Read Kissi Esekiɛl 16 Bible Online

Esekiɛl 16 - Kissi bible

Esekiɛl 16

¹Mí Mɛlɛka soaa o ya lo, mó dimul-la aa:

²«Po vanacieo sei, cɔm kobio Yerusalɛm dɛnnda ndɔla nɔɔlɛilan.

³Dimi aa nuaa Maalii, o co Mɛlɛka-o dimul nɔm Yerusalɛm ni aa: ‹O lɛŋnde Kanaan-nden nin n kandun ni, lenin n velun ni, Amoriinɔɔ fuɲa nɔm va ni, kala nɔm yɛ Hitiinɔɔ ndu va ni.

⁴O violɔn nɔmndo, paale n velun-nden, pule nɔmnden le kilun te, a pulu nɔm o mɛnndan nin le nɔm dindio le, a suu nɔm hɛlle le, a simbul nɔm o lakola nin te.

⁵Vana-vana tofa nɔm mì ɲíí bii ndu a nɔm, mò tosal nɔm dɛnnda lan hali o pilɛ kpé, le nɔm ɲííye tuinɔnndo le. Kɛ paale n velun-nden, viovɔɔ nda viow nɔm lɛŋ yondoo nin ni, le nɛyɔn ndáà nɔ a nɔm-ndo.

⁶Mɛɛ ya kei nɔm ikɛi, mí komal nɔm lɔngɔlianndo o kooma nɔmndan nin. Mí dimul nɔm aa: ‹Va yoomu o kooma nɔmndan nin.› A toɲa, mí dimul nɔm aa: ‹Va yoomu o kooma nɔmndan nin›.

⁷Mí vangala nɔm taw-taw, má kui maa billo yondoo nin, má can o boondei coo, má hindu, má naŋ naŋɔɔ pila. Mí mɛɛma nɔmndan má kiilian nɔm o ibuŋ, mí yiiŋii nɔmnde del kɛpuu-kɛpuu. Kɛ tum fondo fúú n va ni, a vannun kɔɔle fondo fúú.

⁸Mɛɛ ya kei nɔm ikɛi, mí tofa nɔm, mí ca maa telen nɔmndo ndóò tiiya nin, maa nɔm óò sul nin tuu hiavaa vanapɔnɔ kɔɔli. Le hee, mí kuumbuu nɔm bɔɔle doma ni bɛndoo, mí vian nɔm sɔwve, mí mɛnalan nɔm mɛnalan kpemaa, má cal sumialii ni. Maalii, o co Mɛlɛka-o soo nuaa ni.

⁹Mí pulu nɔm o mɛnndan nin, mí faaŋiaa kooma va nɔm ma suinan-ndan, mí suu nɔm cuɛiyan.

¹⁰Mí vow nɔm doma bɛndu sɔɔlaa, mí vow nɔm samtala yáwla kɛndɛ-kɛndɛlan o n'pelu, mí cuɛi nɔm a kola keese fɛtufɛtoo, mí kuumbuu nɔm a kola humbu lɛmɛsɛsɔɔ.

¹¹Mí dovi nɔm a ɲɛm kɛɛmianndon, mí vow kelan nɔm o laba, mí vow nɔm yɔɔvaa o labolo.

¹²Mí vow kelɛi nɔm o milin, mí vow kelan nɔm o lani, mí vow mɔsil kɛndɛ-kɛndɔɔ nɔm o lebol.

¹³A va o dovianndo a sianion, a volion, a kola keese fɛtufɛtoo, a kola lɛmɛsɛsɔɔ, a doma bɛndu sɔɔlaa. Ɲɛdiaa nɔmndo va kpeyan yukuyukoo, lɛan a cuɛiyan ni. Má va hiovɔɔ laci a naŋɔɔ taw, má sɔla hɔlaa lemasaa.

¹⁴Le hee, mí tɔ́ɔ́ nɔmndo tiw vanaa-mangalaa-isɔɔa tɛɛn le naŋɔɔ nɔmndo, kani le tùú yáà dovi nɔm a naŋɔɔ-o, mí nɔm óò tiwnun a naŋɔɔ. Ya Maalii, ya co Mɛlɛka-o soo nuaa ni.

¹⁵Kɛ nɔm yɛ, má puulun naŋɔɔ nɔmndo a tɔ́ɔ́ n kela-o, má luɛi laasianndo a suundaa. Má lɔngɔliaa vana-vana va keiyo lon a suunda nɔmndo, má yɔngun nda kpow.

¹⁶Mí nɔm pila cua volɔɔla nɔmnda cuɛinanndan, má ciiŋiaa lan sɔndɔɔ nɛɛ pilɛ, má toosiaa sooluulan a lan, má kɔ suunda lon. Kabi bɛɛ ɲɛ vaa lende tosan-ndɔ le, le fɛɛn bɛɛ o tosan ndɛnin vɛlɛ le.

