Read Kissi Esekiɛl 35 Bible Online

Esekiɛl 35 - Kissi bible

Esekiɛl 35

¹Mí Mɛlɛka soaa o ya lo, mó dimul-la aa:

²«Po vanacieo sei, muli hɔlaa nɔmnda a kpengii pembei Seir, mà tɛɛngul ndi diom Hala-o.

³Dimul ndi aa nuaa Maalii, o co Mɛlɛka-o dimi ni aa: ‹Má cè ya nɔm hinullo, nɔm pembei Seir! I cii nɔm soŋɔ̀ɔ̀ a ba nuu, mí siinguu nɔm lɛŋnde tambɛilen a lɛŋnde piɔl vɔ́-vɔ́ len!

⁴I siinguunin kobila nɔmndan kobila pɔmndan, la piɔlnin mì la siŋnun bémbélan. O kon, a sinanin maa ya co Mɛlɛka ni.

⁵Le tùú n nɔ nɛyɔn cuavaa Israɛlla telen oo telen-ndo, le tùú n diw nda a mɔɔn cɔwvon telen nda va o dɛnɛ palaa nin-ndo, telen haki ndaa tiiya o mɛɛlulan-ndo,

⁶o ya Maalii Hala dimi-o co hoo ni: Le yoomu nuu, i co nɔm (pembei Seir) koovan soli, kani ɲɔlɛi bii nɔm le vanndacieea diwvo le, nɔm bɛɛ koovan ma fulanin nɔm!

⁷I siinguunin nɔm pembii tambɛiye a pembii vanaciee co coo lei, nɔm Seir, mí diw vanaa co kɔlan a hunɔɔ o nɔmndo-a.

⁸I peinin pembun nɔmndon a vanvílɛ́iya, vanaa vunin o mɔɔn cɔwvon bɛngu-a vanin o pembun pɔmbɔn nɔmndon coo, o bólta nɔmndan nin a o kpolonnda nɔmndan nin.

⁹I siinguunin nɔm lɛŋnde piɔlɛilen le fɛɛn a fɛɛn, vanaciee cel-lɛnin o kobila nɔmndan nin te, o kon la sinanin maa ya co Mɛlɛka ni.

¹⁰Kani a dimi aa: «I hialunin masɛi ŋiiŋii ken, Israɛl a Yuda, lɛŋii Mɛlɛka co ken nin-nde pɛɛn.»

¹¹Le hee, ya Maalii Hala soaa nuaa ni. Le yoomu nuu, i tuisinin nɔm kɔltuwvo a paŋalaa coo mɛɛ nɔm bɛɛ tosal cuavaa Israɛlla o nɛyɔn nɔm bɛndoo nin yɛ. Nduyɛ telen ya kialunin yamɛi nɔmnde o, i cɔmnin vana súú ya co nda tɛɛn-ndo.

¹²O kon, nɔm Seir, a sinanin maa i tuei tɛɛndan n tɛɛndan pembun Israɛlla-on, bau a dimi maa pembun mun pembun fondon n co ni, maa n del nɔm o ba mí n siŋnun ɲɛ naa diaa!

¹³Mí la simul-la a tombola maloo-maloo niaa, mí la soaa yongaa a ya, i tuɛi yonga niaa soo kon-ndo válán.

¹⁴Lelan nuaa Maalii, o co Mɛlɛka-o dimi ni aa: Tuma lɛŋnden kpede le vanin o kɔlkɛndɔɔ nin-ndo, i siinguunin nɔm Seir fonda piɔlɛiyo.

¹⁵Le tùú n viow kponyoo le tambii kɛ́ cuavaa Israɛlla ndóò tambu-e-o, lende koni ya bɛɛ tosalnin nɔm ni. Nɔm pembei Seir, a siŋnunnin fonda piɔlɛiyo, kandɔɔ a nɔm Seir, kɔ bii a lɛŋnde Edɔm-nden faw. O kon, vannda sinanin maa ya co Mɛlɛka ni.