Read Kissi Esekiɛl 17 Bible Online

Esekiɛl 17 - Kissi bible

Esekiɛl 17

¹Mí Mɛlɛka soaa o ya lo, mó dimul-la aa:

²«Po vanacieo sei, vion kaamaa, mà dimul cuavaa Israɛlla bundɛi!

³Dimul nda aa nuaa Maalii, o co Mɛlɛka-o dimi ni aa: ‹Kovɛ bɛndoo pum cɛn ni, ndóò nɔ kumbannda bɛndulan a bɔɔla vilɛilan, bɔɔla ndɔlan la va lapooɲɛilan, mó kɔa háá Liban, mó kɔ sungu yɔm sɛɛdre bollen.

⁴Mó bɛɛsa lɛvii ndɔɛi hiow bandei kpow-ve, mó kɔa a ndi o lɛŋnde leyulalen nin, mó kɔ kɛsi ndi o kobi leyulaa nin.

⁵Mó cua tɛyii yɔmndo pum o lɛŋnde len nin, mó kɔ saani ndi. Mó tɔal ndi o mɛmma bɛnduan kɔngɔ, mó tɔal ndi maa yɔm pɔmbɔ.

⁶Mí tɛyii ken hindu, mí i siŋnun rɛsɛn tum koam taw-vo, kɛ ndíì bendu taw le. Mí lɛvun ndɔn mulin a kpengii kovɛɔ va-e, puundun ndɔn mun va tolɔɔ o kovɛ kon bɛngu. Mó siŋnun rɛsɛn tumndo, mó soli lɛwvon a lɛɛndon.

⁷Kovɛ bɛndu celen va vɛlɛ lon, ndu bɛɛ ndóò nɔ kumbannda bɛndulan a bɔɔla celulaalan. Mí rɛsɛn tum kon talatala lɛvun ndɔn nɛɛ kovɛ kon va-a, mó muli puundun ndɔn kpengii kovɛ kon haliko mi kovɛ kon ndóò pɔɔliaa ndu.

⁸O va o tɔalaa o lɛŋnde kɛndɛlen coo, o mɛmma bɛnduan ikɛi, haliko mi ndóò pui taw-taw mi ndóò kom kɔmnden pila, mi ndóò siŋnun rɛsɛn tum kɛndɛ-kɛndɔɔ.›

⁹Dimul nda aa nuaa Maalii, o co Mɛlɛka-o ɲuna ni aa: «Vɛ̀ɛ̀ rɛsɛn tum kon dɔawnunnin pá fuma? Vɛ̀ɛ̀ kovɛ tasoo sungunin puundun ndɔn mò keenduu kɔmnde ndɔlen haliko mo vesa, mì pei ndɔɛi o soli-e kpede i vesa le? Le ndu sungɔɔ a puundun ndɔn, vana nɔnin kpeku a kpaayaa bɛndu, te kon te a vannda sɛ́lɛ́ bɛndu le.

¹⁰Má cè ndu o tɔalaa! Vɛ̀ɛ̀ o dɔawnunnin pá fuma? Vɛ̀ɛ̀ te hoeiye a ba paalen le can-ndo i hɔŋul pɛ ndu, o vesanin lekɛ́ndɛi le? Mbɔ̀ vesaa o vesanin o fonda o va hindɔɔ coo-o coo ni!›»

¹¹Mí Mɛlɛka soaa o ya lo, mó dimul-la aa:

¹²ɲuna vanaa nila kalua ha aa: «Vɛ̀ɛ̀ la sina kɔlɔ dɛnɔɔ ho le? Dimul nda aa la tofa vɔ, masaa Babilɔn cɛn mó kɔa Yerusalɛm, mó kɔ bii masaa Yerusalɛm a simlacia va lon-nda, mó kɔa a nda Babilɔn.

¹³Mó hɛli vanndo o polale lemasalen coo, mó yii kpemaa a ndu, mó viam ndu mɛnanndo, mó kɔa a vanaa bɛndua lelɛŋnda,

¹⁴haliko mi masalen le fula o baa nin, le biinun ndɛ bila le, o kon mì ndu manda kpema ndɔɔ mò lo lecoo.

