Read Kissi Esekiɛl 15 Bible Online

Esekiɛl 15 - Kissi bible

Esekiɛl 15

¹Mí Mɛlɛka soaa o ya lo, mó dimul-la aa:

²«Po vanacieo sei, tɔnɔ yɛɛ nɛ rɛsɛn tumndo nɔ yɛ hiovɔɔ lɛvun co o yɔmii tɔ̀ɛi co o bundɔɔ nin-nde coo?

³Vɛ̀ɛ̀ vana cua yɔm ndɔɔ le ɲɔɔ pum siɔlɔɔ? Vɛ̀ɛ̀ vana toosiaa bawvo a ndu le ɲɛlan lapum landɔɔ lon?

⁴O yin vana vow ndu ni, mì yinnden le cuulu ndu mungén, te yinnden le lom pɛ ndu hɔllo a tumndo, mì bungɛi tɛɛn va ŋɔu, vɛ̀ɛ̀ vana nɔla vɛlɛ má solin kpeku a ndu le ɲɔɔ pum toosiaa?

⁵Lɔ́ɔ́ o vannun-ndɔ kpulukuluu-o, vana ve kpeku solin a ndu le ɲɛ pum toosiaa le. Vɛ̀ɛ̀ te yinnden le lom nin ndu pɛ mì le cuulu ndu, vana nɔla lɛ pá mà toosiaa ɲɛ pum a ndu?

⁶Ava, mɛɛ nuaa Maalii, o co Mɛlɛka-o dimi ni aa: «Mɛɛ rɛsɛn tum ya viow o yin-ndo co o yɔmii bundɛi tɛɛn yɛ, lende ya malnin vanaa co icali Yerusalɛm-nda o yin ni.

⁷I cɔlɔbanin nda. A fula o yinnden nin, kɛ yinnden le loamnin nda sukɛí. Lɔ́ɔ́ ya mululunnin nda-o, la sinanin maa ya co Mɛlɛka ni.

⁸I siinguunin lɛŋnde len lɛŋnde pɔmnden, kani vanaa co lenin-nda a lo o lediom coo le. Ya Maalii, ya co Mɛlɛka-o soo nuaa ni.»