Read Kissi Esekiɛl 3 Bible Online

Esekiɛl 3 - Kissi bible

Esekiɛl 3

¹Mó dimul-la aa: «Po vanacieo sei, dio ɲɛ n co cɔu-vo, dio sɛbɛ simbulaa ho, mà kɔ soo o cuavaa Israɛlla lo!»

²O kon, mí kumbi sondoo, mó yɔngu ya sɛbɛ simbulaa le ndu dioo.

³Mó dimul-la aa: «Po vanacieo, dɔw dembe nɔmndo balo mà pimi pulun nɔmndon a sɛbɛ simbulaa ya co hoo nɔm yɔngoo-o!» Mí dia ndu, mó yeela ya o sondo maa malɛ.

⁴Mó dimul-la aa: «Po vanacieo sei, kɔ o cuavaa Israɛlla lo, mà kɔ tɛɛngul nda sɔɔn nun!

⁵Kani o co o vanaa sɔɛi ndɛi mangalɛi kendu tueyɔɔ a bilaa biyɔɔ-a lo le ya co nɔm vomɔɔ le, kɛ o cuavaa Israɛlla lo ya co nɔm vomɔɔ ni.

⁶O co o vanaa súúla celeŋaa sɛ́lɛ́ bɛndua nɔ sɔɛi mangalɛi kendu tueyɔɔ a bilaa biyɔɔ-a lo le ya vem nɔm te, a n bii sɔɔn ndan bila le-a. Te o vanaa súú vaa lende lo yáà vem nɔm ni, a va nilan yaŋɔɔ o sɔɛi nɔmnde.

⁷Kɛ cuavaa Israɛlla nda yeemanin le naa nilan yaŋɔɔ o sɔɛi nɔmnde le, kani a yeema le ya pila nilan yaŋɔɔ le, bau cuavaa Israɛlla kpede, vanaa bolii kalaa a vanaa bii isɔɔ le-a nda co ni.

⁸Lelan tofa vɔ, i siinguunin nɔm vana bolle kalaa, haliko ma simul nda a bolii ndɛi kalɛi. I siinguunin nɔm vana itɛɛndiaa, haliko ma simul nda a tɛɛndiɛi ndɛi.

⁹I siinguunin bolle nɔmnden lekala kpoke maa idiaman, le hiawnin pow kpovaa kaloo. Le hee, yɔŋ isiòòn a nda le, ɲiiya nda o hɔl te, kani vanaa nila kalua nda co o lepola ni.»

¹⁰Mó dimul-la vɛlɛ aa: «Po vanacieo sei, yaŋ nilan ɲɛkɛndɛi o sɔɔn ya dimulnin nɔm-ndon kpow, mà mandan mun o kɔl kpáŋ!

¹¹O kon, mà kɔ komal vanaa nda hin o biyɔɔ nin-nda, vanaa co súú pilɔɔ maa nɔm-nda, mà soo o nda lo. A yaŋ lani o sɔɛi nɔmnde, a yaŋ lani le, nɔm bɛnda ma dimul nda aa: «Lende Maalii soo ni, Mɛlɛka pɛɛn.»

¹²O kon mí kɔl Mɛlɛka-o cua ya coocoo, mí tuɛinun vɔkɔ-vɔkɔ bɛndoo ya kɔɔli aa: «Duaa co le biilu Mɛlɛka-o o fonda calta ndɔlan la co-o nin!»

¹³Mí tuɛi kumbannda ɲaa yoomaa kan diom o lɔanan la va-o, mí tuɛi bɛngula tiilannda va nda o kpengon-ndan sɔɛi diki-diki, mí sɔkɔsɔkɔ bɛndu-bɛndoo yɔŋnun.

¹⁴Mí Kɔl Hala heelu ya-o kɔa a ya. I va kɔlan a kɔltuwvo a sɔɛi nɛyɛi, mí ba Mɛlɛka-o toal-la coo a kpaaya bɛndoo.

¹⁵O kon, mí tiiya Tɛl-Aviv[2], o vanaa ndáà kɔɛ o biyɔɔ nin-nda lo, a va o peo Kebar kɔngɔ, o fonda nda va icali-o, mí tosa palɛi ndii ŋɔmmɛw nda tɛɛn ndon o kɔndɔfillo nin.

