Read Kissi Yeremi 51 Bible Online

Yeremi 51 - Kissi bible

Yeremi 51

¹Diom Mɛlɛka dimi-o co hoo ni aa: «I co hoeyii tɛɛmbuai hɔŋ Babilɔn a vanaa co icali lon-nda coo.

²I toolunin mialla mà kɔ piɔl vanaa co lon-nda mɛɛ hoeiye saŋ foeende nuaa yɛ. Mà tɛɛmbuu lɛŋnde ndalen. A hunin mà tiila nda o paale dɛnɛ palaa le len coo.

³La kindu kpaasiaa, le vanaa vuaa lakpaasia yaamɔɔa viɔu. O kon a sangalan ndɛ le kɔ̀ɔ̀la cɔwla ndalan te. La mal vanaa cɔvaa felengia ha le. La cii vanaa ndaa cɔwva kpede.

⁴Vanaa yɔŋulunnin-nda vanin a deliaa o lɛŋnde Babilɔn-nden nin, vanvílɛ́yaa cɔwva hinin lɛ́ɛ́siɛn o nɛilan coo.

⁵Kani lɛŋnde ndalen le pɛ a tɛɛmbuula nda tɛɛmbuu a Hala diandaa Israɛlla lan. Kɛ a kon kpede Mɛlɛka mel Israɛlla a Yudaa le, Mɛlɛka-Nɔ-Kpaayaa-Kpow-vo pɛɛn.

⁶La ɲaanun mì la faŋan Babilɔn, vana-vana cɛwnun. O kon la vinin le tɛɛmbuu ndaa le. A toɲa, telen Mɛlɛka minginin màá-o tiiya. O tosalnin ndu mɛɛ o bɛnda a ndu yɛ.

⁷Maa taala kólaa n'siani Babilɔn va Mɛlɛka o ba ni, o va ceendo kpow hɔlla hiŋndo. Vanaa-mangalaa-isɔɔa va mɔima ndɔan kolɔɔ háá mí maa hiŋ nda bolle.

⁸Fɔ́ɔ́fɔ̀, mì Babilɔn del, mò piɔsi! La mɛli ndu yeelan coo. La sui ndu koovan o boolɔnndan, bɔɔle mò sengu.

⁹N dɔw nin Babilɔn danda, kɛ o singu le. Lelan n malnun ndu, mì vana-vana kɔɛnnun o lɛŋnde ndɔ nin. Kani dɛnɛ palaa nda tuisi ndu hoo coo-o tiiyaa o halataala di, O pilan yumbuyumboo coocoo di-di.

¹⁰Mɛlɛka cii dí naa soli ceen. N kɔnnun Siɔn mì n kɔ cɔmnun ɲɛ Mɛlɛka Hala naa tosa-o.

¹¹Mɛlɛka tuu le Babilɔn tɛɛmbuuo. O co masaa Medii yoomuan lueiyo le tuu ndɔ kon peeloo. Maa ndɔɔ o co mingi ni, maa Cɛi-Hala co le ndu-o o co mingi kon lende ni. La cɛɛŋa bálta niaalan, mì la pei lan bɔlɔlan cá-cá.

¹²La heelu tɔɔmasele cɔwvo le kpakio Babilɔn simullo! La cɔɔlu fondala cumulaalan hɔlten handɔɔ coo, la kɛsi kpalilla. La kɛsi vannda le cumullo! Kani Mɛlɛka nɔ tuuvo pum, nduyɛ sɔɛi o tuu a Babilɔnnda-e, mɛɛ mò peelu ndi.

¹³Nɔm Babilɔn co o mɛmma bɛnduan kɔngɔ-o, nɔm nɔ hoo bolofaa taw-vo, i nɔmnde cuu, delɔɔ coo nɔmndo mɛɛlu.

¹⁴Mɛlɛka-Nɔ-Kpaayaa-Kpow-vo cii mɛnan aa: ‹Te lekɛ́ndɛi Hala ya co ni, i co tosa mì vannda hinul nɔm fili-fili maa n'sóónɔ, mà yonda le nɔm delɔɔ coo a cɔwvo.›

¹⁵Mɛlɛka cɔw lɛŋnden a kpaaya ndɔɔ. O cɔw ceendo a taasi ndɔɔ. O tondu halataalaa a kɔlkalu ndɔɔ.

¹⁶O dimi pɛ, mɛnndan ma diinun o halataala, piɔɔ bɛndoo hel o lɛŋnden mɛɛlulan, halataalaa voli, o kon piɔɔ sia, hoeiye fula o soon ndɔɔ nin.

