Read Kissi Esekiɛl 20 Bible Online

Esekiɛl 20 - Kissi bible

Esekiɛl 20

¹O vɔsi ŋɔmmɛwndɔɔ nin, paangii ŋuɛɛnundɔɛi va malɔ tɔ́, mí vanaa kɔlkalua Israɛlla pum a hun le Mɛlɛka isɔɔ ɲuna, má cal-la o hɔl.

²O kon, mí Mɛlɛka soaa o ya lo, mó dimul-la aa:

³«Po vanacieo, soo o vanaa kɔlkalua Israɛlla lo, má dimul nda aa Ya Maalii, ya co Mɛlɛka-o soo nuaa ni aa: ‹Vɛ̀ɛ̀ le ya isɔɔ ɲuna niaa hin ni? Le yoomu nuu, i cɛlnin mì la ɲuna ya isɔɔ oo isɔɔ le. Sɔɛi fula ya Maalii o sondo-e co ken ni, ya Mɛlɛka pɛɛn.›

⁴Nɔm Po vanacieo, a kialunin pá yamɛi ndɛi, a kialunin ndi? Cɔm nda dɛnnda nɔɔlɛila fuɲaa ndaa tosa lan.

⁵Dimul nda aa nuaa Maalii, o co Mɛlɛka-o soo ni aa: Paale ya hɛli Israɛl-ten, mí heelu baa coocoo, mí mɛnalan polale Yakɔb len, mí cɔmnun vɛlɛ nda o lɛŋnde Esipte len nin, mí heelu baa coocoo, mí mɛnalan nda, mí dimul nda aa: Ya co Mɛlɛka ni, Hala niaa pɛɛn.

⁶Paale len, mí heelu baa coocoo, mí mɛnalan nda le nda faŋaa o lɛŋnde Esipte len nin, le nda yɔɔ o lɛŋnde ya mɛɛndian le nda len nin, lɛŋnde cɔlua a tɔlɔɔlan la naŋ nin taw-taw len, lɛŋnde hiow lɛŋnde kpow naŋɔɔ len.

⁷Mí dimul nda aa: «Vana-vana viow ɲɛm nɔɔlɛin o co mun hɔlla mulullo-on. La nɔɔlian a piɔmaa co o lɛŋnde Esipte len nin-nda le, ya co Mɛlɛka ni, Hala niaa pɛɛn.»

⁸Kɛ má luɛi seesiɛi a ya, a cɛl le nilan yaŋɔɔ o diom nuu le. Vana-vana viw ɲɛ nɔɔlɛi ndóò mulul hɔlla-o le, a faŋan piɔmaa Esiptea kɔɔli le. Le hee, mí dimi le kɔl ni tuwvo cuiŋio nda coo, le kɔltuw nuu kpow tuisio nda coo o lɛŋnde Esipte len nin.

⁹Kɛ mí tosa ɲɛ pum le diola nilan, yɔŋii la tambu vanaa-mangalaa-isɔɔa nda va tɛɛn-nda o hɔl, kani vanaa-mangalaa-isɔaa kan o hɔl yáà cɔmnun Israɛlla le nda solio o lɛŋnde Esipte len nin ni.

¹⁰Lelan, mí faŋa nda Esipte, mí yaa nda o lɛŋnde vesɛilen nin.

¹¹Mí yɔngu nda silala nilan, mí cɔm nda tɔŋnda nilan, la vanacieo bɛnda mò kela coo haliko mi la tosa mó tuei yoomoo yeela lan.

¹²Mí yɔngu nda vɛlɛ palɛi pɛngiɛi nii, mí palɛi ken siŋnun tɔɔmaseloo naa tɛɛn naa ndaa, haliko mi ndáà sina maa ya co Mɛlɛka dindi nda-o ni.

¹³Kɛ mí cuavaa Israɛlla luɛi seesiɛi a ya o lɛŋnde veselɛilen nin. A bii silala nilan te, má kɛɛ tɔŋnda nila vanacieo bɛnda mò kela coo, haliko mi la tosa mo tuei yoomoo yeela lan, má va kasio delɔɔ tuŋ-tuŋ a palɛi pɛngiɛi nii. Mí dimi le kɔl ni tuwvo cuiŋio nda coo o lɛŋnde veselɛilen nin, le nda ciiyo diwvo o lepilɔɔ.

¹⁴Kɛ mí tosa ɲɛ pum le diola nilan, yɔŋii diola nilan láà tambu vanaa-mangalaa-isɔɔa va cɔu mí soli Israɛlla o lɛŋnde Esipte len nin-nda o hɔl.

¹⁵O lɛŋnde veselɛilen nin bɛɛ, yáà heelu baa ni, mí mɛnalan nda maa i lueinin nda o lɛŋnde yáà ke nda len nin ten, lɛŋnde cɔlua a tɔlɔɔlan la naŋ nin taw-taw len, lɛŋnde hiow lɛŋnde kpede naŋɔɔ len.

