Read Kissi Esekiɛl 4 Bible Online

Esekiɛl 4 - Kissi bible

Esekiɛl 4

¹Nɔm Po vanacieo yɛ, cua kpilikiei, mà simi ndi nɔm o hɔl, mà tuula kobio lecoo, kobio Yerusalɛm pɛɛn.

²O kon kɔɔli, a handu fondaa ndu o hɔl-ndɔ le ndu tiilaa. Mà tow soonndan, mà handu kpengbalan le helɔɔ o kpakio le ndu cɔlɔbaa, mà toosiaa piŋndan ndu balɔɔ sɔ́, mà handu dɔ́ɔ́ngɔ́la cɔwlan ndu o hɔl-ndɔ, mà tuula ciliŋii balamaniei, mà simi ndi o kobi kalaa balɔɔ pindo le ndu cɔlɔbaa.

³A cii pɛ, a cua bombo icilinndo, a handu ndu maa kpaki icilin nɔm pila a kobi kalaa tɛɛn. A cii pɛ tosa lende, a sim a tofa kobi kalaa ciŋ, a tiila ndu. Tɔɔmaseloo vanin kon le cuavaa Israɛlla ni.

⁴O kon kɔɔli, nɔm pila hini o ba mɛl nɔmndo coo, lende n siilunnin yɔŋnda vɔɔnnda cuavaa Israɛlla ni. Mɛɛ n tosanin palɛi ihini o ba mɛl kon coo yɛ, lende hakila Israɛlla la viawnin nɔm coo ni.

⁵I kilu nɔm palɛi mɛɛ vɔsila ndá tosa o yɔŋ vɔɔndo nin-ndan la co sɛ́lɛ́ yɛ. Lelan i kilu nɔm palɛi kɛmɛ leyáá a belaŋɔmahiɔɔlu. O palɛi ken kpede bɛngu n siilunnin yɔŋ vɔɔn cuavaa Israɛlla ni.

⁶Lɔ́ɔ́ n ciinin palɛi ken-ndo, a hini vɛlɛ o ba kɛndɔɔ coo, a cua yɔŋ vɔɔn polale Yuda len o palɛi belehiɔɔlu bɛngu. I kilu nɔm paalen lepilɛ le vɔsi oo vɔsi.

⁷Mà muli vɛlɛ hɔlaa nɔmnda a congú nɔm vanin fondo-o a kpengii Yerusalɛm vanin kon o tiilaa pindo-o-e, mà tɛɛngul ndu diom Hala-o.

⁸Tofa vɔ, i yiinin nɔm a yoei, yɔŋii n faŋan o kpaŋii n vanin ihini coo-e coo, mà mulin o kpaŋnde pilɛi coo, à lonin lende háá mà cii palɛi n tosanin o kobi kalaa tiilaa nin-nde kpede.

⁹Nɔm Esekiɛl-lɛ, cua maalon, ɔrse, kavun bɛndon, cabueenndon, cɔnndon a sɔkpɔn, mà vow mun kpow o hɛngɔɔ pum nin, mà bɛɛndiaa ɲɛdiaa a mun. O palɛi n vanin ihini o kpaŋii nɔmnde coo-e kpow bɛngu, ɲɛdiaa kon n vanin dioo ni, kon vanin balo nɔmndo o palɛi kɛmɛ leyáá a belaŋɔmahiɔɔlui ken bɛngu ni.

¹⁰Ɲɛdiaa n vanin dioo-o co hoo ni: lepalaa-lepala kalamulan kɛmɛ lediin a bidiin. Lende n vanin dioo telen oo telen ni.

¹¹Mɛnndan bɛɛ, a kolnin man mɛɛ ma tuununnin yɛ, a kolnin litilio o pilɛ o paalen lepilɛ nin. Lende n vanin man kolɔɔ telen oo telen o palɛi ken kpow nin ni.

¹²A dianin dɛɛ toaŋaa toosian a kpeyan ɔrse-o. A toaŋnin dɛɛ kalaa vannda kpow o hɔl a yinnde n ciŋanin a poola vanndacieea len.»

¹³Mí Mɛlɛka dimi aa: «Lende cuavaa Israɛlla dianin ɲɛdiaa nda nɔɔlɛiyo nɛɛ ya toawnin nda vanaa-mangalaa-isɔɔa tɛɛn-nda ni.»

¹⁴Mí dimi aa: «Éé Maalii Hala! I kɛɛ ɲɛ-ɲɛ co o nɔɔlɛi mí kpakpala ndu. Kabi kandɔɔ o cuaambɔyɛi nii nin háá hau, i di vɔ cɔlu vílɛ́i te kon te cɔlu visi yondoo sɛɛsiaa-o le. Nduyɛ visii nɔɔlɛi súú-súù luei-yɔ ya o sondo le dɛ!»

¹⁵Mó mulul-la aa: «Mɛɛ i yɔngu nɔm poola nawlan mà toŋ ɲɛdiaa nɔmndo lecoo, a tuŋ ndɛnin ndu o poola n'vanndaciee coo le.»

¹⁶Mó dimul-la vɛlɛ aa: «Po vanacieo, i co ɲɛdiaa co Yerusalɛm-ndo poondiaa. Vanaa co icali lon nda vanin ɲɛdiaa tuuvo ɲɛ-pɔmbɔ cuinii le dioo, o venin nda tiw le, a vanin mɛnndan tuuvo le kolɔɔ, ma venin nda kolɔɔ iyeema cii le.

¹⁷O kon, ɲɛdiaa a mɛnndan ma biinin nda pɛŋnden, mɔnɛi a sangaa toalnin nda coo vellaa-velle, lende nda ɲawnin le dɛnɛ sandaa lepɛŋ ndaa ni.