Read Kissi Yeremi 6 Bible Online

Yeremi 6 - Kissi bible

Yeremi 6

¹Vanaa fula o polale Bɛnyamɛn-nden nin-nda, la mal Yerusalɛm mì la ɲaanun. La hɔŋ buloo Tekoa ciee, la heelu lɛfɛ cɔwvo Bɛt-Hakerɛm! Kani n co dɛnɛ palaa, a dɛnɛ vɔɔndo cɔu hunɔɔ cɔnɔnndo a ba luaŋ-ndo.

²Tofa vɔ, i tɛɛmbuunin Yerusalɛm, kobi naŋ kon hɔlla-o, ndu cua salama kon pɛɛn.

³Vanaa mandaa n'cɔlua co kɔlan o ndu lo a kundala cɔlua ndaa, ma va cɛila-kolala-toandaala ndalan baŋɔɔ ndu coo, mì cɔlua vana-vana va diolan o bungɛi ndɔ nin, o balɔɔ kon sɔ́.

⁴A co dimio aa: «La cɔn le cɔwvo! N kɔ delnun nda coo a telen paalen o pol déŋ. Éé, mɔnɛi co hee le naa ni, paalen le yɔngun, vunduma paale yɔnganndan ma co kɔlan a bandei.

⁵La cɔn mì n kuelnun nda cɔɛllɛn, mì n tɛɛmbun cɛila lemasala ndalan.»

⁶Kani o Mɛlɛka-Nɔ-Kpaayaa-Kpow-vo dimi-o co hoo ni aa: «La kioŋ yɔmnde le keiyo lecoo, mì n kei o kpakio coo, mì n kuel Yerusalɛm.» Kani kobi bɛnda le tambei-yo o co ni, delɔɔ coo daama co lon ni.

⁷Maa mɛɛ soon kólaa soli mɛnndan vasu-vasu yɛ, lende o soli dɛnɛ ndɔ vɔɔndo vasu-vasu ni. Vana tui sɔɛi celen ndon te, fɔ vannda saangiaa a dɛnɛ vɔɔndo tosaa, ɲɛ ya co cɔu lɔ́ɔ́-lɔ́ɔ̀-o co ɲɛ nɛyaa a boolɔnndan ni.

⁸Yerusalɛm, bii silaa yɔŋii ya faŋan nɔm kɔɔli, mì dɔw lɛŋnde nɔmnden yɛɛvɛ, vana ve lɛnin ndon te.»

⁹Mɛlɛka-Nɔ-Kpaayaa-Kpow-vo dimi aa: «Israɛlaa tɔ̀a cɔwviannin mɛɛ vana cɔwviaa rɛsɛnndon nuaa yɛ, mà cɔɔlu balan keela mɛɛ vana kiandaa n'rɛsɛnndo keela balan o lɛvon yɛ.»

¹⁰O nɛ̀ɛ̀ lo ya soo yɛ? Nɛ̀ɛ́-nɛ̀ ya kanalan yɛ mò yaŋnun ya? A buli lani le, lelan a tui isɔɔ le. Sɔɛi Mɛlɛka-e nda muungu mamɔɔ ni, i bii nda bɛɛ iyeema le.

¹¹I co o piaa cá a kɔltuw Mɛlɛka-o, i nɔla ndu mandanndo o kɔl te. «Cuiŋi ndu cuaambɔa co o nɛilan coo-a coo, a kundala cuaa felengia coo. Kani a kɔanin a nda kpow o biyɔɔ nin: caa piaandua a vanlaandua, vanaa yuuvɛiya a vanaa yuuva nin taw-va.

¹²Tuma ya mululunnin vanaa co o lɛŋnden nin-nda-o, cɛila ndalan la kɔanin vanaa celen o ba, mì ciɛɔn ndan a laandaa ndaa bɛɛ lo le caanda. Sɔɛi fula Mɛlɛka o sondo-e co ken ni.

¹³Kani kandɔɔ a cuaambɔ hiow dɔɔnanndo nda tɛɛn-ndo, kɔ bii a kaasonɔ hiow nda faw-vo, nda kpow, vana-vana nɔ hɔlten tɔnɔ ndɔ ndu pila-o kɔɔli. Kandɔɔ a vanaa-tɛɛngaa-diom Hala-a, kɔ bii a vana-solia-lasálàá, nda kpow vanaa lakafaa kposon.

