Read Kissi Esekiɛl 10 Bible Online

Esekiɛl 10 - Kissi bible

Esekiɛl 10

¹Mɛɛ ya tofa vɛlɛ, mí ca ɲɔɔ pum maa pow safir o ɲɛ tɛ́ngɛ̀-tɛ́ngɛ̀ va o toandaa mɛlɛkanɔ kanda ɲɛm Hala-on-ndo o bollen coo maa halataala. Vanáà ca ko ɲɛ va kon maa pow safir-o aa kpɛŋɛ lemasaa ni.

²Mí Mɛlɛka dimul langbanɔ va a kola keesoo lekɔɔ-o aa: «Luɛi o hoeyii felenfelennde nin o bɛngula tiilannda mɛlɛkaa kanda ɲɛm Hala-on-nda bɛngu, mà kɔ kɔndu dɛngulta biyaalan, mà pei lan balan ca. A kɔndu lan pɛ, a kɔ saŋ ndan o kobio nin.» O kon, mí ca, mí langbanɔ kon kɔa.

³Tuma o tiiya-o, mɛlɛkaa kanda ɲɛm Hala-on-nda va cɛinin ndu o ba kɛndɔɔ coo. Mí yumbuyumboo pia o bɛ́ɛ̀ va lenin-ndo nin ca.

⁴Mí biilu Mɛlɛka-o can mɛlɛkaa kanda ɲɛm Hala-on-nda coo, mó kɔa o kèédei coo, mí cɛiyo pia cá a yumbuyumboo, mí bɛɔ pia a ɲɛ-tengaa va fulaa o biilu Mɛlɛka-o nin-ndo.

⁵Vanáà lo o bɛ́ɛ̀ va lekɔɔli-o nin, mí vanáà tuei diom kumbannda mɛlɛkaa kanda ɲɛm Hala-on-nda. Vanáà tuɛi lan ko diom aa Hala Vana-Kpaayaa-Kpow co sɔɛi ni.

⁶O kon, mí Mɛlɛka dimul langbanɔ va a kola keesoo lekɔɔ-o aa: «Cua yinnden o felenfelenndo nin, o mɛlɛkaa kanda ɲɛm Hala-on-nda tɛɛn.» O kon, mí langbanɔ kon kɔ sim o bɛngu tiilanndo ikɛi.

⁷Mí mɛlɛkanɔɔ pilɛ siɛndi baa nda pila mɛlɛkaa tɛɛn, nɛɛ yinnden le va nda tɛɛn-nda, mó cua yinnden, mó vow len langbanɔ va kon a kola keesoo lekɔɔ-o o laba. Mí langbanɔɔ bii len, mó fula.

⁸Ɲɛlan lapum la va mɛlɛkaa kan o kumbanndan bɛngu maa bala vanaciee.

⁹Mɛɛ ya tofa, mí ca bɛngula tiilanndan tan hiɔɔlu mɛlɛkaa kanda ɲɛm Hala-on-nda ikɛi. Mɛlɛkanɔ oo mɛlɛkanɔ bɛngu tiilanndo o pilɛ va ndu ikɛi ni. Bɛngula tiilannda lan la va iŋɛlɛngi-ŋɛlɛngiei maa pow krisolite.

¹⁰Bɛngula tiilannda hiɔɔlula lan kpow láà velan taw. Vanáà ca ko maa bɛngu tiilan oo bɛngu tiilan va o luɛyaa o bɛngu tiilan celen nin.

¹¹Te láà va pɛ kɔlan, láà kɔɛ o kpengun ndan hiɔɔlon coo, kɛ láà mulin o kɔlan te. Nɛɛ bolle mɛlɛkanɔɔ léè kɔa-a la va kɔlan ni, kɛ láà mulin o kɔlan te.

¹²Kɔɔle mɛlɛkaa kan kpow le va lepiaalen a hɔltan ba-ba fee, kandɔɔ a kɔɔla ndalan, bala ndalan a kumbannda ndalan kpede. Hali o bɛngula tiilannda ndalan. Bɛngula tiilannda ndalan tan hiɔɔlu kpede hɔltan la va lon.

¹³Mí tuɛi ma va bɛngula tiilannda lan veeloo aa «Felen-felenndo».

¹⁴Ɲaa yoomaa hiɔɔlua kan o kɛ́-kɛ̀ ndóò nɔ hɔlla a hiɔɔlu, hɔlaa tasea va maa hɔlaa mɛlɛkanɔ kanda ɲɛm Hala-on-ndo, hɔlaa diinndɔa maa hɔlaa vanaciee, hɔlaa yàándɔa va maa hɔlaa yàlà, hɔlaa hiɔlundɔa maa hɔlaa kovɛ.

¹⁵Mí mɛlɛkaa kanda ɲɛm Hala-on-nda can coocoo, mí bii bila maa ɲaa yoomaa kan yáà ce o peo Kebar kɔngɔ ni.

¹⁶Te mɛlɛkaa kan ndáà va pɛ kɔlan, bɛngula tiilanndan láà kɔɛ nda o kpengon, hali mɛlɛkaa kanda ɲɛm Hala-on-nda ndáà lɔɔ pɛ kumbanndan le cɔnɔnndo coocoo, bɛngula tiilannda lan láà cɛn latulu nda o kpengon coo.

¹⁷Te ndáà sim pɛ, lan bɛɛ láà sim, te ndáà cɛn pɛ coocoo, lan bɛɛ láà cɛn coocoo a nda latulu, kani kɔl ɲaa yoomaa kan va o bɛngula tiilannda ndalan nin.

¹⁸Mí biilu Mɛlɛka-o faŋan o kèédei coo, mó kɔ cal mɛlɛkaa kanda ɲɛm Hala-on-nda coo.

¹⁹Mí mɛlɛkaa pɛɛnga kumbannda ndalan, má faŋan lɛŋ, má can coocoo ya o hɔl, má kɔannun a bɛngula tiilannda ndalan latulu. Má kɔ sim o dio Cɛi-Mɛlɛka-o sondoo, a ba paalen le can-ndo, biilu Hala Israɛlla va coocoo nda coo.

²⁰Mí ca maa ɲaa yoomaa yáà ce o Hala Israɛlla bɛngu o peo Kebar kɔngɔ-a ni, mí sina dɔ́ɔ́ maa mɛlɛkaa kanda ɲɛm Hala-on-nda ni.

²¹O kɛ́-kɛ̀ ndóò nɔ hɔlla a hiɔɔlu, o kɛ́-kɛ̀ ndóò nɔ kumbanndan lahiɔɔlu, bala vanacieo la va nda o kumbanndan bɛngu.

²²Hɔlaa ndaa va maa hɔlaa yáà ce o peo Kebar kɔngɔ-a, súú pilɔɔ kpé nda va ni, nda kpeekpei va kan ni. O kɛ́-kɛ̀ va kɔlan ndu pila laci sanaa.