Read Kissi Esekiɛl 31 Bible Online

Esekiɛl 31 - Kissi bible

Esekiɛl 31

¹O vɔsi tɔ́ a ò pilɛndɔɔ, paangii yàándɔɛi va malɔ lepilɛ, mí Mɛlɛka soaa o ya lo, mó dimul-la aa:

²«Po vanacieo, dimul Faraɔnnɔɔ, o co masaa Esipte-o nda vanaa ndɔa sɛ́lɛ́ bɛndua aa: ‹A nɛ̀ɛ́-nɛ̀ nɔm Faraɔnnɔɔ velan yɛ o bɔɔbɔɔyɛi nɔmnde nin?

³Maa yɔm sɛɛdre Liban Asiri va ni, ndóò nɔ lɛvun kɛndɔn, lɛvun ndɔn mun nɔ vunduan, ndóò bandu taw, ndóò hiow yɔmii bɔɔla yukɔnnde bandei polon.

⁴Mí mɛnndan ma tosa mí ndóò hindu taw, mí soon bɛndoo ndóò tosa mí ndóò bandu langbon. Soon kon va mɛmma peean yɔɔ nɛɛ yɔm kalaa va o tɔalaa-a, mó va vɛlɛ mɛnndan yɔɔ o yɔmii va yondoo nin-nde kpede tumndan.

⁵Lelan yɔm sɛɛdre kon ndóò bandu ni mó hiaw yɔmii va yondoo nin-nde faw. Mí lɛvun ndɔn kui taw-taw, mí n pɛngɛlan ɲɛkɛndɛi le mɛmma bɛnduma va hunɔɔ lebɛngu-an.

⁶Yowva coocoo kpede a va vɛɛnde tangullo o lɛɛndun ndɔn coo, visia yondoa kpow a va hunɔɔ cuawva konɔɔ o lɛvun ndɔn bɛngu, vanaa-mangalaa-isɔɔa bɛndua faw a va hunɔɔ calle o vunduma ndɔan bɛngu.

⁷Ndóò naŋ taw o bɔɔbɔɔyɛi ndɔɛi nin, le tùú lɛvun ndɔn mun pɛngɛlan taw-vo, kani puundun ndɔn va n tɔalaa o mɛmma bɛnduan nin di.

⁸Yɔmii sɛɛdrei o nakɔ Hala-o nin kpede ndíì siiman a ndu le, yɔmii siprɛsiei ndíì sulan a lɛvun yɔm kon te, hali yɔmii platannde ndíì ve maa lɛɛndun ndɔn te, yɔm oo yɔm ve o nakɔ Hala-o nin, o ndóò sulan naŋɔɔ a yɔm sɛɛdre bɛndu kon-ndo le.

⁹Mí yáà nɛŋi ndu a lɛvun ndɔn sɛ́lɛ́ bɛndon. Le hee, mí yɔmii va Edɛn o nakɔ Hala-o nin-nde kpede i va ndu paŋalaa.

¹⁰Lelan, nuaa Maalii, o co Mɛlɛla-o dimi ni aa: «Le tùú ndóò bandu taw-vo, le tùú ndóò hiow yɔmii bɔɔla yukɔnnde kpow bandei-yo, le tùú kɔl ndɔɔ ndóò kɔngan naŋɔɔ ndɔɔ sii-o,

¹¹lelan ya mal ndu simlacinɔ vanaa-mangalaa-isɔɔa o ba ni, haliko mi simlacinɔ kon tosal ndu mɛɛ kɔlvesɛi ndɔɔ co yɛ. Mí toaw ndu few-few!

¹²O kon, mí vanaa celennda, a hiow kɔlvesɛiyo o vanaa-mangalaa-isɔɔa tɛɛn-nda a kiaŋ ndu, má mɛi ndu lon, mí lɛvun ndɔn del o pembon coo a o bóltan kpede nin. Mí vannda yimiyimi lɛɛndun ndɔn o kpolonnda co o lɛŋnde len nin-ndan kpow nin. O kon, mí vanaa súúla yɛ́-yɛ́a co o lɛŋnden nin-nda kpow a ɲaanun, má faŋan o vunduma ndɔan bɛngu, má mɛi ndu lon.

¹³Mí yowva coocoo kpow a hun cal o lɛvun ndɔn coo. Mí visia yondoa kpow a hun kila bɛ̀mɛ́ltan o lɛvun ndɔn kombɛiyon bɛngu.

¹⁴Kon tosan haliko yɔm oo yɔm co o mɛnndan kɔngɔ o bandu lɛ lende taw-taw le, bolle ndɔlen le hiaw lɛ yɔmii bɔɔla yukɔnnde bandei le. Kon tosan vɛlɛ haliko yɔm oo yɔm nɔ mɛnndan lebɛngu taw, ndu hindu lɛ mò hel coocoo lende le. Kani yɔmii ken faw i co imandaa le vuo, le tolɔɔ o puuloo bɛngu di-di vanndacieea vi-a tɛɛn nda vanaa co tolɔɔ o soon bɛndoo nin-nda latulu.»

¹⁵Nuaa Maalii, o co Mɛlɛka-o dimi ni aa: «Paale yɔm sɛɛdre bɛndu kon tol ciee-piɔ́m nden, mí saŋ dɛnɛ biisi ndɔɔ o lɛŋnden coo, mí kumbu soon bɛndu co lɛŋ-ndo le ndu, mí bii mɛmma pee bɛnduan, mí mɛmma bɛndu-bɛnduan ma sim, mí tuisi ɲumndan o pembei Liban coo le ndu, mí yɔmii co yondoo nin-nde kpow i vesa kékélé le ndu.

¹⁶Tuma ya va ndu tuisio ciee-piɔ́m nda vanaa co tolɔɔ o soondo nin o puuloo bɛngu-a latulu-o, telen o va kombaa-o, mí hiiluu vanaa-mangalaa-isɔɔa, má ɲiiya. Mí yɔmnde Edɛn kpow i sɔla ɲɔɔloo o puuloo bɛngu di-di, mí yɔmii hiow naŋɔɔ a sɔvɛyɛi Liban-nde, i nɔ mɛnndan lebɛngu-e i hini kɔl ɲɛkɛndɛi.

¹⁷Mí yɔmii ken bɛɛ i toal ciee-piɔ́m a yɔm bɛndu kon latulu, nɛɛ vanaa vi o mɔɛi cɔwve bɛngu-a co-a. Kani vanaa kan va tiindan ndɔɔ ni, nda va icali o vunduma ndɔan bɛngu o vanaa-mangalaa-isɔɔa kpede tɛɛn ni.

¹⁸O yɔmnde Edɛn tɛɛn faw, a nɛ̀ɛ́-nɛ̀ n velan yɛ o biiloo a o bɔɔbɔɔyɛi nin? Nɔm yɛ, a co nɔm tuisi o puuloo bɛngu di-di niaa yɔmii ken Edɛn latulu. A yambunin nɔm vanaa dii tooma le-a tɛɛn niaa vanaa vi o mɔɛi cɔwve bɛngu-a! Lende dɛnɛ masaa Esipte a dɛnɛ vanaa ndɔa sɛ́lɛ́a vanin ni. Ya Maalii, ya co Mɛlɛka-o soo nuaa ni.»