Read Kissi Esekiɛl 22 Bible Online

Esekiɛl 22 - Kissi bible

Esekiɛl 22

¹Mí Mɛlɛka soaa o ya lo, mó dimul-la aa:

²«Nɔm Po vanacieo sei, a kialunin pá yamɛi? A kialunin pá yamɛi kobi diuvaa n'vanndo ho? Cɔm ndu dɛnnda ndɔla nɔɔlɛilan kpow!

³Dimul ndu aa nuaa Maalii Hala soo ni aa: ‹Tofa vɔ, kobi nda co vannda diwvo nin-ndo. Nduyɛ, paale ndɔle kialaa n'yamalen le tiiya nuaa ni, kobi co piɔmnda toosialanndo le nɔɔlianndo-o n co ni.

⁴A sɔla vɔwlen le vanaa n diw-va, mí nɔm pila nɔɔlian a piɔmaa n cownun-nda. Palɛi yoomu nɔmndo n dɔɔniaa lende nuaa ni. A tiiya o vɔsila nɔmndan mɛɛlulan. Lelan ya cii nɔm bɛ̀ɛ̀lan vanaa-mangalaa-isɔɔa o hɔl ni, mí tosa mí lɛŋnde kpow i tɛɛndan nɔm.

⁵Vanaa co macɛlu-a a vanaa co levilla a mamnin nɔm kobi nɔɔliaa hoo diola nɔmndan ma va o piaa a dɛnɛ palaa-o.

⁶Tofa vɔ simlacia Israɛlla, vana-vana co dɛnndan tosaa o nɔm ndo a kpaaya ndɔɔ le vanndacieea diwvo.

⁷O nɔm nin, vannda co fuɲaa ndaa a kalaa ndaa tɛɛndanndo. O nɔm ndo, vannda co mialla delɔɔ coo, a co vííya a vanlaandua piaandaa ndaa vi-a saangiaa le nda tɔnɔɔ solio o n'dial.

⁸Nɔm pila co ɲɛm nin diandan pɛɛsaa, a co kasio delɔɔ a paalɛi nii diandɛi.

⁹Vanaa co vannda sɔɔn handɔɔ coo le nda diwvo-a a co nanu, vannda pum co kùlon dioo.

¹⁰Vanaa pum co suundaa a laandaa fuɲaa ndaa nanu, a pum co vanlaandua co o paangii ndɛi nin-nda baŋɔɔ le vaa a nda.

¹¹Vana-vana co mààlan tosaa a lanɔɔ po ndɔɔ, vana-vana co yema ndɔ fuɲa pilɔɔ kpuvaa le hinilan a ndu nanu.

¹²Vannda co luɛyɔɔninndo biyɔɔ le vannda diwvo nanu. Nɔm pila co vannda ɲɔɔn dɔndaa le nɔm mingullo a tɔnɔɔ bɛndoo, a co vannda ɲɔɔn poondiaa o laba a kafalan, a co vana niaa co-o ɲɔɔn poondiaa o ba a paa-kala, ya Mɛlɛka, má pɔɛɛnun ya. Ya Maalii, ya co Mɛlɛka-o soo nuaa ni.

¹³Tofa vɔ, i lɔɔ balan a kpingaa le delɔɔ coo n co tosa-o a le vanaa nda co diwvo nanu-a.

¹⁴Vɛ̀ɛ̀ kɔl nɔmndo simnin pá yili? Bala nɔmndan la nɔnin pá yoomuan o palɛi ya tisanin nɔm coo le nɔm saangiaa-e nin? Ya Mɛlɛka soo lende ni, nduyɛ i tosanin mɛɛ ya dimi yɛ.

¹⁵I saŋnin (vanaa nɔmnda) vanaa-mangalaa-isɔɔa tɛɛn, i sɛŋinin nda o lɛŋii bɔɔ-bɔɔ nin, o kon i solinin dɛnnda nɔɔlɛilan kpow nɔm nin.

¹⁶Nɔm pila ciinun labɛɛ vanaa-mangalaa-isɔɔa o hɔl ni, nduyɛ nɔm bɛɛ sinanin maa ya co Mɛlɛka ni.»

¹⁷Mí Mɛlɛka soaa o ya lo, mó dimul-la aa:

¹⁸«Po vanacieo sei, cuavaa Israɛlla siŋnun ya o hɔl maa poola icilin, a siŋnun kpow maa idaɲa, maa volin humbu, maa ciliŋii dingɛn.

