Read Kissi Esekiɛl 18 Bible Online

Esekiɛl 18 - Kissi bible

Esekiɛl 18

¹Mí Mɛlɛka soaa o ya lo, mó dimul-la aa:

²«Tɔnɔ yɛɛ niaa nɔ yɛ o taloo ho dimio a ndu miinganndo o lɛŋnde Israɛl-ten nin aa: ‹Fuɲaa de rɛsɛŋun pùiyon, mí ciŋndon vaaliaa poaa ndaa?›

³Le yoomu nuu, ya Maalii, ya co Mɛlɛka-o co sɔɛi nuaa ni, la dimi lɛnin tale kon o lɛŋnde Israɛl-ten nin te.

⁴Kani la tofa vɔ, le ya yoomulan kpede la co ni, yoomu poo co le ya mɛɛ yoomu fuɲaa po kon co le ya yɛ. Tan tiɔn kpow, sumialii ni la co ni. Lelan vana co hakio tosa-o, vana kon vunin ni.

⁵Vana sandu-o, o co sakpo-o, o co kelaa o dɛnɛ sandaa nin-ndo,

⁶o co n'kúlù dio o pembon coo loo, o co lahɔl heelu le piɔmaa cuavaa Israɛlla sooluu loo, o co lanɔ pilaa luɛyɔɔ nin too, o co vanalanɔɔ sɔɔnguu ikɛi telen vanalanɔ kon co o paangii ndɔɛi nin-ndo loo,

⁷o saangiaa vana le tɔnɔ soli ndu o n'dial too, o mingul vana yow ɲɔɔ ndu o ba-o landii ndɔɛi-yo, o tosa levui loo, o yɔngu vana yiaan má co nɛiyo-o ɲɛdiaa ndɔɔ-o, o yɔngu vana fɛlio co-o ɲɛ cuɛinan ndɔɔ-o,

⁸vana mel kueo le ndu mingul a tɔnɔ loo, o yɔɔkpiaa vana loo, o sòli bala ndɔlan o dɛnɛ sendu loo nin-ndo, o kialu yamɛi a toɲaa vanaa ŋiɔn tɛɛn-ndo,

⁹o co silala nilan biyɔɔ a kelaa o tɔŋnda nilan coo-o, o co toɲaa tosaa-o, vana sandaa co kon ni. Ndu viawnin yoomu taw-taw. Ya Maalii, ya co Mɛlɛka-o soo nuaa ni.

¹⁰Te vana vaa lende velu pɛ poo, mì po ndɔ kon siŋnun vana delaacoo a vana diuvaa n'vanndo, te kon te mò va dɛnnda vɔɔnnda pesin-ndan diolan-ndan o pum tosaa,

¹¹nduyɛ fuɲa ndɔ ndu tosa dɛnɛ vaa lende le, mí po kon ndu de kulon o pembon coo, mó luɛi lanɔ pilaa nin,

¹²mó saangiaa vanaa ikɔɔa a vanaa bala fondoa le nda tɔnɔɔ solio nda o n'dial, mó tosa vuilen, mó cɛl le ɲɛ nda lendul ndu o ba-o mingio le, mó muli hɔlla o piɔmnda mó tosa dɛnnda nɔɔlɛilan,

¹³mó mal kueo le tɔnɔɔ sɔlaa, mó mal dɔndɔɔ le ndu mingullo a tɔnɔɔ lecoo, vɛ̀ɛ̀ po kon viawnin pá yoomu? O viwnin yoomu le! Le dɛnnda o tosa lan-ndan, o bɛnda mò vi kangalan, ndu pila nuwviaa piɔ́m ndɔ kon ni!

¹⁴Nduyɛ te vana (lahaki) vaa lende velu pɛ poo, mí po kon ce hakila fuɲa ndɔ co tosaa lan, mò ce hakila lan kɛ mì ndu po kon tosa lende le,

¹⁵mò sɔɔnguu le kulon dioo o pembon coo le, mò muli hɔlla o piɔmaa cuavaa Israɛlla lo le, mò luei lanɔ pilaa nin te,

¹⁶mò saangiaa vana le ndu tɔnɔ soli o n'dial te, mò kungulan o landii pilɛi coo le, mò yɔŋ levui le, mò yɔngu vana yiaan ma co nɛiyo-o ɲɛdiaa, mò ke vana co a fɛlio-o ɲɛ cuɛinanndo,

¹⁷mò tosal vana ikɔɔ dɛnɛ kɔlvesɛi le, mò mel kuee te kon te dɔndɔɔ le ndu mingul a tɔnɔ bɛndu le, mò bii tɔŋnda nilan, mò kela o silala nilan coo, hɔ́ɔ́ vaa lende vinin le haki fuɲa ndɔ-o le. A toɲa, o viawnin yoomu lekɛ́ndɛi.

