Read Kissi Esekiɛl 30 Bible Online

Esekiɛl 30 - Kissi bible

Esekiɛl 30

¹Mí Mɛlɛka soaa vɛlɛ o ya lo, mó dimul-la aa:

²«Po vanacieo sei, tɛɛnguu diom Hala-o. Dimi aa: Nuaa Maalii, o co Mɛlɛka-o dimi ni aa: ‹La koŋul mì la hiiliaa hiko-hiko, la dimi aa: Kpòkóó, má cè paale bɛndu dɛ!»

³Kani paale len le cɛn tiiyaa, paale Mɛlɛka len le bendu lɛ le. Paale yumbuyumbu bɛndulen a paale vanaa-mangalaa-isɔɔa le vanin ni.

⁴Cɔwvo luɛinin o lɛŋnde Esipte len nin. Tuma nda vanin vannda diwvo Esipte mà va delio-o, lɔ́ɔ́ nda poondiaanin bolofaa ndaa-o, telen ɲɛm Esipte cɔwnun coo-on vanin puusianndo-o, sangaa a kɔl yoloma-yolomaa luɛinin Etiopii dí.

⁵Kandɔɔ a vannda Etiopii, Put, Lud a vanaa muuliannda kpow. Lɛŋnde Kub len a vanaa co o lɛŋii yii kpemaa-e nin-nda kpede a cɛɛlunnin o mɔɛi cɔwve bɛngu nda ndaa latulu.»

⁶Nuaa Mɛlɛka dimi ni aa: «Ɲɛ-ɲɛ co Esipte malaa delnin, kpaaya ndɔ o kɔngan kon-ndo tambunin. Kandɔɔ a Mikdɔl háá a Siɛn, nda kpow a cɛɛlunnin o mɔɛi cɔwve bɛngu. Ya Maalii, ya co Mɛlɛka-o soo nuaa ni.»

⁷Lɛŋnde Esipte len le siŋnunnin lɛŋnde veselɛilen hiovɔɔ lɛŋii veselɛiye kpow coo, kobila ndɔlan la siŋnunnin pɔmndan o cieon pɔmndon tɛɛn.

⁸Lɔ́ɔ́ ya malnin Esipte yin mò ŋɔɛ, mì vanaa ndɔa co ndu malaa-a yomiyomi-o, a sinanin maa ya co Mɛlɛka ni.»

⁹Paale len, kiilaa ya viamnin-nda kɔanin o dɛ̀ndɛ̀la mamɛnndan nin le kɔlan Etiopii co nila ɲulu-o hiiloo. Paale Esipte sɔlanin soŋɔ̀ɔ́ len, vanaa co lon-nda yɔŋnunnin yoloma-yoloma a siòòŋii bɛnduei. Nduyɛ paale len le co nin kpɛɛlun le tiiyaa.»

¹⁰Nuaa Maalii, o co Mɛlɛka-o dimi ni aa: «I diwnin vanndacieaa co haa sɛ́lɛ́ bɛndoo Esipte-a a tiŋ, vana ya viamnin mò kɔ diw nda-o co Nebukanɛsar masaa Babilɔn ni.

¹¹O cuanin vanaa ndɔa, vanaa hiow kɔlvesɛiyo o vanaa-mangalaa-isɔɔa tɛɛn-nda a ndu Nebukanɛsar pila, mà kɔ tɛɛmbuu lɛŋnden. A solinin mɔɔn ndan cɔwvon mà cɔlɔba Esiptea, mà pei lɛŋnde len ca a vanvílɛ́iya.

¹²I veesiaanin peo Nil a tɛiyun ndɔn, mì vɔngul lɛŋnde len vanaa kɔlvesɛiya o ba. I malnin nden vanaa celennda o ba mà tɛɛmbuu len, mà soli ɲɛ-ɲɛ sɔlaa co lenin. Ya Mɛlɛka soo lende ni!»

