Read Kissi Esekiɛl 37 Bible Online

Esekiɛl 37 - Kissi bible

Esekiɛl 37

¹Mí ba kpaaya Mɛlɛka-o toal-la coo, mí kɔl Mɛlɛka-o cua ya o yiyanndo nin, mó kɔ kɛsi ya o bóllo tɛɛn, ból kon va o piaa cá a paalan.

²Mó kei ya o paala lan ikɛi, mí balu lan kpow, la va sɛ́lɛ́ taw-taw, la va vɛlɛ la vesɛi kékélé.

³Mó ɲuna ya aa: «Po vanacieo sei, paalan ndan la nɔla lɛ pá mì la muungu yoomu?» Mí muli aa: «Maalii, Mɛlɛka nɔm pila sina.»

⁴Mó dimul-la aa: «Tɛɛnguu diom Hala-o o paalan-ndan coo. Dimul tan aa: Niaa paala vesɛilan sei, la yaŋ-ndɔ nilan o sɔɛi Mɛlɛka-e.

⁵Nuaa Maalii, o co Mɛlɛka-o dimul niaa paalan ni aa: La tofa vɔ, i co niaa yoomoo mingi nin, mì la muungu a kiyɛi.

⁶I minginin ɲɛsuan niaa coo, mì tosa mì vision vil niaa coo, mì kumbu niaa a yáw n'visio, mì mingi niaa yoomoo nin, mì la muungu a kiyɛi. La sinanin o kon maa ya co Mɛlɛka ni.»

⁷O kon, mí tɛɛnguu diom Hala-o mɛɛ ya sɔla vomɔɔ yɛ. Tuma ya va diomnda lan tɛɛnguuo lende-o, mí tuɛi ɲɔɔ sɔɛi vɔkɔ-vɔkɔ, mí ɲɔɔ kandu biiŋɔnndo sikpɛ-sikpɛ, mí paalan la kandu sɔɔnganndo ikɛi vellaa-velle.

⁸Mí ca dɔ́ɔ́ ɲɛsuan o paala kalalan coo, mí vision kandu vulɔɔ lecoo, mí yáw n'visio kumbu lan mɔɔsu, kɛ yoomoo ndóò muungu vɔ lenin te.

⁹Mó dimul-la aa: «Tɛɛnguu diom Hala-o mà soo o hoeyii yoomuɛi lo aa ‹Nuaa Maalii, o co Mɛlɛka-o dimi ni aa: Nɔm hoeyii yoomuɛi sei, fula o kpengun hiɔɔlun ceendo mà hɔŋ vanvílɛ́iya haa coo, haliko ma muungu yoomu.›»

¹⁰Le hee, mí tɛɛnguu diom Hala-o mɛɛ ndóò vem ya le tosaa yɛ. O kon, mí hoeyii yoomuɛi hun luɛi nda nin, má muungu yoomu, má sim o pelun ndan coo. Vanaa cɔwva sɛ́lɛ́ bɛndoo pila nda va ni.

¹¹Mó dimul-la aa: Po vanacieo sei, paalan ndan, la co cuavaa Israɛlla kpow ni. Kani cuavaa Israɛlla co dimio aa: ‹Paala naalan la vesan, tiindan naa tambu. Mbɔ̀ naa n cuu fɔ́!›

¹²Lelan, nɔm tɛɛngul nda diom Hala-o. Dimul nda aa: Nuaa Maalii, o co Mɛlɛka-o dimi ni aa: ‹La tofa vɔ mɛɛ ya kumbi sɛila niaalan yɛ, i solinin niaa o sɛila lan nin, mì heelu niaa ceen. I co niaa mingi o lɛŋnde Israɛl-ten nin, niaa co vanaa nia-a pɛɛn.

¹³Tuma ya kumbinin sɛila niaalan, mì soli niaa o sɛila lan nin, mì heelu niaa o kɔngɔ-o, la sinanin maa ya co Mɛlɛka ni.

¹⁴I lueinin hoeyii nii yoomuɛi niaa nin, mì la muungu yoomu. I minginin niaa kɛsi o lɛŋnde niaalen coo, mì la sina o kon maa ya Mɛlɛka, i soo, mì tosa vɛlɛ o ya dimi-o.» Diom Mɛlɛka dimi-o co kon ni.

