Read Kissi Esekiɛl 19 Bible Online

Esekiɛl 19 - Kissi bible

Esekiɛl 19

¹Nɔm yɛ, soli condii mɔnɛi simlacia Israɛlla coo,

²mà dimi aa: «Yɛɛ nɛ kala niaa va yɛ? Yàlà laandoo o va ni. O yàlàá tɛɛn o va ihini ni, o yàlàà téndéa tɛɛn o manda cuavaa ndɔa ni.

³Mó suili cuale ndɔlen lepilɛ, mí le siŋnun yàlà téndóó, mí le caa ɲɛ le bii-o sɛɛsiaa, mí cuale len le sɔam vanndacieea.

⁴Mí vanaa-mangalaa-isɔɔa tuɛi len tɔ́ɔ́, mí le del o soon ndaa nin, má baa len dolinnde o milin, má kɔa a len Esipte.

⁵Mɛɛ yàlà laandoo cum len tei, o ci len te, mó ca maa cuale ndóò tiindan-nden le lo o lekáá, mó cua vɛlɛ cualen lepilɛ o cuavaa ndɔa tɛɛn, mó suili vɛlɛ len, mí le siŋnun yàlà téndóó.

⁶Mí le kandu kelaa o kàŋnda yàlàà piaandua coo. Mɛɛ le sul yàlà téndóó, mí le caa ɲɛ le bii-o sɛɛsiaa, mí len bɛɛ le sɔam vanndacieea.

⁷Mí le pesipesi calta ndala sɔvɛlan, mí le mingi kobila ndalan pɔmndan. O cuale len tueyɔɔ pɛɛliaa daama, mí lɛŋnden a ɲɛ-ɲɛ va lenin kpow dɔawnun yɛɛvɛ.

⁸O kon, mí vanaa-mangalaa-isɔɔa va o lɛŋii va o tàndà kon nin-nde nin-nda mɛngɛla ndu, má toandu yala ndaa ndu coo, mó del o soon ndaa nin.

⁹Má baa ndu dolinnde, má vow ndu o saasa n'cilinndo nin, má kɔa a ndu o masaa Babilɔn-ndo, má yàà ndu o fondala mayoomulan nin, haliko vana tuɛi lɛ diom ndɔɔ o pembon Israɛl coo le.

¹⁰Maa rɛsɛn tum tɔlnun o mɛnndan kɔngɔ-o kala nɔm vannun ni. O va kɔmnden a puiyo taw-taw le tùú mɛnndan ma vannun ndon taw-vo.

¹¹Mó soli lɛvun kálà-kálàn, mí lɛvun ndɔn mun siŋnun tindala lemasalan. Mó hindu mó hiaw lɛwvon kpow bandei, mí bandii ndɔɛi a lɛvun ndɔn kaakuuvon n siinguu ndu yɔm tɔ́ɔ́ bɛndoo.

¹²Kɛ mí vannda sungu ndu a kɔltuwvo, má ɲindu ndu lɛŋ vuluvulu. Mí hoeyii fula a ba paalen le can-ndo-e i veesiaa kɔmnde ndɔlen, mí lɛvun ndɔn kálà-kálàn bɛɛsiaa, mí n vesan kékélé, mí yinnden le loam mun kpúlúká.

¹³Sunsun nin, o co o tɔalaa o lɛŋnde veselɛilen nin, o lɛŋnde vesɛile kokolo le nɔ mamɛn te len nin.

¹⁴Yinnden le fula o lɛvun ndɔn nin mí le loam lɛɛndon a kɔmnde ndɔlen, o nɔ lɛ lɛvii kàlà-kálà nɔla mì i va tinda lemasaa-e le. Condii imɔnɛi co hee ni, i vanin solinndo le mɔnɛi biyɔɔ-e.»