Read Kissi Esekiɛl 39 Bible Online

Esekiɛl 39 - Kissi bible

Esekiɛl 39

¹Nɔm Po vanacieo sei, tɛɛngul Kɔk diom Hala-o a dɛnɛ palaa toalnin ndu coo-o. Dimul ndu aa: Nuaa Maalii, o co Mɛlɛka-o dimi ni aa: «Má cè ya nɔm cɔlɔbaa, nɔm Kɔk, nɔm simlacinɔ lebollo le Mesɛk a Tubal!

²I sasunin nɔm mì kɔɛ a nɔm. I cuanin nɔm o lɛŋnde maluaŋ-nden nin di-di mì yɛɛ nɔm o pembon Israɛl coo.

³I yamnin kpaasiaa n nɔ o ba mɛllo-o, mì tosa mì kɔɔn co nɔm o ba kɛndɔɔ nin-ndon cɛɛlun.

⁴O kon, nɔm pila, vanaa nɔmaa cɔwva kpow a vanaa vanin a nɔm latulu-a, la delinin a vílɛ́iya o pembon Israɛl coo. I yɔngunin yovaa biyaa, yovaa súú-súù ka a visia yondoa dialun niaan mà dɔwnun balo a mun.

⁵Nɔm Kɔk, a delnin lɛŋ yondoo nin, kani ya dimi lende ni. Ya Maalii, ya co Mɛlɛka-o soo nuaa ni.

⁶I yaanin yinnden o tàndá Makɔk-o nin, a vanaa co icali nila ɲulu o lɛŋii co o mɛnndan tɛɛn-nde nin-nda coo. Nda bɛɛ sinanin o kon maa ya co Mɛlɛka ni.

⁷I cɔmnin diola nila diandaalan vanaa nia tɛɛn, Israɛlla pɛɛn. Nduyɛ i cɛl-lɛnin mì diola nila diandaalan la nɔɔlian te. O kon, vanaa-mangalaa-isɔɔa sinanin maa ya co Mɛlɛka ni, O-Diandaa co Israɛl-lo pɛɛn.

⁸La tofa vɔ! Dɛnnda lan la co tiiya, la kandu peelɔnndo, paale ya va dimio len le tiiya. Diom Maalii, o co Mɛlɛka-o dimi-o co kon ni.

⁹Vanaa co icali o kobilan Israɛl nin-nda fulanin, mà ciŋa yinnden, mà lom ɲɛm cɔvun (yaamɔaa ndaa): kɔ̀ɔ̀la cɔwla pɔmbɔlan a labɛndulan, kpaasiaalan a kɔɔn, siongolan a báltan. A vanin yinnden ciŋaa a ɲɛm mun o vɔsilan tan ŋɔmmɛw bɛngu.

¹⁰O vɔsila lan bɛngu, a venin lakɔ iyɔm tingɔɔ yondo nin te, a venin lakɔ iyɔm kioŋ o labundɛ nin te, kani ɲɛm cɔwvon nda vanin dɔvɔɔ le yinnden ciŋaa ni. A hialunin vanaa poondiaa ɲɔɔn nda o ba-a ɲɔɔn o ba, mà punga ɲɛm vanaa punga ɲɔɔn nda o ba o tasendɔ-a. Ya Maalii, ya co Mɛlɛka-o soo nuaa ni.

¹¹Paale len, lɔ́ɔ́ sɔɔn mun peelunnin-ndo, i yɔngunin Kɔk fondaa le ndu kumbɔɔ lon, o lɛŋnde Israɛl-ten nin. Fonda kon vanin ból vanaa kelaa ni, o mɛmma hɛlii bɛnduan ikɛi, a ba paalen le can-ndo. Sɛila lan la kindalnin vanaa hiawnannda nɛiyo ni. Lon nda kumbunin Kɔk a vanaa ndɔa sɛ́lɛ́a kpede ni. O kon, a kenin ból kon diolan aa Ból sɛ́lɛ́ bɛndu Kɔk-o.

¹²Paangon mún ŋɔmmɛw, cuavaa Israɛlla vanin nda kumbɔɔ, haliko mi lɛŋnden le muungu lediandaa.

¹³Vanaa co icali (Israɛl) lon-nda kpow a sɔɔnguunin le nda kumbɔɔ. Nduyɛ tɔ́ɔ́ bɛndoo kelanin paale ya cɔmnin biilu nuu ceen-nden. Ya Maalii, ya co Mɛlɛka-o soo nuaa ni.

¹⁴A hɛlinin vannda pum, mì nda va kelaa mɛɛndianndo o lɛŋnden faw nin. A vanin kelaa mɛɛndianndo le vanvílɛ́yaa lonin ihini yondoo nin-nda cɔwviaa, mà kumbu nda, haliko mi lɛŋnden le dendu. Te paangun ŋɔmmɛwun mun cuu dɔ́ɔ́ pɛ, vanaa kan kandu kelaa le vanvílɛ́yaa kan nuwviaa.

