Read Kissi Esekiɛl 28 Bible Online

Esekiɛl 28 - Kissi bible

Esekiɛl 28

¹Mí Mɛlɛka soaa o ya lo, mó dimul-la aa:

²«Po vanacieo sei, dimul masa co kobio Tir bollen-ndo aa nuaa Maalii Hala dimi ni aa: ‹Kɔl nɔmndo pɛ a kuundianndo háá má dimi aa hala n co ni! A co icali o ɲɛ-calaa Hala-o coo o mɛmma ihɛllan tɛɛn. Nɔm yɛ, vanacieo n co ni, a co Hala le, kɛ má tuu maa yiyan nɔmndo a yiyan Hala-o kpen-kpen la co ni.

³A co yiyanndo maa a hiow Daniɛl kɔlkaloo, a nɔ o kɔl maa ɲɛ-ɲɛ ve o viannan a nɔm te.

⁴A kɔlkalu nɔmndo a á dɛnɛ sinaa nɔmndo, má cuungiaa bolofaa taw, má cuungiaa sianion a volion o ɲɛm sɔlan nɔmndon nin.

⁵A vangala bolofaa nɔmndo o yulale n caa taw len nin, le bolofaa nɔm kon, mí kɔl nɔmndo pia a yongaa.

⁶Lelan, nuaa Maalii, o co Mɛlɛka-o soo ni aa: «Le tùú n ce maa yiyan nɔmndo co kpen-kpen a yiyan Hala-o-o,

⁷i viamnin mialla mà kɔ cɔlɔba nɔm. Vanaa hiow kɔlvesɛiyo o vanaa-mangalaa-isɔɔa tɛɛn-nda ya yaanin nɔm coo ni. A solinin mɔɔn ndan cɔwvon, mà tɛɛmbuu ɲɛm n tosa a kɔlkalu nɔmndo-on, mà laasiaa naŋɔɔ nɔmndo.

⁸A tuisinin nɔm o limii yingilɛi nin, mà sɔla piɔ́m vɔɔndo o mɛmma ihɛllan tɛɛn.

⁹Vɛ̀ɛ̀ a nɔla vɛlɛ mà dimi vanaa co nɔm diyɔɔ-a o hɔl aa hala n co ni? Nduyɛ vanacieo daama n lonin ɲinkon vanaa vanin nɔm diyɔɔ-a o ba ni. A venin hala nda o ba le.

¹⁰Nɔm, a vunin maa vanaa dii tooma le-a, mialla co nɔm diyɔɔ ni. Kani ya soo lende ni. Ya Maalii, ya co Mɛlɛka-o soo nuaa ni.»

¹¹Mí Mɛlɛka soaa o ya lo, mó dimul-la aa:

¹²«Po vanacieo sei, soli condii biisiei masaa Tir coo. Dimul ndu aa nuaa Maalii, o co Mɛlɛka-o dimi ni aa: ‹Nɔm va vana hiow vannda kpow tiwnɔnndo-o ni, nɔm óò nɔ kɔlkaloo taw-taw, nɔm óò hiow ba naŋɔɔ.

¹³A va icali Edɛn, o nakɔ Hala-o nin, a va o kumbaa a powta báà kàlàla súú-súù ka: sarduan, topas, diamannde, krisolite, onikse, yaspe, safir, pow siaŋa báà kalaa a emerɔd. Kelan nɔmndon va n'cɔavaa a sianion, paale n cɔwnun-nden kelan mun bɛɛndian ni.

¹⁴Mɛlɛkanɔ bɛndu kanda ɲɛm Hala-on-ndo n va ni, mí handu nɔm mì nɔm óò va o pembii diandɛi Hala-e coo, a va kelaa o powta ŋɛlɛngi-ŋɛlɛngilan tɛɛn.

¹⁵Kandɔɔ paale n cɔwnun-nden háá paale hakio luɛi nɔm o kɔl-ten, a yɔŋnun vana diola vɔɔn o kela nɔmndo nin te.

