Read Kissi Yeremi 5 Bible Online

Yeremi 5 - Kissi bible

Yeremi 5

¹«La balu o nɛilan Yerusalɛm coo, mì la mɛɛndian, mì la ɲuuniaa, mì la nuwviaa o bɛ́ɛ̀lan kpow. Te la saalun pɛ vanndo, hali o pilɛ kpé, o sandu-o, o yeema dɛnɛ sandaa-o, o kon, i mal Yerusalɛm haki.»

²Hali à mɛnan bɛɛ má dimi aa: «Le Mɛlɛka yoomaa.» Mɛɛniannda lacòòvalan daama nda nɔ ni.

³Mɛlɛka, vɛ̀ɛ̀ o co dɛnɛ sandaa le n yeema le? A cii nda lɔɔ, kɛ a co sinan te. Má tuu le nda ciiyo kpede, a tui silala nɔmndan te. Má kindi bolle a nɔm hiovɔɔ bandíláà coo, má kɛɛ le mangalanndo pɛ!

⁴I va yiyanndo maa: «O co vanaa sɔvɛ le vannda ha co le, a tosa sɔɔn kɔlkalu le, kani a sina nɛi Mɛlɛka-o le, tɔŋ Hala ndaa pɛɛn.

⁵I co lakɔnnɔn o simlacia lo, mì kɔ soo o nda lo, kani nda sina nɛi Mɛlɛka-o, tɔŋ Hala ndaa pɛɛn.» Kɛ nda bɛɛ ɲɛ pilɔɔ nda co kpow ni! A mal sangala va nda coo lan kpow, má tɛɛmbuu bɛnda va nda tɛɛn nda Hala-a o.

⁶Lelan yàlá fula o bundɔɔ nin-ndo co nda diwvo ni, mì tun yondo fula o lɛŋnde veselɛilen nin-ndo va nda sɛɛsiaa. Tambillo co mɛngɛlaa o kobila ndalan sondoo, vana-vana fula dɔ́ɔ́ pɛ, o sɛɛsiaa ndu, kani nila kalula ndalan la co nin bɔɔ sɛ́lɛ́, dɛnɛ sandaa lepɛŋ ndaa vangalan nin bɔɔ.»

⁷«Yerusalɛm, vɛ̀ɛ̀ ya mal lɛ nɔm haki lende? Cuavaa nɔmnda kɛɛ ya, mà muungu mɛɛnianndo o ɲɛm co Hala loon. I va nda ɲɛm ndáà nɔ makoo-on yɔngoo, kɛ má yiinan sɛ́lɛ́ bɛndoo o cɛi suundaa nin.

⁸Nda a pilɛn-pilɛnnda, vana-vana co kiltan lanɔ puapilɛ ndɔɔ kɔɔli mɛɛ soa piaandua téndéa ɲaanun soa laandua kɔɔli a yeemɛi bɛnduei yɛ.

⁹Vɛ̀ɛ̀ i bɛnda mì kuuna dɛnnda vaa lende le? Vɛ̀ɛ̀ i bɛnda mì fula kɔl a vanaa vaa lende le nɛ? Sɔɛi fula Mɛlɛka o sondo-e co ken ni.

¹⁰La hel o kungala ndɔlan mì la tɛɛmbuu, kɛ la tɛɛmbuu ndu kpow le. La bɛɛsiaa lɛvun ndɔn, kani o co Mɛlɛka le nɔ mun te.

¹¹Kani Israɛlla nda Yudaa hui ya.» Sɔɛi fula Mɛlɛka o sondo-e co ken ni.

¹²A soo sɔɔn lacòòvan a Mɛlɛka o kɔɔ, a co dimio aa: «Mɛlɛka co le! Dɛnɛ palaa kɛ́-kɛ̀ komalnin naa le, cɔw hinulnin naa le, yima biinin naa le.

¹³Hoeyii fondoei fúú vanaa-tɛɛngaa-diom Hala-a co ni, o co Hala le co sɔɛi o nda lo le. Màá i yɔŋnun nda mɛɛ nda co dimio yɛ!»

¹⁴Lelan, diom Mɛlɛka dimi-o co hoo ni, Hala-Nɔ-Kpaayaa-Kpow-vo pɛɛn aa: «Le sɔɛi nda dimi ken-nde, i co sɔɛi nii mingi yinnden nɔm Yeremi o sondo, mì siinguu vanaa kan yɔmnde, yɔmii yinnde len le loamnin-nde.

¹⁵Mí Mɛlɛka dimi aa: «I co vanaa-mangalaa-isɔɔa cuu fulaa nɛɛ levil, má hun del niaa coo, niaa yungu Israɛl-lo pɛɛn. Vanaa-mangalaa-isɔɔa kpaayaa nda co ni, a masindɛa pɛɛn. Vanaa niaa sina sɔɛi ndɛi le-a, a niaa bii sɔɛi ndɛi bila le-a.

