Read Kissi Esekiɛl 36 Bible Online

Esekiɛl 36 - Kissi bible

Esekiɛl 36

¹Nɔm Po vanacieo yɛ, tɛɛngul pembon Israɛl diom Hala-o, mà dimul mun aa: «Niaa pembon Israɛl, la yaŋ ndɔ nilan o sɔɛi Mɛlɛka-e!

²Nuaa Maalii, o co Mɛlɛka-o dimi aa: «Le tùú yaamɔɔa dimi aa ‹Ɛ̀ɛ̀ hɛ́ɛ̀! Mbɔ̀ pembun masindɛ-sindɔn mun siŋnun ɲɛ naa pɛ-o›,

³lelan tɛɛnguu diom Mɛlɛka-o mà dimi aa: Nuaa Maalii, o co Mɛlɛka-o dimi ni aa: Le tùú vannda yeema ba-ba fee le niaa pembon Israɛl mɛiyo fondo a le niaa hiɔlɔɔ haliko mi la siŋnun le vanaa-mangalaa-isɔɔa-o, le tùú vannda tɛɛndan niaa má ke niaa diomndan-ndo,

⁴lelan niaa pembon Israɛl, la yaŋ-ndɔ nilan o sɔɛi Maalii Hala dimi-e! A toɲa, Maalii, o co Mɛlɛka-o soo pembun bɛndon, mó soaa pembun pɔmbɔn, kpolonndan, bóltan, bémbéla piɔlɛilan a kobila vannda piow nin-ndan, kobila vanaa-mangalaa-isɔaa balu lon-nda mal pungaa nin má mam lan-ndan pɛɛn.

⁵Lende ni, Maalii Hala soo, mó dimi aa: «I kɔngɔlan vanaa-mangalaa-isɔaa balu lon-nda a yinnde paŋalaale nilen, kɛ taama-taama lɛŋnde Edɔm-nden kpede, kani o kɔl nda kɛndɔɔ nin a o tɛɛndan co nda o kɔl-lo nin, mí nda pila kennun lɛŋnde nilen, má poonda nɛɛ nda yaa cɔlua diólan-nda.

⁶Le hee, tɛɛnguu diom Hala-o a lɛŋnde Israɛl-ten o kɔɔ. Dimul pembun bɛndon a pembun pɔmbɔn, kpolonndan a bóltan aa nuaa Maalii Hala dimi ni aa: La tuei-yɔ ya sɔɛi o paŋala nuu a o kɔltuw nuu nin le tùú vanaa-mangalaa-isɔɔa tɛɛmbuu niaa bɛ̀ɛ̀lan-ndo.

⁷Nduyɛ, nuaa Maalii Hala dimi ni aa: Ya, i heelu ba nuu mí mɛnan a ndi o kɔɔ maa vanaa-mangalaa-isɔaa balu niaa-a, nda pila tɛɛmbunnin bɛ̀ɛ̀lan ni!

⁸Niaa pembon Israɛl-lɛ, la piaŋnin mí la pui tɛi-tɛi. La solinin kɔmnde niaalen le vanaa nia, Israɛlla pɛɛn, kani o lo cobe mà muungu o lɛŋnde ndalen nin.

⁹La tofa vɔ, sunsun nin, i co niaa ikɛi. I mululnin niaa hɔlla, lɛŋnde niaalen le vaanunnin mì yɛiyon saŋnun lecoo.

¹⁰I kuinin vanndacieea yoomaa niaa coo, cuavaa Israɛlla kpede pɛɛn. Vanndacieea muungunin mà cal o kobila niaalan nin. A minginin bémbéla ndala piɔlɛilan tangulu.

¹¹I vangalanin vanndacieea a cɔlua niaa coo. A naŋnin ipulu taw mà kui kuiyo pila. I peinin niaa mɛɛ niáà pɛ paandu yɛ. I tosalnin niaa dɛnɛ kɛndɔɔ o laan mò hiow mɛɛ yáà tosal niaa ndu paandu yɛ. O kon, la sinanin maa ya co Mɛlɛka ni.

