Read Kissi Esekiɛl 33 Bible Online

Esekiɛl 33 - Kissi bible

Esekiɛl 33

¹Mí Mɛlɛka soaa o ya lo, mó dimul-la aa:

²«Po vanacieo sei, soo o vanaa niaa co yungu pilɔɔ-a lo, mà dimul nda aa: ‹Telen ya cuunin mɔɛi cɔwve o lɛŋnden nin-ndo, vanaa co o lɛŋnden nden nin-nda hɛli vana pilɛ o nda tɛɛn, mà siinguu ndu kpalilnɔɔ,

³te kpalilnɔ kon ce pɛ cɔwvo hunɔɔ o lɛŋnden nden nin, o hɔŋ buloo le vannda dimullo.

⁴Te vanndo pum tuei pɛ diom bulu kon mò saalan sɔɛi ken te, te o vi pɛ o mɔɛi cɔwve bɛngu, mɛɛ ndu pila nuwviaa piɔ́m kon ni.

⁵Kani o tuei diom buloo, kɛ o saalan sɔɛi ken te, lelan mɛɛ ndu pila cii yoomu ndɔɔ ni. Kɛ vana tuei pɛ yoongu kon, mò cɛwcɛw milin ndɔɔ, mɛɛ ndu baŋa yoomu ndɔɔ.

⁶Kɛ te kpalilnɔ kon ndu ce pɛ cɔwvo hunɔɔ, mò hɔŋ buloo le, te vannda tui yoongu kon te, mì cɔwvo luɛi, mì vanndo pum vi o cɔw kon nin, vana vi kon-ndo sɔlanin piɔ́mndo le tɛɛmbuu ndɔ ndu pila-o, kɛ i heelunin sɔɛi piɔ́m ndɔɔ kpalilnɔ kon o lebol.

⁷Lelan, nɔm Po vanacieo, nɔm ya siinguu kpalilnɔɔ le cuavaa Israɛlla ni. A bɛnda ma yaŋ nilan o sɔɛi vanin fulaa ya o sondo-e, mà tɛɛngul nda ndi o diola nilan.

⁸Te i dimul pɛ vana kɔlvesɛiyo aa: «Nɔm vana kɔlvesɛiyo a co vu!» Te nɔm (Esekiɛl) a suu o vana kɔlvesɛiyo lo a kela ndɔ vɔɔndo o kɔɔ le, vana kɔlvesɛi kon vunin lekɛ́ndɛi le tɛɛmbuu ndɔ ndu pila-o, kɛ i heelunin sɔɛi piɔ́m ndɔɔ nɔm o lebol.

⁹Kɛ te nɔm tɛɛngul pɛ vana kɔlvesɛiyo sɔɛi ken le ndu faŋaa o kela ndɔ vɔɔndo coo, mì ndu vana kɔlvesɛi kon pila kɛɛ le kela ndɔ vɔɔndo malɔɔ, o vunin o sandii lepɛŋii ndɔɛi nin. O kon, nɔm a baŋanin yoomu nɔmndo.

¹⁰Le hee, nɔm Po vanacieo, dimul cuavaa Israɛlla maa la co dimio aa: «Yɔŋnda vɔɔnda naalan a hakila naalan la co naa pila coo, le hakila lan naa co yɛɛvɔɔ dɔwnɔnndo nuaa ni, vɛɛ nɛ naa nɔla yɛnin lou yoomu?»

¹¹Lelan, dimul nda maa diom Maalii Hala dimi-o co hoo ni aa: «Le yoomu nuu, i hɛnan mì vana kɔlvesɛiyo vi le, kɛ mò mangala kela ndɔ vɔɔndo haliko mò va yoomu. Le hee, la mangalan! La mal kelala niaala vɔɔnndan! Le yɛɛ nɛ niaa yeema yɛ le vuo, niaa cuavaa Israɛlla?»

¹²Nɔm Po vanacieo sei, dimul vanaa niaa co súú pilɔɔ-a aa: «Dɛnɛ sandaa vana sandaa tosa paandu-o nɔlanin ndu baŋaa paale o tosanin dɛnɛ vɔɔndo len te. Vana kɔlvesɛiyo bɛɛ mal pɛ kɔlvesɛi ndɔɔ, kɔlvesɛi kon nɔla mò del ndu coo paale o co mangalan-nden te. Te vana sandaa mal pɛ dɛnɛ sandaa mò luɛi hakilan tosaa, dɛnɛ sandaa o tosa paandu-o nɔla mò ciindiaa ndu le.

¹³Hali o va bɛɛ mì dimul vana sandaa maa o co va yoomu, te vana sandaa kon tiindan pɛ sandii ndɔɛi ken, mò luɛi dɛnɛ sandaa lepɛŋndo tosaa, vana loonun ndɛnin a dɛnnda ndɔla sandaa lan te few, o vunin le dɛnɛ sandaa lepɛŋ o tosanin-ndo.

¹⁴Te i dimul pɛ vana kɔlvesɛiyo maa o co vu, te vana kɔlvesɛi kon mal pɛ haki o va coo-o, mò kela kela sandaa o sakpoyɛi nin, mɛɛ o baŋa yoomu ndɔɔ.

¹⁵Te vana kɔlvesɛi kon mingi pɛ landii pilɛi ndóò bii le kueo-ve, te o mingi pɛ ɲɛm ndóò hɛlu a kafalan-ndon, mò bii silala tosa mí vana viow yoomu lan, mò tosa lɛ dɛnɛ vɔɔn te, mɛɛ o baŋa yoomu ndɔɔ, o vi lɛnin le ken te.

