Read Kissi Esekiɛl 38 Bible Online

Esekiɛl 38 - Kissi bible

Esekiɛl 38

¹Mí Mɛlɛka soaa o ya lo, mó dimul-la aa:

²«Po vanacieo sei, muli hɔlla o masaa Kɔk lo, o lɛŋnde Makɔk len nin, Kɔk kon pɛɛn, o co simlacinɔ lebollo le vannda Mesɛk a haa Tubal-lo, mà tɛɛngul ndu diom Hala-o a tambii o hun tambunin-nde o kɔɔ.

³Dimul ndu aa nuaa Maalii, o co Mɛlɛka-o soo ni aa: ‹Nɔm Kɔk, má cè ya nɔm cɔlɔbaa! Nɔm simlacinɔ lebollo Mesɛk a Tubal!

⁴I vownin nɔm dolinndon o yaalelan nin, mì sɛɛsuu nɔm, nɔm pila, vanaa nɔmaa cɔwva kpow, soa nɔmnda, vanaa nɔmaa ɲaanun o soa coo mà dovin kan ɲɛkɛndɛ-kɛndɛ-a, a co kan sɛ́lɔ́ɔ́ taw mà nɔ kɔ̀ɔ̀la cɔwla bɛndulan a lapɔmbɔlan o laba-a, a caa kan mɔɔn cɔwvon hiŋndo-a pɛɛn.

⁵Vanaa cɔwva Pɛrse, haa Etiopii a haa Put handunnin nda coo. Nda kpow a nɔnin kɔ̀ɔ̀la cɔwlan o laba a mɔsilta kengelɛila cɔwlan o lebol.

⁶Lɛŋnde Komɛr len a vanaa ndɔa cɔwva kpow, yungu Tokarma co o lɛŋnde maluaŋ-nden nin di-di-o a vanaa ndɔa cɔwva kpede. Vanaa sɛ́lɛ́ bɛndua kan kpede a vanin a nɔm latulu.

⁷Toosian, va o bɛɛndianndo, kandɔɔ nɔm pila, kɔ bii sɛ́lɛ́ bɛndu balu nɔm kon pindo-o, la bɛɛndian! Nɔm vanin nda simndan laci ni.

⁸O vɔsila bɔɔ-bɔɔ kɔɔli, i viamnin nɔm mà kuel lɛŋnde Israɛl-ten. O kon, vanáà hɛlun má ɲaanun cɔwvo o lɛŋii yɛ́-yɛ́i nin-nda muungunin mà kɔ cuungian Israɛl, o co nin lɔ́ɔ́ levil taw, vana hel-lɛ o pembun mun coo le. A faŋannin vanaa celen tɛɛn, mà va nila ɲulu.

⁹Nɔm pila a vanaa nɔmaa cɔwva, la heelunin maa hoeyii fùkù-fùkù, la kuelnin nda maa yumbuyumbu kumbu lɛŋnden mɔku-mɔku-o.»

¹⁰Nuaa Maalii, o co Mɛlɛka-o dimi ni aa: «Paale len, yiyannda vɔɔnndan la luɛinin nɔm o kɔl, mà tuu le dɛnɛ vɔɔndo tosaa.

¹¹A diminin aa: ‹I heelu vɔ mì kɔ del lɛŋnde co lekumbiaalen coo, mì del vanaa co icali o ba ndaa coo nila ɲulu o calta ndalan nin-nda coo. Vanaa co kan icali kpow o kobila co lakungaa a kpaki le lan nin-nda, à kobila ndalan la nɔ kan masɔkɔ a lakoŋ te-a pɛɛn.

¹²Nɔm co lakɔ nda ɲɔɔn hiɔlɔɔ o laba ni, mà punga ɲɛm ndan a paa-kala.› Nɔm delnin kobila pɔmnda nda co mingio tangullo lan coo ni, mà del vanaa fula kan vanaa-mangalaa-isɔɔa tɛɛn má mɔɔsian o nda lo-a coo, a nɔ kan cɔlua taw a ɲɛm kɛndɔn taw-va, a co kan icali o ceendo kɔllo déŋ-nda.

