Read Kissi Esekiɛl 24 Bible Online

Esekiɛl 24 - Kissi bible

Esekiɛl 24

¹O vɔsi ŋɔmahiɔɔlundɔɔ nin, paangii tɔ́ndɔɛi va palɛi tɔ́, mí Mɛlɛka soaa o ya lo, mó dimul-la aa:

²«Po vanacieo sei, sɛva paalen nden hau, sɛva len kpafii. Kani paalen nden hau masaa Babilɔn del Yerusalɛm coo ni.

³Lelan dimul vanaa nila kalua ha taloo aa: Nuaa Maalii, o co Mɛlɛka-o dimi ni aa: «Bɛɛndiaa kpɛɛnɛi, bɛɛndiaa ndi ma vow mɛnndan lenin.

⁴Vow visin kɛndɔn kpow lenin, visin hiow naŋɔɔ-on, lɔloo a congoo, pei ndi ca a paala kɛndɛ-kɛndɛlan.

⁵Cua visin saa hiow naŋɔɔ-a, mà ciiŋiaa yɔmnde o kpɛɛnɛi ken bɛngu, yaw mun mì n ŋol taw-taw háá mì paalan la lɔw lɛkpɛ.»

⁶Lelan ɲɛ Maalii, o co Mɛlɛka-o co dimio-o co hoo ni aa: «Dɛnɛ palaa co le kobi diyaa n'vanndo ho, kpɛɛnɛi pɛ a ɲɛ sɔvɛiyo-e o co ni, sɔva ndɔ kon faŋan ndi. Vannda sooluunin visin n'kpungban lenin n'pilɛn-pilɛnndon, kɛ o venin a lesion malɔɔ le.

⁷Kani kooma vanaa o diw-va ma co vɔ ceen déŋ, o pow bandíláà coo kpendekele o taaliaa man ni, o sɛŋi man o lɛŋnde muungu coo mì maa mɔɲamɔɲa o cundoo nin te.

⁸O kɔltuw bɛndu-bɛndoo nin, mí cuiŋi kooma man o pow bandíláà coo le màá mingio, yɔŋii ma mɔɲamɔɲa.»

⁹Le kɔlɔ kon Maalii, o co Mɛlɛka-o dimi ni aa: «Dɛnɛ palaa co le kobi diyaa n'vanndo ho! Ya bɛɛ i yeema mi tosa yinndaceele bɛndoo.

¹⁰Lelan vow yɔmnde taw-taw mà ciŋa yinnden, mà yaw vision, mà vow tɔɔyon lenin háá mì paalan la ŋɔɛ kpúlúká.

¹¹O kon kɔɔli, mà handu kpɛɛnɛi fondoei o dɛngultan coo, haliko mi i tuulu, mì daɲɛi diw vaŋ, o kon mì sɔva co lenin-ndo cɛɛlun.

¹²Kɛ kindikindin kon kpow, sanga fondoo koni o co ni, sɔva co o piaa o kpɛɛnɛi ken nin-ndo nɔla mò faŋan a yinnden te.»

¹³Nɔm Yerusalɛm, dɛnɛ nɔɔlɛiyo mingi nɔm maa kpɛɛnɛi sɔvɛi, mì yeema le nɔm dindio kɛ a cɛl te pɛ! Lelan a sɔla lɛnin dindio a dɛnɛ nɔm nɔɔlɛiyo le, háá mì cii kɔltuw nuu cuiŋi nɔm coo.

¹⁴Ya Mɛlɛka soo nuaa ni, i tosanin ɲɛ ya dimi-o, i peelunin sɔɛi nii, i mɛinin ɲɛ-ɲɛ le tosaa le, ɲíí biinin ya le, mɔnɛi biinin ya le. Yamɛi nɔmnde kialunnin mɛɛ kelala nɔmndan a dɛnnda nɔmndan la co yɛ!» Sɔɛi fula Maalii o sondo-e co ken ni, Mɛlɛka pɛɛn.

¹⁵Mí Mɛlɛka soaa o ya lo, mó dimul-la aa:

¹⁶«Po vanacieo sei, i co (lanɔ) hɛnan nɔm hoo o tofaa-o yomɔɔ o lepilɔɔ kpɔsu, mò lo nɔm o hɔl telele. Kɛ a bɛnda ma tosa biisi ndɔɔ le, a bɛnda ma caŋ ndu le, a bɛnda ma tuisi mamɛmɛ le.

¹⁷Ŋɔɔcian o kɔl nin, kɛ tosa sɔɔn biisin vanvílɛ́iya le. Vownun mɔsil nɔm vilɛiyo, vownun samtala nɔmndan o n'pelu, kumbu hɔlaa nɔmnda tálá co lebɛngu-o le, dia ɲɛdiaa biisi caanda le.»

¹⁸Idiiyo mí soaa o vannda lo, icɔl kon mí laa nuu vu. O kon, diimandɔɔ idiiyo, mí tosa mɛɛ Mɛlɛka hendul-la tɔŋndo yɛ.

¹⁹Mí vannda dimul-la aa: «Cɔm naa kɔlɔ dɛnɛ n co hoo tosaa-o nɔ le naa-o!»

²⁰Mí mulul nda aa: «Sɔɛi Mɛlɛka-e dimulun ya ni aa:

²¹Dimul cuavaa Israɛlla aa nuaa Maalii Hala dimi ni aa: ‹Tofa vɔ, i co fonda diandaa nɔɔliaa, o co kon tosaa, mì la va lisanndo a yoomuan-ndo, o hɔlta niaalan la co kon mɛɛndanndo a kɔlkɛndɔɔ-o, cɛi ni yoomula niaalan la tiindan kon-ndo pɛɛn. Poaa niaa a cuavaa niaa laandua niaa mɛinin-nda a sɔlanin piɔ́mndan o mɔɔn cɔwvon bɛngu.

²²O kon, niaa bɛɛ la tosanin mɛɛ ya (Esekiɛl) tosa yɛ. La kumbunin hɔlaa niaa tálá co lebɛngu-o le, la dinin ɲɛdiaa biisi caanda le.

²³Mɔsilta niaalan la vanin niaa o lebol, la tosanin sɔɔn biision te, la ceŋnin te, kɛ la ɲawnin le hakila niaalan mì la cɛɛŋun niaa pila ikɛi vellaa-velle.

²⁴Dɛnɛ Esekiɛl tosa-o vanin tɔɔmaseloo le niaa ni, la tosanin mɛɛ o tosa yɛ kpafii. Lɔ́ɔ́ kon keinin niaa coo-o, la sinanin maa ya co Maalii ni, Mɛlɛka pɛɛn.

²⁵Nɔm vanacieo yɛ, yaŋ-ndɔ nilan: paale vanin mì hɛlu Cɛ̀i biilaa yɔngu kon nda yoomuan-ndo nda o ba, Cɛ̀i kɔlkɛndɛ nda kon, Cɛ̀i nda dovian kon, o hɔlta ndalan la co kon mɛɛndanndo a ɲaaloo-o, ɲɛ yoomula ndalan la yeema kon taw-vo, mì hɛlu vɛlɛ poaa ndaa a cuavaa ndaa laandua.

²⁶Paale len, vana hɛlun-ndo hunnin o nɔm ndo, mò hun dimul nɔm yoongu kon.

²⁷Paale len, sondo nɔmndo kumbinnin ma soo niaa vana hɛlun kon-ndo, a ve lɛnin bobonɔ le, nɔm sìŋnunnin tɔɔmaseloo le vanaa nia, nda bɛɛ sinanin o kon maa ya co Mɛlɛka ni.