¹⁷Má cua kelan nɔm kɛndɛn toosian a sianin nun a á volin nin humbun yáà yɔngu nɔm-ndon-ndon, má cɔaw piɔmaa piaandua a mun, má muungu suunda bilaa n'piɔmndo a nda.

¹⁸Má cua volɔɔla nɔmnda sɔɔlaalan, má kuumbuu nda a lan, má solul nda sálàlan a cuɛima nian a á lasikɔlɔ cun kɛndɛ nuu.

¹⁹Le nda hɛnanndo, má yɔngu ɲɛm kɛndɛn yáà ke nɔm-ndon, kpeyan yukuyukoo, cuɛiyan a lɛma ya va nɔm yɔngoo le baloo dɔwnɔnndo-an, ma yɔngu piɔmaa nɔmnda ɲɛm mun maa sálà cun kɛndɛ. Dɛnɛ n tosa-o yɔŋnun kon ni. Ya Maalii, ya co Mɛlɛka-o soo nuaa ni.

²⁰Má cua poaa a cuavaa landua nɔm óò vilul-la a, má solul piɔmaa kan sálàá haliko ma somi nda. Vɛ̀ɛ̀ suunda n suunda-o ndóò tiw vɔ nɔm te?

²¹Má kili poaa nia bololan, má loam nda o yin le nda sálàá solio o piɔmaa nɔmaa kan ndo.

²²Telen n va dɛnnda nɔɔlɛila lan kpow tosaa-o, a yiyan a felengiyɛi nɔmnde o kɔɔ le. Má pɔɛɛnun telen n vannun tum fondo o kooma nɔmndan nin-ndo.

²³Kpòkóó! Nɔm a kɔndu dɛnɛ fɔ́! A dɔwnun yɛɛvɛ dɛ! Ya Maalii, ya co Mɛlɛka-o soo nuaa ni. O dɛnnda kɔlvesɛila n tosa lan-ndan kɔɔli,

²⁴má tengulun vɛlɛ bandólan a kpɔngbɔlan o fondalan kpede coo.

²⁵O nɛi oo nɛi sondoo, má tangul bàndóó, má tosa dɛnnda nɔɔlɛilan a naŋɔɔ nɔmndo, má yɔngun vanaa hiawnannda kpede, má luɛi suundaa a labɛɛla kpeekpei.

²⁶Má suunda a Esiptea, vanaa falun bɛndua cɛɛlan kan a niaa-a, má luɛi o sundaa, suundà láà suundà, le ya kɔllo tuuloo.

²⁷Le hee, mí tuisi ba nuu le nɔm soŋɔ̀ɔ́, mí poonda ɲɛdiaa nɔm o ba, mí mal nɔm yaamɔaa nɔmnda o ba, kobila Filistia pɛɛn, kobila siɛmbulan láà bii le suunda nɔm bɛndu-bɛndoo-a.

²⁸Má suunda vɛlɛ a Asiriia, kani nɔm óò pim ndɔ a suundaa le, kɛ hali a suunda n suunda kon a kan-ndo kpede, a sanga vɛlɛ a suundaa le.

²⁹Má mulin má suunda vɛlɛ a lɛŋnde Kanaan-nden, kɛ a ken kpdede, a sanga vɛlɛ a suundaa le.

³⁰Kpòkóó Yerusalɛm, kɔl nɔmndo laasian bɔɔ! A tosa dɛnndan ndan kpede maa vanalanɔɔ suundɛi hiow vanlaandua kpow suundaa-o. Sɔɛi fula Maalii, o co Mɛlɛka-o o sondo-e co ken ni.

³¹Telen oo telen nɔm óò tangul pɛ bandólan o nɛilan kpow sondolan, mí nɔm óò toosiaa kpɔngbɔlan o fondalan kpede coo, a ve tosa maa vanalanɔ suunda leyula le, kani a va vɔngu suundaa pɛɛsaa.

³²Kɛ maa vanalanɔ tiamaa co o nɔu mò va pɔnɔ ndɔ dúmbóó yiiyo le kɔlan tiɔmɔɔ a vanpiaandua celen-ndo n yɔŋnun o kon ni.

³³Kani vanlaandua co suunda leyulaa-a kpede, sala ndaa vana yɔngu nda ni. Kɛ nɔm, nɔm pila yɔngu sámáá nɔmnda kpede ɲɔɔn ni, má piandu nda a ɲɛm nɔmndon, haliko ma fula nɛɛ-nɛɛ ka, mà hin o nɔm ndo le suundaa a nɔm.