¹⁶Bɔlɔ nda mandaa n'kɔɔ co maa sɛi kumbiaa, nda kpow kuubaa cɔwva nda co ni.

¹⁷Vanaa kan tɛɛmbuunin calta niaalan a ɲɛdiaa niaa. A diwnin poaa a cuavaa laandua niaa, a diwnin cɔlua niaa pɔmbɔa a á bɛndua. A tɛɛmbuunin nakɔla n'rɛsɛnnda niaalan a la n'voosulan. A pesinin kobila mayoomula niaala niaa tiindan ndan a cɔwvo.

¹⁸Mí Mɛlɛka dimi aa: «Kɛ hali o palɛi ken nin, i diwnin niaa kpow le.

¹⁹O kon taa ɲuna pɛ aa: ‹Le yɛɛ Mɛlɛka Hala naa tosal lɛ naa nuaa?› nɔm Yeremi, a mulul nda aa: ‹Le kɛɛ niaa kɛɛ ndu mí la sooluu halaa celennda o lɛŋnde ndalen nin, mí la va mialla baalaa tosallo o lɛŋnde isumialten nin-ndo ni.›»

²⁰«La yonda sɔɛi he o Yakɔb lo cɛinin, mì la dimi ndi o tàndá Yuda-o nin aa:

²¹Niaa vanaa kindu haa lakɔl te-a, niaa vanaa nɔ lakɔl niŋ te-a, la yaŋ nilan! La nɔ hɔltan, kɛ la ci a lan te. La nɔ nilan, kɛ la tui a lan te.›

²²Mí Mɛlɛka ɲuna aa: ‹Mɛɛ la nɔ siòòŋii ni le? Mɛɛ la nɔla ɲiiyaa ya o hɔl te? Ya kɛsul mɛmma ihɛllan pɛɛngulan a sióónndon ni, pɛɛngula fɛɛn-fɛɛnnda ma nɔla hiovɔɔ le lan pɛɛn. Mɛ̀ɛ́-mɛ̀ɛ́ ma va biiŋɔnndo, ma nɔ kpaaya má hiaw lan te, mɛ̀ɛ́-mɛ̀ɛ́ ma kuuliaa, ma hiw pɛɛngula lan te.

²³Kɛ niaa, vanaa nila kalua a vanaa bii isɔɔ le-a niaa co ni. La co mulinndo mí la va kɔnndan.

²⁴La co dimin o lakɔl te aa: N tosan siòònde a Mɛlɛka Hala naa, o tuisul naa piɔɔ o telen ndɔɔ-o, piɔɔ tasoo a piɔɔ vɔɔle pɔmbɔɔ, o yɔngu naa lɔ́ɔ́lan le kovɔɔlan-ndo.›

²⁵Dɛnnda niaala vɔɔnndan la hiŋ ɲɔɔ kpow ni, hakila niaalan la co niaa ɲɛm kɛndɛn mun tuŋɔɔ ni.

²⁶Kani vanaa kɔlvesɛiya co vanaa nia tɛɛn, vana ca ko nda a tundan aa vana biyaa n'yowvo co mɛngɛlaa ni. A co yaŋɔɔlan handɔɔ le vanndacieea biyɔɔ.

²⁷Mɛɛ kesu mandaa n'yowvo và o piaa a yowva yɛ, lende cɛila ndalan la co lapiaa a ɲɛm lakafan ni. Le ken nda siŋnun vanaa kpaayaa a vanaa bolofaa ni.

²⁸A luɛi cuɛiyan, má celul celoo pila. À nɔ lapɛɛngu o dɛnɛ vɔɔndo tosaa nin te. À kilu yaman sandaa le. À suu le vííya dí ndaa yɔngu le, te ndáà soaa pɛ le nda, vííya va dí ndaa sɔla. À cue sɔɛi vanaa bala fondoa balan latiɔn te.›

²⁹Le hee Mɛlɛka dimi ni aa: ‹Vɛ̀ɛ̀ i bɛnda mì cɛɛlian vannda ha le? Vɛ̀ɛ̀ i mingùl vanaa súú vaa nuaa màá le?

³⁰Dɛnɛ kɔlvesɛiyo a dɛnɛ imɔnɔɔ co bɔɔ tosanndo o lɛŋnden nden nin.

³¹Vanaa-tɛɛngaa-diom Hala-a co sɔɛi o diola hala fondoo, vanaa-solia-lasálàá nda co tɔnɔ ndaa nuwviaa tuŋ. Ɲɛ hɛnan yɛ vanaa niaa-o co kon ni. Kɛ nduyɛ o mɛɛlulan, vɛɛ niaa yɔŋ yɛnin?›»