¹²I tosanin mì vanndacieaa yoomaa va kelaa niaa coo, vanaa nia, Israɛlla pɛɛn. Nda nɔnin nɔm ni, nɔm lɛŋnde Israɛl-ten pɛɛn. Nɔm vanin kɛ́ ndaa ni. A helu lɛnin nda cuavaa ndaa o ba mà lo kɔɔ fondo le.

¹³La tuei-yɔ diom Maalii Hala dimi-o: Vannda co dimio aa nɔm co vanndacieea diwvo, aa nɔm co vanaa nɔmnda cuawva hiɔlɔɔ o ba mì nda va lou kɔɔla fondo.

¹⁴Lelan, (nɔm lɛŋnde Israɛl-ten), a diw lɛnin n'vanndaciee le. A mɛi lɛnin vanaa nɔmnda kɔɔ fondo le. Ya Maalii, ya co Mɛlɛka-o soo nuaa ni.

¹⁵I mel-lɛnin vanaa-mangalaa-isɔɔa ma yeow nɔm ma cii nɔm bɛ̀ɛ̀lan te. Vanaa súúla celennda tuisi lɛnin nɔm siɛmbulan te, nɔm bɛɛ a tuŋ ndɛnin vanaa nɔmnda cuawva le. Ya Maalii, ya co Mɛlɛka-o soo nuaa ni.»

¹⁶Mí Mɛlɛka soaa o ya lo, mó dimul-la aa:

¹⁷«Po vanacieo sei, telen cuavaa Israɛlla va icali o lɛŋnde ndale kpeekpeilen nin-ndo, má nɔɔliaa len a kela nda vɔɔndo, a dɛnnda ndala vɔɔnndan. Mí kela nda vɔɔndo va ya o hɔl maa nɔɔla vanalanɔ co paangii ndɔɛi cɔu-vo.

¹⁸O kon, mí tuisi kɔl ni tuwvo nda coo le vanndacieea ndáà diw o lɛŋnde len nin-nda a le piɔmaa nda va sooloo má nɔɔliaa lɛŋnde len a nda-a.

¹⁹Mí saŋ nda o vanaa-mangalaa-isɔɔa tɛɛn, má sɛŋin o lɛŋii bɔɔ-bɔɔ nin, mí kialu yamɛi ndɛi mɛɛ kela ndaa a dɛnnda ndalan la va yɛ.

²⁰Mɛɛ nda tiiya o vanaa-mangalaa-isɔɔa nda va a sɛŋian tɛɛn-nda lo, má nɔɔliaa diola nila diandaalan, kani vannda va dimio a nda o kɔɔ aa: «Vanaa Mɛlɛka-a co haa ni, o lɛŋnde ndɔlen nin nda cɛn ni!»

²¹Mí mɔnɛi bii ya le diola nila diandaala cuavaa Israɛlla va nɔɔliaa nɛɛ nda va vanaa-mangalaa-isɔɔa tɛɛn-nda.

²²Le hee, dimul cuavaa Israɛlla aa nuaa Maalii Hala dimi ni aa: O co le niaa cuavaa Israɛlla le ya co dɛnndan tosaa nuaa le, kɛ le diola nila diandaalan, la niaa nɔɔliaa nɛɛ niaa co a sɛŋiannda vanaa-mangalaa-isɔɔa tɛɛn-nda pɛɛn.

²³I dindinin diola nila bɛndulan, la niaa nɔɔlia vanaa-mangalaa-isɔɔa tɛɛn-ndan, diola nila niaa nɔɔliaa nda tɛɛn-ndan pɛɛn. O kon, lɔ́ɔ́ ya cɔmnin diondɔɔ nuu niaa tɛɛn vanaa-mangalaa-isɔaa kan o hɔl-lo, a sinanin maa ya co Mɛlɛka ni. Diom Maalii Hala dimi-o co kon ni.