¹⁶Vana loonun ndɛnin a hakila o tosa lan te few, kani o co nin va dɛnɛ sandaa a sakpoyɛi tosaa, lelan o lonin yoomu ni.»

¹⁷Vanaa niaa co súú pilɔɔ-a co dimio aa: «Nɛi Maalii co coo-o sendu le!» Kɛ nɛi nda nda co coo-o sendu le ni.

¹⁸Te vana sandaa mal pɛ sandii ndɔɛi, mò tosa dɛnɛ sendu loo, o vunin le ken.

¹⁹Te vana kɔlvesɛiyo mal pɛ kɔlvesɛi ndɔɔ, mò tosa dɛnɛ sandaa a sakpoyɛi, o lonin yoomu le ken.

²⁰La co dimio aa: ‹Nɛi Maalii co hoo coo-o sendu le!› Kɛ niaa cuavaa Israɛlla, i kialunin yamɛi vana-vana mɛɛ kelala ndɔlan la co yɛ!

²¹O vɔsi tɔ́ a o diinndɔɔ, o kɔla nda kɔɛ a naa o biyɔɔ nin-ndan kɔɔli, paangii tɔ́ndɔɛi va malɔ leŋuɛɛnu, mí langbanɔɔ pum, o hɛlun mó ɲaanun telen yaamɔɔa bii Yerusalɛm-ndo, mó hun o ya lo, mó dimul-la aa: ‹Kobio Yerusalɛm cuu biyɔɔ!›

²²Nduyɛ, telen pá mí vana hɛlun kon Yerusalɛm-ndo tiiya o ya lo diimandɔɔ idiiyo, ba kpaaya Mɛlɛka-o va fɔlɔn ya coo icɔllo, telen langbanɔ kon tiiya o ya lo diimandɔɔ idiiyo-o, mí Mɛlɛka timbi ya sondoo le sɔɛi. Mí sondo nuu kumbin, i ve lɛ bobonɔ le.

²³O kon, mí sɔɛi Mɛlɛka-e dimulun ya aa:

²⁴«Po vanacieo sei, vanaa co icali o cieon piɔlɛin mun nin Israɛl-la co dimio aa: ‹Abraham ndu pilɛ kpé va ni, kɛ mó hialu lɛŋnden nden kpow, kɛ naa naa n co sɛ́lɛ́ taw, nduyɛ naa lɛŋnden nden le yɔngun fasɛi ni!»

²⁵Le hee, dimul nda aa nuaa Maalii Hala dimi ni aa: «La co vision dioo a koovan lenin, la co hɔlla mulio o piɔmaa niaa lo, mì la va nda sooloo. La co vanndacieea diwvo! Yee a kon kpow la co vɔ yiyanndo maa ɲɛ niaa pɛpɛ lɛŋnden nden le co ni?

²⁶La co mɔɔn niaan cɔwvon tiindanndo, la co dɛnɛ nɔɔlɛiyo tosaa, o niaa tɛɛn vana-vana co suundaa a lanɔ pilaa! Yee a kon kpow la co vɔ yiyanndo maa ɲɛ niaa fasɛi lɛŋnden nden le co ni?»

²⁷Lelan dimul nda maa nuaa Maalii Hala dimi ni aa: «Le yoomu nuu, vanaa tɔ̀a lo icali o cieon piɔlɛi mun nin-nda a delinin mà vi o mɔɔn cɔwvon bɛngu, visia biyaa sɔamnin vanaa co yondoo nin-nda, mì nàà n'kɔnyaa diw vanaa vanin o powta kpovalan bɛngu-a a vanaa viannunnin o buululan nin-nda.

²⁸I siinguunin lɛŋnde (ndalen) lɛŋnde piɔlɛilen a lɛŋnde veselɛilen. Yoomuma nda kɔngan, mà va heelɔnndo-an ma cuunin itambu. Pembon Israɛl n lonin fondo fúú, vana-vana ve lɛnin kei lecoo le.

²⁹Tuma ya pialnin lɛŋnde (ndalen) mì tɛɛmbuu len le dɛnnda nɔɔlɛila nda tosa lan kpow-vo, nda bɛɛ sinanin o kon maa ya co Mɛlɛka ni.

³⁰Le hee, nɔm Po vanacieo, vanaa niaa co kan súú pilɔɔ-a co tombolaa a nɔm o sondo o kpakilan dangalaa a o diola cɛilan sondoo, a co suukanndo vellaa-velle, vana-vana co vanndo pilɔɔ dimullo aa: ‹La hun ndɔ mì la tuei sɔɛi co fulaa Mɛlɛka o sondo-e!›»

³¹A co hunɔɔ sɛ́lɛ́ bɛndoo fili-fili o nɔm ndo, vanaa niaa kan pɛɛn, a co hunɔɔ calle nɔm o hɔl. A co nilan yaŋɔɔ o sɔɔn nɔmndon, kɛ a co kela lecoo le, kani a sondo yeelaa koni nda co sɔɛi ni, kɛ o kɔlta ndalan nin, tɔnɔ nda pila-o daama nda co nuwviaa ni.

³²Tofa vɔ (nɔm Esekiɛl), a siŋnun nda o hɔl maa yɔmbanɔ diom kɛndɛ caa condei taw-vo. Kani a co nilan yaŋɔɔ o sɔɔn nɔmndon, kɛ a co kela lecoo le.

³³Lelan, lɔ́ɔ́ dɛnndan ndan la tosannin-ndo, nduyɛ la co nin le kandɔɔ tosanndo, a sinanin o kon maa vana-tɛɛngaa-diom Hala-o co nda tɛɛn.