¹⁵A kɔanin o lɛŋnden nin ba-ba fee, te o pilɛ ce pɛ paala vanacieo, o dii powtan kundaa lecoo háá mì vanaa toavaa lasɛiya a kɔ kumbu paala lan o Ból sɛ́lɛ́ bɛndu Kɔk-o nin.

¹⁶Kobio pum sɔlanin bɛɛ diolan aa Hamona (Sɛ́lɛ́ bɛndoo). Lende nda dindinin lɛŋnden ni.

¹⁷Nɔm Po vanacieo, yaŋ nilan. Nuaa Maalii Hala dimul nɔm ni aa: «Dimul yowva súúlan kpow a visia yondoa kpede aa la hun mì la cuungian. La fula nɛɛ-nɛɛ ka mì la hun mɔɔsian le sálà nuu dioo, sálà ya pila solinin mì dii ndu le niaa-o! Sálà kon vanin bɔɔ sálà bɛndu o pembon Israɛl coo! La dianin visin (vanndacieea) mí la kol kooma ndan.

¹⁸La dianin visin kuubaa cɔwva mì la kol kooma simlacia co o lɛŋnden coo-a. Nda kpow, saa kóndóa, saa téndéa, cuinaa toovia a navaa téndéa dɔwnun cuɛiyan Basan-nda nda co ni.

¹⁹O sálà ni ya co kon soli le niaa-o coo, la dianin visin macuɛiyon mì la pim ca. La kolnin kooma (vanndacieea) mì ma bii niaa maa mamɔi.

²⁰La dianin visin soa a visin vanaa ɲaanun a soa-a o tabali nuu coo mì la pim. La dianin visin kuubaa cɔwva a visin vanaa cɔwva kpow. Ya Maalii, ya co Mɛlɛka-o soo nuaa ni.

²¹I cɔmnin biilu nuu vanaa-mangalaa-isɔɔa tɛɛn, o kon, nda kpow a canin mɛɛ ya kialunin yaman yɛ, ma ce vɛlɛ ba ni kpaaya ya tuisinin nda coo-o.

²²Cuavaa Israɛlla sinanin o kon maa ya co Mɛlɛka ni, Hala ndaa pɛɛn. Kandɔɔ paale len háá le lɔ́ɔ́-lɔ́ɔ̀.

²³O kon, vanaa-mangalaa-isɔɔa sinanin maa hakilan cuavaa Isaɛlla tosa ni, lelan nda kɔɛ a nda o biyɔɔ nin ni. Le kɛɛ nda kɛɛ le lou o diomnden coo a ya-o ya bɛɛ faŋal nda hɔlaa nia ni. Mí mal nda yaamɔaa ndaa o ba, haliko ma cuu vu kpede o mɔɛi cɔwve bɛngu.

²⁴Mí tosa a nda mɛɛ dɛnnda ndala nɔɔlɛilan a yɔŋnda vɔɔnnda ndalan la yɔŋnun yɛ, mí vin nda hɔlaa nia.

²⁵Le hee, nuaa Maalii Hala dimi ni aa: «O laan nin, i minginin cuavaa-imamaa Yakɔk-a co o biyɔɔ nin-nda o nda lo. I tuinunnin cuavaa Israɛl-la kpow iɲíí, kani paŋalaa biinin ya le diola nila diandaalan.

²⁶O kon, a pɔɛɛnunnin siɛmbula kei nda coo lan, mà pɔɛɛnun a nila kalula ndáà tosal-la lan kpede. A calnin o lɛŋnde ndalen nin o nila ɲulu nin, vana-vana hin ndɛnin nda kɔltan hiiluu le.

²⁷Lɔ́ɔ́ ya solinin nda vanaa súúla celennda tɛɛn, mì mingi nda o nda lo-o, lɔ́ɔ́ ya solinin nda o lɛŋii yaamɔaa ndaa nin mì mɔɔsiaa nda-o, i cɔmnin vanaa-mangalaa-isɔɔa taw-taw diondɔɔ nuu a dɛnɛ kɛndɛ ya vanin tosaa Israɛlla tɛɛn-ndo.

²⁸A sinanin maa ya co Mɛlɛka ni, Hala ndaa pɛɛn, o tow nda mí ndáà kɔa o biyɔɔ nin vanaa-mangalaa-isɔɔa tɛɛn-ndo, o co nda mɔɔsiaa o lɛŋnde ndalen coo-o, o pilɛ bɛɛ i mɛinin o lɛŋii ken nin te.

²⁹Handɔɔ o kon coo, i vin ndɛnin nda hɔlaa niaa le, kani i saŋnin kɔl nuu cuavaa Israɛlla coo. Ya Maalii, ya co Mɛlɛka-o soo nuaa ni.