¹³Nuaa Maalii Hala dimi ni aa: «I tɛɛmbuunin piɔmnda mì ɲumi halaa fondoa co Nɔf-a, simlacinɔ ve lɛnin le lɛŋnde Esipte len te. I sɛŋinin kɔl isiòònndo o lɛŋnde len kpow nin.

¹⁴I tɛɛmbuunin tándàà Patrɔs mì lom kobio Soan a yinnden. I kialunin yamɛi kobio No, mì saangiaa ndu.

¹⁵I cuiŋinin kɔl ni tuwvo o kobio Sin coo, o co fonda mayoomoo le Esipte-o, mì diw vannda taw No ciee.

¹⁶I malnin Esipte yin. Vanaa co o kobio Sin nin-nda ɲiiyanin a siòònde. A buuluunin tɛɛngon o kpakila kobio No. Yaamɔɔa biinin kobio Nɔf ipala déŋ.

¹⁷Felengia piaandua Ɔn a haa Pi-Besɛt a cɛɛlunnin o mɔɛi cɔwve bɛngu, vanaa tɔ̀a lonin yoomu lon-nda kɔanin o biyɔɔ nin.

¹⁸Lɔ́ɔ́ ya vanin yoomuma Esipte-an tɛɛmbuuo mì kpaaya ndɔ o va kuundianndo-o cuu-o, paalen le ɲumnin mí ɲɔɔ yɔŋnun yifidii o kobio Tapanɛs nin. Yumbuyumboo kumbunin kobi kon mɔku-mɔku, mì vanlaandua co lon-nda kɔɛ o biyɔɔ nin.

¹⁹Lende ya kialunin yamɛi Esiptea ni, mì tuisi nda dɛnnda palaalan coo. O kon, a sinanin maa ya co Mɛlɛka ni.»

²⁰O vɔsi tɔ́ a ò pilɛndɔɔ nin, paangii tasei va malɔ leŋɔmmɛw, mí Mɛlɛka soaa o ya lo, mó dimul-la aa:

²¹«Po vanacieo sei! I yem Faraɔnnɔɔ, o co masaa Esipte-o baa. Vana-vana yíí ndu ba kon le ndu ndu cɛwvo le, vana yíí ndu ba kon a kola ipɛngɛ, haliko mo simul, mò nɔla vɛlɛ mɔɛi cɔwve hiŋndo le.

²²Lelan, nuaa Maalii Hala dimi ni aa: «Má cè ya Faraɔnnɔɔ cɔlɔbaa, masaa Esipte pɛɛn! I yiminin ndu balan kpow, ba co vɔ kɛndɛa-o a ba co nin o yomɛiyo-o kpede. I tosanin mì mɔɛi cɔwve hɛlun ndu mì i del.

²³I saŋnin Esiptea o vanaa-mangalaa-isɔɔa tɛɛn, mì sɛŋi nda o lɛŋii bɔɔ-bɔɔ nin.

²⁴Kɛ i lueinin bala masaa Babilɔn-ndan yoomuan, mì sɔɔ mɔɛi nii cɔwve ndu o ba. O kon i yiminin Faraɔnnɔɔ balan, mò viiviin a caŋndo masaa Babilɔn o hɔl mɛɛ vana nda yɔŋ ɲɛm-kalan bɛndon-ndo viiviin le kɔllo malnɔnndo yɛ.

²⁵A toɲa, i lueinin bala masaa Babilɔn-ndan yoomuan, kɛ mìì bala Faraɔnnɔɔ la tol kɛpuu-kɛpuu, mì la vi lɔ́ngùlɔn. Lɔ́ɔ́ ya sɔaanin masaa Babilɔn mɔɛi nii cɔwve o ba mò kɔɛ Esipte cɔlɔba a ndi-o, vannda sinanin maa ya co Mɛlɛka ni.

²⁶Mbɔ̀ i saŋnin bɔɔ Esiptea o vanaa-mangalaa-isɔɔa tɛɛn mì sɛŋi nda o lɛŋii bɔɔ-bɔɔ nin, o kon nda sinanin ni maa ya co Mɛlɛka ni.»