Read Kissi Esekiɛl 42 Bible Online

Esekiɛl 42 - Kissi bible

Esekiɛl 42

¹Mí langbanɔ kon soli ya kpengii bɛɛ va lekɔɔli-o a ba luaŋ-ndo, mó yaa ya o cɛila pɔmbɔla leninnda va o fonda fondoo hɔl-ndɔ a o cɛiyo hɔl-ndɔ a ba luaŋ-ndo lan,

²hɔlaa cɛi kon, nɛɛ dio va a maluaŋ-ndo va-a, ɲɔɔ va bandei dunndo kɛmɛ, buo dunndo beleŋuɛɛnu.

³O fonda ɲɔɔ va dunndo bidiin o bɛ́ɛ̀ co lenin-ndo hɔl-ndɔ-o a o fonda peelaa tɛlɛlɛ va o bɛɔ lekɔɔli nin-ndo hɔl-ndɔ, fonda hiavaa pum va lon o fonda hiavaa ba pilɛ, o cɛi helɔɔ leyàá kon coo.

⁴O cɛila pɔmbɔla leninndan laci fonda hiavaa fɛkɛiyo pum va lon a ba lenin-ndo, buo dunndo tɔ́, nɛiyo va lon buo dunndo lepilɛ, a ba luaŋ-ndo diola ndalan láà muli hɔlla ni.

⁵Cɛila pɔmbɔla leninnda va lecoo láà hiow va sɔɔkɛɲɛɛ kani sɛmtɛla ndalan láà cua fondaa taw hiovɔɔ sɛmtɛlan lebɛngu a lan tɛɛn ni.

⁶Cɛiyo va helɔɔ leyàá, kɛ sungbuma ve maa sungbuma bɛnduma va o bɛ́ɛ̀lan-ndan te. Lelan, cɔnɔnndo lɛŋ, cɛila pɔmbɔla leninndan láà hiow va sɔɔkɛɲɛɛ a lan lebɛngu a á lan tɛɛn.

⁷Kungaa va lekɔɔli, o demul cɛila pɔmbɔla leninnda lan a kpengii bɛɔ lekɔɔli-o, o va o cɛila pɔmbɔla leninnda lan laci, bandii ndɔɛi va dunndo beleŋuɛɛnu.

⁸Kani cɛila pɔmbɔla leninnda va a ba bɛɔ lekɔɔli lan láà va bandei dunndo beleŋuɛɛnu. Kɛ kpengii va imuliɛi a ba Cɛi-Hala-o-e, ɲɔɔ va dunndo kɛmɛ.

⁹O cɛila pɔmbɔla leninnda lan bɛngu sondo va a ba paalen le can-ndo o va ni, te vanáà cɛn pɛ a ba bɛɛ co lekɔɔli-o.

¹⁰Cɛila pɔmbɔla leninndan la va vɛlɛ a ba kunga bɛɔ ndóò nɔ buo-o, a kpengii paalen le can-nde, o fonda fondoo hɔl-ndɔ a o cɛiyo hɔl-ndɔ.

¹¹Fonda hiavaa pum va o cɛila pɔmbɔla leninnda lan laci, maa mɛɛ o pum va o cɛila pɔmbɔla leninnda va a maluaŋ-ndan hɔl-ndɔ yɛ. Ɲɛ pilɔɔ kpé bandii ndɛi a bu ndaa va ni. Lende koni, fondala ndala fulaalan, mɛɛ cɛila lan láà toosian yɛ a diola ndɔla luɛyaalan, ɲɛ pilɔɔ la va ni.

¹²Lende koni cɛila pɔmbɔla leninnda va a ba too lan la va ni. Dioo pilɛ va o fonda hiavaa sondoo, fonda hiavaa va o kungaa laci sakpo a ba paalen le can-ndo o, kpengii vanáà kei le luɛyɔɔ lenin-nde.

¹³Mí langbanɔ kon dimul-la aa: «Cɛila pɔmbɔla leninnda co lan a maluaŋ-ndan a cɛila pɔmbɔla leninnda co lan a ba too o fonda connun fondo-o laci lan, cɛila diandaalan la co ni, lon vanaa-solia-lasálàá, a co sɔɔnguuo Mɛlɛka ikɛi-ya vanin ɲɛm dian diandaa-diandan dioo ni. Lon nda vanin ɲɛm diandaa-diandan, sálàla kpeyanndan, visin cɔlu sálà co le hakio sɔlaa malɔɔ-o-on a visin sálà bɛɛndiaa isɔɔn kɛsio ni, kani o diandaa fonda kon co ni.

¹⁴Te vanaa-solia-lasálàá luɛi pɛ lon, a bɛnda lɛ ma cɛn o fonda diandaa kon nin, mà fula a kpengii bɛɛ co lekɔɔli-o le. Kɛ a bɛnda mà soli fɔlɔn volɔɔla nda soli sálàá lekɔɔ lan, ma mɛi lan ndon. Kani ladiandaalan volɔɔla lan la co ni. A soli pɛ lan, a vownun volɔɔla cuɛinannda celen malan nda sɔɔnguu o fonda co le vanaa tɔaa-o.

¹⁵Lɔ́ɔ́ langbanɔ kon cii Cɛi-Hala-o tuu lenin-ndo, mó kei ya o dio bɛndu va a ba paalen le can-ndo o, mó soli ya, mó balu cɛiyo tuuvo pindo.

¹⁶Mó tuu kpengii paalen le can-nde a tinda ndɔ tuvaa, mí ɲɔɔ bɛnda faw-faw tinda kon kɛmɛ leŋuɛɛnu o balɔɔ kon sɔ́, a tinda tuvaa kon o tuu ni.

¹⁷Mó tuu a ba luaŋ-ndo, mí ɲɔɔ bɛnda tindaa kɛmɛ leŋuɛɛnu, a tinda tuvaa o tuu ni.

¹⁸Mó tuu vɛlɛ a ba too a tinda va (ndu o ba) maa ɲɛ tuvaa-o, mí ɲɔɔ bɛnda tindaa kɛmɛ leŋuɛɛnu, a tinda tuvaa o tuu ni.

¹⁹Mó mulin a ba paalen le del-lo, mó tuu vɛlɛ lon, mí ɲɔɔ bɛnda kɛmɛ leŋuɛɛnu, a tinda tuvaa o tuu ni.

²⁰Mó tuu kpakio balɔɔ pindo o kpenngon kpow coo, mí ɲɔɔ bɛnda bandei tindaa kɛmɛ leŋuɛɛnu, buo tindaa kɛmɛ leŋuɛɛnu le fonda dindin (le vali Hala-o) a fonda yɔŋaa nuaa sɛiyo tɛɛn.