Read Kissi Esekiɛl 40 Bible Online

Esekiɛl 40 - Kissi bible

Esekiɛl 40

¹Mɛɛ nda bii naa má kɔa a naa, o vɔsi bidiin a o ŋuɛɛnundɔ naa n tosa o biyɔɔ kon nin-ndo nin, vɔsi kon va vɔsi tɔ́ a o hiɔɔlundɔɔ o biyɔɔ yaamɔɔa bii Yerusalɛm ma tɛɛmbuu ndu-o ni. O vɔsi kon kandɔɔ, paangii tasei va malɔ tɔ́, paale len, mí ba kpaaya Mɛlɛka-o toal-la coo, mó cua ya, mó kɔa a ya lon.

²O vunduma ya va cɔu-van nin, mí cannun mí Mɛlɛka kɔa a ya o lɛŋnde Israɛl-ten nin, mó kɔ kɛsi ya o pembii vilɛi-vilɛiye coo, mí ca tangultan lapum a ba too lon maa cɛila vaa o kobi nin.

³Mɛɛ o kɔɛ a ya a ba too lon, mí ca langbanɔɔ pum lon, hɔlla va ndu maa idaɲa, kɛi kola keesoo pilɛ a tindaa o pilɛ va ndu o ba le tuuvo, o va isisi o dio kobi kon ikɛi.

⁴Mí langbanɔ kon dimul-la aa: «Po vanacieo sei, tofa mà mɛɛndan ɲɛkɛndɛi, mà yaŋ nilan yékén. Handu hɔlla o dɛnnda ya co nɔm cɔm-ndan kpede coo, mà dɔw lan taasi. Kani le lan tofaa a lan mɛɛndanndo nda hin a nɔm nanu ni. A cii pɛ cɔ, a kɔ downun cuavaa Israɛlla kona, a tɛɛsial nda ɲɛ-ɲɛ n co hunɔɔ cɔ a lehɔl.

⁵Tofa vɔ ɲɛ ya ce-o, kpaki va lekɔɔli-o va lon, mó balu Cɛi-Hala-o nɛɛ-nɛɛ ka. Tindaa va langbanɔ kon o ba le tuuvo, tinda kon va bandei dunndo leŋɔmpum, kɛ o ve dun ndáà dema tuu-o le, dun kon ndóò hiow dun nda dema tuu-o bandei le ba-piasaa lepilɛ. Mó tuu mɛɛ kpakila tangulta lan láà celul-lɛ, mí buo bɛnda mɛɛ tinda kon ndóò bandu yɛ, mí helɔɔ bɛnda vɛlɛ mɛɛ tinda kon ndóò bandu yɛ kpafii.

⁶Mó kɔa a kpengii dio bɛndu muli hɔlla a ba paalen le can-ndo-e, mó hel o helɔɔla dio kon, mó tuu kèédei dio bɛndu kon, buo va tinda ndɔ kon lepilɛ, bandei tinda kon lepilɛ, kon kpede kèédei kínɛí.

⁷Cɛila cumulaala va lenin-ndan, o kɛ́-kɛ̀ ndóò nɔ bandei dunndo leŋɔmpum, buo dunndo leŋɔmpum. Fonda va cɛila cumulaala lan tɛɛn le lan sɛiyo-o va dunndo leŋuɛɛnu. Kèédii dio bɛndoo, i va o cɛi-luɛyaa tase dio bɛndu kon ikɛi lenin-nde ndíì va dunndo leŋɔmpum.

⁸Mó tuu lenin tongo-luɛyaa tase dio bɛndu kon, mó bɛnda dunndo leŋɔmpum.

⁹Mó tuu tongo-luɛyaa tase dio bɛndu kon, mó bɛnda dunndo leŋɔmaa, mí sungbuma ndɔan ma bɛnda dunndo lediin, lenin tongo-luɛyaa dio bɛndu kon va ni.

¹⁰Cɛila cumulaala dio bɛndu va kon a ba paalen le can-ndo lan la va layàá kpengei pilɛ, kpengei pille vɛlɛ tan yáá, layàála lan kpede bu pilɔɔ a bandii pilɛi láà nɔ ni, sungbuma va o kpengon-ndan bɛɛ bu pilɔɔ a bandii pilɛi maa nɔ ni.

