Read Kissi Yeremi 9 Bible Online

Yeremi 9 - Kissi bible

Yeremi 9

¹Màá yáà kɔnnun ko o lɛŋnde veselɛilen nin, mì yáà kɔ va o pangala vanaa kelaa pɛngi nin-ndan bɛngu, haliko mi yáà faŋan vanaa nia ikɛi, mì yáà kɔ calnun ndon polon. Kani mɛɛ nda co kpede, vanaa lakafaa nda co ni, vanaa suundaa kposon.

²«Maa kpaasiaa diɛɛmui ndɛi co ni, o co o dɛnɛ sandaa tosaa nin te nda sul n'masa le, a kafalan kposon nda co masalen tosaa ni. A sina vɛlɛ ya le, hiyanndo tuŋ nda co a dɛnɛ vɔɔndo tosaa ni.» Sɔɛi fula ya Mɛlɛka o sondo-e co ken ni.

³Vana-vana bɛnda mò mandan a puapilɛ ndɔɔ, vana-vana co caan ndɔ toɲa dimul te, kani vana-vana co kafalan tosaa a vanndo pilɔɔ, vana-vana dimi sɔɛi kɛndɛ a caan ndɔ le.

⁴Vana-vana co caan ndɔ kafalan tosallo, vana-vana dimi toɲa le. Caa pila nda caa còòlan dimio ni, o kon nda co kɛɔ le muungoo ya o ibuŋ ni.

⁵Dɛnnda vɔɔnndan tuŋ nda co hiyanndo tosaa ni, còòlan keiyo dimio má hiaw, a kɛɛ le ya Mɛlɛka sinaa pɛ!» Sɔɛi fula Mɛlɛka-Nɔ-Kpaayaa-Kpow-vo o sondo-e co ken ni.

⁶Lelan, o Mɛlɛka-Nɔ-Kpaayaa-Kpow-vo dimi-o co hoo ni aa: «I co nda dindi a yinnden mì soli nda kɔlɔ. Kani mɛɛ celen tosaa co a vanaa nia le!

⁷Maa lebɛlɛn diɛɛmule ndalen le co le diyɔɔ ni, còòlan kínɛí la co nda o lasondo ni, sondo yeelɛiyo nda nɔ a caanda ni, kɛ o kɔlta ndalan nin, a co nda yaŋɔɔla nɛyɔnndan hendullo.

⁸Sɔɛi fula Mɛlɛka o sondo-e co hee ni aa: «Vɛ̀ɛ̀ i bɛnda mì kpaa vannda ha le dɛnnda lan te? Vɛ̀ɛ̀ i mingul vannda ha mɛɛ dɛnnda ndalan la co yɛ le?»

⁹I yeema mi caŋ, mi cɛɛŋun o pembon coo, mi soli condii biisiei o dɛngbɛla vesɛila co o lɛŋnden nin-ndan coo, kani la ŋɔɛ, vana-vana co lɛ kei lon te, vana tui lɛ cɔlua kundaa diom lon te. Yowva coocoo a visia yondoa piow lon few-few.

¹⁰I minginin Yerusalɛm bémbélan kposon, mì siinguu ndu buulula tunaa yondoa. I tosanin mì kobilan Yuda la lo fondo, vana-vana venin lenin te.»

¹¹Ɔ́ɔ̀ vana nɔ kɔlkaloo le dɛnndan ndan bilaa biyɔɔ-o? Vana sondo Mɛlɛka-o dimul sɔɔn mun-ndo, o yonda mun! Le yɛɛ lɛŋnden le tambu yɛ, mí le ŋɔa maa lɛŋnde veselɛile vana-vana kei nin te len?

¹²Mí Mɛlɛka dimi aa: «Le tùú nda kɛɛ tɔŋ ni yáà yɔngu nda-o biyɔɔ-o, le tùú nda kɛɛ ya nilan yaŋɔɔ, má kɛɛ le diom nuu biyɔɔ-o.

