Read Kissi Cɛɛŋɔnnda Yeremi lan 2 Bible Online

Cɛɛŋɔnnda Yeremi lan 2 - Kissi bible

Cɛɛŋɔnnda Yeremi lan 2

¹«Éé vannda! La ce dɛnɛ nɛ? Maalii cii kobio Yerusalɛm kumbɔɔ a yumbuyumbu kɔl ndɔ tuwvo. O lo o halataala, mó viaw biilu Israɛlla o lɛŋnden coo. Tuma o tambu kɔllo a Israɛlla-o, mó pɔɛɛn maa ɲɛ ndɔ kɛsiaa n'peloo nda co ni.

²Mí Mɛlɛka tɛɛmbuu calta Yakɔb lan kpow a kɔltuwvo, o tosa iɲíí le. Mó puusiaa kobila Yudala va o kpakilan nin-ndan. Mó viaw nda lɛŋ, mó soli masalen a simlacia o báà nin.

³O kɔltuw ndɔ bɛndu kon nin, mó tɛɛmbuu tiindan Israɛlla kpow. Lɔ́ɔ́ yaamɔɔa hinul nda-o, o cɛl le nda malaa le. Mó mɛndul yinnden o lɛŋnde Yakɔb len nin, mí le loam ɲɔɔ nda balɔɔ sɔ́.

⁴Mó kindu kpaasiaa nda kɔɔli maa n'yaamɔɔ, mó yaa ba kɛndɔɔ le kɔɛi malɔɔ nda kɔɔli maa n'yaamɔɔ. Mó tɛɛmbuu ɲɛm kɛndɛn mun naŋ o tofaa-on kpow. Mó cuiŋi kɔltuw ndɔɔ o Cɛi-Hala-oSiɔn coo maa leyin.

⁵Mí Maalii siŋnun maa yaamɔɔ naa. Mó tɛɛmbuu Israɛlla a cɛila lemasala ndalan kpow, mó tɛɛmbuu kpakila ndalan. Mó kui ŋɔɔcanndan a cɛɛŋɔnndan o Yuda lo cɛinin.

⁶Mó pial kunga nakɔ ndɔɔ, mó tɛɛmbuu fonda náà n cuungian ndu o hɔl-lo. Mí Mɛlɛka tosa mí vannda Siɔn pɔɛɛnun kafolan a cuungiannda palɛi pɛngiaalan. Mó tɛɛmbuu masaa a vanaa-solia-lasálàá bɛ̀ɛ̀lan a kɔltuw bɛndoo.

⁷Mí Mɛlɛka kɛɛ fonda-loamaa-lasálàá ndɔɔ, mí cɛi-kola-toandaa ndɔ diandaa nɛinun ndu. Mó mal kpakila cɛila lemasalan Siɔn yaamɔɔa o ba. Mí yoondiaalan la va sɔɛi o Cɛi-Mɛlɛka-o nin, maa o paale kafo coo.

⁸Mí Mɛlɛka ndóò kialu le kpakilan Siɔn koombiaa. Mó toandu yoolen nda laci, o faŋa baa le, háá mó cii nda fɔlɔn diw tɛ́ɛ́. Mó dɔaw kpakilan a ciin cɛiyon yɛɛvɛ, mí la tambu o lepilɔɔ kpow.

⁹Mí koŋnda kobi kalaa la deli, mí la luɛi lɛŋ. Mí Mɛlɛka tɛɛmbuu sɔkɔma ndan. Masa ndɔɔ a simlacia ndɔa kpow a co a biyaa vanaa-mangalaa-isɔɔa o ba. Vana-vana co lɛ le vannda tɔŋndo pɛɛkoo le. Hali vanaa-tɛɛngaa-diom Hala-a, a co lɛ levundu cɔ fulaa Mɛlɛka o ba le.

¹⁰Kaasoŋaa kɔlkalua co Siɔn-nda co icali lɛŋ, a mei kpili. A cii loolio vownɔn o lebol, má vownun volɔɔla biisilan. Cuaa laandua Yerusalɛm a tundu bolle lɛŋ.

¹¹Hɔlta nilan la sanga a mɛmɛan tuisio, niŋndo co ya ŋolɔɔ, Kɔllo laasian ya niŋ kpede le sanga bɛndu co kobi vanaa nia coo-o. Cuaambɔa a cɛlɛkpɛa a co vuo o nɛila kobio coo.

