Read Kissi Esekiɛl 34 Bible Online

Esekiɛl 34 - Kissi bible

Esekiɛl 34

¹Mí Mɛlɛka soaa o ya lo, mó dimul-la aa:

²«Po vanacieo sei, tɛɛngul simlacia Israɛlla diom Hala-o. Tɛɛngul nda ndu mà dimul nda, simlacia kan pɛɛn aa: Nuaa Maalii, o co Mɛlɛka-o dimi ni aa: ‹Dɛnɛ palaa co le simlacia Israɛlla co nda pila baloo dɔwnɔnndo-a. Vɛ̀ɛ̀ vanaa mandaa n'saa bɛnda mà yɛɛ saa ndaa billo dioo le?

³Nduyɛ niaa niaa, la co nɔnɔan kolɔɔ, la co kolala toosian a yiiŋii saa lan cuɛinɔnndo, la co sálàlan solio a cɔlua macuɛiya, kɛ la co saa yɔɔ diólan te.

⁴La luei saa nɔ mayoomu le-a yoomuan te. La cɛw a va a nààlan-nda le. La hol pavii a yɔŋulun-nda le. La mingi a va laasianndo-a a tɔ̀a coo le. La nuwviaa a luusian-nda le, kɛ mí la cal nda coo a kpaayaa, a paa-kala.

⁵Le vana manda n'saa lepɛŋndo, má saŋnun kpede, má siŋnun balo visia biyaa yondoo nin, má cuu saŋnɔn faw.

⁶Saa nia co luusianndo o pembun bɛndon kpow coo a o buubuuon kpede coo, a co a saŋnannda yondoo nin o lɛŋnden kpow nin, vana-vana nɔ nda lehɔl coo le, vana-vana co nda nuwviaa le.

⁷Le hee, niaa vanaa mandaa n'saa, la yaŋ nilan o sɔɛi Mɛlɛka-e.

⁸Diom Maalii, o co Mɛlɛka-o dimi-o co hoo ni aa: «Le yoomu nuu, le tùú saa nia siŋnun pungapungaa-o, le tùú saa nia siŋnun balo visia biyaa yondoo nin le vana mandaa n'saa lepɛŋndo-o, le tùú vanaa mandaa n'saa nia a kɛɛ le hɔlla landɔɔ saa nia coo-o, le tùú vanaa mandaa n'saa va nda pila baloo dɔwnɔnndo má kɛɛ le saa baloo dɔvɔɔ-o,

⁹lelan niaa vanaa mandaa n'saa, la yaŋ-ndɔ nilan o sɔɔn Mɛlɛka dimi-on.

¹⁰Maalii, o co Mɛlɛka-o dimi aa: I co vanaa mandaa n'saa tisa kɔɔli. I co saa nia poonda nda o ba, i mel-lɛnin nda le saa nia baloo dɔvɔɔ le, yɔŋii nda pila vanaa mandaa n'saa a va baloo dɔwnɔnndo daama. I solinin saa nia nda o lasondo, a ve lɛnin pungapungaa nda o ba le.»

¹¹Kani nuaa Maalii, o co Mɛlɛka-o dimi ni aa: «Ya pila co nin va saa nia hɔlla landɔɔ coo ni, ya pila o ba nda co nin va ni.

¹²Mɛɛ vana mandaa n'saa cuungiaa cɔlua ndɔa paale nda co sɛŋin-nden yɛ, lende ya mɔɔsiaanin saa nia ni, mì soli nda o fondala nda co a saŋnannda nin-ndan kpede, nɛɛ ndáà sɛŋin o paale yumbuyumbulen a o paale ɲumma bɛndulen coo-a.

¹³I solinin nda vanaa súúla celennda tɛɛn, mì soli nda o lɛŋnde nin, mì mɔɔsiaa nda, mì mingi nda o lɛŋnde ndalen nin. I dɔawnin nda balo o pembon Israɛl coo, o peelan kɔngɔ a o fondala vana nɔla calle nin o lɛŋnden nin-ndan nin.

¹⁴I yaanin nda le kɔlan diólan o bil puiyaa kɛndɛ-kɛndɔɔ nin o pembon Israɛl coo.

¹⁵Ya pila co nin va saa nia yɔɔ diólan ni, ya pila vanin vɛlɛ nda yambɔɔ le pɛngio ni. Ya Maalii, ya co Mɛlɛka-o soo nuaa ni.