¹⁶Kɛ le yulale va nɔm yelelallo len, má pia a kɔlvesɛiyo, má tosa hakio. Le hee, mí faŋa nɔm o pembii Hala-e coo, nɔm mɛlɛkanɔ kanda ɲɛm Hala-on-ndo, mí soli nɔm o powta ŋɛlɛngi-ŋɛlɛngilan tɛɛn po.

¹⁷Le naŋɔɔ nɔmndo kɔl nɔmndo pɛ a kuundianndo ni, má laasiaa kɔlkalu nɔmndo le iŋɛlɛngi-ŋɛlɛngii nɔmnde. Lelan, mí viaw nɔm fakolo o lɛŋnden coo, mí siɛmbulan la bii nɔm masaa o hɔl kpendekele.

¹⁸A yɔŋnda vɔɔnda nɔmnda sɛ́lɛ́ bɛndulan, a kafala n co tosa o yulale nɔmnden nin-ndan, mí nɔm pila laasiaa sooluula nɔmndan. Lelan, mí soli yinnden o nɔm ndo, mí yinnde len le loam nɔm, mí siinguu nɔm pultan o lɛŋnden coo vanaa va nɔm tofaa-a kpow o hɔl.

¹⁹Vanaa sina nɔm o vanaa súúla celen tɛɛn-nda kpede a co o mɔnɛi nin le nɔm, dɛnɛ nɔmndo lueinin vannda siòònde. Le fɛɛn a fɛɛn nin a ve lɛnin ɲɛ-ɲɛ le.»

²⁰Mí Mɛlɛka soaa o ya lo, mó dimul-la aa:

²¹«Po vanacieo sei, muli hɔlaa nɔmnda a kpengii kobio Sidɔn, mà tɛɛngul ndu diom Hala-o.

²²Dimul ndu aa nuaa Maalii, o co Mɛlɛka-o soo ni aa: ‹Má cè ya nɔm kuello, nɔm (kobio) Sidɔn! I cɔmnin biilu nuu o nɔm tɛɛn. O kon, telen ya kialunin yaman kobio Sidɔn mì tuisi ndu sangalan coo-o, vannda sinanin maa ya co Mɛlɛka ni. Lende ya cɔmnin diondɔɔ nuu o kobi kalaa tɛɛn ni.

²³I tuisinin nàà n'kɔnyaa lon, mì tosa mì kooma vanndacieea ma taaliaa o nɛila ndɔlan coo. Cɔwvo cannin o kpengon kpow coo mò luɛi lon, mì vanaa ndɔa nda tiwnin ba-a deli o mɔɛi cɔwve bɛngu o kobi kalaa tɛɛn. O kon, vannda sinanin maa ya co Mɛlɛka ni.

²⁴O kon, kobi kon ve lɛnin maa yɔɔn siɛɛmbiaa, te kon te maa yɔm n'yɔɔ nɛyaa le cuavaa Israɛlla o vanaa balu ndu mà va ndu pɛɛsaa-a kpow tɛɛn te. O kon, vannda sinanin maa ya co Maalii ni, Mɛlɛka pɛɛn.

²⁵Tuei-yɔ diom Maalii Hala dimi-o aa: «Lɔ́ɔ́ ya solinin cuavaa Israɛlla nɛɛ nda co a sɛŋiannda vanaa súúla celennda tɛɛn, mì mɔɔsiaa nda nɛɛ pilɛ-o, i cɔmnin diondɔɔ nuu vanaa-mangalaa-isɔɔa o hɔl a nda o kɔɔ. O kon, a calnin o lɛŋnde ndalen nin, lɛŋnde ya yɔngu sindɛ vana baalaa nuu len, Yakɔb pɛɛn.

²⁶A calnunnin ndon nila ɲulu, a tangulnin cɛilan mà soli nakɔla n'rɛsɛnndan. Telen ya kialunin yaman vanaa balu nda, mà va nda pɛɛsaa kpow-va o, a calnin nila ɲulu o lɛŋnden nden nin. O kon a sinanin maa ya co Mɛlɛka ni, Hala ndaa pɛɛn.»