³⁴Nɔm a suunda maa vanlaandua tɔ̀a le, vana ve nɔm kela kɔɔli le suunda a nɔm te, kɛ nɔm pila va sámáá nɔmnda salaa le suundaa a nɔm ni, a ve nɔm sala le. Ɲɛ vanlaandua tɔ̀a ve tosaa loo nɔm koni va tosaa ni!»

³⁵Lelan nɔm Yerusalɛn suundɛiyo ho se! Yaŋ nilan o sɔɛi Mɛlɛka-e!

³⁶Nuaa Maalii Hala dimi ni aa: «Le tùú n cii bolofaa nɔmndo laasia-o, le tùú n cɔm tum fondo nɔmndo o suunda nɔmndo nin nia sámáá nɔmnda a o laasian nɔmndo nin nia piɔmaa nɔmaa nɔɔlɛiya kpede-o, le tùú n yɔngu nda kooma cuavaa nɔmnda-o,

³⁷i co sámáá nɔmaa n va tiɔmɔɔ-a kpede mɔɔsiaa, vanaa n kaola-a kpow a vanaa n nɔ nɛyɔn ndaa-a kpede. I cuunin nda fulaa nɛɛ-nɛɛ ka, mì cuungiaa nda le nɔm cɔlɔbaa, mì yunga nɔm nda o hɔl, mì mal nɔm tum fondo fúú, mì nda kpow a ce tum fondo nɔmndo kpendekele.

³⁸I kialunin yamɛi nɔmnde mɛɛ vana kialu yamɛi vanlaandua suundɛiya a vanlaandua co vanndacieea diwvo-a yɛ. O kɔl ni tuwvo a o paŋala nuu nin, i yɔŋulnin nɔm mì soli nɔm koovan.

³⁹I malnin nɔm nda o ba, mà koombiaa bandóla nɔmndan, mà puusiaa yasabaala makòóla nɔmndan. A yunganin nɔm mà poondiaa nɔm volɔɔla nɔmnda cuɛinanndan o ba. A puunin ɲɛm kɛndɛn n dovin-ndon nɔm o ba, mà mɛi nɔm fondo fúú.

⁴⁰A mɔɔsiannin mà biiŋuu ɲɔɔ le nɔm delɔɔ coo. A viinin nɔm a powtan mà buuluu nɔm a mɔɛi cɔwve.

⁴¹A loamnin cɛila nɔmndan a yinnden. A tuisinin sanga bɛndu-bɛndoo nɔm coo vanlaandua taw-taw o hɔl. Lende ya kuunanin nɔm suunda lotalotaa ni, o kon, lɔ́ɔ́-lɔ́ɔ̀ nin bɛɛ a sala lɛnin vana le.

⁴²I tuulunin kɔl a nɔm taw-taw. O kon kɔɔli, i paŋala lɛnin nɔm te, i ɲululnin kɔl, i tuulu lɛnin kɔl te.

⁴³Kani a loonun a telen ifelengiya nɔmndo le, kani o kon nin kpow, má tuulu ya kɔllo a káà nɔmndo. Lelan ya bɛɛ, i minginin kela nɔm vɔɔndo nɔm pila o lebol. Vɛ̀ɛ̀ o co mààlan te n tosa vɛlɛ o dɛnnda nɔmnda nɔɔlɛilan kɔɔli le? Maalii ɲuna nuaa ni, Mɛlɛka pɛɛn!»

⁴⁴Tofa vɔ, vanaa dimia latalea kpow a dimulnin nɔm taloo ho aa: ‹Mɛɛ kalacuaa va yɛ, lende koni cua ndɔɔ bɛɛ va ni.›

⁴⁵Cua kala nɔmndo n co ni, kala nɔm sɔɛi pɔnɔ ndɔ-e a cuavaa ndɔa nɛinun kon-ndo. Ɲɛ pilɔɔ niaa co niaa puapilɛa nɔmaa laandua ni, à sɔɛi piaandaa ndaa a hɔ́aa ndaa nɛinun kan-nda. Hitiinɔɔ kala niaa va ni, fuɲa niaa ndu Amoriinɔɔ o va ni.

⁴⁶Bɛ nɔm laandoo, o co nɔm a maluaŋ-ndo co Samari a cieon balu ndu-on ni, pɔmbɔ nɔm laandu co nɔm a too-o co Sodɔm a cieon balu ndu-on ni.

⁴⁷Te nɔm óò mɛɛlu pɛ o kela vɔɔndo coo maa nda, mí nɔm óò tosa dɛnnda nɔɔlɛilan maa nda kpafii, kon ndóò va tiŋ fisa. Kɛ mí nɔm bɛɛ laasian o kelala nɔmndan kpow nin hiovɔɔ nda coo.

