Read Kissi Yeremi 8 Bible Online

Yeremi 8 - Kissi bible

Yeremi 8

¹O kon mí Mɛlɛka dimi aa: «O telen kon, a solinin paala masaa Yuda o sɛila ndalan nin, mà soli paala simlacia ndaa, paala vanaa-solia-lasálàá, paala vanaa-tɛɛngaa-diom Hala-a a paala vannda Yerusalɛm.

²Mà tɛ̀i lan o paalen, o paangei, mì loeon bɛɛ n lɔɔ lan. Kani ɲɛm mun ndáà yeema ni, má del mun kɔɔli, má yiinun a mun, má baŋ mun vulan o labɛngunin. Lelan, vana kondunin paala kalalan te, vana minginin ndan kumbɔɔ le, lon la co lo ni háá mì la siŋnun kɔmbɔɔsio o foofo kon coo.

³Piɔ́mndo vanaa tɔ̀a lonin yoomu o polale vanaa vɔɔŋaa kan kpow tɛɛn-nda hiawnin yeema a yoomoo, nɛɛ ya sɛŋinin nda o fondala yɛ́-yɛ́lan-nda pɛɛn.» Sɔɛi fula Mɛlɛka-Nɔ-Kpaayaa-Kpow-vo o sondo-e co ken ni.

⁴Dimul nda aa diom Mɛlɛka dimi-o co hoo ni aa: «Vɛ̀ɛ̀ vana del pɛ a cen ndɛ le? Vɛ̀ɛ̀ vana pɔw pɛ nɛiyo a muungu lɛ o nɛi le?

⁵Ɔ́ɔ̀ niko le kɔlɔ vannda ha Yerusalɛm, a luɛi nila kalulan tosaa-o? A co baŋnɔnndo o kafala ndalan coo, mà va kɛɔ le mangalanndo.

⁶I co nilan yaŋɔɔ yékén o sɔɔn ndan: a co isɔɔ mɛɛ nda bɛnda le sɔɛi yɛ le. Vana-vana co dɛnɛ vɔɔn ndɔɔ malɔɔ le, a co ɲunaa aa: ‹Yɛɛ ya tosa yɛ hoo?› Mɛɛ nda co kpede, vana-vana muungu kiltan a yeemɛi maa so co ɲaanɔnndo a yeemɛi le kɔlan o cɔwvo-o.

⁷Hali yow yɔɔyaa cɔcɔɛi vilɛiyo sina telen ndɔɔ, piinndo, lɛɛfɛnndo a yow yɔɔyaa kɛsii vilɛiyo, a sina telen nda hun-ndo. Kɛ vanaa nia sina silala Mɛlɛka lan te.»

⁸Le yɛɛ niaa co yɛ dimio aa: «Vanaa kɔlkalua naa n co ni, tɔŋ Mɛlɛka-o co naa o ba»? A toɲa, o kafalan coo daama vanaa sɛvaa latɔŋnda co ndu sɛvaa a kpɛkile lacòò len ni.

⁹Siɛmbulan la bii vanaa kɔlkalua, siòònde bii nda taw, a biinun o yaŋɔɔlen. Nda kelun sɔɛi Mɛlɛka-e yii ni. Ɔ́ɔ̀ niko kɔlkalu ndaa?

¹⁰Lelan, i co laandaa ndaa malɔɔ vanaa celen o ba, mì mal ciɛɔn ndan vanaa hialunin mun-nda o ba. Kani kandɔɔ a cuaambɔɔ, kɔ bii háá a kaasonɔɔ, nda kpow vana-vana co fafaláà le ɲɛ-sɔlaa. Kandɔɔ a vana-tɛɛngaa-diom Hala-o, kɔ bii a vana-solia-lasálàá, nda kpow a vow balan o kafalan nin.

¹¹A co pavii cua nuu pulɔɔ sɔvɛ le, vanaa nia pɛɛn. A co dimio aa: «Kɔlɲuloo, kɔlɲuloo», kɛ kɔlɲulu co le.

¹²Siɛmbulan láà bɛnda mì láà bii nda le dɛnnda nɔɔlɛila nda co tosaa lan. Kɛ siɛmbulen bɛɛ le co nda le, a kɛɛ lan pɛ. Lelan a delnin nda vanaa bɛnda le delɔɔ-a latulu, a boŋnin mà del o telen ya lɔanin nda-o». Sɔɛi fula ya Mɛlɛka o sondo-e co ken ni.

¹³Mí Mɛlɛka dimi aa: «I yeema mi cii a nda, rɛsɛŋun ve lɛnin o rɛsɛn tumndo coo le, buumbun ve lɛnin o vosu tumndo coo le, pei simbulunnin, ɲɛ yáà ke nda-o hialunnin nda.»

¹⁴«Le yɛɛ naa n co yɛ lou icali? N cuungian nɛɛ pilɛ, mì n kɔɛnnun o kobila kpakilan nin, mì n kɔ vunnun ndon! Kani le vuo Mɛlɛka Hala naa kɛsi naa ni, o co naa mɛmma bɔ̀tàán koesi, le tùú naa n cua hakio a ndu Mɛlɛka-o.

¹⁵Kɔlɲuloo naa n va kɔl ni, kɛ dɛnɛ kɛndɛ kɛ́-kɛ̀ co naa komal te. Siongɔɔ naa n yeema ni, kɛ dɛnɛ palaa sii co hiyanndo ni!

¹⁶Vana tuɛi soa ndɔa diom cɔnɔnndo Dan dí, lɛŋnden kpow le co ɲiiyaa a caŋ nda co-o. A co hunɔɔ le lɛŋnden a ɲɛm co lenin-ndon tɛɛmbuuo, le kobio a vanaa co lenin-nda tɛɛmbuuo.»

¹⁷«I co kɛvaa lólòla nɛyaa yɔɔ niaa tɛɛn, ɲɛ-ɲɛ kuunanin nda niaa lɔwviaa le.» Sɔɛi fula Mɛlɛka o sondo-e co ken ni.

¹⁸I yeema mi faŋan mɔnɛi nii o hɔl, kɔl nuu co o mɔnɛi bɛnduei nin.

¹⁹Caŋnda vanaa nia la co sɔɛi o lɛŋnde levil-ten nin aa: «Vɛ̀ɛ̀ Mɛlɛka co lɛ Siɔn te? Vɛ̀ɛ̀ masa ndɔɔ co lɛ icali lon te?» «Le yɛɛ nda tɛɛmbuu yɛ ya kɔllo a piɔmaa ndaa, má tɛɛmbuu ya kɔllo a diɔmun mialla?»

²⁰Telen koavaa hiow, vɔɔlen le cuu, kɛ n sɔla cinda le few!

²¹Sanga bɛndoo co vanaa nia coo, mɔnɛi co ya o kɔl, diallon n vi ya.

²²Vɛ̀ɛ̀ kooma cɛvaa ma co Kalaad le? Vɛ̀ɛ̀ vana dɔavaa ladanda co lɛ lon te? Le yɛɛ nɛ vanaa nia co niko siongɔ̀ɔ̀ sɔla le?

²³Te bolle nilen léè pɛ̀ pɛ a mɛnndan, mí hɔlta nilan láà siŋnun peela leboltan a mɛmɛan, paalen a ɲumndan yàá vanin vanaa nia vi-a caŋndo ni.