Read Kissi Esekiɛl 23 Bible Online

Esekiɛl 23 - Kissi bible

Esekiɛl 23

¹Mí Mɛlɛka soaa o ya lo, mó dimul-la aa:

²«Po vanacieo sei, vanlaandua pum va nda ŋiɔn, nda ŋiɔn kpow kala pilɔɔ ndóò velu nda ni.

³Má luɛi suundaa o lɛŋnde Esipte len nin, a va vɔ cuaambɔa lemboa má luɛi suunda kon. Lon nda vɔɔciaa nda mɛɛyan o ibuŋ ni, lon vannda piilian takpala ndala vanapɔnɔ ndóò pilan-ndɔ le lan ni.

⁴Diola cua tasoo aa Ohola, diola pɔmbɔ ndɔlan aa Oholiba. Nda ŋiɔn kpede, le ya Mɛlɛka ndáà va ni, má vialu poaa a cuavaa laandua. Le diola ndalan yɛ, Ohola ndu co Samari ni, Oholiba ndu co Yerusalɛm ni.

⁵Mí Ohola va le ya-o luɛi suundaa, mó yom yomndo pila le sámáá ndɔa, Asiriia pɛɛn, vanaa nda calnan macɛlu-a,

⁶a va a doviannda a volɔɔla cuɛinannda siaŋala sɔɔtɔtɔlan-nda, masaa n'bungaa a vanaa bɛndua, vanaa kan kpow felengia a vanaa naŋ hɔlla-a nda va ni, vanaa caa ɲaanɔnndo a soa-a.

⁷Nda Ohola malnun o ba ni, langbaa kalla Asiri kpow o del kɔɔli ni. Mó nɔɔlian a vanaa ndóò yom le nda-a kpdede, mó nɔɔlian a piɔmaa ndaa kpow.

⁸O mel suundala ndɔla o kandu o lɛŋnde Esipte len nin-ndan te, lon pá nda hini a ndu o felengiyɛi ndɔɛi nin ni, má piilian ndu mɛɛma vanapɔnɔ ndóò pilan-ndɔ le-an. Má laasiaa ndu a suunda ndaa.

⁹Lelan ya mal ndu sámáá ndɔa o ba ni, mí mal ndu poaa Asiri-a o ba, a ndóò yom le nda-a.

¹⁰Nda yunga ndu ni má ca ndu tum fondo. Nda bii poaa ndɔa a cuavaa ndɔa laandua ni, má dii ndu pila a mɔɛi cɔwve. Mó siŋnun seilen le vanlaandua, kani mí sámáá ndɔa tuisi ndu sanga imɔnɔɔ coo.

¹¹Mí Oholiba pɔmbɔ ndɔ ca dɛnɛ kon ciŋ, kɛ mí ndu ndu hiaw bɛɛ bɛ ndɔ laasianndo o tiɔmɔɔ nin, mí suundala ndɔlan la hiaw suundala Ohola bɛ ndɔ lan polon.

¹²Mí ndu bɛɛ yom yomndo pila le poaa Asiri-a, masaa n'bungaa a vanaa bɛndua, vanaa nda calnan macɛlu-a, a va a doviannda a ɲɛ cuɛinan tɔ́ɔ́ bɛndoo-a, vanaa ɲaanun o soa coo-a, nda kpow felengia piaandua naŋ hɔlla-a nda va ni.

¹³Mí ca maa ndu Oholiba bɛɛ lɔngɔlian, mí ca maa nda ŋiɔn kpow vana-vana kɔɛ o nɛi pilɔɔ coo.

¹⁴Kɛ mí ca maa ndu Oholiba óò hiow bollen luei o suundaa nin ni. Kani ɲin pum, mó ca tuuliaala vanpiaandua o kpakio coo, tuuliaala Kaldea yin yinɔɔ siaŋaa lan,

¹⁵a yáwve nda ikandan o caŋ, a mɔsilta ivanabɛnduyala nɔ yinɔɔlan súúlan taw lan o lebol, ndáà nɔ hɔlla maa n'simlaci, vanáà ca ko nda aa poaa Babilɔn-nda[4] ni, poaa Kaldee, lɛŋnde ndalen pɛɛn.

¹⁶Mɛɛ o ce nda dɔ́ɔ́, mó yom yomndo pila le nda, mí vim nda kilaa o lɛŋnde Kaldee len nin.

¹⁷O kon, mí poaa Babilɔn-nda hun o ndu lo, má hini a ndu o kpele suundaa coo, má lɔngɔliaa ndu a suunda ndaa. Mɛɛ o cii nɔɔlian a nda lende, mí dɛnɛ ndaa fula ndu iyeema few-few.

¹⁸Mó soli suunda ndɔɔ ceen vakpa, mó mal tum fondo ndɔɔ ceen kpendekele. Le hee, mí dɛnɛ ndɔɔ fula ya iyeema few-few, mɛɛ dɛnɛ bɛ ndɔ-o fula ya iyeema yɛ.

