Read Kissi Esekiɛl 32 Bible Online

Esekiɛl 32 - Kissi bible

Esekiɛl 32

¹O vɔsi tɔ́ a o diinndɔɔ, paangii tɔ́ a idiinndɔɛi va malɔ lepilɛ, mí Mɛlɛka soaa o ya lo, mó dimul-la aa:

²«Po vanacieo sei! Soli condii biisiei Faraɔnnɔɔ coo, masaa Esipte pɛɛn, mà dimul ndu aa: ‹A yàlà téndóó nɔm óò velan vanaa-mangalaa-isɔɔa tɛɛn ni. A va paandu maa kui va o mɛmma ihɛllan nin-ndo. A va ciikiaa o peela nɔmndan nin ma va mɛnndan lindaa a labɛngu. A va yeelio[9] kalaŋaa o tɛiyun peela lan nin.›

³Kɛ tuei-yɔ mɛɛ Maalii, o co Mɛlɛka-o dimi yɛ aa: «Tuma vanaa súúla yɛ́-yɛ́a taw a cuungiannin-ndo, i vuunin yala ni yɔɔyaa nɔm coo, mì vanaa kan nan nɔm lenin.

⁴I viawnin nɔm o kɔngɔ, mì yɔl nɔm o lɛŋnde mungulen coo yondoo nin. I cuunin yowva coocoo mà hun cal nɔm coo, mì dɔw visia o lɛŋnden coo kpow balo a dialun nɔmndon.

⁵I sɛŋinin visin nɔmun siowvon o pembon coo, mì pei bóltan a kpolonndan a ɲɛm tumulɛin nɔmndon.

⁶I pɔɔliaanin lɛŋnden a kooma vanin fulaa nɔm lekɔɔ o pembon coo-an, mì kooma man ma pɛ o peela pɔmbɔlan kɔllo ca.

⁷Tuma n malnunnin kɔl-lo, i minginin halataalaa yifidii, mì ɲumi pangele n'loo, mì kumbu paalen a yumbuyumboo, Paangei bɛɛ i soli lɛnin ɲɛ-tengaa ndɔɔ le.

⁸I ɲuminin ɲɛm tengan co o halataala-on kpow, mí tuisi ɲumndan o lɛŋnde nɔmnden coo le nɔm. Ya Maalii, ya co Mɛlɛka-o soo nuaa ni.

⁹I lueinin vanaa súúla celeŋaa bɔɔ-bɔɔ kɔl tambɛiyo o lakɔl lɔ́ɔ́ nda tuɛinin a tambii nɔmnde o kɔɔ-o, mì tɔ́ɔ́ kon kɔɛ háá o lɛŋii n sina lei nin.

¹⁰I lueinin vanaa súúla celennda taw mɔnɛi le nɔm. Siòònde biinin masaa ndaa taw-taw le nɔm telen ya hiŋnin mɔɛi cɔvii nii nda o hɔl-lo. Paale n delnin-nden, vanaa kan ɲiiyanin telen oo telen, mì vana-vana buulan le yoomu ndɔɔ.»

¹¹Kani nuaa Maalii, o co Mɛlɛka-o dimi ni aa: «Mɔɛi cɔvii masaa Babilɔn-nde toalnin nɔm coo.

¹²I cɛɛluunin sɛ́lɛ́ nɔm bɛndoo o mɔɔn cɔvun langbaa kalla bɛngu. Langbaa kalaa kan kpow a vanin vanaa hiow kɔlvesɛiyo vanaa-mangalaa-isɔɔa tɛɛn-nda. A hun pesipesinin ɲɛ Esipte tiindan, mò va kuundianndo le ndu-o, mà diw sɛ́lɛ́ bɛndu Esiptea.

¹³I diwnin cɔlua ndaa co o mɛmma bɛnduan kɔngɔ-a kpow. O kon, pelii vanacieo linda lɛnin mɛmma man te, buuku cɔloo bɛɛ linda lɛnin man te.

