Read Kissi Esekiɛl 26 Bible Online

Esekiɛl 26 - Kissi bible

Esekiɛl 26

¹O vɔsi tɔ́ a ò pilɛndɔɔ nin, paangei[8] va malɔ lepilɛ, mí Mɛlɛka soaa o ya lo, mó dimul-la aa:

²«Po vanacieo sei, kobio Tir mam kobio Yerusalɛm, mó dimi aa: ‹O piɔsipiɔsi fɔ́! Dio luɛyaa vanaa-mangalaa-isɔɔa piɔsi vɔ́-vɔ́! O ya lo vannda co nin mulin hunɔɔ ni, ya i pianin cá, kɛ ndu ndu siŋnun ciee pɔmndo.›

³Lelan nuaa Maalii, o co Mɛlɛka-o dimi ni aa: ‹Nɔm kobio Tir, má cè ya nɔm kuello. I yaanin vannda sɛ́lɛ́ bɛndoo taw mà kɔ del nɔm coo mɛɛ mɛmma ihɛllan ma biiŋun a kpaayaa nuaa yɛ.

⁴Vanaa kan pesinin kpakilan Tir mà koombiaa cɛila coocoola co lon-ndan. I basunin cundu co lon-ndo mì siinguu fonda kon pow bandílá pulee-o.

⁵Fonda vana tɛ̀i yalalan le vesaa-o o vanin o mɛmma ihɛllan tɛɛn ni. Kani ya soo lende ni.› Diom Maalii, o co Mɛlɛka-o dimi-o co kon ni. Kobi kon siŋnunnin pungapungaa vanaa-mangalaa-isɔɔa o ba.

⁶Cuavaa ndɔa laandua co yondolan nin-nda a vunin o mɔɛi cɔwve bɛngu. O kon vannda sinanin ni maa ya co Mɛlɛka ni.

⁷Kani nuaa Maalii, o co Mɛlɛka-o dimi ni aa: «I viamnin Nebukanɛsar masaa Babilɔn, masa hiow masaa-o, mò cɛn a maluaŋ, mò hinul kobio Tir a soa, a ɲɛla ɲaanannda soa nan-ndan, a vanaa ɲaanun a soa-a, a vanaa cɔwva taw-taw, a sɛ́lɛ́ bɛndu-bɛndoo kɔɔli.

⁸O diwnin cuavaa nɔmaa laandua co yondolan nin-nda. O kilanin piŋndan le nɔm cɔlɔbaa, o yaŋnin yaŋɔɔla cɔwlan le nɔm biyɔɔ, o siminin kɔ̀ɔ̀ cɔw bɛndoo le nɔm cɔlɔbaa.

⁹O mulinin saa kóndóa ndɔa hɔlla o kpakila nɔmndan, mà kundu lan kpoku-kpoku. O koombiaanin cɛila coocoola nɔmndan a ɲɛm ndɔn cɔwvon.

¹⁰Cundu bɛndu soa ndɔa kunda bɛndua vanin cuaa coocoo-o kumbunin nɔm mɔku-mɔku. Tuma vanaa ndɔa ɲaanun a soa-a a tiiyanin a ɲɛla ɲaanannda soa nan-ndan, a bɛngula ɲɛla ɲaanannda lan, mò luɛi o diola luɛyaala nɔmndan mɛɛ vanaa cɔwva luɛi o kobi nda bii-o nin yɛ, kpakila nɔmndan la ɲiiyanin ɲinkon.

¹¹O nɛwnin nɛila nɔmndan kpow a buukula soa ndɔa. O diwnin vanaa nɔmnda a mɔɛi cɔwve, powta sálàla co tɔɔmasele kpaaya nɔmndo lan la koombiaanin lɛŋ.

¹²Vannda cuanin bolofaa nɔmndo, mà poondiaa ɲɛm leyulan nɔmndon. A koombiaanin kpakila nɔmndan, mà pesipesi cɛila nɔmnda latɔ́ɔ́-tɔ́ɔ́lan. A viawnin powta nɔmndan, yɔmii nɔmnde a cundu nɔmndo o mɛnndan nin.

¹³I kpaanin vɔkɔ-vɔkɔ n'condu nɔmndo, vana tui lɛnin bangala nɔmndan diom te.

¹⁴I siinguunin nɔm pow bandílá pulee-o, a siŋnunnin fonda tɛiyaa layalaa, a tengulun ndɛnin te few. Kani ya Mɛlɛka soo lende ni. Ya Maalii, ya co Mɛlɛka-o soo nuaa ni.»

¹⁵Nuaa Maalii Hala soo o kobio Tir lo ni aa: «Lɔ́ɔ́ n delnin mì ɲɔɔ biiŋun-ndo, telen vanaa vanin piɔ́mndo-a co va lawlawvo-o, telen vannda vanin vannda diwvo o nɔm nin-ndo, vɛ̀ɛ̀ lɛŋii co o mɛnndan tɛɛn-nde ɲiiyanin te?

¹⁶Simlacia co o mɛmma ihɛllan tɛɛn-nda toalnin o kpɛŋɛla ndala lemasalan coo, a solinin domala ndala lecoolan, mà yungan mà hulu volɔɔla ndala sɔɔlaalan. A yɔŋnunnin yulan-yulan a siòònde, mà cal lɛŋ vɔyɔn. A vanin vooloo a siòònde telen oo telen mì mɔnɛi va nda biyɔɔ le nɔm.

¹⁷A solinin condii biisiei nɔm coo, mà dimul nɔm aa: «Kpòkóó dɛnɛ! A ɲum mundu fɔ́! Éé nɔm kobi vanaa co kelaa o mɛmma ihɛllan coo-a va hoo a piaa nin ca-o! Nɔm kobi latɔ́ɔ́-tɔ́ɔ́ óò nɔ hoo kpaaya bɛndoo o mɛmma ihɛllan coo-o dɛ! Kobio a vanaa va icali lenin-nda a va vanaa balu nda-a siòònde lueiyo ba-ba fee!

¹⁸Sunsun yɛ, telen n del mà piɔl-lo, mí siòònde bii lɛŋii co o mɛnndan tɛɛn-nde. Lɛŋii co o mɛnndan tɛɛn-nde yɔŋnun yoloma-yoloma le tambii nɔmnde.»

¹⁹Kani nuaa Maalii Hala dimi ni aa: «Tuma ya siinguu nɔm ciee-piɔ́m-ndo maa kobila vanndaciee co icali nin te lan-ndo, lɔ́ɔ́ ya tuisinin nɔm o soon bɛndoo nin mì mɛmma bɛnduan ma kumbu nɔm mɔku-mɔku-o,

²⁰i tuisinin nɔm niaa vanaa co tolɔɔ o soon yingilaa nin-nda latulu, mì la kɔɛ vanaa hiow sindɛ-a ikɛi. I yaanin nɔm mà kɔ cal o lɛŋnden bɛngu di-di niaa vanaa co tolɔɔ o soon yingilaa nin-nda latulu, maa ɲɛm tambu sindɛ-on, yɔŋii vannda cal vɛlɛ nɔm nin. Nduyɛ, i mandanin biiloo le lɛŋnde vanaa kiyɛiya co nin-nden.

²¹I tosanin mì dɛnɛ nɔmndo luei vannda siòònde taw, nduyɛ nɔm ve lɛnin ɲɛ-ɲɛ le. Vannda nuwviaanin nɔm, kɛ a seelunin nɔm le fɛɛn a fɛɛn te!» Diom Maalii dimi-o co kon ni, Mɛlɛka pɛɛn.