Read Kissi Esekiɛl 27 Bible Online

Esekiɛl 27 - Kissi bible

Esekiɛl 27

¹Mí Mɛlɛka soaa o ya lo, mó dimul-la aa:

²«Po vanacieo sei, soli condii biisiei kobio Tir coo!

³Dimul ndu aa: ‹Òó nɔm co hoo icali o mɛmma ihɛllan kɔngɔ-o, nɔm co hoo yulalen tosaa a vanaa-mangalaa-isɔɔa taw a lɛŋii co o mɛnndan tɛɛn-nde sɛ́lɛ́ bɛndoo taw-vo. Tuei-yɔ mɛɛ Maalii Hala dimi yɛ aa nɔm Tir a va dimio aa a tiwnun bɔɔ a naŋɔɔ!

⁴O mɛmma ihɛllan tɛɛn dí pɛɛngula nɔmndan la co ni. Vanaa tangul nɔmnda a nɛŋi nɔm bɔɔ.

⁵A yɔmii siprɛsiei Senir nda tangul kungala balu nɔmndan kpow ni, má tol nɔm yɔm sɛɛdreo Liban le lɛfɛ landaa heeloo,

⁶má toosial nɔm bombola pɔmbɔlan a yálánnde Basan. Má toosial nɔm fonda fɛkɛiyo o dɛ̀ndɛ̀ bɛndu mamɛnndo coo a ciŋun kamaa, n nda fula o lɛŋnde Asiri len nin-ndon, la nda cua o lɛŋii co o mɛnndan tɛɛn Kitim-ndan.

⁷Kolala-keesela sɔɔlaalan Esipte la va kola nɔm vaan-vaan kuumbuan o hɔl-lo a vanaa sina nɔm kɔɔli-kɔɔli-a ni. Kola siaŋa vólotótoo a kola siaŋa sɔɔtɔtɔɔ, la fula o lɛŋii co o mɛnndan tɛɛn Elisia lan la va la kumbuaa o vɔngula nɔmndan coo ni.

⁸Vannda Sidɔn a haa Arvad va vanaa tɛɛngaa ladɛ̀ndɛ̀a nɔmnda ni. Òó nɔm Tir! Vanaa hiow dɛ̀ndɛ̀la mamɛnndan caa ɲaanɔnndo taw-va va kɔlan a dɛ̀ndɛ̀la nɔmndan ni.

⁹Kaasoŋaa kɔlkalua Kebal a vanaa dɛnɛ sinaa ndɔa bɛndua va o nɔm ndo le tɛɛngun dɛ̀ndɛ̀la nɔmndan baŋullo. Dɛ̀ndɛ̀la mɛmma ihɛl tan kpow a vanaa tɛɛngaa ndaa va o nɔm ndo le vɔngula nɔmndan baa kiolɔɔ.

¹⁰Vannda Pɛrse, haa Lud a haa Put va vallo vanaa nɔmaa cɔwva tɛɛn, nda va langbaa cɔvaa nɔmnda ni. O nɔmndo ndáà landu kɔ̀ɔ̀la cɔwlan a mɔsilta cɔwlan ni, nda va biilu nɔmndo ni.

¹¹Vannda Arvad a kuubaa cɔvaa nɔmnda va a balaa o kpakila nɔmndan pindo, kpalilla va yasabaala cɔwla nɔmndan kandaa, a va kɔ̀ɔ̀la cɔwla ndalan lɛɛndoo o kpakila nɔmndan balɔɔ sɔ́, má nɛŋi nɔm nɛŋio pila.

¹²Vannda Tarsis va yulalen tosaa a nɔm, le ɲɛm kɛndɛn va nɔm o ba taw-von. A va hunɔɔ a volin latámán, cilinndon, ciliŋun humbon a liion o nɔm ndo le vɔngulan tosaa niaa ndaa.

¹³Vannda Yavan, haa Tubal a haa Mesɛk va yulalen tosaa a nɔm, a va cɛa a ɲɛm cɔwnun a daɲan-ndon yɔngoo le singaa a vɔngula nɔmndan.

¹⁴Vannda o Tokarma lo cɛinin va hunɔɔ a soa, vanaa ɲaanun o soa coo-a a milɛɛa le vɔngulan tosaa niaa ndaa.

¹⁵La va yulalen niaa poaa Dedan-nda, lɛŋii co o mɛnndan tɛɛn-nde i bɔɔ-bɔɔ, nɔm o ba vɔngula ndalan láà kei ni, a va nɔm salaa a ciŋun kamaa a bungan yɔm Ebɛn.

¹⁶Vannda Aram va vɔngulan tosaa nɔm o ba le ɲɛm sɔvɛn nɔm óò toosiaa mí n va nɔm o ba taw-taw-von, a va hunɔɔ le yulalen o nɔm ndo: a powta emerɔd, kolala siaŋala vólotótolan, kolala sɔɔlaalan, kolala keeselan, koon a powta sɔvɛla báà kalalan.

¹⁷Tàndá Yuda-o a lɛŋnde Israɛl-ten kpow le va yulalen tosaa a nɔm, a va hunɔɔ a kulun fula Minnit-on o lɔ́ɔ́ nɔmndo nin: ɔrse, lɛan, cuɛiyan a ansan.

¹⁸Vannda Damas bɛɛ a va yulalen tosaa a nɔm le ɲɛm nɔm óò toosiaa mí n va nɔm o ba taw-taw-von, le ɲɛm kɛndɛn va nɔm o ba taw-von kpow, a va nɔm mɔima fula Hɛlbon-ndan a kola humbu yiiŋii saa cuuo.

