Read Kissi Esekiɛl 41 Bible Online

Esekiɛl 41 - Kissi bible

Esekiɛl 41

¹Mó kɔa a ya o Cɛi-Hala kalaa nin kpeekpei, mó tuu sungbuan, ma va buo kpengei pilɛi dunndo leŋɔmpum, baa pilɔɔ vɛlɛ dunndo leŋɔmpum, bu cɛi-kola-toandaa.

²Dioo va buo dunndo tɔ́, cii balu dio kon-nde va tongei baa pilɔɔ dunndo leŋuɛɛnu, baa pilɔɔ vɛlɛ dunndo leŋuɛɛnu. Mó tuu bandii Fonda-Diandaa kon, mí ɲɔɔ bɛnda dunndo belehiɔɔlu, buo dunndo bidiin.

³O kon kɔɔli, mó luɛi lenin, mó tuu sungbuma dio kon, mí ma bɛnda dunndo lediin, mí dio kalaa pila bɛnda dunndo leŋɔmpum, bu dio kon va dunndo leŋɔmmɛw.

⁴Mó tuu fondaa o Cɛi-Diandaa kon o hɔl-ndɔ bandei dunndo bidiin, buo dunndo bidiin. Mó dimul-la aa: «Fonda Diandaa-Diandaa co hoo ni.»

⁵Mó tuu cìì cɛi kon, mí i bɛnda dunndo leŋɔmpum. Mó tuu vɛlɛ bu cɛila pɔmbɔla va latangulaalan o Cɛi-Hala kon kpengon-ndan, mí o kɛ́-kɛ̀ bɛnda buo dunndo lehiɔɔlu.

⁶Cɛila pɔmbɔla lan la va latangulaalan o cɛi coocoo nɔ helɔɔ leyàá-o coo, helɔɔ oo helɔɔ ndóò nɔ cɛila pɔmbɔlan beleyaa. O kpaki va o cɔavaa o Cɛi-Hala kon balɔɔ pindo-o nin cɛila pɔmbɔla lan la va latangulaa lan ni, kɛ o ve o cìì Cɛi-Hala-o nin kpeekpei le la va lacɔavaalan te.

⁷Mɛɛ vanáà kɔa a helɔɔ o cɛila coocoola lan coo yɛ, lende koni cɛila pɔmbɔlan láà kɔa a pɛngɛlanndo vana o hɔl ni, kani a pilapilanndo vanáà hel kpengba vanáà kei coo le helɔɔ lon-ndo ni. Lelan, o Cɛi-Hala kon coocoo fondaa ndóò hiow pɛngɛlan, vanáà cɛn pɛ vɛlɛ o cɛi coocoo tasoo, áà kei o hoo tɛɛn, áà kɔ tiiya niko o hoo lecoo.

⁸Mí mɛɛndan mɛɛ ɲɔɔ ndóò va o helaa o Cɛi-Hala kon balɔɔ yɛ, cɛila pɔmbɔla va o kpengon-ndan, kandɔɔ nɛɛ la cɛn tum lɛŋ-nda, la va helɔɔ tindaa lepilɛ, kon bɛnda dun bɛndoo leŋɔmpum ni.

⁹Cii va o cɛila pɔmbɔla lan a makɔɔ-e i va celullo dunndo leŋuɛɛnu. Fonda fondo va Fonda-Diandaa a cɛila pɔmbɔla va o kpengon-ndan

¹⁰a cɛila balu Cɛi-Hala-o lan tɛɛn-ndo va buo dunndo bidiin, lende o va balɔɔ pindo ni.

¹¹O fonda fondo kon cɛila pɔmbɔla va o kpengon-ndan láà muli hɔlla ni. Sondoo pilɛ va a ba luaŋ-ndo, o pilɔɔ va a ba too, fonda fondo kon va buo dunndo leŋuɛɛnu, lende o va balɔɔ pindo ni.

¹²O Cɛi-Hala-o a ba paalen le del-lo, cɛiyo pum va lon, ndóò nɔ buo dunndo belaŋɔmmɛw. Celul cìì cɛi kon va dunndo leŋuɛɛnu, balɔɔ pindo lende ndíì celul ni, bandei dunndo belaŋɔmahiɔɔlu.

