Read Kissi Esekiɛl 21 Bible Online

Esekiɛl 21 - Kissi bible

Esekiɛl 21

¹Mí Mɛlɛka soaa o ya lo, mó dimul-la aa:

²«Po vanacieo sei, muli hɔlaa nɔmnda o ba kɛndɔɔ coo, mà tɛɛngul vanaa co a ba too-a diom Hala-o. Tɛɛngul bundɛ co yondoo nin a ba too-o aa: ‹Yaŋ nilan o sɔɔn yɔŋnunnin-ndon!›

³Dimul bundɛ co kon a ba too-o aa: ‹Yaŋ nilan o sɔɛi Mɛlɛka-e!› Nuaa Maalii Hala dimi ni aa: ‹Ya, i co yinnden malɔɔ nɔm nin, mì yinnde len le lom yɔmii keyɛiye a yɔmii vesɛii co nɔm nin-nde kpow, yinnde len le ɲumnin te, nduyɛ, le lonin biyɔɔ lende háá mì vannda kpow a cuu ŋɔ, kandɔɔ a ba too haa a ba luaŋ-ndo.

⁴O kon, ɲɛ-ɲɛ yoomaa canin maa ya Mɛlɛka, ya mɛndul yinnde len ni, maa le ɲumnin te.›

⁵O kon, mí (ya Esekiɛl) dimi aa: ‹Éé Maalii, Mɛlɛka nuu, vanaa kan co dimio a ya o kɔɔ aa talelan koni ya co dimio a miinguuvo ni.›

⁶Le hee, mí sɔɛi Hala-e dimulun ya aa:

⁷‹Po vanacieo sei, muli hɔlla a kpengii Yerusalɛm-nde, má tɛɛnguu diom Hala-o a tambii sooluula ndalan la tambunin-nde o kɔɔ!›

⁸Má dimul lɛŋnde Israɛl-ten aa: ‹Tofa vɔ, i co nɔm cɔlɔba, i solinin mɔɛi cɔvii nii o boo ndɔɔ nin, mì diw vanaa sandaa a vanaa kɔlvesɛyaa co o nɔm nin-nda.

⁹Kani i yeema mi faaŋiaa vanaa sandaa a vanaa kɔlvesɛiya nɔm nin. Lelan mɔɛi nii cɔwve fulanin o boo ndɔɔ nin ni le ɲɛ-ɲɛ yoomaa lɔwviaa, kandɔɔ a ba too háá a ba luaŋ-ndo.

¹⁰O kon ɲɛ-ɲɛ yoomaa sinanin maa ya Mɛlɛka, i soli mɔɛi nii cɔwve o boo ndɔɔ nin. Nduyɛ i muungu lɛnin lenin te.›

¹¹Le hee, nɔm Po vanacieo, somisomin! Somisomin nda o hɔl, mà cɔm mɔnɛi a kɔl tambɛiyo taw.

¹²Taa ɲuna nɔm pɛ aa: ‹Le yɛɛ n co yɛ somisominndo?› A mulul nda aa: ‹Kani yoongoo pum co hunɔɔ, kɔlta vannda kpow la caŋnin, bala vannda kpede la fulanin yoomuan, yiyannda vannda kpow la laasiannin, vula vannda kpede la vunin, yoongu kon co hunɔɔ ni, o tiiya nin bɛɛ. Ya Maalii, ya co Mɛlɛka-o soo nuaa ni.›»

¹³Mí sɔɛi Mɛlɛka-e dimulun ya vɛlɛ aa:

¹⁴«Po vanacieo sei, tɛɛnguu diom Hala-o, dimi aa: ‹Maalii dimi aa kpókò, la tofa vɔ! Mɔɛi cɔwve! Mɔɛi cɔvii cɛɛŋɛi, i iyikpɛi tɛm-tɛm.

¹⁵Le (vannda) diwvo i cɛɛŋan ni, i co volio ŋuandi-ŋuandi i yikpɛi tɛm-tɛm. Vɛ̀ɛ̀ vana dɔawnun ɲaale a tinda lemasa po nuu? Tinda lemasaa co ɲɛ-ɲɛ mɔɛi cɔwve o hɔl te.

¹⁶A yɔngu mɔɛi cɔvii ken le yikpaa haliko mi vanndo bii ndi o ba, i cɛɛŋan mì i yikpan le ndi sɔɔ vana diyaa o ba!»

¹⁷Lelan, nɔm Po vanacieo, koŋul mà hiila hiko-hiko! Kani vanaa nia mɔɛi cɔwve he hinul nuaa ni, le simlacia Israɛlla cɔlɔbaa. Simlacia kan sɔlanin piɔ́mndo nda vanaa niaa latulu. Lelan lɔɔnun lɔloo (a kpingaa).

¹⁸Kani tɔɔndan kàlà-kálàá co hoo ni. Te tinda lemasa mɔɛi cɔvii ken va kuello-o co lɛ le, yɛɛ yɔŋnun yɛnin? Ya Maalii, ya co Mɛlɛka-o soo nuaa ni.

¹⁹Lelan, nɔm Po vanacieo, tɛɛnguu diom Hala-o, tuu balan mà lɔɔ lepilɛ, lediin háá bɛmbɛ leyáá. Mɔɛi cɔvii diyaa n'vannde i co ni, mɔɛi cɔvii co le sɛ́lɛ́ bɛndoo diyɔɔ-e, i diwnin nɛɛ-nɛɛ ka.

