Read Kissi Esekiɛl 25 Bible Online

Esekiɛl 25 - Kissi bible

Esekiɛl 25

¹Mí Mɛlɛka soaa o ya lo, mó dimul-la aa:

²«Po vanacieo sei, muli hɔlaa nɔmnda a kpengii Amɔnnda, mà soo a tambii nda tambunin-nde o kɔɔ.

³Dimul nda aa la yaŋ-ndɔ nilan o sɔɛi Maalii-e, Mɛlɛka pɛɛn. Nuaa Maalii, o co Mɛlɛka-o dimi ni aa: ‹Le tùú niaa mam cɛi-kola-toandaa diandaa nuu lɔ́ɔ́ nda nɔɔliaa ndu-o, le tùú niaa mam lɛŋnde Israɛl-ten telen nda tɛɛmbuu len-ndo o, le tùú niaa mam cuawva Yuda telen nda va kɔlan a nda o biyɔɔ nin-ndo o,

⁴lelan ya bɛɛ i co niaa hinul! I malnin niaa vanaa fula a ba paalen le can-ndo a o ba, mà hɛlu lɛŋnde niaalen. A kilanin dɔ́ɔ́ngɔ́la ndalan ma kunga lan o lɛŋnde niaalen nin, a kilanin calta ndalan o lɛŋnde niaalen coo. Nda dianin kɔmnde tɔlɔɔla niaalan ni, nda kolnin nɔnɔma niaan ni.

⁵I siinguunin kobio Raba yasabaa ɲɔɔmɛɛa, mì siinguu lɛŋnde poaa Amɔnnda kpow bɛ̀mɛ́lta saa. O kon la sinanin maa ya co Mɛlɛka ni.

⁶Kani nuaa Maalii Hala dimi ni aa: «Le tùú niaa tɛm balan mì la kundu pelon lɛŋ-ndo, le tùú niaa dɔwnun ɲaale a nɛyɔn Israɛlla o lakɔl, mì la pɛɛsa nda-o,

⁷i co ba nuu siɛndi mì soŋ niaa, mì mal niaa vanaa-mangalaa-isɔɔa o ba. I tɛɛmbuunin niaa, la ve lɛnin yungu le, i faŋanin niaa o lɛŋnden coo, mì tɛɛmbuu niaa kpow. La sinanin o kon maa ya co Mɛlɛka ni.»

⁸Nuaa Maalii, o co Mɛlɛka-o dimi ni aa: «Le tùú vannda Moab a haa Seir a dimi aa: ‹Cuawva Yuda siŋnun maa vanaa-mangalaa-isɔɔa kpow-vo.›

⁹I co kpaki balu lɛŋnde Moab len-ndo piɔlɔɔ vɔ́-vɔ́, mì koombiaa kpakila kunga kobila ndɔlan-ndan, kandɔɔ a kpengei kɔlan fulaa háá a kpengei pilɛi o pɛɛngulan. I kumbinin kobila ndala kɛndɛ-kɛndɛla lan maa Bɛt-Yesimɔt, Baal-Meɔn, Kiriataim.

¹⁰I malnin nda vanaa fula a ba paalen le can-ndo-a o ba mɛɛ poaa Amɔnnda co nin vanaa kan o ba yɛ. I yɔngunin nda lɛŋnde len mì le siŋnun ɲɛ nda, haliko vana pial-lɛ Amɔnnda diolan o vanaa-mangalaa-isɔɔa tɛɛn te.

¹¹I kialunin yamɛi Moabua mì tuisi nda sangaa coo, o kon mà sina maa ya co Mɛlɛka ni.»

¹²Nuaa Maalii Hala dimi ni aa: «Le tùú Edɔmnda tosal cuawva Yuda dɛnnda vɔɔnndan le nda màá mingullo-o, le tùú nda yɔŋnun vanaa vɔɔnda má mingul yungoo Yuda màá-o,

¹³lelan, nuaa Maalii Hala dimi ni aa: ‹I heelu ba nuu le Edɔmnda lɔɔ, i ciinin vanndacieea a cɔlua co lon-nda. I tɛɛmbuunin lɛŋnde len kandɔɔ a kobio Teman kɔlan háá a kobio Dedan. Vanaa kan kpow a vunin o mɔɛi cɔwve bɛngu.

¹⁴I mingulnin Edɔmnda màá a bala vanaa niaa, Israɛlla pɛɛn. Israɛlla dɔawnin Edɔmnda yɛɛvɛ mɛɛ kɔl ni tuwvo a kɔl ni fulaa co yɛ. O kon, a sinanin mɛɛ ya Mɛlɛka mingi màá yɛ.› Ya Maalii, ya co Mɛlɛka-o soo nuaa ni.›»

¹⁵Nuaa Maalii Hala dimi ni aa: «Le tùú Filistia tosa dɛnnda vɔɔnndan le màá mingio-o, le tùú nda mingi màá a nɛyɔnndo o lakɔl le ɲɔɔ tɛɛmbuuo o hiilɛi ndɛi lɔ́ɔ́-lɔ́ɔ̀-e nin-ndo,

¹⁶lelan, nuaa Maalii Hala dimi ni aa: ‹Tofa vɔ, ya i heelunin ba nuu mì soŋ Filistia, i ciinin Keretiia kpow, mì siow vanaa tɔ̀a lonin yoomu o mɛmma ihɛllan kɔngɔa-a diw kpede.

¹⁷I mingulnin nda màála bɛndula kɔltuwlan. O kon telen ya mingulnin nda màá lende-o, a sinanin maa ya co Mɛlɛka ni.»›