Read Kissi Esekiɛl 12 Bible Online

Esekiɛl 12 - Kissi bible

Esekiɛl 12

¹Mí Mɛlɛka soaa o ya lo, mó dimul-la aa:

²«Po vanacieo sei, o vanaa nila kalua tɛɛn n co icali nuaa ni. Vanaa kan nɔ hɔltan, kɛ a ci le, a nɔ nilan, kɛ a tui le, kani vanaa nila kalua nda co ni.

³Lelan, nɔm po vanacieo, bɛɛndiaa volɔɔlan maa vana nda co kɔlan o biyɔɔ nin-ndo, mà kɔɛ nda o hɔl ipala déŋ mɛɛ vana kɔa o biyɔɔ nin yɛ. Faŋan nda o hɔl o fonda n co icali-o, mà kɔɛ o fonda celen, maa vana nda co kɔlan o biyɔɔ nin-ndo.

⁴Soli volɔɔla nɔmndan maa volɔɔla vana co kɔlan o biyɔɔ nin-ndo. Soli lan nda o hɔl ipala déŋ, mì nɔm pila fula icɔllo nda o hɔl mɛɛ vanaa nda co kɔlan o biyɔɔ nin-nda fula yɛ.

⁵Buli tɛɛngei o kpakio nda o hɔl, mà soli volɔɔla nɔmndan ndon.

⁶Siilun volɔɔla nɔmndan o congú nda o hɔl, mà soli lan o ɲumndan nin, mà kumbu hɔlla yɔŋii n cɔ lɛŋnden. Kani i yeema ma tosa dɛnɛ kpaloo le Israɛlla.»

⁷Mí tosa ɲɛ dimulun ya le tosaa-o, mí soli volɔɔla nilan ipala déŋ maa volɔɔla vana co kɔlan o biyɔɔ nin-ndo. Icɔllo, mí buli tɛɛngei o kpakio a ba, mí fula o ɲumma bɛnduan nin, mí handun volɔɔla nilan o congú nda o hɔl kpendekele.

⁸Diimandɔɔ idiiyo, mí Mɛlɛka soaa o ya lo, mó dimul-la aa:

⁹«Po vanacieo sei, cuavaa Israɛlla, yungu lanila kaloo ho, a co nɔm ɲuna aa: ‹Yɛɛ nɛ n co yɛ hoo tosaa?›

¹⁰Lelan dimul nda aa: ‹Nuaa Maalii, o co Mɛlɛka-o dimi ni aa: kɔngɔlanndo ho, le vana co masalen tosaa Yerusalɛm-ndo a le cuavaa Israɛlaa co lon-nda kpede o co ni.›

¹¹Dimul nda ɲɛ ya túú ho-o, ndu co tosan nda coo ni. A kɔanin a nda o biyɔɔ nin o lɛŋnde celen nin.

¹²Vana co masalen tosaa nda coo-o siilunnin volɔɔlan o congú o ɲumndan nin, mò fula. A bulinin tɛɛngei o kpakio le ndu solio lon. O kumbunin hɔlaa ndɔa yɔŋii o cɔ lɛŋnden a lehɔl.

¹³I toandunin yala nuu ndu coo, mò haw o yaŋɔɔle nilen. I kɔanin a ndu Babilɔn, lɛŋnde Kaldea pɛɛn, kɛ o cinin lɛŋnde len a lehɔl te, mò vi lon.

¹⁴Vanaa balu ndu-a kpede, vanaa co ndu kanda-a a vanaa ndɔa cɔwva faw, i saŋnin nda ba-ba fee, mì tol nda kɔɔli a mɔɛi cɔwve.

¹⁵Tuma ya sɛŋinin nda vanaa-mangalaa-isɔɔa tɛɛn-ndo, telen ya saŋnin nda o lɛŋii bɔɔ-bɔɔ nin-ndo, a sinanin o kon maa ya co Mɛlɛka ni.

¹⁶Kɛ o nda tɛɛn, i mɛinin vannda a pum yoomu, a hialunnin mɔɛi cɔwve, mà cinda a yima fofolan a á nàà n'kɔnyaa-a, haliko mà kɔ downun vanaa-mangalaa-isɔɔa nda kɔanin tɛɛn-nda kona, mà cɔm nda dɛnnda nɔɔlɛila ndalan kpow. O kon, vanaa kan bɛɛ a sinanin maa ya co Mɛlɛka ni.»

¹⁷Mí Mɛlɛka soaa o ya lo mó dimul-la aa:

¹⁸«Po vanacieo sei, a dianin ɲɛdiaa nɔmndo a ɲiiyaa, mà kol mɛmma nɔmndan o vóólun-vóólunndo nin a o buulanndo nin.

¹⁹O kon kɔɔli, a dimul vanaa co o lɛŋnden nin-nda aa: ‹Nuaa Maalii Hala dimul vanaa co icali Yerusalɛm o lɛŋnde Israɛl-ten nin-nda ni aa a dianin ɲɛdiaa ndaa o sangaa nin, mà kol mɛmma ndan a mɔnɛi. Kani lɛŋnde ndalen le luɛinin o mɔnɛi nin, ɲɛ-ɲɛ co lenin puununnin nda o ba, kon tosannin le yɔŋ vɔɔn vanaa co icali lenin nda kpow co tosaa-o.

²⁰Kobila co lapiaalan a vanndacieea lan la piɔsinin vɔ́-vɔ́, mì lɛŋnden le luɛi o mɔnɛi nin. O kon la sinanin maa ya co Mɛlɛka ni.›»

²¹Mí Mɛlɛka soaa o ya lo, mó dimul-la aa:

²²«Po vanacieo sei, taloo pum dimin niaa tɛɛn a lɛŋnde Israɛl-ten o kɔɔ aa: ‹Palɛi co viovɔɔ, nduyɛ levundu oo levundu le co peelɔn te›, kɔlɔ yɛɛ nɛ talekon nɔ yɛ?

²³Le hee dimul nda aa: ‹Nuaa Maalii Hala dimi ni aa i ɲumi tale kon, vana dimi lɛnin ndu Israɛl te!» Dimul nda aa palɛi tiiya, vunduan kpow ma co peelɔn.

²⁴Kani vundule lacòòvale ve lɛnin te, vana vim ndɛnin yava o cuavaa Israɛlla tɛɛn te.

²⁵Kani ya co Mɛlɛka ni, sɔɛi ya nɔ le dimio-e ndi ya diminin ni, sɔɛi peelunnin a lɔ́ɔ́ lei. O palɛi niɛi he nin, niaa vanaa nila kalua ha, i diminin sɔɛi mì peelu ndi lende. Ya Maalii, ya co Mɛlɛka-o soo nuaa ni.»

²⁶Mí Mɛlɛka soaa o ya lo, mó dimul-la aa:

²⁷«Po vanacieo sei, tuei-yɔ mɛɛ cuavaa Israɛlla co dimio yɛ aa vundule o nɔ len, ɲɔɔ bandu vɔnin le len peelɔnndo, o co diom Hala-o tɛɛnguuo. Kɛ ɲɔɔ bandu vɔ bɔɔ le diom nda co kon tɛɛnguuo-o peelɔnndo.»

²⁸Lelan, dimul nda aa: «Nuaa Maalii Hala soo ni aa: sɔɛi-sɔɛi ya co dimio, i peelunnin ndi, o venin a lɔ́ɔ́ le. Ya Maalii, ya co Mɛlɛka-o soo nuaa ni.»