¹⁹Lelan nuaa Maalii Hala dimi ni aa: «Le tùú niaa kpow siŋnun maa poola icilin-ndo, la tofa vɔ, i co niaa cuungiaa o kobio Yerusalɛm tɛɛn,

²⁰mɛɛ vana dɔaw volin latámán, daɲan, cilinndon, ciliŋun dingɛnndon a ciliŋii humbuei o kpɛɛnɛi nin má sɛndi yinnden le mun teengiaa yɛ, lende ya cuungiaanin niaa o kɔl ni tuwvo a o kɔl ni fulaa nin ni. I cuungiaa niaa pɛ, i kɛsi niaa, i teengiaa niaa.

²¹I mɔɔsiaanin niaa nɛɛ pilɛ, mì sɛndi yinnde nile kɔltuwlen niaa coo, o kon la tenganin o kobio Yerusalɛm nin.

²²Mɛɛ volin latámán tenga o kpɛɛnɛi nin nuaa yɛ, lende niaa tenganin o kobio Yerusalɛm nin ni. O kon, la sinanin maa ya Mɛlɛka, i saŋ kɔl ni tuwvo niaa coo.»

²³Mí Mɛlɛka soaa o ya lo, mó dimul-la aa:

²⁴«Po vanacieo, dimul Yerusalɛm aa lɛŋnde diandaalen le co ni, piɔɔ se ndu coo mó pɔɔliaa ndu o paale kɔltuwlen coo le.

²⁵Vanaa-tɛɛngaa-diom Hala-a ndɔa co dúmbóó yiiyo o ndu nin maa yàlá co pɛɛliaa o ɲɛ o bii-o sɛɛsiaa-o, a o yoomula (vanndacieea) tɛɛmbuuo, o co ɲɛm sɔlan pilan a ɲɛm sɔvɛɔn poondiaa. O co vanlaandua taw-taw mɛiyo o vii piaandua nin o kobi kon nin.

²⁶Vanaa-solia-lasálàà ndɔa co tɔŋ nuu tɛɛmbuuo, a co kasio delɔɔ o cɛila-kolala-toandaala ndala diandaalan nin, a sina pɛngulan ɲɛ co o solian sálà-o a ɲɛ co o solian sálà loo tɛɛn te. Lelan, a cɔmnin sɛyanndo ɲɛ co o diandaa-o a ɲɛ co o nɔɔlɛiyo-o tɛɛn te. A co hɔlaa ndaa faŋaa o palɛi nii pɛngiɛi coo, a cii ya bɛ̀ɛ̀lan nda tɛɛn few-few.

²⁷Simlacia nɔmnda co macoaa maa tunaa yondoa co ɲɛ nda bii-o sɔmndo-a, a co vannda diwvo a yoomulan tɛɛmbuuo le bolofaa sɔlaa o ken nin.

²⁸Vanaa-tɛɛngaa-diom Hala-a ndɔa co ɲɛ-ɲɛ ka yikpaa a ɲɛ vana yikpa-o, a co vunduma fondoan cɔu, a co còòlan dimio a siɔdii lacio o kɔɔ, a co dimio aa: ‹Nuaa Maalii soo ni, Mɛlɛka pɛɛn!› Nduyɛ, o co ya Mɛlɛka le soo lende le.

²⁹Vanaa co o lɛŋnde len nin-nda co vannda yɛɛvɔɔ dɔvɔɔ, a co vuilen yɔŋndo, a co vanaa ikɔɔa a vanaa bala fondoa saangiaa le tɔnɔɔ solio nda o n'dial, a co mialla mɔnɛi lueiyo o dí ndaa kpede coo.

³⁰I co vanndo nuwviaa o nda tɛɛn, le o nɔla mò cɔw kpakio, mò sim o tɛɛngei nin coocoo ya o hɔl le sɔɛi le lɛŋnden-ndo, yɔŋii lɛŋnden le tambu, mì le piɔl, kɛ i seelun-ndɔ vana vaa lende le.

³¹Lelan ya co kɔl ni tuwvo cucɔɔ nda coo ni, i co yinnde kɔl ni fulaa kpow tuisi nda coo, i co dɛnnda ndalan tuisi nda pila o lebol.» Sɔɛi fula Maalii o sondo-e co ken ni, Mɛlɛka pɛɛn.