Read Kissi Yeremi 49 Bible Online

Yeremi 49 - Kissi bible

Yeremi 49

¹Sɔɛi Mɛlɛka dimi a Amɔnnda o kɔɔ-e co hee ni aa: «Vɛ̀ɛ̀ Israɛlla nɔ lɛ hɔ́aa piaandu le? Vɛ̀ɛ̀ a nɔ lɛ vana cuanin kɛ ndaa le? Le yɛɛ piɔmndo Malkɔm loo yɛ tàndá Kad-o, mí vanaa ndɔa va icali o kobila co lon-ndan nin?»

²Lelan sɔɛi fula Mɛlɛka o sondo-e co hee ni aa: «Paale vanin mì vannda tuei vóólun-vóólun cɔwvo Raba o kobi lebol Amɔnnda nin. Kobi kon siŋnunnin bémbélan, mà lom cieon pɔmbɔn balu ndu-on. O telen kon Israɛlla minginnin ɲɛm ndan o laba.» Mɛlɛka dimi lende ni.

³Vannda Hɛsbɔn, la hiiliaa a mɔnɛi, kani Ai cuu itambu! La mɛli yeelan, niaa vanaa co o cieon balu Raba-on nin-nda. La vownun volɔɔla dɛnɛ palaalan, mì la soli condii biisiei, mì la va keiyo ba-ba fee o kolokololan, kani a co kɔlan a piɔmndo Molɛk o biyɔɔ nin a vanaa ndɔa solia lasálàá a simlacia ndɔa latulu kpow.

⁴Niaa vanaa nila kalua Raba, le yɛɛ niaa co yɛ lisanndo a bólta niaalan, bólta niaala tɔlɔɔlan la naŋ nin taw lan? La va bolofaa niaa tiindanndo, mí la va dimio aa: ‹Nɛ̀ɛ́ tɔɔndan yɛnin mò hun del-la coo?›

⁵Lelan, Maalii Mɛlɛka-Nɔ-Kpaayaa-Kpow-vo dimi aa: ‹I co kɔl yulan-yulanndo luei o niaa lo, mò cɛn ba-ba fee mò balu niaa. La sɔlanin tovɔɔ mì vana-vana ɲaanun ndu pila laci. Vana venin le vanaa vanin kan ɲaanɔnndo-a mɔɔsiaa le.

⁶Kɛ o kon kɔɔli, i minginin Amɔnnda maa paandu.› Sɔɛi fula ya Mɛlɛka o sondo-e co ken ni.

⁷Sɔɛi fula Mɛlɛka-Nɔ-Kpaayaa-Kpow-vo o sondo a Edɔm o kɔɔ-e co hee ni aa: ‹Vɛ̀ɛ̀ vana kɔlkalu co lɛ Teman te? Mò va maa dɛnɛ sinaa vanaa kɔlkalua laasian? Bàà tambei kɔlkalu nda tambu ni?

⁸«Vannda Dedan! La mulin mì la ɲaanun, mì la kɔ vionnun o buululan nin, kani dɛnɛ palaa ya hin niaa tuisi coo ni, niaa yungu Esau-vo pɛɛn! Telen ya co niaa mululɔn-ndo tiiya nuaa ni.

⁹Te vanaa kiandaa n'rɛsɛnnda hin pɛ o niaa lo, kpɔ̀nyɔ̀ɔ́ pilɛ bɛɛ a mɛinin te. Ɲumma vuiya hinulnin niaa-an, ɲɛ-ɲɛ nda nɔla pɛ, a tɛɛmbuunin kon.

¹⁰Ya pila yunganin niaa yungu Esau-vo ni, mì soli dɛnnda niaala viannanndan ceen. La nɔla lɛnin vionnɔnndo le. Cuavaa niaa kpow, puapilɛa niaa, a vanaa niaa cal latulu-a cuunin. Vana-vana dimulnin niaa aa:

¹¹‹La mɛi ya víyaa niaa o ba mì koma suili nda, a laandaa niaa mì koma handu nda hɔlten coo.›»

¹²Kani diom Mɛlɛka dimi-o co hoo ni aa: «La yaŋ nilan ɲɛkɛndɛi, vanaa yáà beŋ le taala kólaa kɔltuw nuu kolɔɔ le-a, má kol ndu. Yee niaa yungu Edɔm-ndo ya mɛinin ndon ni? Kɛì-kɛì bɛɛ! Mɛɛ mì la kol ndu kangalan.