¹³Le tùú nda del yiyannda ndala nda pila lan kɔɔli, má kɔa halaa Baal-la kɔɔli, maa mɛɛ fuɲaa ndaa mamaa pɛɛku nda yɛ-o,

¹⁴diom ya Mɛlɛka-Nɔ-Kpaayaa-Kpow-vo, ya Hala Israɛlla dimi-o co hoo ni aa: «I co vannda ha bil loloo ke mà de, mì koesi nda bɔ̀tàá.

¹⁵I co nda sɛŋi vanaa-mangalaa-isɔɔa nda sina le-a tɛɛn, vanaa nda a fuɲaa ndaa sina le-a pɛɛn, o kon mì tol nda kɔɔli a mɔɛi cɔwve háá mi cii nda kpede.»

¹⁶O Mɛlɛka-Nɔ-Kpaayaa-Kpow-vo dimi-o co hoo ni aa: «La keela kɔllo mì la veelu vanlaandua caa caŋndo-a, mì la dimul nda mà hin. La yɔɔ kiilaa vanaa hiow caŋndo caa-a kɔɔli, mà hin.

¹⁷A keleŋa hunɔɔ mà hun kisu naa lan coo, mì mɛmɛan ma tol naa pulua-pulua, mì ma tol naa maa mamɛn o lahɔl.»

¹⁸Kani yeelan a somisominndan la co diomndo fulaa a ba Siɔn-ndo aa: «Kpòkóó dɛnɛ! Mbɔ̀ naa n tambu fɔ́! Siɛmbulan la tol naa kangalan, fɔ mi n mal lɛŋnden nden. Kani a cii calta naalan puusiaa!»

¹⁹Lelan niaa vanlaandua, la yaŋ nilan o diom Mɛlɛka-o, mì nila niaalan la tuei sɔɔn co ndu fulaa o sondo-on. La pɛɛku cuavaa niaa laandua caŋ biisio, la pɛɛkuan caŋ kalaa vellaa-velle aa:

²⁰«Kani piɔ́mndo hel o diola naala pɔmbɔlan, mó luɛi o cɛila naala sɔvɛlan nin. O co cuaambɔa biwvo o nɛilan coo, a felengia co o bɛ́ɛ̀lan-nda.»

²¹Dimul nda maa sɔɛi fula Mɛlɛka o sondo-e co hee ni aa: «Vanvílɛ́iya delinin mɛɛ kɔmbɔɔsio co o tiuvaa lɛŋ yondoo nin nuaa yɛ, mɛɛ yasalan la deli vanaa koavaa kɔɔli yɛ, la vana-vana co cɔwviaa le lan.»

²²O Mɛlɛka dimi-o co hoo ni aa: «Vana kɔlkaloo lisan le kɔlkalu ndɔɔ le, vana mayoomoo lisan le yoomuma ndɔan te, vana bolofaa lisan le bolofaa ndɔɔ le.

²³Kɛ vana yeema pɛ le lisanndo, ndu lisan le kɔlkalu o sɔla mó sina ya-o, le sinaa maa ya co Mɛlɛka ni. O co kɛndɛi, dɛnɛ sandaa a sakpoyɛi tosaa o lɛŋnden coo-o, vanaa vaa lende hɛnan ya ni.» Sɔɛi fula Mɛlɛka o sondo-e co ken ni.

²⁴Mɛlɛka dimi aa: «Paale co hunɔɔ, mì simul vanaa dii toomaa n'faloo daama-a:

²⁵Esiptea, Yudaa, Edɔmnda, Amɔnnda, Moabua a vanpiaandua sendin kangbalan-nda kpow, á co icali o lɛŋnde veselɛilen nin-nda pɛɛn. Kani vanaa kan kpow a dii tooma le, Israɛlla bɛɛ kɔ̀ndéa nda co o kɔlta ndalan nin ni.»