Read Kissi Yeremi 52 Bible Online

Yeremi 52 - Kissi bible

Yeremi 52

¹Sedekia ndóò nɔ vɔsilan bidiin a ò pilɛ, mó siŋnun masaa o tàndá Yuda-o nin, mó tosa masalen vɔsilan tɔ́ a ò pilɛ Yerusalɛm. Kala ndɔ ndóò nɔ diolan aa Hamutal ni, cua Yeremi fula Libna-o.

²Mó tosa ɲɛ hɛnan Mɛlɛka loo maa Yehoyakim.

³Mí dɛnnda va tosanndo Yerusalɛm a o masale Yuda len nin-ndan la tɛɛmbuu Mɛlɛka kɔllo. O mɛɛlulan, mó toaw vanaa ndɔa polon. Mí Sedekia simul Nebukanɛsar masaa Babilɔn.

⁴Vɔsi Sedekia suili vɔsilan laŋɔmahiɔɔlu o masalen-ndo, paangii tɔ́ndɔɛi va malɔ tɔ́, mì Nebukanɛsar cua vanaa ndɔa cɔwva kpow, mó hinul Yerusalɛm. Mí vanaa ndɔa cɔwva kila dɔ́ɔ́ngɔ́ ndaa Yerusalɛm ciee-lekɔɔ, má tiila kobio, má yaŋ yaŋɔɔ cɔwvo o kobi kalaa balɔɔ sɔ́.

⁵Mí kobio lo o tiilaa lende háá o vɔsi tɔ́ a ò pilɛndɔɔ o masale Sedekia len.

⁶Mí yima fofolan má toal vanaa va Yerusalɛm-nda coo, ɲɛdiaa kɛ́-kɛ̀ ve lɛ nda o ba le dioo le. O paangii hiɔɔlundɔɛi malɔ leŋɔmahiɔɔlu,

⁷mí Babilɔnnda buli tɛɛngei o kpaki va kobio balɔɔ-o. A balɔɔ Babilɔnnda ndáà balu kon kobio sɔ́-o, ɲumndan tolɔɔ, mí vanaa cɔvaa Yudaa ɲaanun, má mal kobio, má kei a dio-pɔmbɔ va o kpakila tiɔnndan tɛɛn a kpengii nakɔ masaa-o. O kon kɔɔli, má bii nɛi óò kɔɛ a ba bóllo Yurdɛn-ndo.

⁸Kɛ mí vanaa cɔvaa Babilɔnnda yim masaa Sedekia kiltan kɔɔli, má kɔ bendal ndu o dɛngbɔɔ Yeriko nin, mí vanaa ndɔa cɔwva kpow ɲaanun, má mɛi ndu.

⁹Mí Babilɔnnda bii ndu, má yàà ndu o masa ndaa lo, nɛɛ o va Ribla o lɛŋnde Hamat len nin-nda. Lon o kelu yamɛi ndɔɛi ni.

¹⁰Ribla lon koni o dii poaa Sedekia-a fuɲa nda o hɔl ni, a simlacia Yudaa kpow.

¹¹O kon kɔɔli, mó pesipesi Sedekia hɔltan, mó baa ndu yɔlɔn n'daɲan, mó kɔa a ndu Babilɔn, lon o kɔ lo o kaasoo ni háá mó vu.

¹²Vɔsi Nebukanɛsar suili vɔsilan tɔ́ a laŋɔmahiɔɔlu-o, paangii ŋuɛɛnundɔɛi va malɔ tɔ́, mí Nebusaradan luɛi Yerusalɛm ciee. Ndu va bolle vanaa kandaa masaa Babilɔn ni, o va vana pilɛ o vanaa masaa Babilɔn ndóò laalan taw-va tɛɛn.

¹³Mó loam Cɛi-Hala-o, cɛi masaa, a cɛila va o kobio nin-ndan, taama-taama la simlacia.

¹⁴Mí vanaa cɔvaa Babilɔŋaa va bolle vanaa kàndàà masaa kɔɔli-a komba kpaki ndóò balu Yerusalɛm-ndo.

¹⁵O kon mí Nebusaradan kɔa a vanaa ndáà lo o kobio nin-nda: yungula vanaa bala fondoa, vanaa ndáà kɔ yɔngun nda pila o masaa Babilɔn ndo-a a vanaa tɔ̀a, aa caa baalala labalan-nda pɛɛn.

¹⁶Kɛ mó mɛi vanaa bala fondoa tiŋ lon le nakɔla n'rɛsɛnndan a ciɛɔn koma vàá.

¹⁷Mí Babilɔnnda pesipesi sungbuma n'daɲama va o Cɛi-Mɛlɛka-o sondoo-an, ɲɛla ɲaanannda soa nan-ndan a kpɛɛnɛi bɛndui mamɛŋii va ikɛsiaa o bɛ́ɛ̀-e. Má sooluu daɲan mun kpow, má kɔannun a mun Babilɔn.