¹³I mɛnan a ya pila, Bɔsra siŋnunnin fonda dɛnɛ palaa, mò muungu bémbélan kposon. Ndu vannda vanin tɔɔmaseloo cuaa le dangaa dɔvɔɔ, te kon te le vannda siɛmbulan tuisio ni. Kobila balu ndu lan la siŋnunnin bémbélan le fɛɛn a fɛɛn.» Sɔɛi Mɛlɛka dimi-e co ken ni.

¹⁴I tuei yoongoo fulaa Mɛlɛka o ba, kiilaa co ndu yondaa le vanaa-mangalaa-isɔɔa aa: «La mɔɔsian mì la kuel Edɔm! La kɔ del ndu coo a cɔwvo!»

¹⁵Niaa Edɔmnda, i co niaa dɔɔniaa, hiovɔɔ vanaa-mangalaa-isɔɔa kpow coo, mì vannda kpow kelun niaa yii.

¹⁶La co vannda kpow vueinɔnndo, a co yiyanndo maa nɔm hiow vannda kpow ni. Kɛ nɔm pila daama co palanndo ni. La co icali o tɛɛngun powta kpovalan nin, mì la va o fondala feke-fekelan. Kɛ hali heelu bɛɛ calta nɔmndan mì la hiow vɛɛnnde kovɔ́ɔ̀ helɔɔ, i tuisinin nɔm mà tiiya lɛŋ dí.» Sɔɛi fula Mɛlɛka o sondo-e co ken ni.

¹⁷«Edɔm siŋnunnin bémbélan kposon. Vanaa vanin keiyo lon-nda ɲiiyanin mà hɔŋ hùíyé a kɔndɔfili bɛndoo, le dɛnɛ tambɛi vanin lon-ndo.

¹⁸Ɲɔɔ yɔŋnunnin mɛɛ kpundɛ tɛɛmbuu Sodɔm a Komɔr a kobilaa balu ndu sɔ́ lan yɛ. Vanndo pilɛ bɛɛ kue lɛnin calle lon te, vanaciee yoomaa bɛɛ kue lɛnin ndon te.

¹⁹I vanin maa yàlá co fulaa o bɔɔ nin o peo Yurdɛn kɔngɔ le luɛyɔɔ o hèéo nin-ndo. I tosanin mì vana-vana piɔl o lepilɔɔ. O kon kɔɔli mí handu masa ya yeema-o Edɔm. Kani ɔ́ɔ̀ vana co maa ya-o? Nɛ̀ɛ́ ya downun yɛnin kona? Ɔ́ɔ̀ simlacinɔ nɔla ya simullo-o?

²⁰Lelan, la yaŋ nilan mì la tuei tuu Mɛlɛka nɔ le Edɔmnda-o, kɛɛsuula o nɔ le vannda Teman-ndan! La laalan ken, a kɔanin a nda maa n'cɔlu, hali a hiow dɔɔnanndo-a. La laalan ken, calta ndalan la tambunin le nda.

²¹Taa va pɛ delɔɔ, lɛŋnden le ɲiiya, vana lo o mɛmma ihɛlma makpɛ̀ndɛ̀an pɔ́, mà tuei nda veeloo le malaa sɔlaa.

²²Mɛɛ kovɔ́ɔ̀ hel coocoo pɔ́, mò pɛɛnga kumbanndan, mò hiŋnun yɛ yaamɔɔa co Bɔsra mɛngɛlaa ni. Paale len, kɔlta kuubaa cɔwva Edɔm la vanin maa kɔl vanalanɔ co le violɔɔ-o.»

²³A Damas o kɔɔ. Kobio Hamat a kobio Arpad a tuei yoongu vɔɔndo pum. Siɛmbulan la bii kobila lan. A muungu yulan-yulan maa mɛmma ihɛlma biiŋuamma nɔla calle le-an.

²⁴Vannda Damas a vi diallon má mulin le kiltan. Siòòŋii bɛnduei bii nda. A luɛi o buulanndo a o dɛnɛ palaa nin, mɛɛ vanalanɔɔ sanga o violɔɔ nuaa yɛ.

²⁵La ce dɛnɛ nɛ! Vannda piow kobio ho, kobi ndóò nɔ hoo tɔ́ɔ́ bɛndoo-o, kobi yáà dɔawnun hoo ɲaale-o!