¹⁶I tosa kon le tùú ndáà tɛɛndan tɔŋnda nilan, mí ndáà kɛɛ le silala nilan biyɔɔ, mí ndáà va kasio delɔɔ a palɛi nii pɛngiɛi-yo, kani kɔlta ndalan la va layiinanndan a piɔmaa ndaa.

¹⁷Kɛ mɛɛ ya tofa nda, mí ɲíí ndɛi bii ya taw, mí ɲííye bii ya le nda ciiyo diwvo. Le hee, i cii lɛ nda diw o lɛŋnde veselɛilen nin te.

¹⁸Mí dimul poaa ndaa o lɛŋnde veselɛilen nin aa: ‹La del silala fuɲaa niaa kɔɔli le, la bii sɔɔn nda co niaa pɛɛkoo-on te, la nɔɔlian a piɔmaa ndaa le!

¹⁹Ya co Mɛlɛka ni, Hala niaa pɛɛn. La bii silala nilan, la tuei sɔɔn ya co niaa pɛɛkoo-on mì la kela lecoo.

²⁰La dindi palɛi nii pɛngiɛi mì la ke ndi bɛɛlen. Palɛi ken vanin tɔɔmaseloo naa niaa tɛɛn ni, haliko mi (vannda) sina maa ya co Mɛlɛka ni, Hala niaa pɛɛn.

²¹Kɛ mí poaa ndaa kan bɛɛ a luɛi seesiɛi a ya. A bii silala nilan te, a bii tɔŋnda nila vanacieo bɛnda mò kela coo, mì la tosa mò tuei yoomoo yeela lan te, a kela lecoo le few. Má del kasi a palɛi nii pɛngiɛi. Mí dimi le kɔl ni tuwvo cuiŋio nda coo, le nda ciiyo a kɔl ni fulaa o lɛŋnde veselɛilen nin ndon.

²²Kɛ mí mingi ba nuu, kani mí yiyan le diola nilan, yɔŋii la tambu vanaa-mangalaa-isɔɔa ya va cɔu mí soli Israɛlla o lɛŋnde Esipte len nin-nda o hɔl.

²³Nduyɛ ɲin pum vɛlɛ, mí yáà heelu vɛlɛ baa coocoo, mí yáà mɛnalan nda le nda saŋɔɔ vanaa-mangalaa-isɔɔa tɛɛn a le nda sɛŋio o lɛŋii bɔɔ-bɔɔ nin.

²⁴Kani a ve kela o sɔɔn ya va nda pɛɛkoo-on coo le, a va silala nilan pɛɛsaa, a va kasio delɔɔ a palɛi nii diandɛi, handɔɔ o kon coo, piɔmaa fuɲaa ndaa ndáà mulul hɔlla ni.

²⁵Mí hendu nda tɔŋnda niŋ te lan, mí ɲindu nda o la ke vana yoomu le lan nin.

²⁶Mí nɔɔliaa nda a ɲɛm kean ndan, telen nda va poaa ndaa tasea a cɔlua piaandua tasea kpow keiyo o yinnden nin-ndo. Lende yáà yeema le nda mɔnɛi lueiyo ni, haliko mi yáà cɔm nda maa ya co Mɛlɛka ni.

²⁷Lelan, nɔm Po vanacieo, soo o cuavaa Israɛlla lo má dimul nda aa nuaa Maalii, o co Mɛlɛka-o dimi ni aa: ‹Mí fuɲaa niaa tɛɛndan ya vɛlɛ, a yɔŋnun vanaa lo o lediom coo a ya le.

²⁸Kani mí luei nda o lɛŋnde yáà heelu baa coocoo mí yáà mɛnan le nda yɔngoo len nin. Kɛ nɛɛ-nɛɛ nda ce pembii vilɛiye a yɔm puiyaa lenin, má kɔ soli sálàlan ndon, má cucu kpeyannda lan ndon, má soli sálàlan a lasikɔlɔ cun kɛndɔɔ lon, má taaliaa sálàla mamɔilan ndon le ya kɔllo tuuloo.

²⁹Le hee, mí ɲuna nda aa yɛɛ nɛ sooluula niaa kɔa lan bɛngu lan la co yɛ kpeekpei? Lelan má ke fonda kon diolan aa «Tombon.»

³⁰Lelan dimul cuavaa Israɛlla aa nuaa Maalii Hala ɲuna ni aa: «Vɛ̀ɛ̀ o co lɔngɔlianndo le niaa co nuaa maa fuɲaa niaa le? Vɛ̀ɛ̀ o co balan te niaa vow nuaa o laasianndo nin a suundaa nɔɔlɛi nda va tosaa-o nin te?

