Read Kissi Cɛɛŋɔnnda Yeremi lan 5 Bible Online

Cɛɛŋɔnnda Yeremi lan 5 - Kissi bible

Cɛɛŋɔnnda Yeremi lan 5

¹«Éé Mɛlɛka! Loonun a dɛnɛ komal naa-o. Tofa vɔ, ma ce siɛmbula co naa coo lan.

²Kɛ́ naa kɔɛnnun vanaa celennda o ba, cɛila naalan la cuu lakɔ mialla o ba.

³N siŋnun vííya, fuɲaa naa co lɛ icali le, kalaa naa vii piaandua.

⁴Le mɛmma co soonnda kólaala naalan nin-ndan kolɔɔ, fɔ mì n pendu man a volion. Yɔmii nɛi bɛɛ piondɔɔ naa n piandu ndi ni.

⁵Vanaa tol naa yɛlen-nda co naa tovɔɔ. N yɔkpa nin, kɛ pɛngi co le naa le.

⁶N co balan siɛndio o Esiptea lo a o Asiriia lo haliko mi n sɔla ɲɛdiaa mò tiw naa.

⁷Fuɲaa naa tosa dɛnɛ vɔɔndo má cuu, mì sanga kon va naa poaa ndaa coo.

⁸Cɛa co masalen tosaa naa coo, nduyɛ vana-vana co le naa solio nda o ba le.

⁹Le ɲɛdiaa naa sɔlaa fɔ mì n vɔngul yoomula naalan, mì n simul vanaa del vannda coo o lɛŋnde vesɛilen nin a mɔɔn cɔwvon-nda.

¹⁰Yáwvo tuulu nin naa maa tóndó leyin a yima co naa yɛɛvɔɔ dɔvɔɔ-an.

¹¹Vannda co vanlaandua Siɔn kpuuvia, à co cuaambɔa lemboa laasiaa o kobilan Yuda nin.

¹²A biw vanaa kùndàá má landu nda, tosa lebɛɛ a kaasoŋaa yuuvɛiya le.

¹³A co langbaa powta lusulaalan siiluuo, poambɔa piaandua co boŋio o yɔmnde vilio.

¹⁴Kaasoŋaa kɔlkalua co lɛ lakɔ o fonda dimia nsɔɔ le, felengia piaandua bɛɛ co lɛ n'condu soli le.

¹⁵Ɲaaloo cuu o kɔlta naalan nin, kponyola naalan la muungu maa biisi.

¹⁶Mɔsil lemasa va naa o lebol-lo del lɛŋ, le haki naa n cua a Mɛlɛka-o. Mbɔ̀ sanga naa co o bɔɔ!

¹⁷Ɲɛ tosa mí nàà kɔllo bii naa-o, ɲɛ tosa mí pundaa cal naa o lahɔl-lo,

¹⁸ndu co le tùú Siɔn tambu, mó siŋnun bɛ̀mɛ́lta kàá-o ni.

¹⁹Kɛ nɔm Mɛlɛka, masaa n co le lɔ́ɔ́-lɔ́ɔ̀ ni, masale nɔmnden le co le fɛɛn a fɛɛn.

²⁰Le yɛɛ pɔɛɛnun yɛnin naa le lɔ́ɔ́-lɔ́ɔ̀ mà mal naa le fɛɛn a fɛɛn?

²¹Mingin naa nɔm o ibuŋ, Mɛlɛka, haliko mi n muungu nɔm o ibuŋ lekɛ́ndɛi. Mingi naa a kiyɛi maa paandu.

²²Vɛ̀ɛ̀ kɛɔ ko n cii naa nuaa le fɛɛn a fɛɛn ni? Vɛ̀ɛ̀ kɔllo ko n tuuluu a naa nuaa ni ma hiaw ba?»