¹⁵Mí Mɛlɛka soaa o ya lo, mó dimul-la aa:

¹⁶«Po vanacieo sei, cua yɔm ipɛngɔɔ mà sɛva lecoo aa: ‹Le tàndá Yuda-o a le cuavaa Israɛlaa co masale len o ba bɛngu-a!› Mà cua vɛlɛ yɔm ipɛngɛ celen, mà sɛva lecoo aa: ‹Le polale Yosɛf len, cuavaa-imamaa Efraim-nda a le cuavaa Israɛlaa co masale len o ba bɛngu-a kpow!›

¹⁷A cii pɛ, a mɔɔsa pɛngɛn miuŋun mun nɛɛ pilɛ, haliko mi n siŋnun nɔm o ba maa pɛngɛi ndii pilɛ, mì n muulian ɲɔɔ ndu pilɛ nɔm o ba.

¹⁸Te vanaa niaa co súú pilɔɔ-a ɲuna nɔm pɛ aa: ‹Vɛ̀ɛ̀ a co naa kɔlɔ dɛnɔɔ ho tɛɛsial te?›

¹⁹A mulul nda aa nuaa Maalii Hala dimi ni aa: «La tofa vɔ ya! I cuanin yɔm ipɛngɛ Yosɛf-o, o co polale Efraim-nden o ba-o, a polama Israɛlaa co masale len o ba bɛngu-an, mì hol ndu o yɔm ipɛngɛ co le pollale Yuda len-ndo coo, mì siinguu pɛngɛn miuŋun mun yɔmndo ndu pilɛ kpé. Lende n mɔsɔŋannin, mì n siŋnun ɲɔɔ ndu pilɛ ya o ba ni.»

²⁰Le hee, nɔm (Esekiɛl), bii pɛngɛn n sɛvanin coo-on o ba kpendekele, haliko mi nda kpede a ce mun.

²¹Mà dimul nda aa nuaa Maalii Hala dimi ni aa: «La tofa vɔ ya! I co cuavaa Israɛlla cua vanaa-mangalaa-isɔɔa nda kɔɛ tɛɛn-nda tɛɛn, mì soli nda ba-ba fee, mì mɔɔsiaa nda, mì mingi nda o lɛŋnde ndalen nin.

²²I siinguunin nda vanaa-mangalaa-isɔɔa súú pilɛa o lɛŋnde (ndalen) nin, o pembon Israɛl coo, a ve lɛnin súúla sala tiɔn te, a ve lɛnin a piɔvannda o masɛi ndii ŋiin bɛngu le.

²³A nɔɔlian ndɛnin a piɔmaa ndaa le, a lɔngɔlian ndɛnin a dɛnnda ndala nɔɔlɛilan a á yɔŋnda vɔɔnnda ndalan kpow le. I ciindiaanin nda o fondala nda vanin icali nin, má tosa hakio lan kpow nin, mì dindi nda ma va vanaa nia, mì ya i va Hala ndaa.

²⁴David vana ni baala vanin masa ndaa ni. Nduyɛ nda kpede, vana manda n'saa ndu pilɛ nda nɔnin ni. A kelanin o pɛɛkula nilan coo, mà bii silala nilan, mà tosa mɛɛ la dimi yɛ.

²⁵A calnin o lɛŋnde ya yɔngu sindɛ Yakɔb vana baala nuu len nin, lɛŋnde fuɲaa ndaa va icali nin-nden pɛɛn. Kandɔɔ a nda pila, cuavaa ndaa a cuavaa ndaa mamaa, a vanin icali o lɛŋnde len nin le fɛɛn a fɛɛn, nduyɛ David vana baala nuu vanin simlacinɔ ndaa le lɔ́ɔ́-lɔ́ɔ̀ ni.

²⁶I yiinin kpema kɔlɲuloo naa ndaa tɛɛn. Kpema fɛɛn-fɛɛndo vanin naa tɛɛn naa ndaa. I minginin nda kɛsi lon mì vangala nda mà kui taw. I minginin cɛi-kola-toandaa diandaa nda tɛɛn le lɔ́ɔ́-lɔ́ɔ̀.

²⁷Calta nilan la vanin nda tɛɛn, i vanin Hala ndaa mì nda va vanaa nia.

²⁸O kon, lɔ́ɔ́ cɛi-kola-toandaa diandaa nuu vanin nda tɛɛn le lɔ́ɔ́-lɔ́ɔ̀-o, vanaa-mangalaa-isɔɔa sinanin maa ya co Mɛlɛka co Israɛlla dindio-o ni.