Read Kissi Esekiɛl 14 Bible Online

Esekiɛl 14 - Kissi bible

Esekiɛl 14

¹Paale pilɛ, mí vanaa bɛndua Israɛlla pum hun o ya lo, má cal-la laci.

²O kon, mí Mɛlɛka soaa o ya lo, mó dimul-la aa:

³«Po vanacieo sei, vannda ha nɔ vɔ yiyan piɔmaa ndaa o lakɔl, a co vɔ hɔlla mulio sakpo o ɲɛ mál nda o hakio nin-ndo coo. Vɛ̀ɛ̀ mì cɛl mì haa piɛi ya?

⁴Lelan soo o nda lo, mà dimul nda aa nuaa Maalii, o co Mɛlɛka-o dimi ni aa: ‹O cuavaa Israɛlla tɛɛn, vana-vana nɔ vɔ pɛ yiyan piɔmaa ndɔa o kɔl, mò va vɔ hɔlla mulio sakpo o ɲɛ mál ndu o hakio nin-ndo, te o hun soo pɛ o vana-tɛɛngaa-diom Hala-o lo, ya Mɛlɛka pila mululnin ndu ni, i mululnin ndu maa piɔmaa ndɔa.

⁵O kon, muli nuu hiiluunin Israɛlaa kɛɛ ya le piɔmaa ndaa kaakuua kpede sooloo-a.

⁶Lelan, dimul cuavaa Israɛlla aa nuaa Maalii, o co Mɛlɛka-o soo ni aa: ‹La mangala kaala niaalan mì la faŋa kɔllo o piɔmaa niaa kan. La faŋa hɔlla o dɛnnda niaala nɔɔlɛila lan kpede.›

⁷Kani o cuavaa Israɛlla tɛɛn, te kon te o mialaa co icali o lɛŋnde Israɛl-ten nin-nda tɛɛn, vana-vana kɛɛ ya, mì yiyan piɔmaa ndɔa va vɔ ndu o kɔl, mò va vɔ hɔlla mulio sakpo o ɲɛ mál ndu o hakio nin-ndo. Te vana vaa lende hun dimul pɛ vana-tɛɛngaa-diom Hala-o le ya Mɛlɛka isɔɔ ɲuna le ndu, ya pila Mɛlɛka mululnin ndu a ya pila ni.

⁸I cɔlɔbanin vana kon, mò siŋnun tɔɔmaseloo, mì vannda dimi taloo a ndu. I faŋanin vana kon vanaa nia tɛɛn few-few. O kon niaa sinanin ni maa ya co Mɛlɛka ni.

⁹Te vana-tɛɛngaa-diom Hala-o malnun pɛ ndu o ba, mò dimul vana kon lediom, mɛɛ ya Mɛlɛka hiŋnin vana kon hɔlla ni. I soaŋnin ndu, mì ɲumi ndu vanaa nia Israɛlla tɛɛn.

¹⁰Lende dɛnɛ palaa toalnin nda coo le yɔŋ vɔɔn ndaa ni. Mɛɛ dɛnɛ vɔɔn vana-tɛɛngaa-diom Hala-o vanin yɛ, lende koni dɛnɛ vɔɔn vana hin kon o ndu lo le ndu ɲunaa-o vanin ni.

¹¹I tosanin lende haliko cuavaa Israɛlla a kɔa lɛ ya levil te, yɔŋii nda nɔɔlian a dɛnnda vɔɔnnda lan kpede. O kon, a vanin vanaa nia, mì ya i va Hala ndaa. Ya Maalii, ya co Mɛlɛka-o soo nuaa ni.»

¹²Mí Mɛlɛka soaa o ya lo, mó dimul-la aa:

¹³«Po vanacieo sei, te lɛŋnden le pum le cua pɛ hakio a ya, mì le kɛɛ le lou o lediom coo a ya. Te i siɛndi pɛ ba nuu, mì soŋ vanaa co lenin nda, mì poondiaa ɲɛdiaa nda o ba, te i tuisi pɛ yima fofolan nda coo, mì tɛɛmbuu vanndacieea a cɔlua,

¹⁴te vanaa yáá-a ha: Noe, Daniɛl a Yɔb a va pɛ nda tɛɛn, nda pila kínɛí baŋanin yoomula ndalan le dɛnɛ nda sandaa ni. Ya Maalii, ya co Mɛlɛka-o soo nuaa ni.

¹⁵Te i luei pɛ visia biyaa o lɛŋnde len nin, mà somi-somi vanndacieea, te lɛŋnde len le siŋnun pɛ lɛŋnde pɔmnden, mì vannda pew len a siòòŋii visia biyaa kan.

¹⁶Te vanaa yáá-aa kan va pɛ lenin, i co yoomu! A nɔlanin poaa ndaa, te kon te cuavaa ndaa laandua ciindiaa le, nda pila daama sɔlanin baŋaa ni, o kon lɛŋnden le siŋnunnin lɛŋnde pɔmnden. Sɔɛi fula Maalii o sondo-e co ken ni, Mɛlɛka pɛɛn.

¹⁷Te kon te, te i tuisi pɛ cɔwvo o lɛŋnde len nin, mì dimi aa: «Màá mɔɛi cɔwve balu o lɛŋnden nden nin! Te i ɲumi pɛ vanndacieea a cɔlua lenin,

¹⁸hali vanaa yáá-aa kan a va bɛɛ o lɛŋnde len nin, i co yoomu! Ya Maalii mɛnan nuaa ni, ya Mɛlɛka pɛɛn, a nɔlanin poaa ndaa te kon te cuavaa ndaa laandua baŋa le, kɛ nda pila daama sɔlanin baŋaa ni.

¹⁹Te kon te, te i tuisi pɛ nàà n'kɔnyaa o lɛŋnde len nin, te i tuisi pɛ kɔl ni tuwvo o lɛŋnde len nin, mì piɔ́mndan la cɛn vanndacieea a cɔlua ciiyo diwvo,

²⁰hali vanaa yáá-aa kan: Noe, Daniɛl a Yɔb a va bɛɛ o lɛŋnde len nin, i co yoomu! Ya Maalii mɛnan nuaa ni, ya Mɛlɛka pɛɛn, a nɔlanin poaa ndaa te kon te cuavaa ndaa laandua baŋa le. Kɛ nda pila baŋanin yoomula ndalan le dɛnɛ nda sandaa ni.

²¹A toɲa, nuaa Maalii o co Mɛlɛka-o dimi ni aa: «Maa lekɛ́ndɛi, i tuisinin sangala hiɔɔlula kálà-kálàlan ndan Yerusalɛm coo: cɔwvo, yima fofolan, visia biyaa a nàà n'kɔnyaa le vanndacieea a cɔlua ciiyo diwvo.

²²Vanaa pum lonin yoomu, mà faŋan o kobi kon nin, mà hin nɛɛ niaa co-a. La canin káà ndaa a dɛnnda ndalan, mì la sɔla ɲɔɔloo le dɛnɛ palaa ya tuisi kon Yerusalɛm coo-o a le sanga oo sanga ya tuisi kon ndu coo.

²³A ɲululnin niaa kɔltan lɔ́ɔ́ niaa canin káà ndaa a dɛnnda ndalan-ndo. O kon, la biinin bila maa o co fondo fúú le ya tuisi Yerusalɛm sangala lan kpow coo le. Sɔɛi fula Maalii o sondo-e co ken ni, Mɛlɛka pɛɛn!»