Read Kissi Yeremi 50 Bible Online

Yeremi 50 - Kissi bible

Yeremi 50

¹Diom Mɛlɛka dimi le kobio Babilɔn a le lɛŋnde Babilɔn-nden kpede a sondo Yeremi vana-tɛɛngaa-diom Hala-o co hoo ni.

²La yondal vanaa-mangalaa-isɔɔa sɔɛi he, la heelu lɛfɛ landaa haliko ma bii bila. La yonda ndi, la vian ɲɛ-ɲɛ le! La dimi aa: «Babilɔn biinun, siɛmbulan la bii piɔmaa ndɔa, mì siòòŋii bɛnduei bii halaa ndɔa fondoa. Siɛmbulan la bii Bɛl, a toɲa, Merodak vi diallon.

³Kani lɛŋnde pilɛ le cɛn a ba luaŋ-ndo mì le va Babilɔn hinullo. Lɛŋnde len le co Babilɔn mingi pɔmndo, vana cel-lɛnin ndon te, vanndacieea a visia ɲaanunnin, mà faŋan ndon.»

⁴Sɔɛi fula Mɛlɛka o sondo-e co hee ni aa: «O telen kon, Israɛlla a Yudaa cannin latulu, mà hin ya nuwviaa a caŋndan, ya Mɛlɛka Hala ndaa pɛɛn.

⁵A ɲunanin nɛiyo le kɔlan Siɔn, mà muli hɔlla a ba kon. A hunnin mà yiinun a ya Mɛlɛka, mì kpema fɛɛn a fɛɛn-ndo va naa tɛɛn, o nda pɔɛɛnnin lɔ́ɔ́-lɔ́ɔ̀ loo.

⁶Maa kunda saa laasiɛi vanaa niaa va ni. Vanaa va nda mandaa-a ndáà hiŋ nda hɔlla ni, má mal nda laasianndo o pembon a o buubuuon coo ba-ba fee, má pɔɛɛnun hee ndaa.

⁷Vanaa kɛ́-kɛ̀ komal pɛ nda, a del nda coo a diw nda kpow, a dimi aa: «N tosa sɔɛi vɔɔn te, kani hakio vannda ha tosa a Mɛlɛka ni, nɛɛ cindaa co-a pɛɛn, o fuɲaa ndaa mamaa ndaa tiindan-ndo.

⁸La ɲaanun mì la faŋan Babilɔn, la faŋan o lɛŋnde len nin. La va maa cuinaa toovi kunda cɔlua laci.

⁹Kani i co lɛŋnde mɔɔsiaa sɛ́lɛ́ bɛndoo, mì toolu ndi le Babilɔn kuello a cɔwvo. A ba luaŋ-ndo nda fulanin ni, mà hun simul ndu, mà bii ndu. Maa kuubanɔ caa cɔwvo taw-vo bálta ndalan la co ni, la bindu le.

¹⁰Vannda yunganin lɛŋnde Babilɔn-nden. Nduyɛ vanaa yunganin nden-nda cuanin bolofaa tei mà sanga.» Sɔɛi fula Mɛlɛka o sondo-e co ken ni.

¹¹A toɲa, la dɔwnun ɲaale, mì la va a kɔlkɛndɔɔ, niaa vanaa poondiaa vanaa niaa ɲɔɔn o laba-a. La huulu mɛɛ navaa téndéa huulu o bil puiyaa nin yɛ. Mì la soli diomndan maa soa kpaaya bɛndu!

¹²Siɛmbula bɛndulan la bii kala niaa, kala velu niaa-o tambu labɛɛ, lɛŋnde niaalen le siŋnun lɛŋnde mɛɛlaa len lɛŋii tɔ̀ɛi tɛɛn, le siŋnun lɛŋnde veselɛilen, lɛŋnde cundu len.»

¹³Kɔltuw Mɛlɛka-o yɔŋ ni mí vannda piaw lon, mó siŋnun pɔmndo. Vanaa vanin keiyo Babilɔn-nda dɔawnunnin kɔndɔfili le ndu cɔu o tambɛiyo.

¹⁴Niaa vanaa caa kpaasiaalan vuuo-a kpow, la hun balu Babilɔn sɔ́ mì la del ndu coo. La vii ndu a kɔɔn niaan, la mandan mun o ba le, kani o del kasi a Mɛlɛka.

¹⁵La yonda le cɔwvo ba-ba fee! O heelu balan le ndu pila yɔngɔnndo. Cɛila coocoola ndala cumulaalan la suingin, kpakila ndalan la koombiaa. Mɛlɛka co ndu maa mingullo ni, lelan la mingul Babilɔn maa, la tosal ndu ɲɛ ndu tosal caanda-o.