¹⁴O kon, i yɔngunin man pɛngio, mì tosa mìpeela lan la va hiovɔɔ maa macuɛi. Ya Maalii, ya co Mɛlɛka-o soo nuaa ni.

¹⁵Lɔ́ɔ́ ya siinguunin lɛŋnde Esipte len lɛŋnde piɔlɛilen-ndo, lɔ́ɔ́ (vannda) yunganin nden mà hɛlu ɲɛm co lenin-ndon kpow-vo, telen ya soaŋnin vanaa co icali lenin-nda faw-vo, a sinanin maa ya co Mɛlɛka ni.

¹⁶Condii biisii bɛnda le solinndo-e co hee ni, cuavaa laandua vanaa-mangalaa-isɔɔa solinin ndi ni. A solinin ndi o lɛŋnde Esipte len a o sɛ́lɛ́ bɛndu co Esipte-o coo. Ya Maalii, ya co Mɛlɛka-o soo nuaa ni.»

¹⁷O vɔsi tɔ́ a o diinndɔɔ nin, paangii tɔ́ a idiinndɔɛi va malɔ tɔ́ a leŋuɛɛnu, mí sɔɛi Mɛlɛka-e dimulun ya aa:

¹⁸«Po vanacieo sei, somisomin sɛ́lɛ́ bɛndoo Esipte coo. Tuisi nda a cuavaa vanaa-mangalaa-isɔɔa kpaaya bɛndua latulu o puuloo bɛngu lɛŋ di-di, nɛɛ vanaa co tolɔɔ o soon yingilaa nin-nda co-a.

¹⁹Nɔm Faraɔnnɔɔ, a ca ko aa nɔm co fisa a caanda? Tol niko mà yambu nɔm niaa vanaa dii tooma le-a nɛɛ pilɛ!

²⁰Esiptea delinin vanaa mɔɛi cɔwve diw-va tɛɛn. Mɔɛi cɔwve yɔngun, lelan la sɛɛsuu Esiptea a vanaa ndaa cɔvaa sɛ́lɛ́a kpow.

²¹Kuubaa cɔvaa bɛndua soaanin o ndu lo a o vanaa va ndu malaa paandu-a lo, mà dimul nda aa: ‹Nuaa vɔ mɛɛ nda tol ciee-piɔ́m nanu yɛ, tofa vɔ nda ihini, vanaa dii haa tooma le-a, a sɔla haa piɔ́mndo o mɔɛi cɔwve bɛngu-a!›

²²Lon masaa Asiri co ihini a vanaa ndɔa cɔwva kpow ni. Sɛila vanaa ndɔa cɔwva la balu sɛi ndɔɔ pindo. Nda kpede lɔwviaa nda lɔwviaa nda ni, mɔɛi cɔwve cɛɛluu nda ni.

²³O puuloo bɛngu lɛŋ di-di sɛila ndalan la co ni. Vanaa ndɔa cɔwva a co a balaa o sɛi ndɔɔ sɔ́. Nda kpede lɔwviaa nda lɔwviaa nda ni. Mɔɛi cɔwve cɛɛluu nda ni, nda va vannda siòònde lueiyo o lɛŋnde vanndacieea yoomaa coo ni.

²⁴Masa va Elam-ndo co ihini a vanaa ndɔa cɔwva a balaa sɛi ndɔɔ pindo. Nda kpede lɔwviaa nda lɔwviaa nda ni. Mɔɛi cɔwve cɛɛluu nda ni, nda vanaa dii haa toomaa le-a. Tofa vɔ mɛɛ nda tol o puuloo bɛngu lɛŋ di-di yɛ, nda va vannda siòònde lueiyo o lɛŋnde vanndacieea yoomaa coo ni. Siɛmbula ndalan la tol nda, nda vanaa co tolɔɔ o sɛilan nin-nda latulu.