²⁰Haliko mi kɔltan la laasian nda nin, mì tɛɛmbuula ndalan la vangalan. I cumulnin nda o diola luɛyaalan kpow sondoo a mɔɛi cɔwve o ba. Mɔɛi cɔvii ken toosian le volio ŋuandi-ŋuandi, i co iyikpaa tɛm-tɛm le diyɔɔ.

²¹Nɔm mɔɛi cɔwve, lɔva o ba kɛndɔɔ coo, mà lɔva o ba mɛllo coo! Lɔva nɛɛ-nɛɛ ka.

²²Nduyɛ ya bɛɛ, i lɔaanin balan, mì tuulu kɔl taw-taw. Ya soo nuaa ni, ya Mɛlɛka pɛɛn.

²³Mí Mɛlɛka soaa o ya lo, mó dimul-la aa:

²⁴«Nɔm Po vanacieo sei, tuula nɛilan tan tiɔn, la masaa Babilɔn keinin coo mò kɔɛ a cɔwvo lan. Nɛila tiɔnnda lan kpede la bɛnda mì la cɛn o lɛŋnde pilɛlen nin. Handu tɔɔmaseloo, handu ndu o nɛi kɔɛ o kobio o pilɛ nin-ndo sondoo.

²⁵Tuula nɛiyo haliko mi cɔwvo luɛi o kobio Raba nin, kobi pɔaa Amɔnnda pɛɛn, mò luɛi vɛlɛ Yerusalɛm. Kobi co kon o kungaa a kpakio o tàndá Yuda-o nin-ndo pɛɛn.

²⁶Kani masaa Babilɔn sim o nɛi-lábándoo, o nɛila tiɔnndan sondoo, le yavaa vomɔɔ. O co kɔɔn hiiloo, o co piɔmaa tongoninnda ɲunaa, o co yemndon mɛɛndianndo.

²⁷Ɲɛ co o ba kɛndɛ ndɔɔ nin-ndo cɔm maa yavaa bii Yerusalɛm, o baŋnin balamaniei lon, mò yɔngu diomndo le vannda diwvo, mò yonda coocoo kpélén. O baŋnin balamaniei o diola luɛyaalan sondoo, o lueinin ndu o píŋndo nin, o cɔawnin kungala saasalan.

²⁸Vanaa co icali Yerusalɛm lon-nda co ko yiyanndo maa còòlan sɔɔn mun co ni, maa n tosannin te. Kani vannda cuel nda ciɛ́ɔn má mɛnalan nda. Kɛ masaa Babilɔn ndu yiyalan nda haki ndaa, lelan nda sɔlanin biyɔɔ ni.

²⁹Le hee, la tuei-yɔ diom Maalii dimi-o, Mɛlɛka pɛɛn: ‹Le tùú niaa yiyalan ya tɛɛmbuu niaa, mí la soli hakila niaalan ceen-ndo, le tùú niaa cɔm yɔŋnda vɔɔnda niaalan kpendekele o dɛnnda niaalan kpow nin-ndo, le tùú niaa pila yɔngu vannda yiyanndo a hakila lan o kɔɔ-o, la co ndu delɔɔ o ba mò bii niaa.

³⁰Le nɔm simlacinɔɔ Israɛl-lɛ, nɔm vana lo hoo o lediom coo loo, nɔm vana kɔlvesɛiyo ho, telen co tiiya, mì yɔŋ vɔɔn nɔmndo mɛɛlu!

³¹Lelan tuei-yɔ mɛɛ Maalii soo yɛ, Mɛlɛka pɛɛn: ‹Tɔɔmasele lemasaa faŋannin nɔm coo, mɔsil lemasaa sungunnin nɔm o lebol. Ɲɛ-ɲɛ mangalanin! Ɲɛ co o tuisianndo-o heelunnin, mì ɲɛ co o heelanndo-o tuisin.

³²Bémbélan, labémbé láà labémbé! I siinguunin (Yerusalɛm) labémbé kposon. Ɲɔɔ mangalannin pɔɔ kpede lɔ́ɔ́ pá mì vana nɔ yamɛi o ba-o hin, o kon mì sɔɔ ndu vali kialaa n'yamaa o ba.»

³³Nɔm Po vanacieo sei, tɛɛnguu diom Hala-o. Dimi aa: «Nuaa Maalii Hala soo o Amɔnnda a o siɛmbula ndalan coo ni, mà dimul nda aa mɔɛi cɔwve cɛɛŋan le (vannda) diwvo, i yikpan le lɔwviaa a le volio ŋuanndi-ŋuanndi.

³⁴Tuma nda co vunduma lacòòvan cɔu a yavala lacòòvalan niaa vimndo-o, mɔɛi cɔwve kilinin vanaa yɔŋ vɔɔnda a vanaa kɔlvesɛiya bololan. Paale ndalen le tiiya, telen yɔŋ vɔɔndo mɛɛlu-o.

³⁵Lelan, la mingi mɔɛi cɔvii niɛi o boo nin. I kialunin yamɛi niɛi o lɛŋnde niaa cɔwnun nin-nden nin, o lɛŋnde niaa cɛn tum-nden nin.

³⁶I cuiŋinin kɔltuw nuu niaa coo, i hulnin yinnde kɔltuw nuu niaa coo, mì mal niaa vanaa yɔŋ vɔɔnda o ba, vanaa co le ɲɔɔn tɛɛmbuuo daama-a.

³⁷Yinnden le loamnin niaa mì la cuulu mungén, kooma niaan ma talanin o lɛŋnden tɛɛn, vanaa loonun ndɛnin a niaa o kɔɔ le, kani ya Mɛlɛka, lende ya soo ni!»