¹⁸Fuɲa ndɔ luei caanda mɔnɛi-yo, o yɔŋ vuilen mò ciimbuu ɲɛ puapilɛ ndɔɔ-o, o tosa ɲɛ bɛnda loo vanaa ndɔa tɛɛn-ndo, fuɲa ndɔ kon sɔlanin piɔ́mndo le hakila ndɔla ndu pila lan ni.»

¹⁹La co ɲunaa aa le yɛɛ nɛ po kon sɔla sangaa le haki fuɲa ndɔ-o le? Kani, po kon kela o sakpoyɛi a o sandei nin. O bii silala nilan kpede, mó kela lecoo, le hee, o bɛnda kpeekpei mò va yoomu.

²⁰Vana co hakio tosaa-o, vana kon vunin ni. Poo bɛnda mò sɔla sangaa le haki fuɲa ndɔ tosa-o le. Dɛnɛ sandaa vana sandaa tosa-o lonin vana sandaa kon coo, mì dɛnɛ kɔlvesɛi vana kɔlvesɛiyo tosa-o lo vana kɔlvesɛi kon coo.

²¹Te vana kɔlvesɛiyo mulul pɛ hakila o va tosaa lan kpede kɔɔ, mò mal tan. Te o bii pɛ silala nilan kpow, mò tosa sakpoyɛi a dɛnɛ sandaa, lekɛ́ndɛi o vanin yoomu, o vinin te.

²²Dɛnnda vɔɔnnda o tosa lan faw la faŋannin ndu o lebol, o lonin yoomu le dɛnɛ sandaa o tosa-o.

²³Vɛ̀ɛ̀ yeemɛi nii co le vana kɔlvesɛiyo vuo ni? Ɛ-ɛ, o co kon te ya yeema le, kɛ i yeema mò mulul nɛi yɔŋ ndɔ vɔɔndo kɔɔ haliko mo va yoomu. Sɔɛi fula Maalii, o co Mɛlɛka-o o sondo-e co ken ni.

²⁴Te vana sandaa mulul pɛ dɛnɛ sandaa kɔɔ mò tosa dɛnɛ sendu loo, mò tuula vana kɔlvesɛiyo, mò tosa dɛnnda nɔɔlɛila vana kɔlvesɛiyo tosa lan kpow, vana vaa lende lonin pá yoomu? Dɛnnda ndɔla sandaalan faw la cɔmnun ndɛnin ndu coo le. Le kɛɛ o kɛɛ le lou o lediom coo-o a le haki o tosa-o. O sɔlanin piɔ́mndo le dɛnnda lan.

²⁵La co dimio aa ɲɛ Maalii co tosaa-o sendu le! Ava, mɛɛ la yaŋ-ndɔ nilan, niaa cuavaa Israɛlla! Vɛ̀ɛ̀ ɲɛ ya co tosaa-o sendu le ni baa dɛnnda niaa co tosaa lan la sendu le ni?

²⁶Te vana sandaa mal pɛ dɛnɛ sandaa, mò tosa dɛnɛ sendu loo, mò vi le lan, mɛɛ le tùú o tosa dɛnɛ sendu loo-o o sɔla piɔ́m kon ni.

²⁷Te vana kɔlvesɛiyo mal pɛ kɔlvesɛi o va tosaa-o, mò muungu dɛnɛ sakpoo a dɛnɛ sandaa tosaa, mɛɛ o baŋa yoomu ndɔɔ.

²⁸Te o kumbi pɛ hɔltan mò mulul dɛnnda vɔɔnnda o va tosaa lan kɔɔ, o lonin yoomu lekɛ́ndɛi, o vinin te.

²⁹Cuavaa Israɛlla co dimio aa: ‹Ɲɛ Maalii co tosaa-o sendu le.› Vɛ̀ɛ̀ ɲɛ ya co tosaa-o sendu le ni, cuavaa Israɛlla? Vɛ̀ɛ̀ o co dɛnnda niaalan te la sendu le le?

³⁰Lelan i kialunin yamɛi niɛi mɛɛ dɛnnda vana-vana la co yɛ, niaa cuavaa Israɛlla pɛɛn. Sɔɛi fula Maalii, o co Mɛlɛka-o o sondo-e co ken ni. Lelan la mangalan, mì la mulul dɛnnda niaala vɔɔnndan kpow kɔɔ, yɔŋii biondɔnnda niaalan la siŋnun pow boŋaa le niaa.

³¹La faŋa dɛnnda vɔɔnnda siinguu niaa vanaa yɔŋ vɔɔnda lan niaa ikɛi, mì la viow lan polon. La lueinun kɔlta sɛnɛilan a yiyannda sɛnɛilan nin. Éé niaa Israɛlla! Le yɛɛ nɛ niaa yeema yɛ le vuo kpeekpei?

³²Nduyɛ ya, i yeema mi vana co vuo-o vi le. Lelan la mangalan mì la va yoomu.» Sɔɛi fula Maalii, o co Mɛlɛka-o o sondo-e co ken ni.