¹³Mó tuu vɛlɛ Cɛi-Hala-o pila, mó bɛnda bandei dunndo kɛmɛ, mí fonda vannun fondo-o, cɛi va a ba paalen la del-lo o a ciin cɛi kon bɛɛ bɛnda bandei dunndo kɛmɛ.

¹⁴Hɔlaa Cɛi-Hala kon a fonda vannun fondo a ba paalen le can-ndo o va buo dunndo kɛmɛ.

¹⁵Mó tuu bandii cɛi va Cɛi-Hala-o kɔɔli-o lende a kpengii luŋndo a makɔɔ a fondala fɛkɛila va o kpengon-ndan, mí ɲɔɔ bɛnda dunndo kɛmɛ. Cɛi bɛndoo lenin a tongola-luɛyaala tasela va lekɔɔli lan,

¹⁶kèéden diola pɔmbɔla nda kaandiaa a cilinndon-ndan a fondala fɛkɛila va o cɛi coocoo kon balɔɔ kèédeon o hɔl-ndɔ lan la va lakumbaalan a yɔm kɛndɛ ŋɛlɛngi-ŋɛlɛngio balɔɔ pindo, kandɔɔ lɛŋ háá o diola pɔmbɔlan coocoo, diola pɔmbɔla lan la va lakiindialan.

¹⁷O Cɛi-Hala kon lekɔɔli a lenin faw, kandɔɔ o dio luɛyaa, kɔlan háá o cɛi fɛkɛi co lenin di-o, má toosiaa tuuliaalan o ciin cɛiyon coo.

¹⁸Má tuuliaa mɛlɛkaa kanda ɲɛm Hala-on-nda a siɔ̀ɔ́la vawlan. O tuuliaala mɛlɛkaa kan a ŋiɔn tɛɛn, siɔ̀ɔ́ vawvo pilɛ va o tuulaa ni. Mɛlɛkanɔɔ ndóò nɔ hɔlla sala tiɔn,

¹⁹hɔlla pilɛa va maa hɔlaa vanaciee, a va a mulia a kpengii siɔ̀ɔ́ vawvo va-e, hɔlla pilla va maa hɔlaa yàlà téndé, a va a mulia baa pilɔɔ a kpengii siɔ̀ɔ́ vawvo pilɔɔ va-e. Lende tuuliaala lan la va cɛiyo balɔɔ pindo ni.

²⁰Kandɔɔ lɛŋ háá o dioo bollen, mí ndáà tuuliaa mɛlɛkaa kanda ɲɛm Hala-on-nda a siɔ̀ɔ́la vawlan. Lende ndáà tuuliaa vɛlɛ lan o kpaki fonda-Hala kon coo ni.

²¹Dio Cɛi-Diandaa kon va maa kpakpa, o Fonda-Diandaa hɔl-ndɔ, ɲɔɔ pum va lon

²²maa fonda-loamaa-lasálà nda toosiaa a yɔmndo-o simndan dunndo leyàá, bandei dunndo lediin. Sɔngila ndɔlan, tum ndɔɔ a cɔcɔn ndɔn va n toosiaa a yɔmndo. O kon, mí langbanɔ kon dimul-la aa: «Bando co o kɛsiaa Mɛlɛka o hɔl-lo co hoo ni.»

²³Cɛi-Hala-o a Fonda Diandaa-Diandaa láà nɔ diola luɛyaalan latiɔn.

²⁴Dio oo dio ndóò nɔ koŋndan latiɔn, hiŋnɔnndo koŋnda lan láà hiŋnun o diola lan coo ni, koŋndan la va latiɔn le dioo pilɛ, la celen la va vɛlɛ latiɔn le dioo pilɔɔ.

²⁵Mí ndáà tuuliaa mɛlɛkaa kanda ɲɛm Hala-on-nda a siɔ̀ɔ́la vawlan o diola Cɛi-Hala kon coo mɛɛ ndáà tuuliaa lan o ciin cɛiyon coo yɛ. Fɛ̀ɛ̀fɛ́ nda toosiaa a yɔmndo-o va o bɛ́ɛ̀ o tongo-luɛyaa tasoo hɔl-ndɔ.

²⁶Diola pɔmbɔla nda kaandiaa a cilinndon-ndan a siɔ̀ɔ́la vawlan la va ba-ba fee, o kpengun tongo-luɛyaa tasoo, o cɛila va o kpengon o Cɛi-Hala kon-ndan a o fɛ̀ɛ̀fɛlan.