¹⁶O palɛi ŋɔmmɛvii ken mɛɛlulan, mí Mɛlɛka soaa o ya lo aa:

¹⁷«Po vanacieo sei, i siinguu nɔm kpalilnɔɔ cuavaa Israɛlla coo. Nɔm, a yaŋ pɛ nilan o sɔɔn vanin fulaa ya o sondo-on, a kɔ hiw mun nda o lani o vomɔɔ nuu bɛngu.

¹⁸Te i dimul pɛ vana kɔlvesɛiyo aa: «Nɔm vana kɔlvesɛiyo, a co vu! Te nɔm (Esekiɛl) tɛɛngul vana kon sɔɛi ken te, taa suu le vana kɔlvesɛi kon kanalanndo le kela ndɔ vɔɔndo malɔɔ a le yoomu ndɔɔ ciindiaa le, vana kɔlvesɛi kon vunin lekɛ́ndɛi o sandii lepɛŋii ndɔɛi nin, kɛ nɔm (Esekiɛl) ya handunin sɔɛi piɔ́m ndɔɔ o lebol ni.

¹⁹Kɛ te nɔm tɛɛngul pɛ vana kɔlvesɛi kon sɔɛi ken, te o mel kɔlvesɛi ndɔɔ mò faŋan o kela ndɔ vɔɔndo coo le, mɛɛ o vunin lekɛ́ndɛi o sandii lepɛŋii ndɔɛi nin, kɛ nɔm nɔm, a ciindiaanin yoomu nɔmndo.

²⁰Te vana sandaa faŋan pɛ o dɛnɛ sandaa coo, mò luɛi o laasianndo nin, i kɛsinin yaŋɔɔlen ndu laci, o hawnin ndon mò vi, le tùú n kɛɛ le ndu sɔɛi ken tɛɛngullo a le ndu kanalanndo-o. Vana loonun ndɛnin a dɛnnda sandaala o tosa lan te. Lelan, nɔm ya heelunin sɔɛi piɔ́m ndɔɔ o lebol ni.

²¹Kɛ te nɔm dimul pɛ vana sandaa aa o tosa haki le, mí vana sandaa kon tosa haki le, mɛɛ o vanin yoomu, kani sɔɛi ken tɛɛngulun ndu mò sɔla kanalanndo, o kon nɔm ciindiaanin vɛlɛ yoomu nɔmndo.»

²²Lon vɛlɛ bɛɛ, mí ba Mɛlɛka-o toal-la coo, mó dimul-la aa: «Cɔm mà tol o bóllo nin, i soaanin o nɔm ndo lon.»

²³O kon, mí can, mí toal o bóllo nin. Tofa vɔ, biilu Mɛlɛka-o va o toangaa lon, mɛɛ yáà ce ndu o peo Kebar ikɛi yɛ. Le hee, mí del lɛŋ, mí kuumbuu hɔlla lɛŋ.

²⁴Mí kɔl Mɛlɛka-o luɛi ya nin, mó cua ya isisi o pelun nun coo. Mí Mɛlɛka soaa o ya lo, mó dimul-la aa: «Kɔ luɛi o nɔm ndo cɛinin mà kindan dioo kɔɔli.

²⁵Tofa vɔ, a vuunin yoei nɔm Po vanacieo coo, mà yii nɔm a ndi, o kon a nɔla lɛnin fulaa ceen vanaa niaa co súú pilɔɔ-a tɛɛn te.

²⁶I holnin diɛɛmule nɔmnden o sondo lenin nɔmndo, haliko ma siŋnun bobonɔɔ, o kon a nɔla lɛnin nda silaa le, kani vanaa nila kalua nda co súú ni.

²⁷Kɛ telen ya soaanin o nɔm ndo-o, i kumbinin nɔm sondoo, haliko ma dimul nda aa: «Lende Maalii Hala soo ni!» Vana yeemanin le nilan yaŋɔɔ-o ndu yaŋ nilan. Vana vownin sondo le, mɛɛ ndu meinun, kani vanaa nila kalua nda co súú ni.