¹³Vannda Sabaa a haa Dedan, yulaa Tarsis a simlacia ndaa kpow a ɲunanin nɔm ɲinkon aa: ‹Vɛ̀ɛ̀ le ɲɔɔn hiɔlɔɔ a paa-kala n co hunɔɔ ni? Vɛ̀ɛ̀ le ɲɔɔn poondiaa n cuungiaa sɛ́lɛ́ bɛndoo ho nuaa ni? Mò va maa le volion a sianion, le cɔlua a ɲɛm kɛndɔn cuaa, a le bolofaa bɛndoo puuvo n hin nuaa ni?›

¹⁴Lelan, nɔm Po vanacieo, tɛɛnguu diom Hala-o. Dimul Kɔk aa: «Nuaa Maalii, o co Mɛlɛka-o dimi ni aa: ‹A toɲa, paale vanaa nia, Israɛlla calnin nila ɲulu len, nɔm Kɔk sinanin.

¹⁵A cannin o calta nɔmndan, o lɛŋnde maluaŋ-nden nin di-di, mà hin a vannda sɛ́lɛ́ bɛndoo nɔm kɔɔli. Nda kpede a vanin o soa coo, mà hin a sɛ́lɛ́ bɛndoo a vanaa cɔwva taw-taw kɔɔli.

¹⁶A heelunin mà kuel, vanaa nia, Israɛlla maa yumbuyumbu co kɔlan lɛŋnden kumbɔɔ mɔku-mɔku-o. O telenndan mɛɛlulan ken tosannin ni. I yaanin nɔm le kɔlan lɛŋnde nilen delɔɔ coo, haliko mi vanaa-mangalaa-isɔɔa sina ya, lɔ́ɔ́ ya cɔmnin nda diondɔɔ nuu a nɔm o kɔɔ-o, nɔm Kɔk pɛɛn!›

¹⁷Nuaa maalii, o co Mɛlɛka-o dimi ni aa: ‹Mò va maa a nɔm o kɔɔ yáà soo sindɛ a sondola vanaa nia baalaa, vanaa-tɛɛngaa-diom Mɛlɛka-a Israɛl ni? Vanaa kan tɛɛnguunin diom Hala kon lɔ́ɔ́ levil, o co nin vɔsilan taw-taw, má dimi maa i yaanin nɔm le kɔlan vanaa nia delɔɔ coo.

¹⁸Nduyɛ paale len, paale Kɔk hun delnin lɛŋnde Israɛl-ten coo len, kɔltuwvo helnin ya Mɛlɛka o lamilin ŋaliŋali. Diom Maalii, o co Mɛlɛka-o dimi-o co kon ni.

¹⁹I co ndi dimio a paŋala co o yinnde kɔltuw nuu nin-ndo. Paale len lɛŋnden le ɲiiyanin taw-taw o lɛŋnde Israɛl-ten nin.

²⁰Suwva o peelo a yowva coocoo a ɲiiyanin ya o hɔl. Visia yondoo nin a ɲaa pɔm-pɔmbɔa kela lɛŋ-nda bɛɛ ɲiiyanin, hali vanndacieea co o lɛŋnden coo-a kpow bɛɛ a ɲiiyanin. Pembon koombiaanin, mì powta yɛ́ndɛ́la feke-fekelan la deli, kpakilan kpow la koombiaanin.

²¹I tuisinin ndu Kɔk cɔwvo coo o pembun nun kpede coo. Vana-vana mululunnin puapilɛ ndɔɔ a mɔɛi cɔwve mà diuvan vellaa-velle! Diom Maalii, o co Mɛlɛka-o dimi-o co kon ni.

²²I kialunin yamɛi ndɔɛi, mì tuisi ndu nàà n'kɔnyaa coo, mì diw vanaa ndɔa. I tuisinin piɔɔ pɔ̀lɔ̀-pɔ̀lɔ̀ɔ́, loeon delian, yinnden a fungoo ndu pila coo, vanaa ndɔa cɔwva coo a vanaa sɛ́lɛ́ bɛndua vanin a ndu latulu-a kpow coo.

²³Lende ya cɔmnin bɔɔbɔɔyɛi nii a diondɔɔ nuu ni. I cɔmnin vanaa-mangalaa-isɔɔa sɛ́lɛ́a vana ya co-o, o kon má sina maa ya co Mɛlɛka ni.›»