¹⁷Vannda kpow a sim silɔn, a dɔwnun kɔndɔfili, a bii ɲɛ-ɲɛ bila le. Siɛmbulan la bii vanaa teengiaa cilinndon má toosiaa piɔmnda-a, kani ɲɛ fondoo fúú piɔmaa kan co ni, a yoomu le.

¹⁸Ɲɛ fondoo fúú nda co ni, mamɔɔ hun vana o kɔl a nda ni. Paale Mɛlɛka co cɔnɔn a nda len, a co ɲum kpede.

¹⁹Kɛ vana bɛndu Yakɔb-o co maa piɔmaa kan te. Ndu cɔw ɲɔɔn kpow-vo ni. Ndu nɔ polama Israɛlla ni. Diola ndɔlan aa Mɛlɛka-Nɔ-Kpaayaa-Kpow-vo.›»

²⁰Mí Mɛlɛka dimul Babilɔn aa: «Maa kundua n co le ya ni, ɲɛ cɔwvo lekɛ́ndɛi. A nɔm ya pesipesi vanaa-mangalaa-isɔɔa ni, mí tɛɛmbuu masɛi.

²¹A nɔm ya pesipesi soa a vanaa ɲaanun o soa coo-a ni, mí tɛɛmbuu ɲɛla ɲaanannda soa nan-ndan a vanaa ɲaanun a lan-nda.

²²A nɔm ya pesipesi vanpiaandua a vanlaandua ni, mí pesipesi felengia a vanaa yuuvɛiya poambɔa piaandua a cuaambɔa lemboa.

²³A nɔm ya pesipesi vanaa mandaa n'cɔlua a cɔlua ndaa ni, mí pesipesi vanaa vàá a navaa ndaa váà, masaa n'bungaa a simlacia.

²⁴I mingulnin Babilɔn-nda a vanaa co o lɛŋnde len nin-nda dɛnɛ vɔɔn kɛ́-kɛ̀ nda tosal Siɔn.» Sɔɛi fula ya Mɛlɛka o sondo-e co ken ni.

²⁵«Nɔm ya bii tɔ́ɔ́yaa ni, nɔm Babilɔn, nɔm pembii va lɛŋnden kpede tɛɛmbuuo-e, i co nɔm baa holɔɔ, mì ɲindu nɔm fulaa o powta kpovalan coo, mì mɛndul nɔm yinnde bɛndulen coo.

²⁶Vana seelun ndɛnin pow lebol o nɔm ndo le, vana seelun ndɛnin vɛlɛ pow kilaa cɛi le. A toɲa fonda vanin o mɔnɛi nin-ndo n vanin ni.» Sɔɛi fula ya Mɛlɛka o sondo-e co ken ni.

²⁷La heelu tɔɔmaseloo o lɛŋnden nin! La hɔŋ buloo vanaa-mangalaa-isɔɔa tɛɛn, mì la mɔɔsiaa vannda le Babilɔn kuello, la yoongu masɛi he le ndu kuello: Ararat, Minni a Askenas. La handu simlacia vanaa cɔwva le vannda diolan sɛvaa le nda cɔlɔbaa. La yɔɔ soa le ndu delɔɔ coo a cɔwvo, mɛɛ sóónɔa kela kunda bɛndoo nuaa yɛ.

²⁸La mɔɔsiaa lɛŋnde kpow le ndu delɔɔ coo, kɛ taama-taama masaa Mɛdea, masaa n'bungaa ndaa a simlacia ndaa, a lɛŋnde nda co masalen tosaa coo len kpow.

²⁹Lɛŋnden le ɲiiyanin, le hiilunnin a siòònde telen tuu Mɛlɛka-o peelunnin a Babilɔn-ndo. O minginin lɛŋnde Babilɔn-nden lɛŋnde imɔnɔ len, mì vannda piow len.

³⁰Vanaa cɔvaa Babilɔŋaa hiow cɔwvo caa-a malnin cɔwvo, mà kɔ vionnun o sɔngilan nin. A fulanin mayoomu, mà muungu fando-fando maa n'vanlaandu. Diola kobio la kumbinnin, mà mal cɛila ndɔlan yin.

³¹Kiilaa co kɔannanndo kɔɔli, vanaa hivia layoongua co kɔlan a kiltan le masaa dimullo aa: «Kobi nɔmndo biinun kpede,

³²fondala hiavaalan la co la havaalan, kpakio cuu ŋɔ mì vanaa cɔwva vu diallon.

³³Diom Mɛlɛka-Nɔ-Kpaayaa-Kpow-vo dimi-o co hoo ni, Hala Israɛlla aa: «Babilɔn taanin, a yɔkpia ndu maa kpele lɔaa-n'mal nda toosiaa le maalon lɔɔ-o. O lo cɔɔlu cobe, mì telen ndɔ koavaa tiiya.»