¹⁶La soli vanaa saŋaa a vanaa koavaa co o kobi kon nin-nda. Màá vana-vana ɲaanun, mò kɔɛ o lɛŋnde ndɔlen nin, mì vana-vana kɔɛ o ndu lo le cɔw kàlà-kálàá ho!

¹⁷Màá saa laasian, mì yàlàá can ndu tovɔɔ-o Israɛlla va ni. O tase de ndu-o yɔŋnun masaa Asiri ni, o ndu kɔɔli, mí Nebukanɛsar masaa Babilɔn hun pesipesi ndu paalan.

¹⁸Lelan, o Mɛlɛka-Nɔ-Kpaayaa-Kpow-vo dimi-o co hoo ni aa: «I co masaa Babilɔn simul, mì simul lɛŋnde ndɔlen, maa mɛɛ ya tosa sindɛ a masaa Asiri yɛ.

¹⁹I minginin Israɛlla diólan nɛɛ paandua, mà kɔ komal ɲɛ nda diaa o pembei Karmɛl coo, o pembei Basan coo, o tàndá Efraim-ndo nin a o tàndá Kalaad-o nin, mò de mɛɛ o hɛnan ndu yɛ.

²⁰Ya Mɛlɛka co sɔɛi he dimio ni aa: ‹Telen kon, a nuwviaanin tɛɛmbuula Israɛlla, kɛ la venin te. A nuwviaanin hakila Yuda lan, kɛ a seelunnin ndan te. Kani i malnin vanaa lonin yoomu-a haki.›

²¹Mɛlɛka dimul yaamɔɔ Babilɔn aa: ‹Del lɛŋnde mɛmma lolɛilen coo a cɔwvo. Del ten coo mà del vannda Pekɔd coo. Diw nda mà tɛɛmbuu nda háá o vana mɛɛlaa, tosa ɲɛ-ɲɛ ya dimul nɔm le tosaa.

²²Vana lo o lɛŋnden nin, mà tuei diom cɔwvo. Má cè dɛnɛ palaa!

²³Babilɔn va kunduva va ceendo kpede pesio-o ni. O piɔl mó kui tɛndulan vàá pilɛ. La ce dɛnɛ nɛ? Babilɔn siŋnun fonda calii hɛnan vana loo vanaa-mangalaa-isɔɔa tɛɛn. Kámáá la ce dɛnɛ!

²⁴Nɔm Babilɔn, i yaŋ nɔm má haw a bii bila le. A luɛi o biyɔɔ nin, kani ya Mɛlɛka n del coo ni.›

²⁵Mɛlɛka co ɲɛm cɔvun o nɔ-on cua, mò cɔm lɛŋnde Babilɔn-nden kɔl ndɔ fulaa. N canin baala Maalii, Mɛlɛka-Nɔ-Kpaayaa-Kpow-vo tosanin-ndo.

²⁶Vannda fula ba-ba fee mà hin o kobio ho nin, mà hun kumbi kondala co nan-ndan, mà piɔw bolofaa co nan-ndo a kundalan, mà tɛɛmbuu kobi kalaa, ɲɛ-ɲɛ lo lon te.

²⁷La kɔ a vanaa cɔvaa ndaa caa cɔwvo taw-va o fonda nda diw cɔlua-o, mà diw nda kpow. Àá taanin, telen ndaa tiiya fɔ. Mɛlɛka tosanin dɛnɛ a nda.

²⁸La yaŋ nilan, niaa vanaa co ɲaanɔnndo le fulaa o lɛŋnde Babilɔn-nden nin-nda, a co vɔ yoomu-a, a co hunɔɔ dimio Siɔn aa: ‹Mɛlɛka Hala naa mingi màá nɔmndo, o mingi màá Cɛi-Hala diandaa ndɔɔ.›

²⁹La yoongu vanaa caa kpaasiaalan vuuo-a kpow, la ɲindu nda Babilɔn o ibuŋ, mà kɔ balu ndu pindo, nɛi ɲaananndo bɛɛ a mɛi le. Mì la tosal kobi kon mɛɛ ndu tosal caanda yɛ, mì la tosal ndu ɲɛ ndu tosal caanda-o. A toɲa, vana yongaa o yɔŋnun a Mɛlɛka ni.

³⁰Lelan langbaa felengia ndɔa delinin o bɛ́ɛ̀lan, mì vanaa ndɔa cɔwva cuu paale len.» Sɔɛi fula Mɛlɛka o sondo-e co ken ni.

³¹Niaa ya bii tɛɛ ni, niaa Babilɔŋaa yongaa ha. Ya Maalii, Mɛlɛka-Nɔ-Kpaayaa-Kpow-vo dimi lende ni. Telen nɔmndo tiiya, telen ya can le mɔnɛ soli a nɔm-ndo pɛɛn!

³²Vana yongaa boŋ mò del. Vana co le ndu cua le. I mal kobila ndɔlan yin, yinnden le loamnin ndu balɔɔ sɔ́.