¹¹Mí langbanɔ kon tuu vɛlɛ bu sondo dio bɛndu kon, mó bɛnda dunndo tɔ́, bandii ndɔɛi dunndo leyàá.

¹²Fonda va cɛila cumulaala lan o hɔl-ndɔ-o va dunndo lepilɛ o kpengon kpow, cɛi cumulaa oo cɛi cumulaa ndóò nɔ dunndo leŋɔmpum o kpengei pilɛ coo.

¹³Mó tuu dio bɛndoo kandɔɔ o yindɔ cɛi cumulaa o pilɛ, háá o yindɔ cɛi cumulaa o pilɔɔ, mí ɲɔɔ bɛnda dunndo bidiin a leŋuɛɛnu o sondola tiɔnnda diola luɛyaala mululan hɔlla lan tɛɛn.

¹⁴Mó tuu vɛlɛ bu tongo-luɛyaa tase kon, mó bɛnda dunndo belaŋɔmpum. Bɛɛ Cɛi-Hala-o va tongo-luɛyaa tase kon o balaa pindo.

¹⁵Fonda va dio bɛndu luɛyaa a tongo-luɛya tase dio bɛndu co lenin-ndo tɛɛn-ndo va dunndo beleŋuɛɛnu.

¹⁶Diola pɔmbɔla ndáà kayakaya a cilinndon-ndan la va o cɛila cumulaala lan a o sungbuma cɛila lan o dio bɛndoo nin balɔɔ pindo, diola pɔmbɔlan la va vɛlɛ o tongola-luɛyaala taselan lenin labalaa pindo, siɔ̀ɔ́la vawlan la va latuulaalan o sungbuan kpow coo.

¹⁷O kon kɔɔli, mí langbanɔ kon kɔa a ya o bɛ́ɛ̀ va lekɔɔli-o, nɛɛ cɛilan a fonda peelaa yikpaa va o toosiaa balɔɔ pindo-o, cɛilan beleyaa la va o fonda peelaa yikpaa kon coo ni.

¹⁸Fonda yikpaa peelaa tɛlɛlɛ kon va a kpengii diola bɛndulan, bandii ndɔɛi va kpen-kpen a bandii diola bɛndula lan, fonda yikpaa peelaa tɛlɛlɛ va lebɛngu-o va kon ni.

¹⁹Mó tuu buo kandɔɔ a nɛɛ dio bɛndu lebɛngoo muli hɔlla-a, háá o bɛ́ɛ̀ va lenin-ndo dangalaa, mó bɛnda dunndo kɛmɛ a ba paalen le can-ndo a á ba luaŋ-ndo.

²⁰Mó tuu bandei a bu dio bɛndu muli hɔlla a ba bɛɛ co lekɔɔli-o a maluaŋ-ndo.

²¹Cɛila ndɔla cumulaala va kpengei layàá kpengei pilɛi layàá lan, sungbuma ndɔan a tongola-luɛyaala tasela ndɔlan, kpen-kpen la va a dio bɛndu tasoo ni, bandei va dunndo beleŋuɛɛnu, buo dunndo bidiin a leŋuɛɛnu.

²²Diola pɔmbɔla ndɔlan, tongola-luɛyaala tasela ndɔlan a siɔ̀ɔ́la ndɔla ndáà tuuliaa lan kpow, kpen-kpen láà va a dio bɛndu óò muli hɔlla a kpengii paalen le can-ndo-e ni. Helɔɔlan tan ŋɔmmɛw vanáà nɛi coo le tiiyaa lon ni, o helɔɔla lan laci tongola-luɛyaala tasela ndɔlan láà va ni.

²³Dio bɛndoo pilɛ va le luɛyɔɔ o bɛ́ɛ̀ va lenin-ndo, o va sakpo a dio bɛndu va a ba luaŋ-ndo-o a á dio bɛndu va a ba paalen le can-ndo-o. Mó tuu mɛɛ tiŋndo ndóò bandu le cɔnɔnndo o dio bɛndoo pilɛ le kɔlan tiiya o ò pilɔɔ yɛ, mí tiŋ kon bɛnda dunndo kɛmɛ.