²⁵A toosiaa nɛɛ ndɔa hinia vanaa nda diw-va tɛɛn, nda vanaa ndɔa cɔwva kpow latulu. Sɛila ndalan la co sɛi ndɔɔ labalaa pindo, vanaa dii kan tooma le-a kpow a sɔla piɔ́mndo o mɔɛi cɔwve bɛngu, kani siòòŋii ndɛi ndíì balu nin o lɛŋnde vanndacieea yoomaa coo faw. Siɛmbulan la tol nda nda vanaa co tolɔɔ o sɛilan nin-nda latulu, a sɔla fondaa vanaa nda diw-va tɛɛn.

²⁶Lon masaa Mesɛk, hoo Tubal a vanaa ndaa sɛ́lɛ́a kpede a co ni. Sɛila vanaa ndaa kan la balu sɛila nda pilalan pindo. Vanaa dii kan tooma le-a kpow a sɔla piɔ́mndo o mɔɛi cɔwve bɛngu, kani a va vannda siòònde lueiyo o lɛŋnde vanndacieaa yoomaa coo.

²⁷A kumbu nda nɛɛ pilɛ nda kuubaa cɔvaa masidɛa[10] le, kuubaa va kan kɔl yulan-yulanndo tuisio vanndacieaa yoomaa coo-a, a va kan tolɔɔ ciee-piɔ́m a volɔɔla ndala cɔwlan-nda, a ndáà vow kan mɔɔn ndan cɔwvon o bolle bɛngu-a, a ndáà handu kan kɔɔla cɔwla ndalan coo-a[11] pɛɛn.

²⁸Kɛ nɔm Faraɔnnɔɔ bɛɛ, vanaa dii tooma le-a tɛɛn nda sɛɛsiaanin nɔm ni. A kumbunin nɔm o vanaa sɔla piɔ́mndo o mɔɛi cɔwve bɛngu-a tɛɛn.

²⁹Edɔmnda, masaa ndaa a simlacia ndaa kpede a co (ciee-piɔ́m) lon. A kpaayaa ndaa nɔ kon taw-vo, má deli nda vanaa vi o mɔɛi cɔwve bɛngu-a latulu, má sɔla kumbɔɔ nda vanaa dii tooma le-a latulu, nda vanaa co tolɔɔ o puuloo bɛngu lɛŋ di-di-a diom pilɛ.

³⁰Tofa vɔ, simlacia co o lɛŋnde co a maluaŋ-nden nin-nda kpow a Sidɔnnda kpow a tol ciee-piɔ́m lon vanaa nda diw-va tɛɛn. A siòòŋii bɛndui nda va ken vannda lueiyo a yoomuma ndan-nde kpede, siɛmbulan la tol vanaa dii kan tooma le-a, a co ihini (a vílɛ́iya) nda vanaa vi o cɔwvo-a latulu. Siɛmbula ndalan la co nda coo nda vanaa co tolɔɔ o puuloo bɛngu lɛŋ di-di-a latulu.

³¹Masaa Esipte canin nda mò ɲulul kɔl le sɛ́lɛ́ ndɔ kaakuu vi-o, kani Faraɔnnɔɔ nda vanaa ndɔa cɔwva kpede a vi o mɔɛi cɔwve bɛngu. Ya Maalii, ya co Mɛlɛka-o soo nuaa ni.

³²Kani ya cɛl ni mí masa kalaa luei vannda siòòŋii yulan-yulannde o lɛŋnde vanndacieea yoomaa coo. Kɛ sisa, a cii ndu yambɔɔ vanaa dii tooma le-a tɛɛn nda vanaa vi o mɔɛi cɔwve bɛngu-a latulu, ndu masaa a vanaa ndɔa sɛ́lɛ́a kpow pɛɛn. Ya Maalii, ya co Mɛlɛka-o soo nuaa ni.»