¹²Cuaambɔa kan a co kalaa ndaa ɲunaa aa: ‹Kuɛɛ nɛ vana sɔ́là yɛ ɲɛdiaa?› A co delio o nɛila kobio coo maa vanaa voosɛi, mà va vuo kalaa ndaa o laba.

¹³Yerusalɛm, yɛɛ nɛ ya dimul lɛnin nɔm vɛlɛ? Vana seelun velan dɛnɛ co nɔm coo-o nɛɛ celen te. Vɛ̀ɛ̀ kpeekpei ya ɲɔɔlu yɛnin nɔm, nɔm kobio Siɔn? Kani paw nɔmndo co o bɔɔ maa mɛmma ihɛl, nɛ̀ɛ́-nɛ̀ tiw yɛnin ba nɔm singio?

¹⁴Vunduma fondoan a còòlan daama vanaa-tɛɛngaa-diom Hala-a nɔmnda tɛɛngul nɔm ni. A cɔm nɔm haki nɔmndo vakpa haliko ma faŋa nɔm cɛlen kuee le. Còòlan sii nda pila toosiaa le nɔm huiyo ni.

¹⁵Vanaa co hiovɔɔ-a kpow a co balan lɔɔ le tambii nɔmnde, a co huiyon hɔŋndo, mà va bolle hiŋndo le nɔm mamɔɔ le dɛnɛ yɔŋnun nɔm kobio Yerusalɛm-ndo, mà va ɲunanndo aa: ‹Vɛ̀ɛ̀ kobio ho ndáà veelu paandu ni aa: Naŋɔɔ bɛndoo a Kɔlkɛndɛ lelɛŋndo?›

¹⁶Yaamɔaa nɔmnda kpow a co balɔɔ a nɔm o sondo, mà va huiyon hɔŋndo, mà va nɔm ciŋndon kumbillo a mamɔɔ aa: ‹N cii a ndu, hee naa n va kɔɔli ni, mɛɛ o co nuaa yɛ náà n yeema le ndu cɔu ni!›

¹⁷Mɛlɛka cii ɲɛ ndóò dimi le tosaa-o tosa, o cii sɔɛi ndóò kelu paandu pa-e peelu, o cii nɔm tɛɛmbuu, o tosa iɲíí le. Mó nɛŋi yaamɔaa nɔmnda kɔltan a sɔɛi nɔmnde, mó luei vanaa nɔ nɛyɔn nɔmndo-a yoomuan.

¹⁸Vanaa co icali Siɔn-nda soli diomndan o lepilɔɔ o Mɛlɛka lo. Kpakio Siɔn, paalen a ɲumndan, va mɛmɛma nɔmndan tuisio maa pee pɔmbɔ. Cɛl mà pɛngi le, yɔngu hɔlta nɔmndan pɛngio le few.

¹⁹Cɔn ma lɔl yondaa pii. Tɔɔnun kɔl cɛ́kɛ́lɛ́ Mɛlɛka o hɔl. Heelu balan o ndu lo mà piɛi ndu le cuavaa nɔmaa co vuo o nɛilan coo a yiaan-nda.

²⁰Mɛlɛka, tofa vɔ ma ce. Nɛ̀ɛ́-nɛ̀ n tosal-lɛ nin dɛnɛ vaa nuaa? Vɛ̀ɛ̀ ndóò bɛnda pá mì vanlaandua ndáà de cuavaa ndaa nda velu-a? Cuavaa nda kaola haa kaola bɛndoo-a. Vɛ̀ɛ̀ ndóò bɛnda pá mi ndáà diw vanaa-solia-lasálàá a vanaa-tɛɛngaa-diom Hala-a o cɛi-kola-toandaa diandaa Mɛlɛka-o nin?

²¹Cuaambɔa a kaasoŋaa yuuvɛiya co ihini lɛŋ lɛtɛu o nɛilan lekɔɔ. Cuaambɔa lemboa a felengia piaandua nia cuu o mɔɛi cɔwve bɛngu. Paale n fula kɔllo len n diw nda ni, a yɔŋ iɲíí le, má kili nda bololan.

²²Paale nɔm Mɛlɛka tuulu kɔllo len, má veelu langbaa kalaa vueinannda, ma veelu fulaa o vanaa bula ya-a tɛɛn le ya hinullo maa o paale kafo coo. Cuavaa nia vana-vana helun te, vana-vana lo yoomu le. Cuavaa yáà suili mí kaola taw-va, nda yaamɔɔa cii ya tɛɛmbul ni.»