³⁴Nebukanɛsar, masaa Babilɔn cii ya sɔɔsiaa, mó mial, mó mal-la fondo maa hɛngɛi fondo. Mó mial-la maa ɲina, mó pei demboo ca a ɲɛm nin hiow naŋɔɔ-on, o kon kɔɔli, mó mal-la.

³⁵Vannda Yerusalɛm dimi aa: ‹Màá dɛnɛ palaa a sanga Babilɔn-nda tuisi naa coo-o muungu nda pila coo!› Vannda Siɔn nda co dimio aa: ‹Màá kooma vanaa nda diw o naa lo-a ma muungu nda pila o lebol!›

³⁶Lelan diom Mɛlɛka dimi a Yerusalɛm o kɔɔ-o co hoo ni aa: ‹I co isɔɔ le niaa, ya co màá mingi le niaa ni! I co mɛmma pee bɛndoo Babilɔn veeliaa, mì veesiaa soonnda ndala mamɛnndan.

³⁷I co Babilɔn mingi bémbélan, nɛɛ tivolla vanin-nda, mì vannda pieow kobi kalaa a siòònde, má yonda a mɔnɛi.

³⁸Sunsun ndɔ, vannda Babilɔn co maa yàlàá iyola, a co pɛɛliaa maa visia biyaa.

³⁹Telen yeemɛi va nda taw-vo, mí toosial nda ɲɛdiaa kɛndɛ-kɛndɔɔ. I co nda koesi háá mì ma bii nda, mà lɔl le lɔ́ɔ́-lɔ́ɔ̀. O kon a tindu lɛnin le fɛɛn a fɛɛn te.› Sɔɛi fula ya Mɛlɛka o sondo-e co ken ni.

⁴⁰‹I yaanin nda nɛɛ nda diw cɔlua-a maa saa téndéa, maa saa kóndó te kon te maa cuinaa toovi.›

⁴¹‹La ce dɛnɛ nɛ? A bii Sesak kobi bɛndu nɔ hoo tɔ́ɔ́ o ceendo coo kpow-vo, a nɔla ndu! La ce dɛnɛ nɛ? Babilɔn siŋnun lɛŋnde veselɛile calii hɛnan vana nin te len vanaa-mangalaa-isɔɔa tɛɛn.

⁴²Mɛmma ihɛllan ma kumbu Babilɔn, mɛnndan biiŋɔnndo o lepilɔɔ kpé, mì ma kumbu ndu.

⁴³Kobila co Babilɔn-ndan la pieow, lɛŋnde ndɔlen le vesan sɛ́ɛ́n mì vanndacieea piaw, vana co lɛ kei lon te.›

⁴⁴Mɛlɛka dimi aa: ‹I co Bɛl piɔm Babilɔnnda simul, mì tosa mò tufu ɲɛ o co miolɔɔ-o. Vanaa-mangalaa-isɔɔa ve lɛnin ifili-filiei lon te. Kpakio Babilɔn komba.

⁴⁵Niaa vanaa niaa, la mal kobio, vana-vana cɛw yoomu ndɔɔ yɔŋii yelenyelen kɔl ni tambɛiyo suinun niaa.

⁴⁶«La vu n'dial te, siòòŋii bii niaa a ɲɛ vannda co dimio o lɛŋnden nin-ndo le. Vɔsi nda dimi pɛ hee, vɔsio pilɔɔ a dimi i celen. Kɔlvesɛiyo tiw o lɛŋnden nin kpede. Vanndo cɛn pɛ a hɔlta vesɛilan, o tow masa hɔlta vesɛi va masalen tosaa-o, ndu bɛɛ koma cal.

⁴⁷Lelan paale vanin, mì simul piɔmnda Babilɔn. Siɛmbula bɛndulan pila o vanin o lɛŋnden kpow nin ni. Vanvílɛ́iya lonin ihini lɛŋ o kobilan nin lɛ́ɛ́siɛn.

⁴⁸Vana tuɛinin kponyoo o halataala a o lɛŋnden coo le delɔɔ Babilɔn-ndo telen vanaa tɛɛmbuunin ndu-a vanin fulaa a ba luaŋ-ndo a kponyoo-o.» Sɔɛi fula Mɛlɛka o sondo-e co ken ni.

⁴⁹Vanaa Babilɔnnda diw o ceendo coo kpede-a co sɛ́lɛ́. Lende koni Babilɔŋaa kalaa bɛɛ vunin le Israɛlaa nda diw-va ni.

