Read Kissi Esekiɛl 29 Bible Online

Esekiɛl 29 - Kissi bible

Esekiɛl 29

¹O vɔsi diinndɔɔ nin, paangii tɔ́ndɔɛi va malɔ tɔ́ a lediin, mí Mɛlɛka soaa o ya lo, mó dimul-la aa:

²«Po vanacieo, muli hɔlla a kpengii Faraɔnnɔɔ, masaa Esipte pɛɛn, má tɛɛngul ndu diom Hala-o a sɔɔn dɛnɛ palan hun yɔŋnunnin ndu pila a lɛŋnde Esipte len kpow-von.

³Soo o ndu lo má dimul ndu aa nuaa Maalii Hala dimi ni aa: ‹Nɔm Faraɔnnɔɔ, nɔm co masaa Esipte-o, tofa vɔ mɛɛ ya co nɔm kuello yɛ! Nɔm kuì bɛndu co hoo hinilan o peela bɛndula nɔmndan tɛɛn-ndo, a co dimio maa pee nɔm bɛndoo Nil, le nɔm o co ni, nɔm pila toosialan ndu ni.

⁴I co nɔm dolinndon vow o yaalelan nin, mì holiholi suvaa co o peela nɔmndan nin-nda o kɛkɛwla nɔmndan nin, o kon mì nan nɔm, mì soli nɔm o peela nɔmnda lan nin a suvaa peaa nɔmaa vanin kan a sɔɔŋia o kɛkɛwla nɔmndan nin-nda latulu.

⁵I co nɔm viovɔɔ a suvaa co kan o peela nɔmndan nin-nda kpede o lɛŋnde veselɛilen nin. I viow nɔm pɛ, a kɔ del lɛŋ o pollo nin, vana-vana kɔ cɔwviaanin nɔm te, vana-vana kɔ koondiaanin nɔm le nɔm kumbɔɔ le. I malnin nɔm visia yondoa a yowva coocoo o sondo mà de nɔm.

⁶O kon, vanaa co icali Esipte-a kpow a sinanin maa ya co Mɛlɛka ni. Kani tiindan leemu-leemoo maa lekpɛ̀ndɛ̀ yɔŋnun le cuavaa Israɛlla ni.

⁷Mɛɛ nda saa nɔm (Faraɔnnɔɔ) le nɔm tiindanndo, má yom nda o ba kpɔsu, má sɛɛsiaa nda congúla tumndan. Mɛɛ nda sɛɛŋun nɔm, má piɔl, má soli nda yoomuan.

⁸Lelan, nuaa Maalii Hala dimi ni aa: ‹Má cè ya! I co cɔwvo tuisi nɔm coo, mì cii vanndacieea a cɔlua co o nɔm ndo-a kpow diw.

⁹Lɛŋnde Esipte len le siŋnunnin lɛŋnde piɔlɛilen a bémbélan kposon. O kon vannda sinanin maa ya co Mɛlɛka ni, kani Faraɔnnɔɔ dimi aa ndu nɔ pee bɛndoo Nil ni, aa ndu toosiaa ndu ni.

¹⁰Lelan, má cè ya ndu pila a peela ndɔlan hinullo, nduyɛ, i siinguunin Esipte lɛŋnde piɔlɛilen. Le siŋnunnin lɛŋnde piɔlɛilen a lɛŋnde poli vesɛilen: kandɔɔ a Mikdɔl, keiyo a Siɛn, kɔlan tiiyaa háá o pɛɛngulan a lɛŋnde Etiopii len.

¹¹Vanacieo ndu pilɛ bɛɛ ve lɛnin kei lon te, hali cɔloo ve lɛnin ndon te. Lende le lonin fondo ni háá vɔsilan belehiɔɔlu, vana venin icali lenin te.

¹²I siinguunin lɛŋnde Esipte len lɛŋnde piɔlɛilen o lɛŋii piɔlɛiye tɛɛn, mì siinguu kobila ndɔlan kobila pɔmndan o kobila piɔl tan tɛɛn o vɔsilan belehiɔɔlu bɛngu. I saŋnin Esiptea vanaa-mangalaa-isɔɔa tɛɛn, mì sɛŋi nda o lɛŋii yɛ́-yɛ́i nin.»

¹³Nuaa Maalii, o co Mɛlɛka-o dimi ni aa: «O vɔsila belehiɔɔlulan mɛɛlulan, i solinin Esiptea o vanaa súúla celeŋaa nda va a sɛŋiannda tɛɛn-nda tɛɛn, mì cuungiaa nda nɛɛ pilɛ.

¹⁴I minginin Esiptea va o biyɔɔ nin-nda o nda lo, mì mingi nda o tàndá Patrɔs-o nin, o lɛŋnde ndale kpeekpeilen nin, o kon, a bɛɛndiaanin masale kɛndɛlen ndon.

¹⁵Masale ndale len le hiawnin vaa lepɔmbɔ a masɛi tɔ̀ɛi, Esipte hel-lɛnin vanaa-mangalaa-isɔɔa tɔ̀a coo fungɛn te. I dɔɔniaanin Esiptea, o kon vanaa-mangalaa-isɔɔa tɔ̀a ve lɛnin nda o ba bɛngu le.

¹⁶Cuavaa Israɛlla tiindan ndɛnin nda le fɛɛn a fɛɛn te. Esipte vanin maa ɲɛ loonan haki le pɔwla vanaa nia ndáà pɔw má kɔ sɔɔnun Esiptea o ba lan. O kon, vannda sinanin maa ya co Maalii ni, Mɛlɛka pɛɛn.»

¹⁷O vɔsi bidiin a o ŋɔmmɛwndɔɔ, paangii tasei va malɔ lepilɛ, mí Mɛlɛka soaa o ya lo, mó dimul-la aa:

¹⁸«Po vanacieo sei, Nebukanɛsar masaa Babilɔn vem vanaa ndɔa cɔwva, má kɔ sanga taw-taw le kobio Tir cɔlɔbaa, mí tembeltan la del nda kpow, mí congúla ndalan kpow la peengun, kɛ Nebukanɛsar sɔla tɔnɔ le baala o tosa kon le Tir cɔlɔbaa-o le.

¹⁹Lelan nuaa Maalii Hala dimi ni aa: ‹I yɔngu Nebukanɛsar masaa Babilɔn lɛŋnde Esipte len. O kɔandunin bolofaa co lon-ndo selemenden, mò kɔɛnnun a ndu. O yunganin ndu kpow, mò cua ɲɛm co lon-ndon, mò kɔɛnnun a mun. Sálà vanaa ndɔa cɔwva sɔlanin-ndo vanin kon ni.

²⁰Le ndu salaa le baala o tosa le kobio Tir cɔlɔbaa-o ya yɔngunin ndu lɛŋnde Esipte len ni, kani le ya vanaa ndɔa cɔwva tosa baalaa ni. Ya Maalii, ya co Mɛlɛka-o soo nuaa ni.›»

²¹Paale len, i cɔɔlunin cuavaa Israɛlla yoomuan. Nɔm Po vanacieo yɛ, i kumbinin nɔm sondoo mà soo ɲɛkɛndɛi nda tɛɛn, o kon nda bɛɛ sinanin maa ya co Mɛlɛka ni.