³³Sɔɛi fula Mɛlɛka-Nɔ-Kpaayaa-Kpow-vo, Hala Israɛlla o sondo-e co hee ni aa: Vannda Israɛl a co o sanga bɛndu nin, lende koni haa Yuda co bɛpɛlaa ni, vanaa kɔɛ a nda-a kafalan nda kpáŋ, a kɛɛ le nda malɔɔ.

³⁴Kɛ ya vana soaa le nda-o, i nɔ kpaayaa. Ya co Mɛlɛka-Nɔ-Kpaayaa-Kpow-vo ni. I co isɔɔ le nda válán, mì kɔlɲuloo sɔlan o lɛŋnden coo, o kon mì Babilɔnnda ɲiiya.

³⁵Sɔɛi fula Mɛlɛka o sondo-e co hee ni aa: «Mɔɛi cɔwve, kuel Babilɔnnda. A kuel vanaa co o kobio Babilɔn nin-nda, má kuel vɛlɛ simlacia ndɔa a vanaa ndɔa dɛnɛ sinaa!

³⁶Mɔɛi cɔwve, kuel vanaa ndaa soaa a vanvílɛ́iya-a. Màá a siŋnun diɔmnda! Mɔɛi cɔwve kuel kuubaa ndɔa cɔwva, màá a vi diallon!

³⁷Mɔɛi cɔwve, kuel soa ndɔa a ɲɛla ɲaanannda ndɔla soa nan-ndan. Ì kuel vanaa-mangalaa-isɔaa co cɔwvo le ndu-a. Màá a muungu fando-fando maa n'vanlaandu! Mɔɛi cɔwve, kuel bolofaa ndɔɔ, màá vannda hun poondiaa ndu!

³⁸Mɔɛi cɔwve kuel peela ndɔlan. Màá la vela sɛ́ɛ́n! Kani lɛŋnde biilaa n'piɔmnden le co ni, ma va heelɔnndo a piɔmaa ndaa lamàà kan.

³⁹Lelan visia hun kɛsinin bɛ̀mɛ́lta ndalan o kobi kon nin, soninkɔnɔa kilanin calta ndalan ndon. Le fɛɛn a fɛɛn nin, vana cel-lɛnin Babilɔn te few.

⁴⁰I co ndu hunɔɔ muli mɛɛ ya muli Sodɔm, Komɔr a kobilaa balu lan-ndan yɛ. Vana-vana cel-lɛnin ndon te, vanaciee kɛ́-kɛ̀ kue lɛnin ndon te.» Sɔɛi fula ya Mɛlɛka o sondo-e co ken ni.

⁴¹Vannda co cɔnɔnndo a ba luaŋ-ndo, vanaa-mangalaa-isɔɔa sɛ́lɛ́ bɛndua a masaa ndaa kpaayaa co o nɛi, o lɛŋnden mɛɛlulan pɔ́ nda co cɔnɔnndo ni.

⁴²Vanaa cɔvaa ndaa nɔ kpaasiaalan a mɔɔn cɔvun vilɛiyon o laba. Kɔltan pila nda vesa ni, ɲííye bɛɛ a nɔ le. Vana tuei nda diom pɛ a ca ko aa mɛmma ihɛllan ma co kuŋndo ni. A co o soa coo, a co a bɛɛndiannda ɲɛkɛndɛi le nɔm hunɔɔ delɔɔ coo, nɔm Babilɔn pɛɛn!

⁴³Masaa Babilɔn tueyɔɔ sɔɛi ken, mó vu diallon, mó buulan maa vanalanɔ demboo co nɛiyo le violɔɔ-o.

⁴⁴I vanin maa yàlá co fulaa o bɔɔ nin, o peo Yudɛn kɔngɔ, le kɔlan o hèéo-o. I co vannda piɔlɔɔ o lepilɔɔ sunsun, o kon mì suili masa ya yeema-o Babilɔn. Kani nɛ̀ɛ́ co yɛ maa ya? Nɛ̀ɛ́ tɔɔndan yɛ mò ɲuna ya konaa? Ɔ́ɔ̀ vana mandaa n'cɔlu nɔla ya simullo-o?

⁴⁵Lelan la yaŋ nilan mì la tuei mɛɛ Mɛlɛka tuu le tosaa a Babilɔn yɛ, mɛɛ o yiyan le tosaa a lɛŋnde len yɛ. La laalan ken, a kɔanin a nda maa n'cɔlu, o pilɛ bɛɛ lonin kɔɔli le. La laalan maa a tɛɛmbuunin hee ndaa le nda.

⁴⁶Telen nda biinin Babilɔn-ndo, lɛŋnden le ɲiiyanin, mì yeelan la soo ba-ba fee vanaa-mangalaa-isɔɔa tɛɛn.