⁵⁰Niaa vanaa hɛlun mɔɛi ndɔɛi cɔwve-a, la kɔnnun, la sim o foofo le dɛ! La kɔ lonin nɛɛ niaa kɔanin-nda mì la loonun a Mɛlɛka, mì la va Yerusalɛm yiyanndo coo.»

⁵¹«Siɛmbulan pila o va le naa, telen naa n va nda tueyɔɔ naa yeowlan-ndo ni! O va bɔɔ siɛmbula bɛndu le naa telen mialla hin mà luɛi o fonda diandaa nin, o Cɛi-Hala-o nin-ndo.»

⁵²Sɔɛi fula Mɛlɛka o sondo-e co hee ni aa: «Lelan paale vanin, mì simul piɔmnda Babilɔn. Vana tuɛinin vanaa ya yɔŋulnin-nda caŋndan nɛɛ-nɛɛ ka o lɛŋnden coo.

⁵³Hali Babilɔnnda hel bɛɛ coocoo o halataala, mà kɔ siinguu lon nɛɛ ndaa viannannda, mà kindan kpakilan kɔɔli, vanaa tɛɛmbuuaa komalnin nda lon di. Ya viamnin nda ni.» Sɔɛi fula Mɛlɛka o sondo-e co ken ni.

⁵⁴La yaŋnun-ndɔ, yeelan la co sɔɛi Babilɔn. Diom dɛnɛ palaa bɛndoo co fulaa o lɛŋnde len nin.

⁵⁵Mɛlɛka kposon co kobi kon tɛɛmbuuo lende ni. Yaamɔa va bɛɛ ivɔkɔ-vɔkɔɛi maa mɛmma ihɛlma biiŋuan, yoondiaala nda co lan-ndan la co cuvɔɔ.

⁵⁶A toɲa, vana co ndu tɛɛmbuu-o co nin ndu kpɛɛlun. O co lakɔ ndu delɔɔ coo, mò diw kuubaa ndɔa, mò yimi kpaasiaala ndala cɔw lan. Kani Mɛlɛka co vana caa màá mingio, mò sala vana-vana mɛɛ o bɛnda yɛ ni.

⁵⁷I co simlacia ndaa a vanaa dɛnɛ sinaa ndaa, masaa n'bungaa ndaa, vanaa ndaa kialaa n'yamaa a kuubaa ndaa hɔlla hiŋ. A lɔlnin le lɔ́ɔ́-lɔ́ɔ̀, nduyɛ le fɛɛn a fɛɛn nin a tindu lɛnin te.» Sɔɛi fula masa bɛndoo o sondo-e co ken ni, o nɔ diolan aa Mɛlɛka-Nɔ-Kpaayaa-Kpow-vo-o pɛɛn.

⁵⁸Diom o dimi vɛlɛ-o co hoo ni aa: «Kpaki tongɛi Babilɔn-ndo sungunnin, mì diola ndɔla vilɛilan la ŋɔɛ. Fondo fúú koni vannda sanganin ni, mì nda pila saangian le yinnden.»

⁵⁹Seraya va po Neriya-o ni, po imama Maseya-o, mó kɔa Babilɔn nda Sedekia masaa Yuda o vɔsi hiɔɔlundɔ o va o masalen-ndo. Ndu Seraya kon va dɔ́ɔ́ngɔ́ɔ̀ kpow bollen ni.

⁶⁰Mí Yeremi ndóò sɛva dɛnnda palaala kɛ́-kɛ̀ va hunɔɔ tolɔɔ Babilɔnnda coo, a sɔɔn kɛ́-kɛ̀ dimin mun a Babilɔn o kɔɔ o sɛbɔɔ pum nin.

⁶¹Mí Yeremi dimul Seraya aa: ‹A tiiya pɛ Babilɔn, a kindin a dimi sɔɔn co o sɛbɛ kon nin-ndon kpow coocoo kpélén.›

⁶²O kon a dimi aa: ‹Mɛlɛka, nɔm pila dimi ndi lɔ́ɔ́ kon ni, aa kobio ho tambunin, aa cɔlu lonin te, vanaciee lonin te, maa o siŋnunnin pɔmndo le lɔ́ɔ́-lɔ́ɔ̀.›

⁶³O kon, telen n ciinin sɛbɛ kalaa dimi-o, a baa ndu o powvo, a viow ndu Efrate o peelo.

⁶⁴O kon a dimi aa: ‹Nuaa Babilɔn co hunɔɔ lo ni pɛ, yukpɛɛ bɛɛ o cuenin bollen o dɛnɛ palaa Mɛlɛka tuisinin ndu coo-o bɛngu le.› Sanga fondoo fúú vanndacieea co ni.» Nanu sɔɔn Yeremi-on mɛɛlu ni.