¹⁵Kɛ mí vana kon luɛi seesiɛi ndu o ba, mó yaa kiilaa o lɛŋnde Esipte len nin haliko mi kan yɔngu ndu soa a vannda sɛ́lɛ́ bɛndoo taw-taw. Vɛ̀ɛ̀ vana tosa lende-o tiwnin pá ba le tùú kon peeloo? O nɔlanin pá hiɔlɔnndo? O cii kpemaa tɛɛmbuu, lelan o helunnin te few!

¹⁶Le yoomu nuu, ya Maalii Hala co tioŋnɔnndo nuaa ni, o lɛŋnde masa bɛndoo siinguu ndu masaa coo len nin o vunin ni, o kobi masaa pɛɛsa o mɛnan ndɔɔ nin-ndo, masa o tɛɛmbuu kpema ndɔɔ-o, ndu ikɛi o vunin Babilɔn ndon ni.

¹⁷Masaa Esipte nɔ bɛɛ vanaa cɔvaa mayoomua taw a vanaa cɔwva sɛ́lɛ́ bɛndu-bɛndoo nuaa, o nɔlanin ndu mala o paale cɔwlen coo, lɔ́ɔ́ vannda hun tiilanin ndu, má tangul fondala cɔwlan, mà yaŋ yaŋɔɔla cɔwlan le vannda taw-taw diwvo-o len coo le.

¹⁸Kabi o pɛɛsa mɛnan o mɛnan-ndo, mó tɛɛmbuu kpemaa, nduyɛ ndóò ciinin laba sɔɔ mó cɛl. Lelan mɛɛ o tosa kon kpede yɛ, o helunnin te few.

¹⁹Le hee nuaa Maalii Hala soo ni aa: «Le yoomu nuu, mɛnan o mɛnan o ya lo-o o pɛɛsa nuaa ni, kpema nuu o tɛɛmbuu lende ni. I tuisinin sanga kon ndu o lebol.

²⁰I toandunin yala nuu ndu coo, mò haw o yaŋɔɔle nilen. I kɔanin a ndu Babilɔn, lon ya kialunin yamɛi ndɔɛi le kɛɛ o kɛɛ lo o lediom coo a ya-o ni.

²¹Vanaa ndɔa cɔwva vanin ɲaanɔnndo le sɔɔndianndo-a delinin o mɔɛi cɔwve bɛngu, a tɔ̀a lonin yoomu-a a sɛŋinnin nɛɛ-nɛɛ ka. O kon niaa sinanin ni maa ya Mɛlɛka soo ni.»

²²Nuaa Maalii Hala soo ni aa: «Ya Mɛlɛka, i cuanin lɛɛndei o lɛvii yɔm sɛɛdre hiow bandei-yo bollen, mì tɔl ndi lɛŋ. I kialunin tɛyii kɛndɛ-kɛndɛi o lɛvun yɔm kon bollen, mì ya pila kɔ tɔl ndi o pembii vilɛi-vilɛiye tullo.

²³I tɔalnin ndi o pembii bɛndu-bɛnduei coo o lɛŋnde Israɛl-ten nin. I dɔawnunnin fuma, mì i kom taw-taw, o kon kɔɔli, i siŋnunnin yɔm sɛɛdre kɛndɛ-kɛndɔɔ. Yowva súúlan kpow a vanin kɔlan pɛngio lecoo, a calnin o vunduma lɛvun ndɔn bɛngu.

²⁴O kon, yɔmnde yondoo nin kpede i sinanin maa ya Mɛlɛka, i bɛɛsiaa yɔmii vilɛiye, mì bɛndi yɔmii bingiei. Maa i veesiaa yɔmii kiyɛiye, mì mingi yɔmii vesɛiye i kiyɛi. Ya Mɛlɛka soo lende ni, nduyɛ i tosanin mɛɛ ya dimi yɛ.»