¹⁹Mó cɔɔlu dɛnnda ndɔla suundɛilan vangala le loonɔnndo a palɛi ifelengiyɛi ndɔɛi o kɔɔ, telen o va suundaa o lɛŋnde Esipte len nin-ndo.

²⁰Mó yom yomndo pila le vanpiaandua suundɛiya, a nɔ dialle[5] maa dialii sofɛlɛ a vanapɔnɔyɛi[6] maa vanapɔnɔyɛi so-a.»

²¹Nɔm Oholiba, a muungu vɛlɛ laasianndo maa laasian n laasian o felengiyɛi nɔmnde nin-ndo, telen Esiptea va takpa nɔmnde piilianndo, ma va mɛɛma nɔmma piaan yiiliaa-o.

²²Lelan, Maalii, o co Mɛlɛka-o dimi ni aa: «I cuanin sámáá nɔmnda mà cɔlɔba nɔm, sámáá nɔmaa fula nɔm iyeema-a pɛɛn. I cuunin nda nanu fulaa ba-ba fee le nɔm cɔlɔbaa.

²³Poaa Babilɔn-nda, Kaldea kpow, vannda Pekɔd, haa Soa, haa Koa a poaa Asiri-a[7] kpow a vanin nda ndaa latulu, felengia naŋ hɔlla-a nda co ni, nda kpow masaa n'bungaa a simlacia nda co ni, vanaa bɛndua lelɛŋnda a vanaa ɲaanun o soa coo-a nda co ni.

²⁴A co hunɔɔ nɔm cɔlɔbaa a ɲɛm cɔwvon, a ɲɛla ɲaanannda soa nan-dan, a ɲɛla ɲaanannda pɔmbɔla cɔlua nan-ndan, a vanndacieea sɛ́lɛ́ bɛndoo. A simulnin nɔm ba-ba fee a kɔ̀ɔ̀la cɔwla bɛndulan a lapɔmbɔlan, a mɔsilta cɔwlan. I viamnin nda le yamɛi nɔmnde kiolɔɔ, a kialunin yamɛi nɔmnde mɛɛ tɔŋnda ndalan la co yɛ.

²⁵I toalnin nɔm kɔɔli cili a paŋala nuu. Lelan, vanaa kan a tosalnin nɔm dɛnndan a kɔltuwvo, a sungunin nɔm milinndo ma kili nɔm nilan. Vanaa nɔmaa tɔ̀a lonin yoomu-a delinin o mɔɛi cɔwve bɛngu, yaamɔɔa cuanin poaa nɔmnda a cuavaa nɔmaa laandua. Vanaa nɔmaa tɔ̀a lonin-nda ŋɔanin o yinnden nin.

²⁶A yunganin nɔm mà soli nɔm ɲɛla n dovin-ndan lekɔɔ.

²⁷Lende ya kpaanin suunda nɔmndo a dɛnnda nɔmnda nɔɔlɛila n kandu tosa Esipte pɔ́ lan ni. O kon, a muli lɛnin hɔlla o vanaa kan ndo le, a ve lɛnin loonɔnndo a Esipte o kɔɔ le.

²⁸Kani nuaa ya Maalii, ya co Mɛlɛka-o dimi ni aa: «Tofa vɔ, i co nɔm malɔɔ vanaa n nɔ nɛyɔn ndaa-a o ba, vanaa dɛnɛ ndaa fula nɔm iyeema-a pɛɛn!

²⁹A tosalnin nɔm sɔɔn a nɛyɔnndo, a poondiaanin tɔnɔ fula o sanga nɔmndo nin-ndo nɔm o ba, mà yunga nɔm, mà mɛi nɔm fondo fúú. O kon, vannda canin bɛɛtambɛi suunda nɔmndo, bɛɛtambɛi nɔɔlian nɔmndo a bɛɛtambɛi laasian nɔmndo.

³⁰Lende nda tosanin a nɔm ni, kani a suunda a vanaa-mangalaa-isɔɔa, má lɔngɔlian a piɔmaa ndaa.

³¹Le tùú n kela maa Ohola bɛ nɔm-ndo, lelan ya sɔɔ taala kólaa o kol nin-ndo nɔm o ba ni.

³²Kani nuaa ya Maalii, ya co Mɛlɛka-o dimi ni aa: ‹Nɔm bɛɛ kolnin o taala kólaa bɛ nɔm kol nin-ndo nin, taala kólaa bɛndu yingilɛi pɛ cá-o. O mɛminin vannda mà tɛɛndan nɔm, kani ɲɛ luɛi lenin-ndo co o bɔɔ.›

³³Nɔm Oholiba, a pumnin mɔiyan, ma pim vɛlɛ mɔnɛi, kani taala kólaa imɔnɔɔ a taala kólaa dɛnɛ palaa taala kólaa Samari bɛ nɔm-ndo co ni.