¹⁸Má cɔwviaa vɛlɛ ɲɛm ndáà toosiaa a daɲan le baala lekaando-on: bombola kɔandaa lapultan, peelelan, mɔɔn, bonyun fuusan a taalala kólaalan a ɲɛm-laandun celen toosian a daɲan le baala lekaandon-ndon.

¹⁹Mí simlacinɔ kpalilla cua vɛlɛ ɲɛm ndáà toosiaa a sianion a á volin latámán-ndon kpow: kpángàlan, kpɛɛnɛn lalɔɔon, bonyun fuusan, bombola kɔandaa lapultan, ɲɛ kɛsiaa lafitinaa, culan a ɲɛm-laandun celen.

²⁰Sungbuma miɔnndan, kpɛɛnɛi bɛndui mamɛnnde a navaa n'daɲaa tɔ́ a à ŋiɔŋaa ndi cal coo-a. Masaa Salomɔn ndóò cɔw ɲɛm mun kpow le Cɛi-Mɛlɛka-o ni, vanaa nɔla lusul ndɔɔ sinaa le.

²¹Sungbuan, le kɛ́-kɛ̀ le va bandei dunndo tɔ́ a leŋɔmaa, pindo-pindoo dunndo tɔ́ a lediin, celullo suon n hiɔɔlu, koongoo va lenin.

²²Kpufɛlan la va o sungbuma kalan bollen, o kɛ́-kɛ̀ va helɔɔ dunndo leŋuɛɛnu. Ma va makɛɛmian o vala n'daɲaa a tuuliaala n'krenadelan ndáà toosiaa a daɲan-ndan. Ɲɛ pilɔɔ kpé sungbuma miɔmma man a tuuliaala va lecoo lan la va ni.

²³Tuuliaala n'krenadelan belaŋɔmahiɔɔlu a laŋɔmpum la va o kpengon ni, faw-faw tuuliaala n'krenadelan kɛmɛ la va o vala n'daɲa kon balɔɔ ni.

²⁴Mí bolle kpalilla bii Seraya bolle vanaa-solia-lasálàá, Sofoni vana va ndu ikɛi o baalaa nin-ndo a vanaa-solia-lasálàá yaa va le cumullo o dio Cɛi-Hala-o sondoo-a.

²⁵Mó bii vɛlɛ vana va bolle vanaa cɔwva-o, vanaa ŋɔmmɛw o vanaa masaa ndóò laalan taw-va tɛɛn, o kon kɔɔli, mó bii vɛlɛ vana sɛvaa simlacinɔ vanaa cɔwva. Ndóò sɛva vannda le cɔwvo ni, handun niko o n'van belaŋɔmpumaa ndáà fula Yuda mí ndáà va calle Yerusalɛm-nda coo.

²⁶Mí Nebusaradan kɔa a nda Ribla o masaa Babilɔn-ndo.

²⁷Mí ndu diw nda Ribla lon, o lɛŋnde Hamat len nin. Nuaa nda kɔɛ a Yudaa levil polon ni, má faŋan lɛŋnde ndalen.

²⁸Mɛɛ vanaa Nebukanɛsar bii Yuda, mó kɔɛ a nda o cɛlen nin-nda va sɛ́lɛ́ yɛ co hoo ni: O vɔsi ŋɔmmɛwndɔɔ nin, vàála yaa n'van bidiin a vanaa yaa (3 023).

²⁹Vɔsi o suili vɔsilan tɔ́ a laŋɔmaa o masalen-ndo, mó kɔa a n'van kɛmɛ leŋɔmaa beleyaa a vanaa ŋiɔn (832) fulaa Yerusalɛm.

³⁰O vɔsi bidiin a oyàándɔɔ, mí Nebusaradan bolle vanaa va diolan kandaa-a kɔa a Yudaa n'van kɛmɛ leŋɔmmɛw belehiɔɔlu a à ŋuɛɛnu (745). Faw-faw niko n'van vàála hiɔɔlu kɛmɛ leŋɔmpum (4 600)

³¹Vɔsilan beleyaa a laŋɔmmɛw o kɔla nda kɔɛ a Yoakɛn masaa Yuda o biyɔɔ nin-ndan kɔɔli, mí Evil-Merodak sul masaa Babilɔn. Paangii tɔ́ a idiinndɔɛi va malɔ bidiin a leŋuɛɛnu o vɔsi kon nin, mó ca Yoakɛn masaa Yuda ɲia, mó soli ndu o kaasoo.

³²Mó soaa sɔɔn kɛndɔn o ndu lo, mó ke ndu fonda, fonda ndɔɔ ndóò hiow fonda masaa va ndu o ba bɛngu Babilɔn-nda.

³³O cɛl lɛ lɔ́ɔ́-lɔ́ɔ̀ mì Yoakɛn vownun volɔɔla kaasolan te. Handɔɔ o kon coo, nda masaa tuŋ vannun nin dioo ni.

³⁴Nuaa masaa Babilɔn lo Yoakɛn ɲɛm ndóò nɔ makoo-on yɔngoo lepalaa-lepala ni háá mó vu.