¹⁹Vannda Vedan a haa Yavan fulaa Usal bɛɛ va hunɔɔ vɔngulan o nɔm ndo, a va hunɔɔ a ciliŋun cɔavan, a tɔɔyun cun kɛndɔn le vɔngulan tosaa niaa ndaa.

²⁰Vannda Dedan va vɔngulan tosaa a nɔm a kolala vana pɛngɛla cɔlua vana hel coo-a o kɔɔ lan.

²¹Vannda Arabii a simlacia Kedar kpow a va yulalen tosaa nɔm o ba bɛngu, o nda lo yulaa nɔmaa n'saa téndéa, yulaa nɔmaa n'saa kóndóa a yulaa nɔmaa cuinaa toovia va ni.

²²Yulaa Saba a haa Raema va vɔngula ndalan tosaa o nɔm ndo, a va hunɔɔ o lɔ́ɔ́ nɔmndo nin, a ɲɛm cun kɛndɔn kpede, a powta báà kàlàlan súúlan kpow a sianion.

²³Haran, Kannee a Edɛn, yulaa Saba, haa Asiri a haa Kilmad va vɔngula ndalan tosaa niaa ndaa,

²⁴a va yulale ɲɛm kɛndɛ-kɛndɛle yeelɛilen tosaa niaa ndaa, a va nɔm yulale domala bɛndula siaŋala vólotóto len, yulale domala sɔɔlaa len, yulale kolala yinaala kɛndɛ-kɛndɛlen, yulale yoei lɔfaalen tosallo a labɛɛla kpeekpei.

²⁵Dɛ̀ndɛ̀la mamɛnndan Tarsis la va ɲɛm leyulan nɔmndon vilio ni. Nɔm, a vannun o bolofaa nin a o biiloo nin o mɛmma ihɛllan tɛɛn.

²⁶O mɛmma bɛnduan tɛɛn dí vanaa tɛɛngaa ladɛ̀ndɛ̀a nɔmnda yɛɛ nɔm ni, hoeyii fula a ba paalen le can-ndo-e yimiyiminin nɔm o mɛmma ihɛllan tɛɛn.

²⁷Paale n mɛɛyanin o mɛnndan bɛngu len, bolofaa nɔmndo, ɲɛm n manda-on, ɲɛm nɔm leyulan, vanaa tɛɛngaa ladɛ̀ndɛ̀a nɔmnda, vanaa vanin o dɛ̀ndɛ̀ nɔmndo nin-nda, vanaa baŋulaa tɛɛngun ladɛ̀ndɛ̀a nɔmnda, yulaa nɔmnda kpow, vanaa cɔvaa co nɔm o ba bɛngu-a kpow a vanaa co o sɛ́lɛ́ nɔm bɛndoo tɛɛn-nda kpede a mɛɛyanin o mɛmma ihɛllan tɛɛn.

²⁸Vanaa co o kɔngɔlan demullo-a tueyɔɔ vanaa tɛɛngaa nɔmnda koŋullo, má ɲiiya.

²⁹O kon, vanaa tɛɛngaa ladɛ̀ndɛ̀a kpow, vanaa vanin o dɛ̀ndɛ̀lan nin-nda kpede a vanaa baalaa ladɛ̀ndɛ̀a faw a toalnin o dɛ̀ndɛ̀la ndalan nin mà kɔ simnun o kɔngɔ.

³⁰A koŋulnin nɔm coo, má caŋ fúkpàà-fùkpàà mà caŋ coocoo kpélén a mɔnɛi. A vownunnin loolio o lebol, mà yuulian o pultan nin.

³¹A sendinnin tembeltan le nɔm, mà vownun volɔɔla biisilan. A caŋnin nɔm coo a mɔnɛi bɛnduei o lakɔl, mà somisomin taw.

³²A solinin condii biisiei nɔm coo o dɛnɛ palaa nda kon nin, mà cua condii biisiei aa: «Nɛ̀ɛ́-nɛ̀ va yɛ maa Tir nɛ? Nɛ̀ɛ́ va yɛ maa kobi piɔl kon vɔ́-vɔ́ o mɛmma ihɛllan tɛɛn, mì ɲɔɔ mei lon kpili-o nɛ?

³³Tuma vɔngula nɔmndan la va fulaa o mɛmma ihɛllan nin-ndo, a va vanaa-mangalaa-isɔɔa taw-taw pimio mà va masaa o lɛŋnden coo siinguuo vanaa bolofaa a ɲɛm kɛndɛn nɔmndon a á vɔngula va nɔm o ba taw lan.

³⁴Kɛ mɛɛ mɛmma ihɛllan ma yimi nɔm, mí vɔngula nɔmndan a ɲɛ-ɲɛ va o dɛ̀ndɔ̀ɔ́ nin toal o mɛmma yingilan tumndo dí a nɔm pila latulu.

³⁵Vanaa co icali o lɛŋii co o mɛnndan tɛɛn-nde nin-nda kpow a co a mɔnɛi le nɔm. Siòònde bii masaa ndaa ma yɔŋnun yoloma-yoloma, hɔlaa ndaa yɔŋnun ɲakpadii.

³⁶Yulaa co vanaa-mangalaa-isɔɔa tɛɛn-nda a co hùíyé hɔŋndo (a kɔndɔfillo) le dɛnɛ nɔmndo. Nɔm Tir, dɛnɛ nɔmndo luei vannda siòònde, le fɛɛn a fɛɛn nin, a ve lɛnin ɲɛ-ɲɛ le few!»