²⁴I faŋanin niaa vanaa-mangalaa-isɔɔa tɛɛn, mì soli niaa o lɛŋnden kpow nin, mì mingi niaa cuungiaa o lɛŋnde niaalen nin.

²⁵I fasaŋanin niaa mɛmma diandan coo, o kon mì la dendu. I tɔaanin niaa le dɛnnda nɔɔlɛila niaalan kpow a le piɔmaa niaa kpede.

²⁶I yɔngunin niaa kɔl sɛnɛiyo, mì luei niaa yiyan sɛnɛiyo nin. I solinin kɔl co o kala maa pow-vo o dialun niaan nin, mì luei kɔl co maa ivisi-o niaa o n'dial.

²⁷I lueinin kɔl nuu niaa nin, mì tosa háá mì la bii silala nilan, mì la bii pɛɛkula nilan, mì la kela lecoo.

²⁸La calnin o lɛŋnde ya yɔngu (sindɛ) fuɲaa niaa mamaa len nin. La vanin vanaa nia, mì ya i va Hala niaa.

²⁹I baŋanin niaa mì soli niaa o dɛnnda nɔɔlɛila niaalan kpow nin. I co maalon dimul mì n luɛi kúlú, mì vangala mun taw. I tuisi lɛnin yima fofolan niaa coo le.

³⁰I vangalanin kɔmnde tɔlɔɔlan a ɲɛm vaan iciɛɔn taw, yɔŋii yima fofolan ma tol niaa coo, mì siɛmbulan la bii niaa vanaa-mangalaa-isɔɔa tɛɛn.

³¹O kon, la loonunnin a kela niaa vɔɔndo, a dɛnnda niaala va lavɔɔn paandu lan. La nɔlanin hɔlla tofanndo vellaa-velle le, kon yɛ le yɔŋnda vɔɔnda niaalan a le kela niaa vɔɔndo.

³²Nduyɛ, o bɛnda mì la sina pɛngu maa o co le niaa le ya co kon tosa le. Sɔɛi fula Maalii o sondo-e co ken ni, Mɛlɛka pɛɛn. Le hee, niaa cuavaa Israɛlla, siɛmbulan la bɛnda mì la bii niaa, mì la cuu labɛɛ le kela niaa vɔɔndo!»

³³Nuaa Maalii Hala dimi ni aa: «Paale ya dindinin niaa a dɛnnda niaala nɔɔlɛilan kpow len, i minginin kobilan pei (a vanndacieea), mà mingi tangullo o bémbéla piɔlɛila paandulan coo.

³⁴Lɛŋnde tambɛilen le vaanunnin, le ve lɛnin lɛŋnde tambɛi vanaa vanin keiyo lon-nda faw o hɔl te.

³⁵O kon, vannda diminin aa: Lɛŋnde tambɛilen-nden le siŋnun lekɛndɛ-kɛndɛ maa nakɔɔ Edɛn. Kobila ndɔla va lapiɔlɛilan, latambɛilan a lasiɔŋɛilan-ndan la muungu tangulɔn, vanndacieea co nin icali lenin.

³⁶Vanaa-mangalaa-isɔɔa lonin niaa a balaa pindo-a sinanin maa ya Mɛlɛka, i mingi ɲɛ va o kombɛiyo-o tangul, mí mingi ɲɛ va o tambɛiyo-o tɔlɔɔ. Ya Mɛlɛka dimi lende ni, nduyɛ i peelunin diom ya dimi-o.»

³⁷Nuaa Maalii Hala dimi ni aa: «I cɛlnin vɛlɛ mì cuavaa Israɛlla piɛi ya le nda dɛnɛ kɛndɔɔ tosallo. I vangalanin vanndacieea ndaa maa kunda n'cɔlu.

³⁸Kobila co lapiɔlɛilan-ndan la pianin a sɛ́lɛ́ bɛndu vanndacieea. A vanin sɛ́lɛ́ maa cɔlua sálàá, maa cɔlua vannda kɔa Yerusalɛm ciee o kafolan coo-a. O kon vannda sinanin maa ya co Mɛlɛka ni.