²⁴Mó yaa ya a ba too, nɛɛ dio bɛndu va a ba too-o va-a. Mó tuu sungbuan a tongola-luɛyaala tasela dio bɛndu kon, mí la va kpen-kpen.

²⁵Dio bɛndu kon a tongola-luɛyaala tasela ndɔlan láà nɔ diola pɔmbɔlaln balɔɔ pindo maa diola pɔmbɔla tɔ̀lan, bandei dunndo beleŋuɛɛnu, buo dunndo bidiin a leŋuɛɛnu.

²⁶Helɔɔlan tan ŋɔmmɛw vanáà nɛi coo le tiiyaa lon ni, o helɔɔla lan laci tongola-luɛyaala taselan la va ni. O ikpengu oo ikpengu coo, siɔ̀ɔ́lan la va latuuliaalan o sungbuma ndɔan coo.

²⁷Bɛɛ co lenin-ndo ndóò nɔ dio bɛndoo a ba too. Mó tuu mɛɛ tiŋndo ndóò bandu le cɔnɔnndo o dio bɛndoo a ba too yɛ, mí tiŋ kon bɛnda dunndo kɛmɛ.

²⁸Mó kei a ya o dio bɛndu va a ba too-o, mó luɛi a ya o bɛ́ɛ̀ co lenin-ndo nin, mó tuu dio bɛndu va kon a ba too-o, mó bɛnda buo a bandei maa diola bɛndula ndóò cii nin tuu lan.

²⁹Cɛila ndɔla cumulaalan, sungbuma ndɔan a tongola-luɛyaala tasela ndɔlan, kpen-kpen láà va ni. Dio bɛndu kon a tongola-luɛyaala tasela ndɔlan láà nɔ diola pɔmbɔlan labalaa sɔ́, láà va bandei dunndo beleŋuɛɛnu, buo dunndo bidiin a leŋuɛɛnu.

³⁰O tongola-luɛyaala taselan balɔɔ sɔ́, fondaa va bandei dunndo bidiin a leŋuɛɛnu, buo dunndo leŋuɛɛnu.

³¹Tongola-luɛyaala tasela ndɔlan la va lamuliaalan a kpengii bɛɛ co lekɔɔli-o-e. Siɔ̀ɔ́lan la va o sungbuma ndɔan coo a helɔɔlan tan ŋɔmaa, la vanaa nɛi coo le tiiyaa lon-ndan.

³²Mí langbanɔ kon kei a ya a kpengii paalen le can-nde, mó luɛi a ya o bɛ́ɛ̀ co lenin-ndo. Mó tuu dio bɛndu kon mí bandei a buo bɛnda maa diola bɛndula ndóò kei nin tuu lan.

³³Mí cɛila cumulaala dio bɛndu kon, sungbuma ndɔan a tongola-luɛyaala tasela ndɔlan la va kpen-kpen, bandei dunndo beleŋuɛɛnu buo dunndo bidiin a leŋuɛɛnu. Dio bɛndu kon a tongola-luɛyaala tasela ndɔlan láà nɔ diola pɔmbɔlan labalaa pindo.

³⁴Tongola-luɛyaala tasela ndɔlan la va lamuliaalan a kpengii bɛɛ va lekɔɔli-o-e. Siɔ̀ɔ́lan la va latuuliaalan o sungbuma ndɔan coo ba-ba fee, helɔɔlan tan ŋɔmaa vanáà nɛi coo le tiiyaa lon ni.

³⁵Mó kɔa vɛlɛ a ya o dio bɛndu va a ba luaŋ-ndo-o, mó tuu ndu, mó bɛnda kpen-kpen a latasela ndóò kei nin tuu lan.

³⁶Cɛila cumulaala ndɔlan, sungbuma ndɔan a tongola-luɛyaala tasela ndɔlan la va bandei dunndo beleŋuɛɛnu, buo dunndo bidiin a leŋuɛɛnu. Lon vɛlɛ bɛɛ, diola pɔmbɔlan la va labalaa pindo.

³⁷Sungbuma ndɔan ma va mamuliaa a kpengii bɛɛ va lekɔɔli-o. Siɔ̀ɔ́lan la va latuuliaalan o sungbuma man coo ba-ba fee, helɔɔlan tan ŋɔmaa vanáà nɛi coo le tiiyaa lon ni.