²⁶Lelan langbaa felengia co lon-nda delinin o bɛ́ɛ̀lan, mí kuubaa cɔvaa ndɔa cuu paale len.» Sɔɛi fula Mɛlɛka-Nɔ-Kpaayaa-Kpow-vo o sondo-e co ken ni.

²⁷I malnin kpakio Damas yin, mì cɛila lemasala Bɛn-Hadad lan la ŋɔɛ.

²⁸Sɔɛi dimin le Arabua co Kedar-a a le masɛi Hatsɔr-e, i Nebukanɛsar masaa Babilɔn nɔla-e co hee ni. Diom Mɛlɛka dimi-o co hoo ni aa: «La cɔn mì la kuel Kedar, mì la tɛɛmbuu ɲɛ-ɲɛ fee, ɲɛm vanaa co icali lon o lɛŋnde veselɛilen nin-nda pɛɛn.

²⁹La cua cɛila-kolala-toandaala ndalan a cɔlua ndaa. La cua cɛila ndalan a volɔɔla ndalan, mì la kɔɛnnun a ɲɔɔmɛɛa ndaa, mì la yondola nda aa: «Siòònde tiw ba-ba fee!»

³⁰Mɛlɛka dimi aa: Vannda Hatsɔr, la ɲaanun mì la keleŋa lakɔ, mì la vennun o buululan nin. Kani Nebukanɛsar masaa Babilɔn tuu dɛnɛ vɔɔndo le niaa, o yiyan le isɔɔ tosa.»

³¹Sɔɛi fula Mɛlɛka o sondo-e co hee ni aa: «La cɔn mì la kuel vanaa nɔ haa buulan te-a, a va yiyanndo maa a caa calle-a pɛɛn. A nɔ yɛ lakon te, a nɔ masɔkɔ le, má calnun yunyen.

³²Yaamɔa biwnin ɲɔɔmɛɛa ndaa a cɔlua ndaa bana-banaa. Bolofaa cɔw nda cuanin-ndo vanin kon ni. I pialnin nda mà sɛŋin ba-ba fee, vanaa nɔ haa kangbala sendiaalan-nda pɛɛn. I tuisinin nda dɛnɛ palaa coo fulaa ba-ba fee.» Sɔɛi fula Mɛlɛka o sondo-e co ken ni.

³³«Kobio Hatsɔr siŋnunnin bɛ̀mɛ́lta tivolla, lɛŋnde veselɛile vanaciee celnin nin lɔ́ɔ́-lɔ́ɔ̀ le len, nɛɛ vanaciee keinin bɛɛ le-a.»

³⁴Diom Mɛlɛka dimulun Yeremi vana-tɛɛngaa-diom Hala-o, le vannda Elam tɛɛngullo-o. Sedekia ndóò hel-lɔ ko sɛnɛi o masalen Yuda kínɛí.

³⁵Diom Mɛlɛka-Nɔ-Kpaayaa-Kpow-vo dimi-o co hoo ni aa: «I co kpaasiaala Elam-nda yimi, nɛɛ kpaaya ndaa co tum-nda pɛɛn.

³⁶I solinin hoeiye o kpengun hiɔɔlon coo, fulaa a ba luaŋ-ndo a á ba too, a ba paalen le can-ndo a á ba le del-lo, mì i hinul Elam. I puusiaanin Edɔmnda mà kɔɛ ba-ba fee. Elamnda kɔanin cɔwvo ɲaanɔn o lɛŋnde kpow nin.

³⁷I vueinunnin Elamnda mà ɲiiya yaamɔaa ndaa a vanaa yeema le nda diyɔɔ-a o hɔl. I tuisinin nda dɛnɛ palaa coo a kɔltuw bɛndoo. I lonin nda kɔɔli a mɔɛi cɔwve háá mì cii nda kpede.» Sɔɛi fula Mɛlɛka o sondo-e co ken ni.

³⁸«I ciinin Elam-nda, masa ndaa a simlacia ndaa, mì mingi kpɛŋɛ ni lemasaa lon.» Diom Mɛlɛka dimi-o co kon ni.

³⁹«Kɛ paale vanin, mì mingi Elam maa paandu.» Sɔɛi fula Mɛlɛka o sondo-e co ken ni.