¹⁴A co boolɔnnda vanaa nia cɛw mɛɛ o bɛnda yɛ le, a co dimio aa: «Kɔlɲuloo! Kɔlɲuloo! Kɛ kɔlɲulu co le.

¹⁵Mí siɛmbulan la bii pá nda a kela nda nɔɔlɛi kon? Kɛì-kɛì bɛɛ! Siɛmbulen bɛɛ le bii nda a kon kpow le, a sina bɛɛ maa a tosa dɛnɛ vɔɔn te. Lelan mí Mɛlɛka dimi aa: A delnin latulu nda vanaa co delɔɔ-a, nda pila cannunnin lɛŋ o telen ya mululunnin nda-o.

¹⁶O Mɛlɛka dimi-o co hoo ni aa: «La sim-ndɔ o nɛilan coo mì la mɛɛndian, la ɲuuniaa vɔ le nɛila masindɛlan, ɔ́ɔ̀ o va nɛi kɛndɔɔ-o, la kɔ lecoo, mì la sɔla pɛngio le kɔlta niaalan! Kɛ má muli aa: ‹N kuenin o nɛi kon coo le.›

¹⁷I kɛsi kpalilla niaa ikɛi, la yaŋ diom buloo nilan. Kɛ mí la muli aa: ‹N yɛŋnin lani le.›

¹⁸Lelan, niaa vanaa-mangalaa-isɔɔa, la yaŋ nilan, mì la sina ɲɛ co nda tosalan-ndo!

¹⁹Lɛŋnden, yaŋnun. I co dɛnɛ palaa tuisi vannda ha coo, tɔnɔ yiyannda ndalan co kon ni. Kani a yeŋ nilan o tɔŋ nuu le, má kɛɛ sɔɔn nun.

²⁰Kpeku yɛɛ ya nɔ yɛ a ansan co fulaa Saba-o, te kon te a ɲɛm cun kɛndɛn fula o lɛŋii celen nin pɔ́-pɔ́-on? Sálàla loamaala niaalan la hɛnan ya le, sálàla niaalan la nɛŋi ya kɔl te.»

²¹Lelan Mɛlɛka dimi ni aa: «I handunin powta boŋaalan vannda ha laci, lon fuɲaa nda poaa ndaa boŋinin ni, mì vanaa cal nɛɛ pilɛ-a a canyan n va boŋio lon latulu mà cuu.»

²²O Mɛlɛka dimi-o co hoo ni aa: «Vannda co fulaa o lɛŋnde co a ba luaŋ-ndo len nin. Vannda kunda bɛndoo co hunɔɔ cɔnɔnndo o lɛŋnden mɛɛlulan.

²³Kpaasiaalan a báltan la co nda o laba, a vesa kɔltan, a nɔ iɲíí le. A co kulaa maa mɛmma ihɛl, a hel o soa coo, a sim simnda cɔwlan vana ca ko aa vanndo ndu pilɛ ni, le nɔm cua laandoo Siɔn cɔlɔbaa.»

²⁴«Naa n tueyɔɔ nda diom, mí diallon vu naa. Mí n buulan taw-taw, mí n sanga mɛɛ vanalanɔɔ sanga o violɔɔ yɛ.

²⁵La kɔa o yondolan nin te, la fula o nɛilan coo le, kani yaamɔɔ co lon a mɔɛi cɔwve o ba, siòònde bii vannda taw nɛɛ-nɛɛ ka.»

²⁶«Cua laandu nuu, yiinun yala yuuloo o caŋ, mà pimbul o loolio nin, mà tosa biisio maa biisi pole pilɛ, mà tuisi mɛmɛan a mɔnɛi bɛnduei! Kani vana tɛɛmbua hunnin o telen n venin ndu kɔl too.

²⁷I kɛsi nɔm le vanaa nia kɔlɔɔ solio maa kpaki, haliko ma sina kela ndaa, mà soli nda kɔlɔ.»

²⁸Nda kpow vanaa nila kalua nda co ni, vanaa muuluannda, a kendu nilan maa n'daɲa, maa n'cilin, nda kpow a laasian.

²⁹Kùùlan la co fuulaa tuŋ, liie tenga mí i lo pɛ o yin. Fondo fúú nda co volion malɔɔ o yin ni, nɔɔ bii mun-ndo faŋannin te.

³⁰A veelu nda aa: ‹Volin vɔɔnndon›, kani kɛɔ Mɛlɛka kɛɛ nda ni.