³⁴A kolnin a taala kólaa kon, mà cii ɲɛ-ɲɛ vanin lenin veeliaa sɛ́ɛ́n. A cii pɛ, a pesipesi ndu a n'ciŋ, a booluu mɛɛma nɔmndan a tɛndula ndɔlan, kani ya dimi lende ni. Ya Maalii, ya co Mɛlɛka-o soo nuaa ni.»

³⁵Nuaa Maalii, o co Mɛlɛka-o dimi ni aa: «Le tùú n pɔɛɛnun ya-o, le tùú n kɛɛ ya ma mulul-la kɔɔ-o, mɛɛ nɔm bɛɛ sɔla niko sangaa le suunda nɔmndo a le nɔɔlian nɔmndo.»

³⁶Mí Mɛlɛka dimul-la aa: «Po vanacieo sei, a kialunin pá yamɛi Ohola nda Oholiba-e? Tɛɛsial nda dɛnnda nɔɔlɛila nda tosa lan kpow,

³⁷kani o suundaa nin nda luei bollen ni, bala ndalan la co la lɔngɔlɛilan a koovan, a suundaa a piɔmaa ndaa. Handɔɔ o kon coo, poaa ndaa vilul-la-a, má loam nda o yinnden nin le nda sálàá solio, haliko mi piɔmaa kan somisomi nda.

³⁸Tofa vɔ vɛlɛ ɲɛ nda tosal-la-o: paale len, má nɔɔliaa fonda ni diandaa, má del kasi a palɛi nii diandɛi.

³⁹Paale nda va poaa ndaa sálàá solio o piɔmaa ndaa lo len, má kɔ luɛi vɛlɛ o cɛi-kola-toandaa ni diandaa nin le ndu nɔɔliaa. Ken nda tosa o cɛi nuu tɛɛn déŋ ni.

⁴⁰Hiovɔɔ o kon coo, má viam bɛɛ vannda vanpiaandua nuwviaa nɛɛ levil lándán, má viam kilaa nda kɔɔli, nduyɛ mí vanpiaandua kan hun. Mɛɛ nda hin, nɔm Oholiba, má pulun le nda, má suinun ɲɛlan o hɔl, má dovin a kelan a yɔɔvama nɔmndan,

⁴¹má cal o kpele kɛndɛ-kɛndɔɔ coo, tabalio va o kɛsiaa o kpele kon hɔl-ndɔ, má handu lasikɔlɔ nuu a ansan nuu lecoo.

⁴²Vɔkɔ-vɔkɔ kponyo bɛndoo va sɔɛi, vanpiaandua taw-taw va lon, mí vannda hun a vannda Saba, mí vanpiaandua kan a vow vanlaandua ŋiɔnda ha kelan o laba, má vow nda mɔsilta kɛndɛ-kɛndɛla lemasalan o lebol.

⁴³Mí yiyan maa vanalanɔ siɔŋin hoo ndu pila o suundaa nin-ndo co vɛlɛ hiovɔɔ laci a laasianndo o suundaa nin.

⁴⁴Vannda co hunɔɔ o ndu lo mɛɛ vana kɔa o vanalanɔ suundɛiyo lo yɛ. Lende vannda hin o Ohola nda Oholiba lo ni, vanlaandua laasiaŋaa kan pɛɛn.

⁴⁵Vanpiaandua sandaa kialunin yamɛi ndɛi mɛɛ vana kialu yamɛi vanlaandua yɛ, mɛɛ vana kialu yamɛi vanlaandua diw vanndacieea-a yɛ, kani vanlaandua suundɛiya nda co ni, bala ndalan la co lalɔngɔlɛilan a koovan.

⁴⁶Kani nuaa Maalii, o co Mɛlɛka-o dimi ni aa: «A veelu sɛ́lɛ́ bɛndoo le nda kɔlan cɔlɔbaa, i minginin nda yulan-yulan a siòònde, mà poondiaa nda ɲɔɔn o laba.

⁴⁷Vanaa sɛ́lɛ́ bɛndua kan viinin nda a powtan, a diwnin nda a mɔɔn cɔwvon, a diwnin poaa ndaa a cuavaa ndaa laandua, a loamnin cɛila ndalan.

⁴⁸Lende ya ɲuminin dɛnɛ nɔɔlɛiyo o lɛŋnden nden nin ni. O kon, vanlaandua kpow a sɔlanin silaa a ken o kɔɔ, a tosa lɛnin dɛnnda nɔɔlɛilan mɛɛ nda co lan tosaa nuaa yɛ le.

⁴⁹A kpuluŋanin hakila niaala biilaa n'piɔmndan niaa pilaa coo. O kon niaa sinanin ni maa ya co Maalii ni, Mɛlɛka pɛɛn.»