¹⁶I nuwviaanin saa lo-o, mì mingi o luusian-ndo nanu. I cɛwnin o yɔŋnulun-ndo, mì mingi o co a naa-o yoomuan o n'dial. Kɛ i diwnin saa celulaa mayoomua. I vanin saa niaa yɔɔ diólan mɛɛ dɛnɛ sandaa co yɛ.

¹⁷Niaa saa nia sei, la tuei-yɔ mɛɛ ya Maalii, ya co Mɛlɛka-o soo yɛ: «La tofa vɔ ya! I co yamɛi kiolɔɔ saa téndóó nda saa téndóó tɛɛn, saa kóndóa nda cuinaa toovia tɛɛn.

¹⁸Vɛ̀ɛ̀ niáà hini kɔl le kɔlan diólan o bil puiyaa kɛndɛ-kɛndɔɔ nin te? Vɛ̀ɛ̀ fɔ mì la nɛw vɛlɛ bil tɔ̀ lo lon-ndo a labɛngu? Vɛ̀ɛ̀ la nɔla manɔlaa kɔllo hinilan le mɛmma tengɛiyan kolɔɔ le, fɔ mì la linda matɔ̀ma lo-an a labɛngu?

¹⁹Nduyɛ, saa nia tɔ̀a dianin bil niaa nɛw a labɛngu-o, mà kol mɛmma niaa linda a labɛngu-an!»

²⁰Lelan, nuaa Maalii Hala dimul nda ni aa: «Ya pila kialunin yamɛi saa téndé celulaa nda saa téndé ɲavɛiyo tɛɛn ni.

²¹Kani la ɲindu saa mɛsɛlɛiya kpow a lungbun niaan a congúla niaalan, mí la kundu nda a leela niaalan háá mì la sɛŋi nda o bɛ́ɛ̀.

²²Le hee, i ciindiaanin saa nia haliko a va lɛ pungapungaa (vannda o ba) le. I kialunin yamɛi saa téndóó nda saa téndóó tɛɛn.

²³O kon, i sɔɔ nda vana mandaa n'saa o ba, o vanin nda yɔɔ diólan-ndo. Vana ni baalaa David pɛɛn, ndu vanin nda yɔɔ diólan ni, ndu vanin vana mandaa ndaa ni.

²⁴Ya Mɛlɛka, ya vanin Hala ndaa ni, David vana baala nuu vanin simlacinɔɔ nda tɛɛn ni. Nduyɛ ya Mɛlɛka, ya soo lende ni.

²⁵I yiinin kpema kɔlɲuloo a nda mì faŋa visia yondoa biyaa o lɛŋnden nden nin. O kon saa nia calnin nila ɲulu o lɛŋnde veselɛilen nin, mà va lɔan o bundɛlan nin.

²⁶I siinguunin lɛŋnde ndalen a yondola balu pembii nii diandɛi lan duaa, mì tuisi piɔɔ a telen bɛnda-o, nduyɛ piɔɔ kon, duaa o vanin ni.

²⁷Yɔmii co yondoo nin-nde koamnin, lɛŋnden le lueinin ɲɛm vaanun lecoo-on kúlú taw. (Vanaa nia) vanin nila ɲulu o lɛŋnde ndalen nin. Nduyɛ, lɔ́ɔ́ ya yiminin kpòndò nda co bɛngu-o, mí baŋa nda vanaa nda co o ba o cɛlen nin-nda o ba-o, a sinanin maa ya co Mɛlɛka ni.

²⁸A ve lɛnin pungapungaa vanaa-mangalaa-isɔɔa tɛɛn te. Visia (biyaa) co o lɛŋnde ndalen nin-nda som ndɛnin nda le, a vanin icali nila ɲulu, vana-vana vueinun ndɛnin nda le.

²⁹I yɔngunin nda tɔlɔɔ vannda sina taw-vo. Yima fofolan ma luei lɛnin nda coo o lɛŋnde ndalen nin te, vanaa-mangalaa-isɔɔa tɛɛmbuu lɛnin nda bɛ̀ɛ̀lan te.

³⁰A sinanin o kon maa ya Mɛlɛka, ya Hala ndaa, i co nda ikɛi, maa vanaa nia nda co ni, nda cuavaa Israɛlla pɛɛn. Ya Maalii, ya co Mɛlɛka-o soo nuaa ni.

³¹Niaa saa nia, niaa saa co o hòóla nilan nin-nda, vanndacieea niaa co ni, ya co Hala niaa ni. Ya Maalii, ya co Mɛlɛka-o soo nuaa ni.»