³⁸Cɛiyo pum va lon, sondo ndɔɔ va o sungbuma diola bɛndulan tɛɛn. Lon ndáà pulu cɔlua va le sálà loamaa solio-a ni.

³⁹O tongo-luɛyaa tase dio bɛndoo nin, bandólan la va latiɔn, o bandóla lan coo ndáà kialu cɔlua bololan le sálàlan solio nisálà loamaa, sálàá le hakio a le sálà bɛɛndiaa isɔɔ.

⁴⁰O kpengei pilɛi coo lekɔɔli, nɛɛ vanáà kei le helɔɔ o dio bɛndu co kon a ba luaŋ-ndo o sondoo-a, bandólan la va lon tan tiɔn, kpengei pilɛi vɛlɛ bɛɛ, a kpengii tongo-luɛyaa tase dio bɛndu kon, bandólan la va tan tiɔn.

⁴¹O kpengun dio bɛndoo, bandólan la va kpow tan ŋɔmaa: kpengei ipilɛi lahiɔɔu, kpengei pilɛi vɛlɛ lahiɔɔlu, o bandóla lan coo ndáà bɛnda le cɔlua sálàá bololan kiolɔɔ ni.

⁴²Le sálàla loamaalan vɛlɛ bɛɛ, bandólan la va tan hiɔɔlu, a powta sialaalan ndáà cɔw bandóla lan ni, bàndóó pilɛ bandei dunndo lepilɛ a tálá, buo dunndo lepilɛ a tálá, simndan dunndo lepilɛ. Lecoo ndáà kɛsi mɔɔn ndáà kialu cɔlua sálà loamaa a cɔlua lasálàá bololan-ndon ni.

⁴³O Cɛi-Hala kon nin, cɛiyo balɔɔ lenin pindo, soonnda pɔmbɔlan la va latoavaalan buo baa piasaa lepilɛ. O bandólan coo ndáà kɛsi visin sálàn ni.

⁴⁴O dio bɛndu va lenin-ndo kɔɔli, o bɛ́ɛ̀ va lenin-ndo nin, cɛilan la va lon le vanaa ɲɛ-caa, cɛila lan o pilɛ va o dio bɛndu va a ba luaŋ-ndo-o ikɛi, mó muli hɔlla a ba too, o pilɔɔ va o dio bɛndu va a ba paalen le can-ndo ikɛi, mó muli hɔlla a ba luaŋ-ndo.

⁴⁵Mí langbanɔ kon dimul-la aa: «Cɛi muli hɔlla a ba too-o, le vanaa-solia-lasálàá co baalaa tosaa o Cɛi-Hala-o ho nin-nda o co ni.

⁴⁶Cɛi muli hɔlla a ba luaŋ-ndo-o ndu ndu, le vanaa-solia-lasálàá co baalaa tosaa o fonda-loamaa-lasálàá coo-a o co ni. Nda co yɛ poaa Sadɔk-a ni, kani o polale Levii len coo nda hɛlin le sɔɔnguuo Mɛlɛka ikɛi le vaa vali ndɔɔ tosaa ni.

⁴⁷Mó tuu bɛɔ, mó bɛnda bandei dunndo kɛmɛ, buo dunndo kɛmɛ, maa kpakpa o va ni. Fonda-loamaa-lasálàá va o Cɛi-Hala kon sondoo.

⁴⁸Mó kɔa vɛlɛ a ya o tongo-luɛyaa tase Cɛi-Hala kon nin, mó tuu sungbuma tongo-luɛyaa tase kon, mí ma bɛnda kpengei pilɛi dunndo leŋuɛɛnu, kpengei pilɛi vɛlɛ dunndo leŋuɛɛnu. Dio bɛndoo va buo dunndo leyàá baa pilɔɔ, baa pilɔɔ vɛlɛ dunndo leyàá.

⁴⁹Tongo-luɛyaa tase kon va bandei dunndo bidiin, buo dunndo tɔ́ a lepilɛ, helɔɔlan vanáà nɛi coo le tiiyaa lon ni. Sungbuma bɛndu-bɛnduan ma va o sungbuma pɔmbɔan ikɛi, lepilɛ le va baa pilɔɔ, lepilɛlen le va vɛlɛ baa pilɔɔ.