³¹Háá a paalen nden, la co nɔɔlianndo a piɔmaa niaa kpow o ɲɛm kean niaan yɔngoo nin a o hɔ́aa niaa keiyo o yinnden nin. Vɛ̀ɛ̀ mì cɛl vɛlɛ mì la hiow laci a ya isɔɔ ɲunaa, niaa cuavaa Israɛlla? Le yoomu nuu, i cɛl-lɛnin mì la ɲuna ya isɔɔ le! Sɔɛi fula Maalii o sondo-e co ken ni, Mɛlɛka pɛɛn.

³²Ɲɛ niaa co tuuvo le tosaa-o tosannin te few. Kani la co dimio aa: ‹N yeema mi naa bɛɛ n va maa vanaa-mangalaa-isɔaa celennda, maa yungula co o lɛŋii celennde nin-ndan. N yeema mi n sooluu yɔmnde a powtan.›

³³Le yoomu nuu, i tosanin niaa masalen coo, mì tuisi niaa ba ni mayoomoo a congú ni kpaayaa coo, mì cuiŋi kɔltuw nuu niaa coo. Sɔɛi fula Maalii, o co Mɛlɛka-o o sondo-e co ken ni.

³⁴I solinin niaa vanaa súúla celennda tɛɛn, mì faŋa niaa o lɛŋii niaa co a sɛngiannda nin-nde nin, mì cuungiaa niaa a ba ni mayoomoo a congú ni kpaayaa, o kon mì cuiŋi kɔl ni tuwvo niaa coo.

³⁵I yaanin niaa o lɛŋnde veselɛilen nin vanaa súúla celennda levil polon. Lon ya calnin niaa o hɔl sanaa ni mì kelu yamɛi niɛi.

³⁶Mɛɛ ya kelu yamɛi fuɲaa niaa mamaa o lɛŋnde veselɛilen nin Esipte yɛ, lende koni ya kialunin yamɛi niɛi ni. Ya Maalii, ya co Mɛlɛka-o soo nuaa ni.

³⁷I keinin niaa o tindaa bɛngu, mì luei niaa o yoole kpema nuu bɛngu.

³⁸I solinin vanaa luɛi seesiɛi, má simul-la-a niaa tɛɛn, mì faŋa nda o lɛŋnde nda co icali nin-nden nin, kɛ a kuenin o lɛŋnde Israɛl-ten nin te. O kon niaa sinanin ni maa ya co Mɛlɛka ni.

³⁹Lelan sunsun, niaa cuavaa Israɛlla, la tuei-yɔ diom Maalii dimi-o, Mɛlɛka pɛɛn: «La kɔ, vana-vana kɔ sooluu piɔm sialaa ndɔɔ! Kɛ o kon kɔɔli, i canin, te la yeŋnin nilan o diom nuu le. Nduyɛ, la del-lɛnin kasi a diola nila diandaalan le ɲɛm kean niaan a le piɔmaa niaa le.

⁴⁰Kani o pembii nii diandɛi coo, o pembii bɛndu-bɛnduei Israɛl coo, cuavaa Israɛlla kpow a vanaa vanin o lɛŋnde len nin-nda kpede a biilunin ya ni. Lon ya cɛlnin nda a kɔllo kpow ni. Lon ya ɲunanin niaa le ɲɛm niaa faŋa o ɲɛm niaan coo le ya yɔngoo-on ni, ɲɛm niaan tason o ɲɛm kean niaan nin a ɲɛm niaa kɛsi le ya-on pɛɛn. Sɔɛi fula Maalii o sondo-e co ken ni, Mɛlɛka pɛɛn.

⁴¹Tuma ya solinin niaa vanaa súúla celennda tɛɛn, mì faŋa niaa o lɛŋii niaa co a sɛŋiannda nin-nde nin, mì cuungiaa niaa-o, i cɛlnin niaa maa sálà cun kɛndɛ. O kon, i cɔmnin vanaa-mangalaa-isɔɔa diondɔɔ nuu a dɛnɛ kɛndɛ ya vanin niaa tosallo-o.

⁴²Lɔ́ɔ́ ya minginin niaa o lɛŋnde Israɛl-ten nin-ndo, lɛŋnde ya heelu baa coocoo mí mɛnan le fuɲaa niaa mamaa yɔngoo len, la sinanin maa ya co Mɛlɛka ni.

⁴³La lonin ndon mì la yiyan a káà niaa a dɛnnda niaala niaa va tosa mí la nɔɔliaa niaa lan kpede. O kon, la nɔla lɛnin hɔlla tofanndo vellaa-velle le, kani siɛmbulan la vanin niaa le dɛnnda vɔɔnnda niaa tosa lan kpow.

⁴⁴Tuma ya tosalnin niaa lende le kaola ya nɔ le diola nilan-ndo-o, la sinanin maa ya co Mɛlɛka ni. Kani i biinin niaa mɛɛ káà niaa vɔɔndo a dɛnnda niaala lɔngɔlɛilan la co yɛ le, niaa cuavaa Israɛlla pɛɛn! Ya Maalii, ya co Mɛlɛka-o soo nuaa ni.»