu ndaa nin, mì vannda mam nda!

²⁷Niaa Moabua, vɛ̀ɛ̀ o co niaa le va Israɛlla mamɔɔ le? Nduyɛ Israɛl tosa levui le. Le yɛɛ niaa va yɛ niko nda mamɔɔ mí la va bolle hiiloo?

²⁸Niaa Moabua, la mal kobilan mì la kɔ cal o powta kpovalan coo. La tuula piiŋaa tangul vaaŋii ndɛi nɛɛ feke-fekea o buululan coo-a.

²⁹N tuei Moabua tɔ́ɔ́ le yongaa, o hiow nda ba! A hel bɔɔ hɔlla a sondo kalaa! Nda pila cennun bɔɔ ɲɛ!

³⁰Ya Mɛlɛka bɛɛ i sina heelɔn ndaa válán. Hoeyii fondoei fúú fula nda o sondo ni, dɛnnda nda tosa vɛlɛ lan la nɔ tɔnɔ le.»

³¹Lelan ya co condii biisiei solio Moab coo ni, i co caŋndo le Moabua kpow. I co koŋullo le vannda Kir-Herɛs.

³²Rɛsɛnndo Sibma, i co caŋndo le nɔm, hiovɔɔ mɛɛ ya co caŋndo le Yaesɛr yɛ. Lɛvun nɔmndon mun talataliaa háá mì n hiaw mɛmma hɛlii bɛnduan, mí n kɔ tiiya Yaesɛr dí. Mí vana tɛɛmbua hun del o komɔɔ nɔm cuu nin kiɔndɔɔ-o a o co vɔ lecoo-o coo.

³³Ɲaale bɛndoo cuu o nakɔla co o lɛŋnde Moab len nin-ndan nin. I cii mɔiyan veeliaa o doolala mamɔilan nin. Vana co lɛ le rɛsɛnndon nɛw le, condun ndáà soli o doolalan-ndon n mei kpili.

³⁴Vannda Hɛsbɔn a co yeelan mɛlio le vana malaa sɔlaa. Vana lo Eleale pɔ́ mà tuei nda diom. Diomnda ndalan la co tiiyaa Yahas dí. A va Soar, Horonaim a Ɛklat-Sɛlisia dí mà tuei nda diom. Kani hali soon mamɛnndo Nimrim, o vela mí vannda piaw lon.

³⁵I ɲuminin vanaa kɔa halaa ndaa sálàlan solullo o tombon-nda o lɛŋnde Moab len nin.» Sɔɛi fula ya Mɛlɛka o sondo-e co ken ni.

³⁶Lelan ya co koŋullo Moabua a vannda Kir-Herɛs coo ni, mì diomndo muungu ya maa diom lesɛ̀ŋ. Kani bolofaa ndaa cuungiaa-o kpow cuu itambu.

³⁷Kani vanpiaandua kpow a sendin tembeltan a siaiyon. A keŋnun vaasan o balan, má vownun volɔɔla dɛnɛ palaalan.

³⁸O cɛilan kpede sɛmtɛ o lɛŋnde Moab len nin a o bɛ́ɛ̀lan kpow, condun biision daama vana tuɛi ni. Kani i cii Moab piɔlɔɔ maa kpɛɛnɛi vana nɔ lɛ mako lei.» Sɔɛi fula ya Mɛlɛka o sondo-e co ken ni.

³⁹La soli condii biisiei mì la dimi aa: «Mbɔ̀ Moab del fɔ́! Siɛmbulan pila o co le Moabua yaamɔaa ndaa ɲaanɔnndo ni.» Siòònde bii vanaa balu nda-a, mà va nda mamɔɔ.

⁴⁰O Mɛlɛka dimi-o co hoo ni aa: «Mɛɛ kovɔ́ɔ̀ pɛɛnga bɔɔlan mò kilan coocoo yɛ, yaamɔɔ co kilanndo Moab coo ni.»

⁴¹Kobilan la biinun, kpakilan la del yaamɔɔa o ba. O kon mì vanaa cɔvaa hiow cɔwvo caa-a va sangaa mɛɛ vanalanɔɔ sanga o violɔɔ nuaa yɛ.

⁴²Moabua ɲuminnin, a ve lɛnin lelɛŋ a ba nda le, le tùú nda cennun maa nda co fisa a Mɛlɛka-o pɛɛn.

⁴³Siòòŋii bɛnduei, soondo a yaŋɔɔlen, mun kpow n co le niaa Moabua!» Sɔɛi fula ya Mɛlɛka o sondo-e co ken ni.

⁴⁴«Vana ɲaanunnin a siòònde-o, ndu kɔ delnin o soondo nin. Te o kindin pɛ mò fula, o kɔ hawnin o yaŋɔɔlen. Lende ya tosanin a Moabua o vɔsi ya ɲunanin nda konaa-o ni.» Sɔɛi fula ya Mɛlɛka o sondo-e co ken ni.

⁴⁵Vanaa co sangaa a ɲaanɔnndo-a co kɔlan vionnɔnndo Hɛsbɔn. Kɛ yinnden le co fula o kobi kon nin, o cɛi lemasaa Sihon, mì yelenyelenndo kɔ loam lɛŋnde vanaa kan cɔnɔnndo o pɛɛngulan háá o lɛŋnden kɔllo.

⁴⁶Dɛnɛ palaa co le niaa Moabua taanin! Vanaa Kɛmɔs-a cuu fɔ́! A kɔɛ a poaa ndɔa a cuavaa ndaa laandua o biyɔɔ nin.

⁴⁷Kɛ paale vanin mì mingi Moab maa paandu.» Sɔɛi Mɛlɛka dimi a Moabua o kɔɔ-e co ken ni.