⁴⁸Le yoomu nuu! Sodɔm pɔmbɔ nɔm laandu a cieon ndɔn n tosa dɛnɛ vɔɔndo mɛɛ nɔm a cieon n balu nɔm-ndon n tosa yɛ le. Maalii soaa nuaa ni, Mɛlɛka pɛɛn.

⁴⁹Ɲɛ yɔŋnun mí tɛɛmbuu Sodɔm pɔmbɔ nɔm laandu-o va hoo ni: ndu a cieon ndɔn, má luɛi kuundianndo, kani ɲɛdiaa va nda o ba taw, a vannun vɛlɛ icali nila ɲulu, a ve buulan le ɲɛ-ɲɛ le. A cɛl le vanaa bala fondoa a vanaa ikɔɔa malaa le.

⁵⁰Má siŋnun vanaa yongaa, má tosa dɛnnda nɔɔlɛilan ya o hɔl. Mɛɛ ya ce lende, mí ciinda diw kpede!

⁵¹Samari sɔla bɛɛ tala dɛnnda n tosa lan te. Dɛnnda nɔɔlɛila nɔm Yerusalɛm tosa lan la hiow le vɔɔw a la ndu tosa lan. Te vana cua pɛ Sodɔm a Samari, dɛnnda ndalan la co fisa a la nɔm tosa lan.

⁵²Nɔm va pɔmbɔa nɔmaa laandua yaalaa-o, nɔm bɛɛ siɛmbulan la tol nɔm le hakila nɔmndan. Hakila lan la siinguu nɔm vana yɔŋ vɔɔndo hiovɔɔ nda coo ni. Lan la tosa ni, mí nda va fisa a nɔm, má hiaw nɔm sandei. Lelan nɔm bɛɛ, siɛmbulan la tol nɔm mà tambu labɛɛ, kani nɔm ke pɔmbɔ nɔm a bɛ nɔm dio ni.

⁵³Le hee, i minginin dɛnɛ ndaa o pemɛi. I minginin Sodɔm toosiaa a cieon va ndu o ba bɛngu-on, mì mingi vɛlɛ Samari toosiaa a cieon va ndu o ba bɛngu-on. O kon kɔɔli, i minginin vɛlɛ dɛnɛ nɔmndo toosiaa, nɔm Yerusalɛm.

⁵⁴O kon, a tambunin labɛɛ mì siɛmbulan la tol nɔm le dɛnnda vɔɔnnda n tosa lan kpow. Mì kobila lan la sɔla ɲɔɔloo.

⁵⁵O kon pɔmbɔa nɔmaa laandua Sodɔm a Samari, a cieon ndan n muungunin maa paandu. Nɔm (Yerusalɛm) a cieon nɔmndon bɛɛ, la muungunin maa paandu.

⁵⁶A va Sodɔm pɔmbɔ nɔm diolan tɛɛmbuuo, má va ndu congulan telen n va yongaa tosaa-o,

⁵⁷kɔlvesɛi nɔmndo ndóò fula vɔ ceen te. Lelan, nɔm bɛɛ telen nɔmndo tiiya, Aram a cieon balu ndu-on n co nɔm yeowlan, Filistii a cieon ndɔn bɛɛ n co nɔm bɛ̀ɛ̀lan tɛɛmbuuo.

⁵⁸Dɛnnda vɔɔnndan a la nɔɔlɛila n tosa lan la co nɔm mingulɔnndo ho nuaa ni. Mɛlɛka soo lende ni.»

⁵⁹Kani nuaa Maalii Hala dimi ni aa: «I tosalnin nɔm Yerusalɛm mɛɛ nɔm bɛɛ tosa yɛ, kani a tɛɛndan sendí n mɛnan-ndo, má tɛɛmbuu kpemaa.

⁶⁰Kɛ ya ya, i loonunnin a kpema ni ya yii a nɔm o felengiyɛi nɔmnde nin-ndo. I yiinin kpema fɛɛn-fɛɛndo a nɔm.

⁶¹A loonunnin a kela nɔmndo o kɔɔ mì siɛmbulan la bii nɔm lɔ́ɔ́ n sɔɔnguunin bɛndaa nɔmaa laandua a à pɔmbɔa ikɛi-yo. I yɔngunin nɔm nda mà siŋnun maa cuavaa nɔmaa laandu, kɛ o co le kpema co naa tɛɛn naa nɔmndo le!

⁶²Ya yɛ, i minginin kpema nuu toosiaa naa nɔm tɛɛn ma sina maa ya co Mɛlɛka ni.

⁶³Kon tosanin haliko ma yiyan a ɲɛ tosan paandu-o, mì siɛmbulan la bii nɔm, bako bɛɛ a suu lɛnin te. Kɛ ya, i malnin nɔm haki le dɛnnda vɔɔnnda n tosa lan kpow. Ya Maalii, ya co Mɛlɛka-o soo nuaa ni.»